অধ্যায় 114

114.1

নারদ উবাচ
হর্যশ্বস্ত্বব্রবীদ্রাজা বিচিন্ত্য বহুধা ততঃ
দীর্ঘমুষ্ণং চ নিঃশ্বস্য প্রজাহেতোর্নৃপোত্তমঃ

উন্নতেষূন্নতা ষট্সু সূক্ষ্মা সূক্ষ্মেষু সপ্তসু
গম্ভীরা ত্রিষু গম্ভীরেষ্বিয়ং রক্তা চ পঞ্চসু

বহুদেবাসুরালোকা বহুগন্ধর্বদর্শনা
বহুলক্ষণসংপন্না বহুপ্রসবধারিণী

সমর্থেয়ং জনয়িতুং চক্রবর্তিনমাত্মজম্
ব্রূহি শুল্কং দ্বিজশ্রেষ্ঠ সমীক্ষ্য বিভবং মম

গালব উবাচ
একতঃশ্যামকর্ণানাং শতান্যষ্টৌ দদস্ব মে
হয়ানাং চন্দ্রশুভ্রাণাং দেশজানাং বপুষ্মতাম্

ততস্তব ভবিত্রীয়ং পুত্রাণাং জননী শুভা
অরণীব হুতাশানাং যোনিরায়তলোচনা

নারদ উবাচ
এতচ্ছ্রুত্বা বচো রাজা হর্যশ্বঃ কামমোহিতঃ
উবাচ গালবং দীনো রাজর্ষিরৃষিসত্তমম্

দ্বে মে শতে সংনিহিতে হয়ানাং যদ্বিধাস্তব
এষ্টব্যাঃ শতশস্ত্বন্যে চরন্তি মম বাজিনঃ

সোঽহমেকমপত্যং বৈ জনয়িষ্যামি গালব
অস্যামেতং ভবান্কামং সংপাদয়তু মে বরম্

এতচ্ছ্রুত্বা তু সা কন্যা গালবং বাক্যমব্রবীৎ
মম দত্তো বরঃ কশ্চিত্কেনচিদ্ব্রহ্মবাদিনা

প্রসূত্যন্তে প্রসূত্যন্তে কন্যৈব ত্বং ভবিষ্যসি
স ত্বং দদস্ব মাং রাজ্ঞে প্রতিগৃহ্য হয়োত্তমান্

নৃপেভ্যো হি চতুর্ভ্যস্তে পূর্ণান্যষ্টৌ শতানি বৈ
ভবিষ্যন্তি তথা পুত্রা মম চত্বার এব চ

ক্রিয়তাং মম সংহারো গুর্বর্থং দ্বিজসত্তম
এষা তাবন্মম প্রজ্ঞা যথা বা মন্যসে দ্বিজ

এবমুক্তস্তু স মুনিঃ কন্যয়া গালবস্তদা
হর্যশ্বং পৃথিবীপালমিদং বচনমব্রবীৎ

ইয়ং কন্যা নরশ্রেষ্ঠ হর্যশ্ব প্রতিগৃহ্যতাম্
চতুর্ভাগেন শুল্কস্য জনয়স্বৈকমাত্মজম্

প্রতিগৃহ্য স তাং কন্যাং গালবং প্রতিনন্দ্য চ
সময়ে দেশকালে চ লব্ধবান্সুতমীপ্সিতম্

ততো বসুমনা নাম বসুভ্যো বসুমত্তরঃ
বসুপ্রখ্যো নরপতিঃ স বভূব বসুপ্রদঃ

অথ কালে পুনর্ধীমান্গালবঃ প্রত্যুপস্থিতঃ
উপসংগম্য চোবাচ হর্যশ্বং প্রীতিমানসম্

জাতো নৃপ সুতস্তেঽয়ং বালভাস্করসংনিভঃ
কালো গন্তুং নরশ্রেষ্ঠ ভিক্ষার্থমপরং নৃপম্

হর্যশ্বঃ সত্যবচনে স্থিতঃ স্থিত্বা চ পৌরুষে
দুর্লভত্বাদ্ধয়ানাং চ প্রদদৌ মাধবীং পুনঃ

মাধবী চ পুনর্দীপ্তাং পরিত্যজ্য নৃপশ্রিয়ম্
কুমারী কামতো ভূত্বা গালবং পৃষ্ঠতোঽন্বগাৎ

ত্বয্যেব তাবত্তিষ্ঠন্তু হয়া ইত্যুক্তবান্দ্বিজঃ
প্রয়য়ৌ কন্যয়া সার্ধং দিবোদাসং প্রজেশ্বরম্