UtshovChapter 72
72.1
भीमसेन उवाच
यथा यथैव शान्तिः स्यात्कुरूणां मधुसूदन
तथा तथैव भाषेथा मा स्म युद्धेन भीषयेः
Bhimasena uvacha
Yatha yathaiva shantih syatkurunam madhusudana
Tatha tathaiva bhashetha ma sma yuddhena bhishayeh
72.2
अमर्षी नित्यसंरब्धः श्रेयोद्वेषी महामनाः
नोग्रं दुर्योधनो वाच्यः साम्नैवैनं समाचरेः
Amarshi nityasanrabdhah shreyodveshi mahamanah
Nogram duryodhano vachyah samnaivainam samachareh
72.3
प्रकृत्या पापसत्त्वश्च तुल्यचेताश्च दस्युभिः
ऐश्वर्यमदमत्तश्च कृतवैरश्च पाण्डवैः
Prakritya papasattvashcha tulyachetashcha dasyubhih
Aishvaryamadamattashcha kritavairashcha pandavaih
72.4
अदीर्घदर्शी निष्ठूरी क्षेप्ता क्रूरपराक्रमः
दीर्घमन्युरनेयश्च पापात्मा निकृतिप्रियः
Adirghadarshi nishthuri kshepta kruraparakramah
Dirghamanyuraneyashcha papatma nikritipriyah
72.5
म्रियेतापि न भज्येत नैव जह्यात्स्वकं मतम्
तादृशेन शमं कृष्ण मन्ये परमदुष्करम्
Mriyetapi na bhajyeta naiva jahyatsvakam matam
Tadrishena shamam krishna manye paramadushkaram
72.6
सुहृदामप्यवाचीनस्त्यक्तधर्मः प्रियानृतः
प्रतिहन्त्येव सुहृदां वाचश्चैव मनांसि च
Suhridamapyavachinastyaktadharmah priyanritah
Pratihantyeva suhridam vachashchaiva manansi cha
72.7
स मन्युवशमापन्नः स्वभावं दुष्टमास्थितः
स्वभावात्पापमन्वेति तृणैस्तुन्न इवोरगः
Sa manyuvashamapannah svabhavam dushtamasthitah
Svabhavatpapamanveti trinaistunna ivoragah
72.8
दुर्योधनो हि यत्सेनः सर्वथा विदितस्तव
यच्छीलो यत्स्वभावश्च यद्बलो यत्पराक्रमः
Duryodhano hi yatsenah sarvatha viditastava
Yachchhilo yatsvabhavashcha yadbalo yatparakramah
72.9
पुरा प्रसन्नाः कुरवः सहपुत्रास्तथा वयम्
इन्द्रज्येष्ठा इवाभूम मोदमानाः सबान्धवाः
Pura prasannah kuravah sahaputrastatha vayam
Indrajyeshtha ivabhuma modamanah sabandhavah
72.10
दुर्योधनस्य क्रोधेन भारता मधुसूदन
धक्ष्यन्ते शिशिरापाये वनानीव हुताशनैः
Duryodhanasya krodhena bharata madhusudana
Dhakshyante shishirapaye vananiva hutashanaih
72.11
अष्टादशेमे राजानः प्रख्याता मधुसूदन
ये समुच्चिच्छिदुर्ज्ञातीन्सुहृदश्च सबान्धवान्
Ashtadasheme rajanah prakhyata madhusudana
Ye samuchchichchhidurgyatinsuhridashcha sabandhavan
72.12
असुराणां समृद्धानां ज्वलतामिव तेजसा
पर्यायकाले धर्मस्य प्राप्ते बलिरजायत
Asuranam samriddhanam jvalatamiva tejasa
Paryayakale dharmasya prapte balirajayata
72.13
हैहयानामुदावर्तो नीपानां जनमेजयः
बहुलस्तालजङ्घानां कृमीणामुद्धतो वसुः
Haihayanamudavarto nipanam janamejayah
Bahulastalajanghanam kriminamuddhato vasuh
72.14
अजबिन्दुः सुवीराणां सुराष्ट्राणां कुशर्द्धिकः
अर्कजश्च बलीहानां चीनानां धौतमूलकः
Ajabinduh suviranam surashtranam kusharddhikah
Arkajashcha balihanam chinanam dhautamulakah
72.15
हयग्रीवो विदेहानां वरप्रश्च महौजसाम्
बाहुः सुन्दरवेगानां दीप्ताक्षाणां पुरूरवाः
Hayagrivo videhanam varaprashcha mahaujasam
Bahuh sundaraveganam diptakshanam pururavah
72.16
सहजश्चेदिमत्स्यानां प्रचेतानां बृहद्बलः
धारणश्चेन्द्रवत्सानां मुकुटानां विगाहनः
Sahajashchedimatsyanam prachetanam brihadbalah
Dharanashchendravatsanam mukutanam vigahanah
72.17
शमश्च नन्दिवेगानामित्येते कुलपांसनाः
युगान्ते कृष्ण संभूताः कुलेषु पुरुषाधमाः
Shamashcha nandiveganamityete kulapansanah
Yugante krishna sambhutah kuleshu purushadhamah
72.18
अप्ययं नः कुरूणां स्याद्युगान्ते कालसंभृतः
दुर्योधनः कुलाङ्गारो जघन्यः पापपूरुषः
Apyayam nah kurunam syadyugante kalasambhritah
Duryodhanah kulangaro jaghanyah papapurushah
72.19
तस्मान्मृदु शनैरेनं ब्रूया धर्मार्थसंहितम्
कामानुबन्धबहुलं नोग्रमुग्रपराक्रमम्
Tasmanmridu shanairenam bruya dharmarthasanhitam
Kamanubandhabahulam nogramugraparakramam
72.20
अपि दुर्योधनं कृष्ण सर्वे वयमधश्चराः
नीचैर्भूत्वानुयास्यामो मा स्म नो भरता नशन्
Api duryodhanam krishna sarve vayamadhashcharah
Nichairbhutvanuyasyamo ma sma no bharata nashan
72.21
अप्युदासीनवृत्तिः स्याद्यथा नः कुरुभिः सह
वासुदेव तथा कार्यं न कुरूननयः स्पृशेत्
Apyudasinavrittih syadyatha nah kurubhih saha
Vasudeva tatha karyam na kurunanayah sprishet
72.22
वाच्यः पितामहो वृद्धो ये च कृष्ण सभासदः
भ्रातॄणामस्तु सौभ्रात्रं धार्तराष्ट्रः प्रशाम्यताम्
Vachyah pitamaho vriddho ye cha krishna sabhasadah
Bhratrinamastu saubhratram dhartarashtrah prashamyatam
72.23
अहमेतद्ब्रवीम्येवं राजा चैव प्रशंसति
अर्जुनो नैव युद्धार्थी भूयसी हि दयार्जुने
Ahametadbravimyevam raja chaiva prashansati
Arjuno naiva yuddharthi bhuyasi hi dayarjune