UtshovChapter 144
144.1
वैशंपायन उवाच
ततः सूर्यान्निश्चरितां कर्णः शुश्राव भारतीम्
दुरत्ययां प्रणयिनीं पितृवद्भास्करेरिताम्
Vaishampayana uvacha
Tatah suryannishcharitam karnah shushrava bharatim
Duratyayam pranayinim pitrivadbhaskareritam
144.2
सत्यमाह पृथा वाक्यं कर्ण मातृवचः कुरु
श्रेयस्ते स्यान्नरव्याघ्र सर्वमाचरतस्तथा
Satyamaha pritha vakyam karna matrivachah kuru
Shreyaste syannaravyaghra sarvamacharatastatha
144.3
एवमुक्तस्य मात्रा च स्वयं पित्रा च भानुना
चचाल नैव कर्णस्य मतिः सत्यधृतेस्तदा
Evamuktasya matra cha svayam pitra cha bhanuna
Chachala naiva karnasya matih satyadhritestada
144.4
कर्ण उवाच
न ते न श्रद्दधे वाक्यं क्षत्रिये भाषितं त्वया
धर्मद्वारं ममैतत्स्यान्नियोगकरणं तव
Karna uvacha
Na te na shraddadhe vakyam kshatriye bhashitam tvaya
Dharmadvaram mamaitatsyanniyogakaranam tava
144.5
अकरोन्मयि यत्पापं भवती सुमहात्ययम्
अवकीर्णोऽस्मि ते तेन तद्यशःकीर्तिनाशनम्
Akaronmayi yatpapam bhavati sumahatyayam
Avakirnosmi te tena tadyashahkirtinashanam
144.6
अहं च क्षत्रियो जातो न प्राप्तः क्षत्रसत्क्रियाम्
त्वत्कृते किं नु पापीयः शत्रुः कुर्यान्ममाहितम्
Aham cha kshatriyo jato na praptah kshatrasatkriyam
Tvatkrite kim nu papiyah shatruh kuryanmamahitam
144.7
क्रियाकाले त्वनुक्रोशमकृत्वा त्वमिमं मम
हीनसंस्कारसमयमद्य मां समचूचुदः
Kriyakale tvanukroshamakritva tvamimam mama
Hinasanskarasamayamadya mam samachuchudah
144.8
न वै मम हितं पूर्वं मातृवच्चेष्टितं त्वया
सा मां संबोधयस्यद्य केवलात्महितैषिणी
Na vai mama hitam purvam matrivachcheshtitam tvaya
Sa mam sambodhayasyadya kevalatmahitaishini
144.9
कृष्णेन सहितात्को वै न व्यथेत धनंजयात्
कोऽद्य भीतं न मां विद्यात्पार्थानां समितिं गतम्
Krishnena sahitatko vai na vyatheta dhananjayat
Kodya bhitam na mam vidyatparthanam samitim gatam
144.10
अभ्राता विदितः पूर्वं युद्धकाले प्रकाशितः
पाण्डवान्यदि गच्छामि किं मां क्षत्रं वदिष्यति
Abhrata viditah purvam yuddhakale prakashitah
Pandavanyadi gachchhami kim mam kshatram vadishyati
144.11
सर्वकामैः संविभक्तः पूजितश्च सदा भृशम्
अहं वै धार्तराष्ट्राणां कुर्यां तदफलं कथम्
Sarvakamaih sanvibhaktah pujitashcha sada bhrisham
Aham vai dhartarashtranam kuryam tadaphalam katham
144.12
उपनह्य परैर्वैरं ये मां नित्यमुपासते
नमस्कुर्वन्ति च सदा वसवो वासवं यथा
Upanahya parairvairam ye mam nityamupasate
Namaskurvanti cha sada vasavo vasavam yatha
144.13
मम प्राणेन ये शत्रूञ्शक्ताः प्रतिसमासितुम्
मन्यन्तेऽद्य कथं तेषामहं भिन्द्यां मनोरथम्
Mama pranena ye shatrunshaktah pratisamasitum
Manyantedya katham teshamaham bhindyam manoratham
144.14
मया प्लवेन संग्रामं तितीर्षन्ति दुरत्ययम्
अपारे पारकामा ये त्यजेयं तानहं कथम्
Maya plavena sangramam titirshanti duratyayam
Apare parakama ye tyajeyam tanaham katham
144.15
अयं हि कालः संप्राप्तो धार्तराष्ट्रोपजीविनाम्
निर्वेष्टव्यं मया तत्र प्राणानपरिरक्षता
Ayam hi kalah samprapto dhartarashtropajivinam
Nirveshtavyam maya tatra prananaparirakshata
144.16
कृतार्थाः सुभृता ये हि कृत्यकाल उपस्थिते
अनवेक्ष्य कृतं पापा विकुर्वन्त्यनवस्थिताः
Kritarthah subhrita ye hi krityakala upasthite
Anavekshya kritam papa vikurvantyanavasthitah
144.17
राजकिल्बिषिणां तेषां भर्तृपिण्डापहारिणाम्
नैवायं न परो लोको विद्यते पापकर्मणाम्
Rajakilbishinam tesham bhartripindapaharinam
Naivayam na paro loko vidyate papakarmanam
144.18
धृतराष्ट्रस्य पुत्राणामर्थे योत्स्यामि ते सुतैः
बलं च शक्तिं चास्थाय न वै त्वय्यनृतं वदे
Dhritarashtrasya putranamarthe yotsyami te sutaih
Balam cha shaktim chasthaya na vai tvayyanritam vade
144.19
आनृशंस्यमथो वृत्तं रक्षन्सत्पुरुषोचितम्
अतोऽर्थकरमप्येतन्न करोम्यद्य ते वचः
Anrishansyamatho vrittam rakshansatpurushochitam
Atorthakaramapyetanna karomyadya te vachah
144.20
न तु तेऽयं समारम्भो मयि मोघो भविष्यति
वध्यान्विषह्यान्संग्रामे न हनिष्यामि ते सुतान्
युधिष्ठिरं च भीमं च यमौ चैवार्जुनादृते
Na tu teyam samarambho mayi mogho bhavishyati
Vadhyanvishahyansangrame na hanishyami te sutan
Yudhishthiram cha bhimam cha yamau chaivarjunadrite
144.21
अर्जुनेन समं युद्धं मम यौधिष्ठिरे बले
अर्जुनं हि निहत्याजौ संप्राप्तं स्यात्फलं मया
यशसा चापि युज्येयं निहतः सव्यसाचिना
Arjunena samam yuddham mama yaudhishthire bale
Arjunam hi nihatyajau sampraptam syatphalam maya
Yashasa chapi yujyeyam nihatah savyasachina
144.22
न ते जातु नशिष्यन्ति पुत्राः पञ्च यशस्विनि
निरर्जुनाः सकर्णा वा सार्जुना वा हते मयि
Na te jatu nashishyanti putrah pancha yashasvini
Nirarjunah sakarna va sarjuna va hate mayi
144.23
वैशंपायन उवाच
इति कर्णवचः श्रुत्वा कुन्ती दुःखात्प्रवेपती
उवाच पुत्रमाश्लिष्य कर्णं धैर्यादकम्पितम्
Vaishampayana uvacha
Iti karnavachah shrutva kunti duhkhatpravepati
Uvacha putramashlishya karnam dhairyadakampitam
144.24
एवं वै भाव्यमेतेन क्षयं यास्यन्ति कौरवाः
यथा त्वं भाषसे कर्ण दैवं तु बलवत्तरम्
Evam vai bhavyametena kshayam yasyanti kauravah
Yatha tvam bhashase karna daivam tu balavattaram
144.25
त्वया चतुर्णां भ्रातॄणामभयं शत्रुकर्शन
दत्तं तत्प्रतिजानीहि संगरप्रतिमोचनम्
Tvaya chaturnam bhratrinamabhayam shatrukarshana
Dattam tatpratijanihi sangarapratimochanam
144.26
अनामयं स्वस्ति चेति पृथाथो कर्णमब्रवीत्
तां कर्णोऽभ्यवदत्प्रीतस्ततस्तौ जग्मतुः पृथक्
Anamayam svasti cheti prithatho karnamabravit
Tam karnobhyavadatpritastatastau jagmatuh prithak