অধ্যায় 57

57.1

ধৃতরাষ্ট্র উবাচ
ক্ষত্রতেজা ব্রহ্মচারী কৌমারাদপি পাণ্ডবঃ
তেন সংয়ুগমেষ্যন্তি মন্দা বিলপতো মম

57.2

দুর্যোধন নিবর্তস্ব যুদ্ধাদ্ভরতসত্তম
ন হি যুদ্ধং প্রশংসন্তি সর্বাবস্থমরিংদম

57.3

অলমর্ধং পৃথিব্যাস্তে সহামাত্যস্য জীবিতুম্
প্রয়চ্ছ পাণ্ডুপুত্রাণাং যথোচিতমরিংদম

57.4

এতদ্ধি কুরবঃ সর্বে মন্যন্তে ধর্মসংহিতম্
যত্ত্বং প্রশান্তিমিচ্ছেথাঃ পাণ্ডুপুত্রৈর্মহাত্মভিঃ

57.5

অঙ্গেমাং সমবেক্ষস্ব পুত্র স্বামেব বাহিনীম্
জাত এব তব স্রাবস্ত্বং তু মোহান্ন বুধ্যসে

57.6

ন হ্যহং যুদ্ধমিচ্ছামি নৈতদিচ্ছতি বাহ্লিকঃ
ন চ ভীষ্মো ন চ দ্রোণো নাশ্বত্থামা ন সংজয়ঃ

57.7

ন সোমদত্তো ন শল্যো ন কৃপো যুদ্ধমিচ্ছতি
সত্যব্রতঃ পুরুমিত্রো জয়ো ভূরিশ্রবাস্তথা

57.8

যেষু সংপ্রতিতিষ্ঠেয়ুঃ কুরবঃ পীডিতাঃ পরৈঃ
তে যুদ্ধং নাভিনন্দন্তি তত্তুভ্যং তাত রোচতাম্

57.9

ন ত্বং করোষি কামেন কর্ণঃ কারয়িতা তব
দুঃশাসনশ্চ পাপাত্মা শকুনিশ্চাপি সৌবলঃ

57.10

দুর্যোধন উবাচ
নাহং ভবতি ন দ্রোণে নাশ্বত্থাম্নি ন সংজয়ে
ন বিকর্ণে ন কাম্বোজে ন কৃপে ন চ বাহ্লিকে

57.11

সত্যব্রতে পুরুমিত্রে ভূরিশ্রবসি বা পুনঃ
অন্যেষু বা তাবকেষু ভারং কৃত্বা সমাহ্বয়ে

57.12

অহং চ তাত কর্ণশ্চ রণয়জ্ঞং বিতত্য বৈ
যুধিষ্ঠিরং পশুং কৃত্বা দীক্ষিতৌ ভরতর্ষভ

57.13

রথো বেদী স্রুবঃ খড্গো গদা স্রুক্কবচং সদঃ
চাতুর্হোত্রং চ ধুর্যা মে শরা দর্ভা হবির্যশঃ

57.14

আত্ময়জ্ঞেন নৃপতে ইষ্ট্বা বৈবস্বতং রণে
বিজিত্য স্বয়মেষ্যাবো হতামিত্রৌ শ্রিয়া বৃতৌ

57.15

অহং চ তাত কর্ণশ্চ ভ্রাতা দুঃশাসনশ্চ মে
এতে বয়ং হনিষ্যামঃ পাণ্ডবান্সমরে ত্রয়ঃ

57.16

অহং হি পাণ্ডবান্হত্বা প্রশাস্তা পৃথিবীমিমাম্
মাং বা হত্বা পাণ্ডুপুত্রা ভোক্তারঃ পৃথিবীমিমাম্

57.17

ত্যক্তং মে জীবিতং রাজন্ধনং রাজ্যং চ পার্থিব
ন জাতু পাণ্ডবৈঃ সার্ধং বসেয়মহমচ্যুত

57.18

যাবদ্ধি সূচ্যাস্তীক্ষ্ণায়া বিধ্যেদগ্রেণ মারিষ
তাবদপ্যপরিত্যাজ্যং ভূমের্নঃ পাণ্ডবান্প্রতি

57.19

ধৃতরাষ্ট্র উবাচ
সর্বান্বস্তাত শোচামি ত্যক্তো দুর্যোধনো ময়া
যে মন্দমনুয়াস্যধ্বং যান্তং বৈবস্বতক্ষয়ম্

57.20

রুরূণামিব যূথেষু ব্যাঘ্রাঃ প্রহরতাং বরাঃ
বরান্বরান্হনিষ্যন্তি সমেতা যুধি পাণ্ডবাঃ

57.21

প্রতীপমিব মে ভাতি যুয়ুধানেন ভারতী
ব্যস্তা সীমন্তিনী ত্রস্তা প্রমৃষ্টা দীর্ঘবাহুনা

57.22

সংপূর্ণং পূরয়ন্ভূয়ো বলং পার্থস্য মাধবঃ
শৈনেয়ঃ সমরে স্থাতা বীজবত্প্রবপঞ্শরান্

57.23

সেনামুখে প্রয়ুদ্ধানাং ভীমসেনো ভবিষ্যতি
তং সর্বে সংশ্রয়িষ্যন্তি প্রাকারমকুতোভয়ম্

57.24

যদা দ্রক্ষ্যসি ভীমেন কুঞ্জরান্বিনিপাতিতান্
বিশীর্ণদন্তান্গির্যাভান্ভিন্নকুম্ভান্সশোণিতান্

57.25

তানভিপ্রেক্ষ্য সংগ্রামে বিশীর্ণানিব পর্বতান্
ভীতো ভীমস্য সংস্পর্শাত্স্মর্তাসি বচনস্য মে

57.26

নির্দগ্ধং ভীমসেনেন সৈন্যং হতরথদ্বিপম্
গতিমগ্নেরিব প্রেক্ষ্য স্মর্তাসি বচনস্য মে

57.27

মহদ্বো ভয়মাগামি ন চেচ্ছাম্যথ পাণ্ডবৈঃ
গদয়া ভীমসেনেন হতাঃ শমমুপৈষ্যথ

57.28

মহাবনমিব ছিন্নং যদা দ্রক্ষ্যসি পাতিতম্
বলং কুরূণাং সংগ্রামে তদা স্মর্তাসি মে বচঃ

57.29

বৈশংপায়ন উবাচ
এতাবদুক্ত্বা রাজা তু স সর্বান্পৃথিবীপতীন্
অনুভাষ্য মহারাজ পুনঃ পপ্রচ্ছ সংজয়ম্

Contains text from DharmicData, made available under the Open Database License (ODbL). Simple meanings are written by AI and can contain mistakes.