Utshovঅধ্যায় 59
59.1
বৈশংপায়ন উবাচ
সংজয়স্য বচঃ শ্রুত্বা প্রজ্ঞাচক্ষুর্নরেশ্বরঃ
ততঃ সংখ্যাতুমারেভে তদ্বচো গুণদোষতঃ
59.2
প্রসংখ্যায় চ সৌক্ষ্ম্যেণ গুণদোষান্বিচক্ষণঃ
যথাবন্মতিতত্ত্বেন জয়কামঃ সুতান্প্রতি
59.3
বলাবলে বিনিশ্চিত্য যাথাতথ্যেন বুদ্ধিমান্
শক্তিং সংখ্যাতুমারেভে তদা বৈ মনুজাধিপঃ
59.4
দেবমানুষয়োঃ শক্ত্যা তেজসা চৈব পাণ্ডবান্
কুরূঞ্শক্ত্যাল্পতরয়া দুর্যোধনমথাব্রবীৎ
59.5
দুর্যোধনেয়ং চিন্তা মে শশ্বন্নাপ্যুপশাম্যতি
সত্যং হ্যেতদহং মন্যে প্রত্যক্ষং নানুমানতঃ
59.6
আত্মজেষু পরং স্নেহং সর্বভূতানি কুর্বতে
প্রিয়াণি চৈষাং কুর্বন্তি যথাশক্তি হিতানি চ
59.7
এবমেবোপকর্তৄণাং প্রায়শো লক্ষয়ামহে
ইচ্ছন্তি বহুলং সন্তঃ প্রতিকর্তুং মহত্প্রিয়ম্
59.8
অগ্নিঃ সাচিব্যকর্তা স্যাত্খাণ্ডবে তত্কৃতং স্মরন্
অর্জুনস্যাতিভীমেঽস্মিন্কুরুপাণ্ডুসমাগমে
59.9
জাতগৃধ্যাভিপন্নাশ্চ পাণ্ডবানামনেকশঃ
ধর্মাদয়ো ভবিষ্যন্তি সমাহূতা দিবৌকসঃ
59.10
ভীষ্মদ্রোণকৃপাদীনাং ভয়াদশনিসংমিতম্
রিরক্ষিষন্তঃ সংরম্ভং গমিষ্যন্তীতি মে মতিঃ
59.11
তে দেবসহিতাঃ পার্থা ন শক্যাঃ প্রতিবীক্ষিতুম্
মানুষেণ নরব্যাঘ্রা বীর্যবন্তোঽস্ত্রপারগাঃ
59.12
দুরাসদং যস্য দিব্যং গাণ্ডীবং ধনুরুত্তমম্
বারুণৌ চাক্ষয়ৌ দিব্যৌ শরপূর্ণৌ মহেষুধী
59.13
বানরশ্চ ধ্বজো দিব্যো নিঃসঙ্গো ধূমবদ্গতিঃ
রথশ্চ চতুরন্তায়াং যস্য নাস্তি সমস্ত্বিষা
59.14
মহামেঘনিভশ্চাপি নির্ঘোষঃ শ্রূয়তে জনৈঃ
মহাশনিসমঃ শব্দঃ শাত্রবাণাং ভয়ংকরঃ
59.15
যং চাতিমানুষং বীর্যে কৃত্স্নো লোকো ব্যবস্যতি
দেবানামপি জেতারং যং বিদুঃ পার্থিবা রণে
59.16
শতানি পঞ্চ চৈবেষূনুদ্বপন্নিব দৃশ্যতে
নিমেষান্তরমাত্রেণ মুঞ্চন্দূরং চ পাতয়ন্
59.17
যমাহ ভীষ্মো দ্রোণশ্চ কৃপো দ্রৌণিস্তথৈব চ
মদ্ররাজস্তথা শল্যো মধ্যস্থা যে চ মানবাঃ
59.18
যুদ্ধায়াবস্থিতং পার্থং পার্থিবৈরতিমানুষৈঃ
অশক্যং রথশার্দূলং পরাজেতুমরিংদমম্
59.19
ক্ষিপত্যেকেন বেগেন পঞ্চ বাণশতানি যঃ
সদৃশং বাহুবীর্যেণ কার্তবীর্যস্য পাণ্ডবম্
59.20
তমর্জুনং মহেষ্বাসং মহেন্দ্রোপেন্দ্ররক্ষিতম্
নিঘ্নন্তমিব পশ্যামি বিমর্দেঽস্মিন্মহামৃধে
59.21
ইত্যেবং চিন্তয়ন্কৃত্স্নমহোরাত্রাণি ভারত
অনিদ্রো নিঃসুখশ্চাস্মি কুরূণাং শমচিন্তয়া
59.22
ক্ষয়োদয়োঽয়ং সুমহান্কুরূণাং প্রত্যুপস্থিতঃ
অস্য চেত্কলহস্যান্তঃ শমাদন্যো ন বিদ্যতে
59.23
শমো মে রোচতে নিত্যং পার্থৈস্তাত ন বিগ্রহঃ
কুরুভ্যো হি সদা মন্যে পাণ্ডবাঞ্শক্তিমত্তরান্