UtshovChapter 66
66.1
संजय उवाच
अर्जुनो वासुदेवश्च धन्विनौ परमार्चितौ
कामादन्यत्र संभूतौ सर्वाभावाय संमितौ
Sanjaya uvacha
Arjuno vasudevashcha dhanvinau paramarchitau
Kamadanyatra sambhutau sarvabhavaya sammitau
66.2
द्यामन्तरं समास्थाय यथायुक्तं मनस्विनः
चक्रं तद्वासुदेवस्य मायया वर्तते विभो
Dyamantaram samasthaya yathayuktam manasvinah
Chakram tadvasudevasya mayaya vartate vibho
66.3
सापह्नवं पाण्डवेषु पाण्डवानां सुसंमतम्
सारासारबलं ज्ञात्वा तत्समासेन मे शृणु
Sapahnavam pandaveshu pandavanam susammatam
Sarasarabalam gyatva tatsamasena me shrinu
66.4
नरकं शम्बरं चैव कंसं चैद्यं च माधवः
जितवान्घोरसंकाशान्क्रीडन्निव जनार्दनः
Narakam shambaram chaiva kansam chaidyam cha madhavah
Jitavanghorasankashankridanniva janardanah
66.5
पृथिवीं चान्तरिक्षं च द्यां चैव पुरुषोत्तमः
मनसैव विशिष्टात्मा नयत्यात्मवशं वशी
Prithivim chantariksham cha dyam chaiva purushottamah
Manasaiva vishishtatma nayatyatmavasham vashi
66.6
भूयो भूयो हि यद्राजन्पृच्छसे पाण्डवान्प्रति
सारासारबलं ज्ञातुं तन्मे निगदतः शृणु
Bhuyo bhuyo hi yadrajanprichchhase pandavanprati
Sarasarabalam gyatum tanme nigadatah shrinu
66.7
एकतो वा जगत्कृत्स्नमेकतो वा जनार्दनः
सारतो जगतः कृत्स्नादतिरिक्तो जनार्दनः
Ekato va jagatkritsnamekato va janardanah
Sarato jagatah kritsnadatirikto janardanah
66.8
भस्म कुर्याज्जगदिदं मनसैव जनार्दनः
न तु कृत्स्नं जगच्छक्तं भस्म कर्तुं जनार्दनम्
Bhasma kuryajjagadidam manasaiva janardanah
Na tu kritsnam jagachchhaktam bhasma kartum janardanam
66.9
यतः सत्यं यतो धर्मो यतो ह्रीरार्जवं यतः
ततो भवति गोविन्दो यतः कृष्णस्ततो जयः
Yatah satyam yato dharmo yato hrirarjavam yatah
Tato bhavati govindo yatah krishnastato jayah
66.10
पृथिवीं चान्तरिक्षं च दिवं च पुरुषोत्तमः
विचेष्टयति भूतात्मा क्रीडन्निव जनार्दनः
Prithivim chantariksham cha divam cha purushottamah
Vicheshtayati bhutatma kridanniva janardanah
66.11
स कृत्वा पाण्डवान्सत्रं लोकं संमोहयन्निव
अधर्मनिरतान्मूढान्दग्धुमिच्छति ते सुतान्
Sa kritva pandavansatram lokam sammohayanniva
Adharmaniratanmudhandagdhumichchhati te sutan
66.12
कालचक्रं जगच्चक्रं युगचक्रं च केशवः
आत्मयोगेन भगवान्परिवर्तयतेऽनिशम्
Kalachakram jagachchakram yugachakram cha keshavah
Atmayogena bhagavanparivartayatenisham
66.13
कालस्य च हि मृत्योश्च जङ्गमस्थावरस्य च
ईशते भगवानेकः सत्यमेतद्ब्रवीमि ते
Kalasya cha hi mrityoshcha jangamasthavarasya cha
Ishate bhagavanekah satyametadbravimi te
66.14
ईशन्नपि महायोगी सर्वस्य जगतो हरिः
कर्माण्यारभते कर्तुं कीनाश इव दुर्बलः
Ishannapi mahayogi sarvasya jagato harih
Karmanyarabhate kartum kinasha iva durbalah
66.15
तेन वञ्चयते लोकान्मायायोगेन केशवः
ये तमेव प्रपद्यन्ते न ते मुह्यन्ति मानवाः
Tena vanchayate lokanmayayogena keshavah
Ye tameva prapadyante na te muhyanti manavah