UtshovChapter 116
116.1
नारद उवाच
तथैव सा श्रियं त्यक्त्वा कन्या भूत्वा यशस्विनी
माधवी गालवं विप्रमन्वयात्सत्यसंगरा
Narada uvacha
Tathaiva sa shriyam tyaktva kanya bhutva yashasvini
Madhavi galavam vipramanvayatsatyasangara
116.2
गालवो विमृशन्नेव स्वकार्यगतमानसः
जगाम भोजनगरं द्रष्टुमौशीनरं नृपम्
Galavo vimrishanneva svakaryagatamanasah
Jagama bhojanagaram drashtumaushinaram nripam
116.3
तमुवाचाथ गत्वा स नृपतिं सत्यविक्रमम्
इयं कन्या सुतौ द्वौ ते जनयिष्यति पार्थिवौ
Tamuvachatha gatva sa nripatim satyavikramam
Iyam kanya sutau dvau te janayishyati parthivau
116.4
अस्यां भवानवाप्तार्थो भविता प्रेत्य चेह च
सोमार्कप्रतिसंकाशौ जनयित्वा सुतौ नृप
Asyam bhavanavaptartho bhavita pretya cheha cha
Somarkapratisankashau janayitva sutau nripa
116.5
शुल्कं तु सर्वधर्मज्ञ हयानां चन्द्रवर्चसाम्
एकतःश्यामकर्णानां देयं मह्यं चतुःशतम्
Shulkam tu sarvadharmagya hayanam chandravarchasam
Ekatahshyamakarnanam deyam mahyam chatuhshatam
116.6
गुर्वर्थोऽयं समारम्भो न हयैः कृत्यमस्ति मे
यदि शक्यं महाराज क्रियतां मा विचार्यताम्
Gurvarthoyam samarambho na hayaih krityamasti me
Yadi shakyam maharaja kriyatam ma vicharyatam
116.7
अनपत्योऽसि राजर्षे पुत्रौ जनय पार्थिव
पितॄन्पुत्रप्लवेन त्वमात्मानं चैव तारय
Anapatyosi rajarshe putrau janaya parthiva
Pitrinputraplavena tvamatmanam chaiva taraya
116.8
न पुत्रफलभोक्ता हि राजर्षे पात्यते दिवः
न याति नरकं घोरं यत्र गच्छन्त्यनात्मजाः
Na putraphalabhokta hi rajarshe patyate divah
Na yati narakam ghoram yatra gachchhantyanatmajah
116.9
एतच्चान्यच्च विविधं श्रुत्वा गालवभाषितम्
उशीनरः प्रतिवचो ददौ तस्य नराधिपः
Etachchanyachcha vividham shrutva galavabhashitam
Ushinarah prativacho dadau tasya naradhipah
116.10
श्रुतवानस्मि ते वाक्यं यथा वदसि गालव
विधिस्तु बलवान्ब्रह्मन्प्रवणं हि मनो मम
Shrutavanasmi te vakyam yatha vadasi galava
Vidhistu balavanbrahmanpravanam hi mano mama
116.11
शते द्वे तु ममाश्वानामीदृशानां द्विजोत्तम
इतरेषां सहस्राणि सुबहूनि चरन्ति मे
Shate dve tu mamashvanamidrishanam dvijottama
Itaresham sahasrani subahuni charanti me
116.12
अहमप्येकमेवास्यां जनयिष्यामि गालव
पुत्रं द्विज गतं मार्गं गमिष्यामि परैरहम्
Ahamapyekamevasyam janayishyami galava
Putram dvija gatam margam gamishyami parairaham
116.13
मूल्येनापि समं कुर्यां तवाहं द्विजसत्तम
पौरजानपदार्थं तु ममार्थो नात्मभोगतः
Mulyenapi samam kuryam tavaham dvijasattama
Paurajanapadartham tu mamartho natmabhogatah
116.14
कामतो हि धनं राजा पारक्यं यः प्रयच्छति
न स धर्मेण धर्मात्मन्युज्यते यशसा न च
Kamato hi dhanam raja parakyam yah prayachchhati
Na sa dharmena dharmatmanyujyate yashasa na cha
116.15
सोऽहं प्रतिग्रहीष्यामि ददात्वेतां भवान्मम
कुमारीं देवगर्भाभामेकपुत्रभवाय मे
Soham pratigrahishyami dadatvetam bhavanmama
Kumarim devagarbhabhamekaputrabhavaya me
116.16
तथा तु बहुकल्याणमुक्तवन्तं नराधिपम्
उशीनरं द्विजश्रेष्ठो गालवः प्रत्यपूजयत्
Tatha tu bahukalyanamuktavantam naradhipam
Ushinaram dvijashreshtho galavah pratyapujayat
116.17
उशीनरं प्रतिग्राह्य गालवः प्रययौ वनम्
रेमे स तां समासाद्य कृतपुण्य इव श्रियम्
Ushinaram pratigrahya galavah prayayau vanam
Reme sa tam samasadya kritapunya iva shriyam
116.18
कन्दरेषु च शैलानां नदीनां निर्झरेषु च
उद्यानेषु विचित्रेषु वनेषूपवनेषु च
Kandareshu cha shailanam nadinam nirjhareshu cha
Udyaneshu vichitreshu vaneshupavaneshu cha
116.19
हर्म्येषु रमणीयेषु प्रासादशिखरेषु च
वातायनविमानेषु तथा गर्भगृहेषु च
Harmyeshu ramaniyeshu prasadashikhareshu cha
Vatayanavimaneshu tatha garbhagriheshu cha
116.20
ततोऽस्य समये जज्ञे पुत्रो बालरविप्रभः
शिबिर्नाम्नाभिविख्यातो यः स पार्थिवसत्तमः
Tatosya samaye jagye putro balaraviprabhah
Shibirnamnabhivikhyato yah sa parthivasattamah
116.21
उपस्थाय स तं विप्रो गालवः प्रतिगृह्य च
कन्यां प्रयातस्तां राजन्दृष्टवान्विनतात्मजम्
Upasthaya sa tam vipro galavah pratigrihya cha
Kanyam prayatastam rajandrishtavanvinatatmajam