অধ্যায় 64

64.1

বৈশংপায়ন উবাচ
এবমুক্ত্বা মহাপ্রাজ্ঞো ধৃতরাষ্ট্রঃ সুয়োধনম্
পুনরেব মহাভাগঃ সংজয়ং পর্যপৃচ্ছত

ব্রূহি সংজয় যচ্ছেষং বাসুদেবাদনন্তরম্
যদর্জুন উবাচ ত্বাং পরং কৌতূহলং হি মে

সংজয় উবাচ
বাসুদেববচঃ শ্রুত্বা কুন্তীপুত্রো ধনংজয়ঃ
উবাচ কালে দুর্ধর্ষো বাসুদেবস্য শৃণ্বতঃ

পিতামহং শাংতনবং ধৃতরাষ্ট্রং চ সংজয়
দ্রোণং কৃপং চ কর্ণং চ মহারাজং চ বাহ্লিকম্

দ্রৌণিং চ সোমদত্তং চ শকুনিং চাপি সৌবলম্
দুঃশাসনং শলং চৈব পুরুমিত্রং বিবিংশতিম্

বিকর্ণং চিত্রসেনং চ জয়ত্সেনং চ পার্থিবম্
বিন্দানুবিন্দাবাবন্ত্যৌ দুর্মুখং চাপি কৌরবম্

সৈন্ধবং দুঃসহং চৈব ভূরিশ্রবসমেব চ
ভগদত্তং চ রাজানং জলসংধং চ পার্থিবম্

যে চাপ্যন্যে পার্থিবাস্তত্র যোদ্ধুং; সমাগতাঃ কৌরবাণাং প্রিয়ার্থম্
মুমূর্ষবঃ পাণ্ডবাগ্নৌ প্রদীপ্তে; সমানীতা ধার্তরাষ্ট্রেণ সূত

যথান্যায়ং কৌশলং বন্দনং চ; সমাগতা মদ্বচনেন বাচ্যাঃ
ইদং ব্রূয়াঃ সংজয় রাজমধ্যে; সুয়োধনং পাপকৃতাং প্রধানম্

অমর্ষণং দুর্মতিং রাজপুত্রং; পাপাত্মানং ধার্তরাষ্ট্রং সুলুব্ধম্
সর্বং মমৈতদ্বচনং সমগ্রং; সহামাত্যং সংজয় শ্রাবয়েথাঃ

এবং প্রতিষ্ঠাপ্য ধনংজয়ো মাং; ততোঽর্থবদ্ধর্মবচ্চাপি বাক্যম্
প্রোবাচেদং বাসুদেবং সমীক্ষ্য; পার্থো ধীমাঁল্লোহিতান্তায়তাক্ষঃ

যথা শ্রুতং তে বদতো মহাত্মনো; মধুপ্রবীরস্য বচঃ সমাহিতম্
তথৈব বাচ্যং ভবতা হি মদ্বচঃ; সমাগতেষু ক্ষিতিপেষু সর্বশঃ

শরাগ্নিধূমে রথনেমিনাদিতে; ধনুঃস্রুবেণাস্ত্রবলাপহারিণা
যথা ন হোমঃ ক্রিয়তে মহামৃধে; তথা সমেত্য প্রয়তধ্বমাদৃতাঃ

ন চেত্প্রয়চ্ছধ্বমমিত্রঘাতিনো; যুধিষ্ঠিরস্যাংশমভীপ্সিতং স্বকম্
নয়ামি বঃ স্বাশ্বপদাতিকুঞ্জরা;ন্দিশং পিতৄণামশিবাং শিতৈঃ শরৈঃ

ততোঽহমামন্ত্র্য চতুর্ভুজং হরিং; ধনংজয়ং চৈব নমস্য সত্বরঃ
জবেন সংপ্রাপ্ত ইহামরদ্যুতে; তবান্তিকং প্রাপয়িতুং বচো মহৎ