UtshovChapter 65
65.1
वैशंपायन उवाच
दुर्योधने धार्तराष्ट्रे तद्वचोऽप्रतिनन्दति
तूष्णींभूतेषु सर्वेषु समुत्तस्थुर्नरेश्वराः
Vaishampayana uvacha
Duryodhane dhartarashtre tadvachopratinandati
Tushnimbhuteshu sarveshu samuttasthurnareshvarah
65.2
उत्थितेषु महाराज पृथिव्यां सर्वराजसु
रहिते संजयं राजा परिप्रष्टुं प्रचक्रमे
Utthiteshu maharaja prithivyam sarvarajasu
Rahite sanjayam raja pariprashtum prachakrame
65.3
आशंसमानो विजयं तेषां पुत्रवशानुगः
आत्मनश्च परेषां च पाण्डवानां च निश्चयम्
Ashansamano vijayam tesham putravashanugah
Atmanashcha paresham cha pandavanam cha nishchayam
65.4
धृतराष्ट्र उवाच
गावल्गणे ब्रूहि नः सारफल्गु; स्वसेनायां यावदिहास्ति किंचित्
त्वं पाण्डवानां निपुणं वेत्थ सर्वं; किमेषां ज्यायः किमु तेषां कनीयः
Dhritarashtra uvacha
Gavalgane bruhi nah saraphalgu; svasenayam yavadihasti kinchit
Tvam pandavanam nipunam vettha sarvam; kimesham jyayah kimu tesham kaniyah
65.5
त्वमेतयोः सारवित्सर्वदर्शी; धर्मार्थयोर्निपुणो निश्चयज्ञः
स मे पृष्टः संजय ब्रूहि सर्वं; युध्यमानाः कतरेऽस्मिन्न सन्ति
Tvametayoh saravitsarvadarshi; dharmarthayornipuno nishchayagyah
Sa me prishtah sanjaya bruhi sarvam; yudhyamanah kataresminna santi
65.6
संजय उवाच
न त्वां ब्रूयां रहिते जातु किंचि;दसूया हि त्वां प्रसहेत राजन्
आनयस्व पितरं संशितव्रतं; गांधारीं च महिषीमाजमीढ
Sanjaya uvacha
Na tvam bruyam rahite jatu kinchi;dasuya hi tvam prasaheta rajan
Anayasva pitaram sanshitavratam; gandharim cha mahishimajamidha
65.7
तौ तेऽसूयां विनयेतां नरेन्द्र; धर्मज्ञौ तौ निपुणौ निश्चयज्ञौ
तयोस्तु त्वां संनिधौ तद्वदेयं; कृत्स्नं मतं वासुदेवार्जुनाभ्याम्
Tau tesuyam vinayetam narendra; dharmagyau tau nipunau nishchayagyau
Tayostu tvam sannidhau tadvadeyam; kritsnam matam vasudevarjunabhyam
65.8
वैशंपायन उवाच
ततस्तन्मतमाज्ञाय संजयस्यात्मजस्य च
अभ्युपेत्य महाप्राज्ञः कृष्णद्वैपायनोऽब्रवीत्
Vaishampayana uvacha
Tatastanmatamagyaya sanjayasyatmajasya cha
Abhyupetya mahapragyah krishnadvaipayanobravit
65.9
संपृच्छते धृतराष्ट्राय संजय; आचक्ष्व सर्वं यावदेषोऽनुयुङ्क्ते
सर्वं यावद्वेत्थ तस्मिन्यथाव;द्याथातथ्यं वासुदेवेऽर्जुने च
Samprichchhate dhritarashtraya sanjaya; achakshva sarvam yavadeshonuyunkte
Sarvam yavadvettha tasminyathava;dyathatathyam vasudeverjune cha