Utshovঅধ্যায় 60
60.1
বৈশংপায়ন উবাচ
পিতুরেতদ্বচঃ শ্রুত্বা ধার্তরাষ্ট্রোঽত্যমর্ষণঃ
আধায় বিপুলং ক্রোধং পুনরেবেদমব্রবীৎ
60.2
অশক্যা দেবসচিবাঃ পার্থাঃ স্যুরিতি যদ্ভবান্
মন্যতে তদ্ভয়ং ব্যেতু ভবতো রাজসত্তম
60.3
অকামদ্বেষসংয়োগাদ্দ্রোহাল্লোভাচ্চ ভারত
উপেক্ষয়া চ ভাবানাং দেবা দেবত্বমাপ্নুবন্
60.4
ইতি দ্বৈপায়নো ব্যাসো নারদশ্চ মহাতপাঃ
জামদগ্ন্যশ্চ রামো নঃ কথামকথয়ত্পুরা
60.5
নৈব মানুষবদ্দেবাঃ প্রবর্তন্তে কদাচন
কামাল্লোভাদনুক্রোশাদ্দ্বেষাচ্চ ভরতর্ষভ
60.6
যদি হ্যগ্নিশ্চ বায়ুশ্চ ধর্ম ইন্দ্রোঽশ্বিনাবপি
কাময়োগাত্প্রবর্তেরন্ন পার্থা দুঃখমাপ্নুয়ুঃ
60.7
তস্মান্ন ভবতা চিন্তা কার্যৈষা স্যাত্কদাচন
দৈবেষ্বপেক্ষকা হ্যেতে শশ্বদ্ভাবেষু ভারত
60.8
অথ চেত্কামসংয়োগাদ্দ্বেষাল্লোভাচ্চ লক্ষ্যতে
দেবেষু দেবপ্রামাণ্যং নৈব তদ্বিক্রমিষ্যতি
60.9
ময়াভিমন্ত্রিতঃ শশ্বজ্জাতবেদাঃ প্রশংসতি
দিধক্ষুঃ সকলাঁল্লোকান্পরিক্ষিপ্য সমন্ততঃ
60.10
যদ্বা পরমকং তেজো যেন যুক্তা দিবৌকসঃ
মমাপ্যনুপমং ভূয়ো দেবেভ্যো বিদ্ধি ভারত
60.11
প্রদীর্যমাণাং বসুধাং গিরীণাং শিখরাণি চ
লোকস্য পশ্যতো রাজন্স্থাপয়াম্যভিমন্ত্রণাৎ
60.12
চেতনাচেতনস্যাস্য জঙ্গমস্থাবরস্য চ
বিনাশায় সমুত্পন্নং মহাঘোরং মহাস্বনম্
60.13
অশ্মবর্ষং চ বায়ুং চ শময়ামীহ নিত্যশঃ
জগতঃ পশ্যতোঽভীক্ষ্ণং ভূতানামনুকম্পয়া
60.14
স্তম্ভিতাস্বপ্সু গচ্ছন্তি ময়া রথপদাতয়ঃ
দেবাসুরাণাং ভাবানামহমেকঃ প্রবর্তিতা
60.15
অক্ষৌহিণীভির্যান্দেশান্যামি কার্যেণ কেনচিৎ
তত্রাপো মে প্রবর্তন্তে যত্র যত্রাভিকাময়ে
60.16
ভয়ানি বিষয়ে রাজন্ব্যালাদীনি ন সন্তি মে
মত্তঃ সুপ্তানি ভূতানি ন হিংসন্তি ভয়ংকরাঃ
60.17
নিকামবর্ষী পর্জন্যো রাজন্বিষয়বাসিনাম্
ধর্মিষ্ঠাশ্চ প্রজাঃ সর্বা ঈতয়শ্চ ন সন্তি মে
60.18
অশ্বিনাবথ বায্বগ্নী মরুদ্ভিঃ সহ বৃত্রহা
ধর্মশ্চৈব ময়া দ্বিষ্টান্নোত্সহন্তেঽভিরক্ষিতুম্
60.19
যদি হ্যেতে সমর্থাঃ স্যুর্মদ্দ্বিষস্ত্রাতুমোজসা
ন স্ম ত্রয়োদশ সমাঃ পার্থা দুঃখমবাপ্নুয়ুঃ
60.20
নৈব দেবা ন গন্ধর্বা নাসুরা ন চ রাক্ষসাঃ
শক্তাস্ত্রাতুং ময়া দ্বিষ্টং সত্যমেতদ্ব্রবীমি তে
60.21
যদভিধ্যাম্যহং শশ্বচ্ছুভং বা যদি বাশুভম্
নৈতদ্বিপন্নপূর্বং মে মিত্রেষ্বরিষু চোভয়োঃ
60.22
ভবিষ্যতীদমিতি বা যদ্ব্রবীমি পরংতপ
নান্যথা ভূতপূর্বং তত্সত্যবাগিতি মাং বিদুঃ
60.23
লোকসাক্ষিকমেতন্মে মাহাত্ম্যং দিক্ষু বিশ্রুতম্
আশ্বাসনার্থং ভবতঃ প্রোক্তং ন শ্লাঘয়া নৃপ
60.24
ন হ্যহং শ্লাঘনো রাজন্ভূতপূর্বঃ কদাচন
অসদাচরিতং হ্যেতদ্যদাত্মানং প্রশংসতি
60.25
পাণ্ডবাংশ্চৈব মত্স্যাংশ্চ পাঞ্চালান্কেকয়ৈঃ সহ
সাত্যকিং বাসুদেবং চ শ্রোতাসি বিজিতান্ময়া
60.26
সরিতঃ সাগরং প্রাপ্য যথা নশ্যন্তি সর্বশঃ
তথৈব তে বিনঙ্ক্ষ্যন্তি মামাসাদ্য সহান্বয়াঃ
60.27
পরা বুদ্ধিঃ পরং তেজো বীর্যং চ পরমং ময়ি
পরা বিদ্যা পরো যোগো মম তেভ্যো বিশিষ্যতে
60.28
পিতামহশ্চ দ্রোণশ্চ কৃপঃ শল্যঃ শলস্তথা
অস্ত্রেষু যত্প্রজানন্তি সর্বং তন্ময়ি বিদ্যতে
60.29
ইত্যুক্ত্বা সংজয়ং ভূয়ঃ পর্যপৃচ্ছত ভারত
জ্ঞাত্বা যুয়ুত্সুঃ কার্যাণি প্রাপ্তকালমরিংদম