UtshovChapter 63
63.1
धृतराष्ट्र उवाच
दुर्योधन विजानीहि यत्त्वां वक्ष्यामि पुत्रक
उत्पथं मन्यसे मार्गमनभिज्ञ इवाध्वगः
Dhritarashtra uvacha
Duryodhana vijanihi yattvam vakshyami putraka
Utpatham manyase margamanabhigya ivadhvagah
63.2
पञ्चानां पाण्डुपुत्राणां यत्तेजः प्रमिमीषसि
पञ्चानामिव भूतानां महतां सुमहात्मनाम्
Panchanam panduputranam yattejah pramimishasi
Panchanamiva bhutanam mahatam sumahatmanam
63.3
युधिष्ठिरं हि कौन्तेयं परं धर्ममिहास्थितम्
परां गतिमसंप्रेक्ष्य न त्वं वेत्तुमिहार्हसि
Yudhishthiram hi kaunteyam param dharmamihasthitam
Param gatimasamprekshya na tvam vettumiharhasi
63.4
भीमसेनं च कौन्तेयं यस्य नास्ति समो बले
रणान्तकं तर्कयसे महावातमिव द्रुमः
Bhimasenam cha kaunteyam yasya nasti samo bale
Ranantakam tarkayase mahavatamiva drumah
63.5
सर्वशस्त्रभृतां श्रेष्ठं मेरुं शिखरिणामिव
युधि गाण्डीवधन्वानं को नु युध्येत बुद्धिमान्
Sarvashastrabhritam shreshtham merum shikharinamiva
Yudhi gandivadhanvanam ko nu yudhyeta buddhiman
63.6
धृष्टद्युम्नश्च पाञ्चाल्यः कमिवाद्य न शातयेत्
शत्रुमध्ये शरान्मुञ्चन्देवराडशनीमिव
Dhrishtadyumnashcha panchalyah kamivadya na shatayet
Shatrumadhye sharanmunchandevaradashanimiva
63.7
सात्यकिश्चापि दुर्धर्षः संमतोऽन्धकवृष्णिषु
ध्वंसयिष्यति ते सेनां पाण्डवेयहिते रतः
Satyakishchapi durdharshah sammatondhakavrishnishu
Dhvansayishyati te senam pandaveyahite ratah
63.8
यः पुनः प्रतिमानेन त्रीँल्लोकानतिरिच्यते
तं कृष्णं पुण्डरीकाक्षं को नु युध्येत बुद्धिमान्
Yah punah pratimanena trinllokanatirichyate
Tam krishnam pundarikaksham ko nu yudhyeta buddhiman
63.9
एकतो ह्यस्य दाराश्च ज्ञातयश्च सबान्धवाः
आत्मा च पृथिवी चेयमेकतश्च धनंजयः
Ekato hyasya darashcha gyatayashcha sabandhavah
Atma cha prithivi cheyamekatashcha dhananjayah
63.10
वासुदेवोऽपि दुर्धर्षो यतात्मा यत्र पाण्डवः
अविषह्यं पृथिव्यापि तद्बलं यत्र केशवः
Vasudevopi durdharsho yatatma yatra pandavah
Avishahyam prithivyapi tadbalam yatra keshavah
63.11
तिष्ठ तात सतां वाक्ये सुहृदामर्थवादिनाम्
वृद्धं शांतनवं भीष्मं तितिक्षस्व पितामहम्
Tishtha tata satam vakye suhridamarthavadinam
Vriddham shantanavam bhishmam titikshasva pitamaham
63.12
मां च ब्रुवाणं शुश्रूष कुरूणामर्थवादिनम्
द्रोणं कृपं विकर्णं च महाराजं च बाह्लिकम्
Mam cha bruvanam shushrusha kurunamarthavadinam
Dronam kripam vikarnam cha maharajam cha bahlikam
63.13
एते ह्यपि यथैवाहं मन्तुमर्हसि तांस्तथा
सर्वे धर्मविदो ह्येते तुल्यस्नेहाश्च भारत
Ete hyapi yathaivaham mantumarhasi tanstatha
Sarve dharmavido hyete tulyasnehashcha bharata
63.14
यत्तद्विराटनगरे सह भ्रातृभिरग्रतः
उत्सृज्य गाः सुसंत्रस्तं बलं ते समशीर्यत
Yattadviratanagare saha bhratribhiragratah
Utsrijya gah susantrastam balam te samashiryata
63.15
यच्चैव तस्मिन्नगरे श्रूयते महदद्भुतम्
एकस्य च बहूनां च पर्याप्तं तन्निदर्शनम्
Yachchaiva tasminnagare shruyate mahadadbhutam
Ekasya cha bahunam cha paryaptam tannidarshanam
63.16
अर्जुनस्तत्तथाकार्षीत्किं पुनः सर्व एव ते
सभ्रातॄनभिजानीहि वृत्त्या च प्रतिपादय
Arjunastattathakarshitkim punah sarva eva te
Sabhratrinabhijanihi vrittya cha pratipadaya