Utshovঅধ্যায় 58
58.1
ধৃতরাষ্ট্র উবাচ
যদব্রূতাং মহাত্মানৌ বাসুদেবধনংজয়ৌ
তন্মে ব্রূহি মহাপ্রাজ্ঞ শুশ্রূষে বচনং তব
58.2
সংজয় উবাচ
শৃণু রাজন্যথা দৃষ্টৌ ময়া কৃষ্ণধনংজয়ৌ
ঊচতুশ্চাপি যদ্বীরৌ তত্তে বক্ষ্যামি ভারত
58.3
পাদাঙ্গুলীরভিপ্রেক্ষন্প্রয়তোঽহং কৃতাঞ্জলিঃ
শুদ্ধান্তং প্রাবিশং রাজন্নাখ্যাতুং নরদেবয়োঃ
58.4
নৈবাভিমন্যুর্ন যমৌ তং দেশমভিয়ান্তি বৈ
যত্র কৃষ্ণৌ চ কৃষ্ণা চ সত্যভামা চ ভামিনী
58.5
উভৌ মধ্বাসবক্ষীবাবুভৌ চন্দনরূষিতৌ
স্রগ্বিণৌ বরবস্ত্রৌ তৌ দিব্যাভরণভূষিতৌ
58.6
নৈকরত্নবিচিত্রং তু কাঞ্চনং মহদাসনম্
বিবিধাস্তরণাস্তীর্ণং যত্রাসাতামরিংদমৌ
58.7
অর্জুনোত্সঙ্গগৌ পাদৌ কেশবস্যোপলক্ষয়ে
অর্জুনস্য চ কৃষ্ণায়াং সত্যায়াং চ মহাত্মনঃ
58.8
কাঞ্চনং পাদপীঠং তু পার্থো মে প্রাদিশত্তদা
তদহং পাণিনা স্পৃষ্ট্বা ততো ভূমাবুপাবিশম্
58.9
ঊর্ধ্বরেখতলৌ পাদৌ পার্থস্য শুভলক্ষণৌ
পাদপীঠাদপহৃতৌ তত্রাপশ্যমহং শুভৌ
58.10
শ্যামৌ বৃহন্তৌ তরুণৌ শালস্কন্ধাবিবোদ্গতৌ
একাসনগতৌ দৃষ্ট্বা ভয়ং মাং মহদাবিশৎ
58.11
ইন্দ্রবিষ্ণুসমাবেতৌ মন্দাত্মা নাববুধ্যতে
সংশ্রয়াদ্দ্রোণভীষ্মাভ্যাং কর্ণস্য চ বিকত্থনাৎ
58.12
নিদেশস্থাবিমৌ যস্য মানসস্তস্য সেত্স্যতে
সংকল্পো ধর্মরাজস্য নিশ্চয়ো মে তদাভবৎ
58.13
সত্কৃতশ্চান্নপানাভ্যামাচ্ছন্নো লব্ধসত্ক্রিয়ঃ
অঞ্জলিং মূর্ধ্নি সংধায় তৌ সংদেশমচোদয়ম্
58.14
ধনুর্বাণোচিতেনৈকপাণিনা শুভলক্ষণম্
পাদমানময়ন্পার্থঃ কেশবং সমচোদয়ৎ
58.15
ইন্দ্রকেতুরিবোত্থায় সর্বাভরণভূষিতঃ
ইন্দ্রবীর্যোপমঃ কৃষ্ণঃ সংবিষ্টো মাভ্যভাষত
58.16
বাচং স বদতাং শ্রেষ্ঠো হ্লাদিনীং বচনক্ষমাম্
ত্রাসনীং ধার্তরাষ্ট্রাণাং মৃদুপূর্বাং সুদারুণাম্
58.17
বাচং তাং বচনার্হস্য শিক্ষাক্ষরসমন্বিতাম্
অশ্রৌষমহমিষ্টার্থাং পশ্চাদ্ধৃদয়শোষিণীম্
58.18
বাসুদেব উবাচ
সংজয়েদং বচো ব্রূয়া ধৃতরাষ্ট্রং মনীষিণম্
শৃণ্বতঃ কুরুমুখ্যস্য দ্রোণস্যাপি চ শৃণ্বতঃ
58.19
যজধ্বং বিপুলৈর্যজ্ঞৈর্বিপ্রেভ্যো দত্ত দক্ষিণাঃ
পুত্রৈর্দারৈশ্চ মোদধ্বং মহদ্বো ভয়মাগতম্
58.20
অর্থাংস্ত্যজত পাত্রেভ্যঃ সুতান্প্রাপ্নুত কামজান্
প্রিয়ং প্রিয়েভ্যশ্চরত রাজা হি ত্বরতে জয়ে
58.21
ঋণমেতত্প্রবৃদ্ধং মে হৃদয়ান্নাপসর্পতি
যদ্গোবিন্দেতি চুক্রোশ কৃষ্ণা মাং দূরবাসিনম্
58.22
তেজোময়ং দুরাধর্ষং গাণ্ডীবং যস্য কার্মুকম্
মদ্দ্বিতীয়েন তেনেহ বৈরং বঃ সব্যসাচিনা
58.23
মদ্দ্বিতীয়ং পুনঃ পার্থং কঃ প্রার্থয়িতুমিচ্ছতি
যো ন কালপরীতো বাপ্যপি সাক্ষাত্পুরংদরঃ
58.24
বাহুভ্যামুদ্বহেদ্ভূমিং দহেত্ক্রুদ্ধ ইমাঃ প্রজাঃ
পাতয়েত্ত্রিদিবাদ্দেবান্যোঽর্জুনং সমরে জয়েৎ
58.25
দেবাসুরমনুষ্যেষু যক্ষগন্ধর্বভোগিষু
ন তং পশ্যাম্যহং যুদ্ধে পাণ্ডবং যোঽভ্যয়াদ্রণে
58.26
যত্তদ্বিরাটনগরে শ্রূয়তে মহদদ্ভুতম্
একস্য চ বহূনাং চ পর্যাপ্তং তন্নিদর্শনম্
58.27
একেন পাণ্ডুপুত্রেণ বিরাটনগরে যদা
ভগ্নাঃ পলায়ন্ত দিশঃ পর্যাপ্তং তন্নিদর্শনম্
58.28
বলং বীর্যং চ তেজশ্চ শীঘ্রতা লঘুহস্ততা
অবিষাদশ্চ ধৈর্যং চ পার্থান্নান্যত্র বিদ্যতে
58.29
সংজয় উবাচ
ইত্যব্রবীদ্ধৃষীকেশঃ পার্থমুদ্ধর্ষয়ন্গিরা
গর্জন্সময়বর্ষীব গগনে পাকশাসনঃ
58.30
কেশবস্য বচঃ শ্রুত্বা কিরীটী শ্বেতবাহনঃ
অর্জুনস্তন্মহদ্বাক্যমব্রবীল্লোমহর্ষণম্