অধ্যায় 98

98.1

নারদ উবাচ
হিরণ্যপুরমিত্যেতত্খ্যাতং পুরবরং মহৎ
দৈত্যানাং দানবানাং চ মায়াশতবিচারিণাম্

অনল্পেন প্রয়ত্নেন নির্মিতং বিশ্বকর্মণা
ময়েন মনসা সৃষ্টং পাতালতলমাশ্রিতম্

অত্র মায়াসহস্রাণি বিকুর্বাণা মহৌজসঃ
দানবা নিবসন্তি স্ম শূরা দত্তবরাঃ পুরা

নৈতে শক্রেণ নান্যেন বরুণেন যমেন বা
শক্যন্তে বশমানেতুং তথৈব ধনদেন চ

অসুরাঃ কালখঞ্জাশ্চ তথা বিষ্ণুপদোদ্ভবাঃ
নৈরৃতা যাতুধানাশ্চ ব্রহ্মবেদোদ্ভবাশ্চ যে

দংষ্ট্রিণো ভীমরূপাশ্চ নিবসন্ত্যাত্মরক্ষিণঃ
মায়াবীর্যোপসংপন্না নিবসন্ত্যাত্মরক্ষিণঃ

নিবাতকবচা নাম দানবা যুদ্ধদুর্মদাঃ
জানাসি চ যথা শক্রো নৈতাঞ্শক্নোতি বাধিতুম্

বহুশো মাতলে ত্বং চ তব পুত্রশ্চ গোমুখঃ
নির্ভগ্নো দেবরাজশ্চ সহপুত্রঃ শচীপতিঃ

পশ্য বেশ্মানি রৌক্মাণি মাতলে রাজতানি চ
কর্মণা বিধিয়ুক্তেন যুক্তান্যুপগতানি চ

বৈডূর্যহরিতানীব প্রবালরুচিরাণি চ
অর্কস্ফটিকশুভ্রাণি বজ্রসারোজ্জ্বলানি চ

পার্থিবানীব চাভান্তি পুনর্নগময়ানি চ
শৈলানীব চ দৃশ্যন্তে তারকাণীব চাপ্যুত

সূর্যরূপাণি চাভান্তি দীপ্তাগ্নিসদৃশানি চ
মণিজালবিচিত্রাণি প্রাংশূনি নিবিডানি চ

নৈতানি শক্যং নির্দেষ্টুং রূপতো দ্রব্যতস্তথা
গুণতশ্চৈব সিদ্ধানি প্রমাণগুণবন্তি চ

আক্রীডান্পশ্য দৈত্যানাং তথৈব শয়নান্যুত
রত্নবন্তি মহার্হাণি ভাজনান্যাসনানি চ

জলদাভাংস্তথা শৈলাংস্তোয়প্রস্রবণান্বিতান্
কামপুষ্পফলাংশ্চৈব পাদপান্কামচারিণঃ

মাতলে কশ্চিদত্রাপি রুচিতস্তে বরো ভবেৎ
অথ বান্যাং দিশং ভূমের্গচ্ছাব যদি মন্যসে

কণ্ব উবাচ
মাতলিস্ত্বব্রবীদেনং ভাষমাণং তথাবিধম্
দেবর্ষে নৈব মে কার্যং বিপ্রিয়ং ত্রিদিবৌকসাম্

নিত্যানুষক্তবৈরা হি ভ্রাতরো দেবদানবাঃ
অরিপক্ষেণ সংবন্ধং রোচয়িষ্যাম্যহং কথম্

অন্যত্র সাধু গচ্ছাবো দ্রষ্টুং নার্হামি দানবান্
জানামি তু তথাত্মানং দিত্সাত্মকমলং যথা