UtshovChapter 118
118.1
नारद उवाच
स तु राजा पुनस्तस्याः कर्तुकामः स्वयंवरम्
उपगम्याश्रमपदं गङ्गायमुनसंगमे
Narada uvacha
Sa tu raja punastasyah kartukamah svayanvaram
Upagamyashramapadam gangayamunasangame
118.2
गृहीतमाल्यदामां तां रथमारोप्य माधवीम्
पूरुर्यदुश्च भगिनीमाश्रमे पर्यधावताम्
Grihitamalyadamam tam rathamaropya madhavim
Pururyadushcha bhaginimashrame paryadhavatam
118.3
नागयक्षमनुष्याणां पतत्रिमृगपक्षिणाम्
शैलद्रुमवनौकानामासीत्तत्र समागमः
Nagayakshamanushyanam patatrimrigapakshinam
Shailadrumavanaukanamasittatra samagamah
118.4
नानापुरुषदेशानामीश्वरैश्च समाकुलम्
ऋषिभिर्ब्रह्मकल्पैश्च समन्तादावृतं वनम्
Nanapurushadeshanamishvaraishcha samakulam
Rishibhirbrahmakalpaishcha samantadavritam vanam
118.5
निर्दिश्यमानेषु तु सा वरेषु वरवर्णिनी
वरानुत्क्रम्य सर्वांस्तान्वनं वृतवती वरम्
Nirdishyamaneshu tu sa vareshu varavarnini
Varanutkramya sarvanstanvanam vritavati varam
118.6
अवतीर्य रथात्कन्या नमस्कृत्वा च बन्धुषु
उपगम्य वनं पुण्यं तपस्तेपे ययातिजा
Avatirya rathatkanya namaskritva cha bandhushu
Upagamya vanam punyam tapastepe yayatija
118.7
उपवासैश्च विविधैर्दीक्षाभिर्नियमैस्तथा
आत्मनो लघुतां कृत्वा बभूव मृगचारिणी
Upavasaishcha vividhairdikshabhirniyamaistatha
Atmano laghutam kritva babhuva mrigacharini
118.8
वैडूर्याङ्कुरकल्पानि मृदूनि हरितानि च
चरन्ती शष्पमुख्यानि तिक्तानि मधुराणि च
Vaiduryankurakalpani mriduni haritani cha
Charanti shashpamukhyani tiktani madhurani cha
118.9
स्रवन्तीनां च पुण्यानां सुरसानि शुचीनि च
पिबन्ती वारिमुख्यानि शीतानि विमलानि च
Sravantinam cha punyanam surasani shuchini cha
Pibanti varimukhyani shitani vimalani cha
118.10
वनेषु मृगराजेषु सिंहविप्रोषितेषु च
दावाग्निविप्रमुक्तेषु शून्येषु गहनेषु च
Vaneshu mrigarajeshu sinhaviproshiteshu cha
Davagnivipramukteshu shunyeshu gahaneshu cha
118.11
चरन्ती हरिणैः सार्धं मृगीव वनचारिणी
चचार विपुलं धर्मं ब्रह्मचर्येण संवृता
Charanti harinaih sardham mrigiva vanacharini
Chachara vipulam dharmam brahmacharyena sanvrita
118.12
ययातिरपि पूर्वेषां राज्ञां वृत्तमनुष्ठितः
बहुवर्षसहस्रायुरयुजत्कालधर्मणा
Yayatirapi purvesham ragyam vrittamanushthitah
Bahuvarshasahasrayurayujatkaladharmana
118.13
पूरुर्यदुश्च द्वौ वंशौ वर्धमानौ नरोत्तमौ
ताभ्यां प्रतिष्ठितो लोके परलोके च नाहुषः
Pururyadushcha dvau vanshau vardhamanau narottamau
Tabhyam pratishthito loke paraloke cha nahushah
118.14
महीयते नरपतिर्ययातिः स्वर्गमास्थितः
महर्षिकल्पो नृपतिः स्वर्गाग्र्यफलभुग्विभुः
Mahiyate narapatiryayatih svargamasthitah
Maharshikalpo nripatih svargagryaphalabhugvibhuh
118.15
बहुवर्षसहस्राख्ये काले बहुगुणे गते
राजर्षिषु निषण्णेषु महीयःसु महर्षिषु
Bahuvarshasahasrakhye kale bahugune gate
Rajarshishu nishanneshu mahiyahsu maharshishu
118.16
अवमेने नरान्सर्वान्देवानृषिगणांस्तथा
ययातिर्मूढविज्ञानो विस्मयाविष्टचेतनः
Avamene naransarvandevanrishigananstatha
Yayatirmudhavigyano vismayavishtachetanah
118.17
ततस्तं बुबुधे देवः शक्रो बलनिषूदनः
ते च राजर्षयः सर्वे धिग्धिगित्येवमब्रुवन्
Tatastam bubudhe devah shakro balanishudanah
Te cha rajarshayah sarve dhigdhigityevamabruvan
118.18
विचारश्च समुत्पन्नो निरीक्ष्य नहुषात्मजम्
को न्वयं कस्य वा राज्ञः कथं वा स्वर्गमागतः
Vicharashcha samutpanno nirikshya nahushatmajam
Ko nvayam kasya va ragyah katham va svargamagatah
118.19
कर्मणा केन सिद्धोऽयं क्व वानेन तपश्चितम्
कथं वा ज्ञायते स्वर्गे केन वा ज्ञायतेऽप्युत
Karmana kena siddhoyam kva vanena tapashchitam
Katham va gyayate svarge kena va gyayatepyuta
118.20
एवं विचारयन्तस्ते राजानः स्वर्गवासिनः
दृष्ट्वा पप्रच्छुरन्योन्यं ययातिं नृपतिं प्रति
Evam vicharayantaste rajanah svargavasinah
Drishtva paprachchhuranyonyam yayatim nripatim prati
118.21
विमानपालाः शतशः स्वर्गद्वाराभिरक्षिणः
पृष्टा आसनपालाश्च न जानीमेत्यथाब्रुवन्
Vimanapalah shatashah svargadvarabhirakshinah
Prishta asanapalashcha na janimetyathabruvan
118.22
सर्वे ते ह्यावृतज्ञाना नाभ्यजानन्त तं नृपम्
स मुहूर्तादथ नृपो हतौजा अभवत्तदा
Sarve te hyavritagyana nabhyajananta tam nripam
Sa muhurtadatha nripo hatauja abhavattada