অধ্যায় 62

62.1

দুর্যোধন উবাচ
সদৃশানাং মনুষ্যেষু সর্বেষাং তুল্যজন্মনাম্
কথমেকান্ততস্তেষাং পার্থানাং মন্যসে জয়ম্

62.2

সর্বে স্ম সমজাতীয়াঃ সর্বে মানুষয়োনয়ঃ
পিতামহ বিজানীষে পার্থেষু বিজয়ং কথম্

62.3

নাহং ভবতি ন দ্রোণে ন কৃপে ন চ বাহ্লিকে
অন্যেষু চ নরেন্দ্রেষু পরাক্রম্য সমারভে

62.4

অহং বৈকর্তনঃ কর্ণো ভ্রাতা দুঃশাসনশ্চ মে
পাণ্ডবান্সমরে পঞ্চ হনিষ্যামঃ শিতৈঃ শরৈঃ

62.5

ততো রাজন্মহায়জ্ঞৈর্বিবিধৈর্ভূরিদক্ষিণৈঃ
ব্রাহ্মণাংস্তর্পয়িষ্যামি গোভিরশ্বৈর্ধনেন চ

62.6

বিদুর উবাচ
শকুনীনামিহার্থায় পাশং ভূমাবয়োজয়ৎ
কশ্চিচ্ছাকুনিকস্তাত পূর্বেষামিতি শুশ্রুম

62.7

তস্মিন্দ্বৌ শকুনৌ বদ্ধৌ যুগপত্সমপৌরুষৌ
তাবুপাদায় তং পাশং জগ্মতুঃ খচরাবুভৌ

62.8

তৌ বিহায়সমাক্রান্তৌ দৃষ্ট্বা শাকুনিকস্তদা
অন্বধাবদনির্বিণ্ণো যেন যেন স্ম গচ্ছতঃ

62.9

তথা তমনুধাবন্তং মৃগয়ুং শকুনার্থিনম্
আশ্রমস্থো মুনিঃ কশ্চিদ্দদর্শাথ কৃতাহ্নিকঃ

62.10

তাবন্তরিক্ষগৌ শীঘ্রমনুয়ান্তং মহীচরম্
শ্লোকেনানেন কৌরব্য পপ্রচ্ছ স মুনিস্তদা

62.11

বিচিত্রমিদমাশ্চর্যং মৃগহন্প্রতিভাতি মে
প্লবমানৌ হি খচরৌ পদাতিরনুধাবসি

62.12

শাকুনিক উবাচ
পাশমেকমুভাবেতৌ সহিতৌ হরতো মম
যত্র বৈ বিবদিষ্যেতে তত্র মে বশমেষ্যতঃ

62.13

বিদুর উবাচ
তৌ বিবাদমনুপ্রাপ্তৌ শকুনৌ মৃত্যুসংধিতৌ
বিগৃহ্য চ সুদুর্বুদ্ধী পৃথিব্যাং সংনিপেততুঃ

62.14

তৌ যুধ্যমানৌ সংরব্ধৌ মৃত্যুপাশবশানুগৌ
উপসৃত্যাপরিজ্ঞাতো জগ্রাহ মৃগয়ুস্তদা

62.15

এবং যে জ্ঞাতয়োঽর্থেষু মিথো গচ্ছন্তি বিগ্রহম্
তেঽমিত্রবশমায়ান্তি শকুনাবিব বিগ্রহাৎ

62.16

সংভোজনং সংকথনং সংপ্রশ্নোঽথ সমাগমঃ
এতানি জ্ঞাতিকার্যাণি ন বিরোধঃ কদাচন

62.17

যস্মিন্কালে সুমনসঃ সর্বে বৃদ্ধানুপাসতে
সিংহগুপ্তমিবারণ্যমপ্রধৃষ্যা ভবন্তি তে

62.18

যেঽর্থং সংততমাসাদ্য দীনা ইব সমাসতে
শ্রিয়ং তে সংপ্রয়চ্ছন্তি দ্বিষদ্ভ্যো ভরতর্ষভ

62.19

ধূমায়ন্তে ব্যপেতানি জ্বলন্তি সহিতানি চ
ধৃতরাষ্ট্রোল্মুকানীব জ্ঞাতয়ো ভরতর্ষভ

62.20

ইদমন্যত্প্রবক্ষ্যামি যথা দৃষ্টং গিরৌ ময়া
শ্রুত্বা তদপি কৌরব্য যথা শ্রেয়স্তথা কুরু

62.21

বয়ং কিরাতৈঃ সহিতা গচ্ছামো গিরিমুত্তরম্
ব্রাহ্মণৈর্দেবকল্পৈশ্চ বিদ্যাজম্ভকবাতিকৈঃ

62.22

কুঞ্জভূতং গিরিং সর্বমভিতো গন্ধমাদনম্
দীপ্যমানৌষধিগণং সিদ্ধগন্ধর্বসেবিতম্

62.23

তত্র পশ্যামহে সর্বে মধু পীতমমাক্ষিকম্
মরুপ্রপাতে বিষমে নিবিষ্টং কুম্ভসংমিতম্

62.24

আশীবিষৈ রক্ষ্যমাণং কুবেরদয়িতং ভৃশম্
যত্প্রাশ্য পুরুষো মর্ত্যো অমরত্বং নিগচ্ছতি

62.25

অচক্ষুর্লভতে চক্ষুর্বৃদ্ধো ভবতি বৈ যুবা
ইতি তে কথয়ন্তি স্ম ব্রাহ্মণা জম্ভসাধকাঃ

62.26

ততঃ কিরাতাস্তদ্দৃষ্ট্বা প্রার্থয়ন্তো মহীপতে
বিনেশুর্বিষমে তস্মিন্সসর্পে গিরিগহ্বরে

62.27

তথৈব তব পুত্রোঽয়ং পৃথিবীমেক ইচ্ছতি
মধু পশ্যতি সংমোহাত্প্রপাতং নানুপশ্যতি

62.28

দুর্যোধনো যোদ্ধুমনাঃ সমরে সব্যসাচিনা
ন চ পশ্যামি তেজোঽস্য বিক্রমং বা তথাবিধম্

62.29

একেন রথমাস্থায় পৃথিবী যেন নির্জিতা
প্রতীক্ষমাণো যো বীরঃ ক্ষমতে বীক্ষিতং তব

62.30

দ্রুপদো মত্স্যরাজশ্চ সংক্রুদ্ধশ্চ ধনংজয়ঃ
ন শেষয়েয়ুঃ সমরে বায়ুয়ুক্তা ইবাগ্নয়ঃ

62.31

অঙ্কে কুরুষ্ব রাজানং ধৃতরাষ্ট্র যুধিষ্ঠিরম্
যুধ্যতোর্হি দ্বয়োর্যুদ্ধে নৈকান্তেন ভবেজ্জয়ঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.