অধ্যায় 61

61.1

বৈশংপায়ন উবাচ
তথা তু পৃচ্ছন্তমতীব পার্থা;ন্বৈচিত্রবীর্যং তমচিন্তয়িত্বা
উবাচ কর্ণো ধৃতরাষ্ট্রপুত্রং; প্রহর্ষয়ন্সংসদি কৌরবাণাম্

মিথ্যা প্রতিজ্ঞায় ময়া যদস্ত্রং; রামাদ্ধৃতং ব্রহ্মপুরং পুরস্তাৎ
বিজ্ঞায় তেনাস্মি তদৈবমুক্ত;স্তবান্তকালেঽপ্রতিভাস্যতীতি

মহাপরাধে হ্যপি সংনতেন; মহর্ষিণাহং গুরুণা চ শপ্তঃ
শক্তঃ প্রদগ্ধুং হ্যপি তিগ্মতেজাঃ; সসাগরামপ্যবনিং মহর্ষিঃ

প্রসাদিতং হ্যস্য ময়া মনোঽভূ;চ্ছুশ্রূষয়া স্বেন চ পৌরুষেণ
ততস্তদস্ত্রং মম সাবশেষং; তস্মাত্সমর্থোঽস্মি মমৈষ ভারঃ

নিমেষমাত্রং তমৃষিপ্রসাদ;মবাপ্য পাঞ্চালকরূষমত্স্যান্
নিহত্য পার্থাংশ্চ সপুত্রপৌত্রাঁ;ল্লোকানহং শস্ত্রজিতান্প্রপত্স্যে

পিতামহস্তিষ্ঠতু তে সমীপে; দ্রোণশ্চ সর্বে চ নরেন্দ্রমুখ্যাঃ
যথাপ্রধানেন বলেন যাত্বা; পার্থান্হনিষ্যামি মমৈষ ভারঃ

এবং ব্রুবাণং তমুবাচ ভীষ্মঃ; কিং কত্থসে কালপরীতবুদ্ধে
ন কর্ণ জানাসি যথা প্রধানে; হতে হতাঃ স্যুর্ধৃতরাষ্ট্রপুত্রাঃ

যত্খাণ্ডবং দাহয়তা কৃতং হি; কৃষ্ণদ্বিতীয়েন ধনংজয়েন
শ্রুত্বৈব তত্কর্ম নিয়ন্তুমাত্মা; শক্যস্ত্বয়া বৈ সহ বান্ধবেন

যাং চাপি শক্তিং ত্রিদশাধিপস্তে; দদৌ মহাত্মা ভগবান্মহেন্দ্রঃ
ভস্মীকৃতাং তাং পতিতাং বিশীর্ণাং; চক্রাহতাং দ্রক্ষ্যসি কেশবেন

যস্তে শরঃ সর্পমুখো বিভাতি; সদাগ্র্যমাল্যৈর্মহিতঃ প্রয়ত্নাৎ
স পাণ্ডুপুত্রাভিহতঃ শরৌঘৈঃ; সহ ত্বয়া যাস্যতি কর্ণ নাশম্

বাণস্য ভৌমস্য চ কর্ণ হন্তা; কিরীটিনং রক্ষতি বাসুদেবঃ
যস্ত্বাদৃশানাং চ গরীয়সাং চ; হন্তা রিপূণাং তুমুলে প্রগাঢে

কর্ণ উবাচ
অসংশয়ং বৃষ্ণিপতির্যথোক্ত;স্তথা চ ভূয়শ্চ ততো মহাত্মা
অহং যদুক্তঃ পরুষং তু কিংচি;ত্পিতামহস্তস্য ফলং শৃণোতু

ন্যস্যামি শস্ত্রাণি ন জাতু সংখ্যে; পিতামহো দ্রক্ষ্যতি মাং সভায়াম্
ত্বয়ি প্রশান্তে তু মম প্রভাবং; দ্রক্ষ্যন্তি সর্বে ভুবি ভূমিপালাঃ

বৈশংপায়ন উবাচ
ইত্যেবমুক্ত্বা স মহাধনুষ্মা;ন্হিত্বা সভাং স্বং ভবনং জগাম
ভীষ্মস্তু দুর্যোধনমেব রাজ;ন্মধ্যে কুরূণাং প্রহসন্নুবাচ

সত্যপ্রতিজ্ঞঃ কিল সূতপুত্র;স্তথা স ভারং বিষহেত কস্মাৎ
ব্যূহং প্রতিব্যূহ্য শিরাংসি ভিত্ত্বা; লোকক্ষয়ং পশ্যত ভীমসেনাৎ

আবন্ত্যকালিঙ্গজয়দ্রথেষু; বেদিধ্বজে তিষ্ঠতি বাহ্লিকে চ
অহং হনিষ্যামি সদা পরেষাং; সহস্রশশ্চায়ুতশশ্চ যোধান্

যদৈব রামে ভগবত্যনিন্দ্যে; ব্রহ্ম ব্রুবাণঃ কৃতবাংস্তদস্ত্রম্
তদৈব ধর্মশ্চ তপশ্চ নষ্টং; বৈকর্তনস্যাধমপূরুষস্য

অথোক্তবাক্যে নৃপতৌ তু ভীষ্মে; নিক্ষিপ্য শস্ত্রাণি গতে চ কর্ণে
বৈচিত্রবীর্যস্য সুতোঽল্পবুদ্ধি;র্দুর্যোধনঃ শাংতনবং বভাষে