UtshovChapter 120
120.1
नारद उवाच
प्रत्यभिज्ञातमात्रोऽथ सद्भिस्तैर्नरपुंगवः
ययातिर्दिव्यसंस्थानो बभूव विगतज्वरः
Narada uvacha
Pratyabhigyatamatrotha sadbhistairnarapungavah
Yayatirdivyasansthano babhuva vigatajvarah
120.2
दिव्यमाल्याम्बरधरो दिव्याभरणभूषितः
दिव्यगन्धगुणोपेतो न पृथ्वीमस्पृशत्पदा
Divyamalyambaradharo divyabharanabhushitah
Divyagandhagunopeto na prithvimasprishatpada
120.3
ततो वसुमनाः पूर्वमुच्चैरुच्चारयन्वचः
ख्यातो दानपतिर्लोके व्याजहार नृपं तदा
Tato vasumanah purvamuchchairuchcharayanvachah
Khyato danapatirloke vyajahara nripam tada
120.4
प्राप्तवानस्मि यल्लोके सर्ववर्णेष्वगर्हया
तदप्यथ च दास्यामि तेन संयुज्यतां भवान्
Praptavanasmi yalloke sarvavarneshvagarhaya
Tadapyatha cha dasyami tena sanyujyatam bhavan
120.5
यत्फलं दानशीलस्य क्षमाशीलस्य यत्फलम्
यच्च मे फलमाधाने तेन संयुज्यतां भवान्
Yatphalam danashilasya kshamashilasya yatphalam
Yachcha me phalamadhane tena sanyujyatam bhavan
120.6
ततः प्रतर्दनोऽप्याह वाक्यं क्षत्रियपुंगवः
यथा धर्मरतिर्नित्यं नित्यं युद्धपरायणः
Tatah pratardanopyaha vakyam kshatriyapungavah
Yatha dharmaratirnityam nityam yuddhaparayanah
120.7
प्राप्तवानस्मि यल्लोके क्षत्रधर्मोद्भवं यशः
वीरशब्दफलं चैव तेन संयुज्यतां भवान्
Praptavanasmi yalloke kshatradharmodbhavam yashah
Virashabdaphalam chaiva tena sanyujyatam bhavan
120.8
शिबिरौशीनरो धीमानुवाच मधुरां गिरम्
यथा बालेषु नारीषु वैहार्येषु तथैव च
Shibiraushinaro dhimanuvacha madhuram giram
Yatha baleshu narishu vaiharyeshu tathaiva cha
120.9
संगरेषु निपातेषु तथापद्व्यसनेषु च
अनृतं नोक्तपूर्वं मे तेन सत्येन खं व्रज
Sangareshu nipateshu tathapadvyasaneshu cha
Anritam noktapurvam me tena satyena kham vraja
120.10
यथा प्राणांश्च राज्यं च राजन्कर्म सुखानि च
त्यजेयं न पुनः सत्यं तेन सत्येन खं व्रज
Yatha prananshcha rajyam cha rajankarma sukhani cha
Tyajeyam na punah satyam tena satyena kham vraja
120.11
यथा सत्येन मे धर्मो यथा सत्येन पावकः
प्रीतः शक्रश्च सत्येन तेन सत्येन खं व्रज
Yatha satyena me dharmo yatha satyena pavakah
Pritah shakrashcha satyena tena satyena kham vraja
120.12
अष्टकस्त्वथ राजर्षिः कौशिको माधवीसुतः
अनेकशतयज्वानं वचनं प्राह धर्मवित्
Ashtakastvatha rajarshih kaushiko madhavisutah
Anekashatayajvanam vachanam praha dharmavit
120.13
शतशः पुण्डरीका मे गोसवाश्च चिताः प्रभो
क्रतवो वाजपेयाश्च तेषां फलमवाप्नुहि
Shatashah pundarika me gosavashcha chitah prabho
Kratavo vajapeyashcha tesham phalamavapnuhi
120.14
न मे रत्नानि न धनं न तथान्ये परिच्छदाः
क्रतुष्वनुपयुक्तानि तेन सत्येन खं व्रज
Na me ratnani na dhanam na tathanye parichchhadah
Kratushvanupayuktani tena satyena kham vraja
120.15
यथा यथा हि जल्पन्ति दौहित्रास्तं नराधिपम्
तथा तथा वसुमतीं त्यक्त्वा राजा दिवं ययौ
Yatha yatha hi jalpanti dauhitrastam naradhipam
Tatha tatha vasumatim tyaktva raja divam yayau
120.16
एवं सर्वे समस्तास्ते राजानः सुकृतैस्तदा
ययातिं स्वर्गतो भ्रष्टं तारयामासुरञ्जसा
Evam sarve samastaste rajanah sukritaistada
Yayatim svargato bhrashtam tarayamasuranjasa
120.17
दौहित्राः स्वेन धर्मेण यज्ञदानकृतेन वै
चतुर्षु राजवंशेषु संभूताः कुलवर्धनाः
मातामहं महाप्राज्ञं दिवमारोपयन्ति ते
Dauhitrah svena dharmena yagyadanakritena vai
Chaturshu rajavansheshu sambhutah kulavardhanah
Matamaham mahapragyam divamaropayanti te
120.18
राजान ऊचुः
राजधर्मगुणोपेताः सर्वधर्मगुणान्विताः
दौहित्रास्ते वयं राजन्दिवमारोह पार्थिवः
Rajana uchuh
Rajadharmagunopetah sarvadharmagunanvitah
Dauhitraste vayam rajandivamaroha parthivah