অধ্যায় 63

63.1

ধৃতরাষ্ট্র উবাচ
দুর্যোধন বিজানীহি যত্ত্বাং বক্ষ্যামি পুত্রক
উত্পথং মন্যসে মার্গমনভিজ্ঞ ইবাধ্বগঃ

পঞ্চানাং পাণ্ডুপুত্রাণাং যত্তেজঃ প্রমিমীষসি
পঞ্চানামিব ভূতানাং মহতাং সুমহাত্মনাম্

যুধিষ্ঠিরং হি কৌন্তেয়ং পরং ধর্মমিহাস্থিতম্
পরাং গতিমসংপ্রেক্ষ্য ন ত্বং বেত্তুমিহার্হসি

ভীমসেনং চ কৌন্তেয়ং যস্য নাস্তি সমো বলে
রণান্তকং তর্কয়সে মহাবাতমিব দ্রুমঃ

সর্বশস্ত্রভৃতাং শ্রেষ্ঠং মেরুং শিখরিণামিব
যুধি গাণ্ডীবধন্বানং কো নু যুধ্যেত বুদ্ধিমান্

ধৃষ্টদ্যুম্নশ্চ পাঞ্চাল্যঃ কমিবাদ্য ন শাতয়েৎ
শত্রুমধ্যে শরান্মুঞ্চন্দেবরাডশনীমিব

সাত্যকিশ্চাপি দুর্ধর্ষঃ সংমতোঽন্ধকবৃষ্ণিষু
ধ্বংসয়িষ্যতি তে সেনাং পাণ্ডবেয়হিতে রতঃ

যঃ পুনঃ প্রতিমানেন ত্রীঁল্লোকানতিরিচ্যতে
তং কৃষ্ণং পুণ্ডরীকাক্ষং কো নু যুধ্যেত বুদ্ধিমান্

একতো হ্যস্য দারাশ্চ জ্ঞাতয়শ্চ সবান্ধবাঃ
আত্মা চ পৃথিবী চেয়মেকতশ্চ ধনংজয়ঃ

বাসুদেবোঽপি দুর্ধর্ষো যতাত্মা যত্র পাণ্ডবঃ
অবিষহ্যং পৃথিব্যাপি তদ্বলং যত্র কেশবঃ

তিষ্ঠ তাত সতাং বাক্যে সুহৃদামর্থবাদিনাম্
বৃদ্ধং শাংতনবং ভীষ্মং তিতিক্ষস্ব পিতামহম্

মাং চ ব্রুবাণং শুশ্রূষ কুরূণামর্থবাদিনম্
দ্রোণং কৃপং বিকর্ণং চ মহারাজং চ বাহ্লিকম্

এতে হ্যপি যথৈবাহং মন্তুমর্হসি তাংস্তথা
সর্বে ধর্মবিদো হ্যেতে তুল্যস্নেহাশ্চ ভারত

যত্তদ্বিরাটনগরে সহ ভ্রাতৃভিরগ্রতঃ
উত্সৃজ্য গাঃ সুসংত্রস্তং বলং তে সমশীর্যত

যচ্চৈব তস্মিন্নগরে শ্রূয়তে মহদদ্ভুতম্
একস্য চ বহূনাং চ পর্যাপ্তং তন্নিদর্শনম্

অর্জুনস্তত্তথাকার্ষীত্কিং পুনঃ সর্ব এব তে
সভ্রাতৄনভিজানীহি বৃত্ত্যা চ প্রতিপাদয়