UtshovChapter 138
138.1
धृतराष्ट्र उवाच
राजपुत्रैः परिवृतस्तथामात्यैश्च संजय
उपारोप्य रथे कर्णं निर्यातो मधुसूदनः
Dhritarashtra uvacha
Rajaputraih parivritastathamatyaishcha sanjaya
Uparopya rathe karnam niryato madhusudanah
138.2
किमब्रवीद्रथोपस्थे राधेयं परवीरहा
कानि सान्त्वानि गोविन्दः सूतपुत्रे प्रयुक्तवान्
Kimabravidrathopasthe radheyam paraviraha
Kani santvani govindah sutaputre prayuktavan
138.3
ओघमेघस्वनः काले यत्कृष्णः कर्णमब्रवीत्
मृदु वा यदि वा तीक्ष्णं तन्ममाचक्ष्व संजय
Oghameghasvanah kale yatkrishnah karnamabravit
Mridu va yadi va tikshnam tanmamachakshva sanjaya
138.4
संजय उवाच
आनुपूर्व्येण वाक्यानि श्लक्ष्णानि च मृदूनि च
प्रियाणि धर्मयुक्तानि सत्यानि च हितानि च
Sanjaya uvacha
Anupurvyena vakyani shlakshnani cha mriduni cha
Priyani dharmayuktani satyani cha hitani cha
138.5
हृदयग्रहणीयानि राधेयं मधुसूदनः
यान्यब्रवीदमेयात्मा तानि मे शृणु भारत
Hridayagrahaniyani radheyam madhusudanah
Yanyabravidameyatma tani me shrinu bharata
138.6
वासुदेव उवाच
उपासितास्ते राधेय ब्राह्मणा वेदपारगाः
तत्त्वार्थं परिपृष्टाश्च नियतेनानसूयया
Vasudeva uvacha
Upasitaste radheya brahmana vedaparagah
Tattvartham pariprishtashcha niyatenanasuyaya
138.7
त्वमेव कर्ण जानासि वेदवादान्सनातनान्
त्वं ह्येव धर्मशास्त्रेषु सूक्ष्मेषु परिनिष्ठितः
Tvameva karna janasi vedavadansanatanan
Tvam hyeva dharmashastreshu sukshmeshu parinishthitah
138.8
कानीनश्च सहोढश्च कन्यायां यश्च जायते
वोढारं पितरं तस्य प्राहुः शास्त्रविदो जनाः
Kaninashcha sahodhashcha kanyayam yashcha jayate
Vodharam pitaram tasya prahuh shastravido janah
138.9
सोऽसि कर्ण तथा जातः पाण्डोः पुत्रोऽसि धर्मतः
निग्रहाद्धर्मशास्त्राणामेहि राजा भविष्यसि
Sosi karna tatha jatah pandoh putrosi dharmatah
Nigrahaddharmashastranamehi raja bhavishyasi
138.10
पितृपक्षे हि ते पार्था मातृपक्षे च वृष्णयः
द्वौ पक्षावभिजानीहि त्वमेतौ पुरुषर्षभ
Pitripakshe hi te partha matripakshe cha vrishnayah
Dvau pakshavabhijanihi tvametau purusharshabha
138.11
मया सार्धमितो यातमद्य त्वां तात पाण्डवाः
अभिजानन्तु कौन्तेयं पूर्वजातं युधिष्ठिरात्
Maya sardhamito yatamadya tvam tata pandavah
Abhijanantu kaunteyam purvajatam yudhishthirat
138.12
पादौ तव ग्रहीष्यन्ति भ्रातरः पञ्च पाण्डवाः
द्रौपदेयास्तथा पञ्च सौभद्रश्चापराजितः
Padau tava grahishyanti bhratarah pancha pandavah
Draupadeyastatha pancha saubhadrashchaparajitah
138.13
राजानो राजपुत्राश्च पाण्डवार्थे समागताः
पादौ तव ग्रहीष्यन्ति सर्वे चान्धकवृष्णयः
Rajano rajaputrashcha pandavarthe samagatah
Padau tava grahishyanti sarve chandhakavrishnayah
138.14
हिरण्मयांश्च ते कुम्भान्राजतान्पार्थिवांस्तथा
ओषध्यः सर्वबीजानि सर्वरत्नानि वीरुधः
Hiranmayanshcha te kumbhanrajatanparthivanstatha
Oshadhyah sarvabijani sarvaratnani virudhah
138.15
राजन्या राजकन्याश्चाप्यानयन्त्वभिषेचनम्
षष्ठे च त्वां तथा काले द्रौपद्युपगमिष्यति
Rajanya rajakanyashchapyanayantvabhishechanam
Shashthe cha tvam tatha kale draupadyupagamishyati
138.16
अद्य त्वामभिषिञ्चन्तु चातुर्वैद्या द्विजातयः
पुरोहितः पाण्डवानां व्याघ्रचर्मण्यवस्थितम्
Adya tvamabhishinchantu chaturvaidya dvijatayah
Purohitah pandavanam vyaghracharmanyavasthitam
138.17
तथैव भ्रातरः पञ्च पाण्डवाः पुरुषर्षभाः
द्रौपदेयास्तथा पञ्च पाञ्चालाश्चेदयस्तथा
Tathaiva bhratarah pancha pandavah purusharshabhah
Draupadeyastatha pancha panchalashchedayastatha
138.18
अहं च त्वाभिषेक्ष्यामि राजानं पृथिवीपतिम्
युवराजोऽस्तु ते राजा कुन्तीपुत्रो युधिष्ठिरः
Aham cha tvabhishekshyami rajanam prithivipatim
Yuvarajostu te raja kuntiputro yudhishthirah
138.19
गृहीत्वा व्यजनं श्वेतं धर्मात्मा संशितव्रतः
उपान्वारोहतु रथं कुन्तीपुत्रो युधिष्ठिरः
Grihitva vyajanam shvetam dharmatma sanshitavratah
Upanvarohatu ratham kuntiputro yudhishthirah
138.20
छत्रं च ते महच्छ्वेतं भीमसेनो महाबलः
अभिषिक्तस्य कौन्तेय कौन्तेयो धारयिष्यति
Chhatram cha te mahachchhvetam bhimaseno mahabalah
Abhishiktasya kaunteya kaunteyo dharayishyati
138.21
किङ्किणीशतनिर्घोषं वैयाघ्रपरिवारणम्
रथं श्वेतहयैर्युक्तमर्जुनो वाहयिष्यति
Kinkinishatanirghosham vaiyaghraparivaranam
Ratham shvetahayairyuktamarjuno vahayishyati
138.22
अभिमन्युश्च ते नित्यं प्रत्यासन्नो भविष्यति
नकुलः सहदेवश्च द्रौपदेयाश्च पञ्च ये
Abhimanyushcha te nityam pratyasanno bhavishyati
Nakulah sahadevashcha draupadeyashcha pancha ye
138.23
पाञ्चालास्त्वानुयास्यन्ति शिखण्डी च महारथः
अहं च त्वानुयास्यामि सर्वे चान्धकवृष्णयः
दाशार्हाः परिवारास्ते दाशार्णाश्च विशां पते
Panchalastvanuyasyanti shikhandi cha maharathah
Aham cha tvanuyasyami sarve chandhakavrishnayah
Dasharhah parivaraste dasharnashcha visham pate
138.24
भुङ्क्ष्व राज्यं महाबाहो भ्रातृभिः सह पाण्डवैः
जपैर्होमैश्च संयुक्तो मङ्गलैश्च पृथग्विधैः
Bhunkshva rajyam mahabaho bhratribhih saha pandavaih
Japairhomaishcha sanyukto mangalaishcha prithagvidhaih
138.25
पुरोगमाश्च ते सन्तु द्रविडाः सह कुन्तलैः
आन्ध्रास्तालचराश्चैव चूचुपा वेणुपास्तथा
Purogamashcha te santu dravidah saha kuntalaih
Andhrastalacharashchaiva chuchupa venupastatha
138.26
स्तुवन्तु त्वाद्य बहुशः स्तुतिभिः सूतमागधाः
विजयं वसुषेणस्य घोषयन्तु च पाण्डवाः
Stuvantu tvadya bahushah stutibhih sutamagadhah
Vijayam vasushenasya ghoshayantu cha pandavah
138.27
स त्वं परिवृतः पार्थैर्नक्षत्रैरिव चन्द्रमाः
प्रशाधि राज्यं कौन्तेय कुन्तीं च प्रतिनन्दय
Sa tvam parivritah parthairnakshatrairiva chandramah
Prashadhi rajyam kaunteya kuntim cha pratinandaya
138.28
मित्राणि ते प्रहृष्यन्तु व्यथन्तु रिपवस्तथा
सौभ्रात्रं चैव तेऽद्यास्तु भ्रातृभिः सह पाण्डवैः
Mitrani te prahrishyantu vyathantu ripavastatha
Saubhratram chaiva tedyastu bhratribhih saha pandavaih