Utshovঅধ্যায় 56
56.1
ধৃতরাষ্ট্র উবাচ
কাংস্তত্র সংজয়াপশ্যঃ প্রত্যর্থেন সমাগতান্
যে যোত্স্যন্তে পাণ্ডবার্থে পুত্রস্য মম বাহিনীম্
56.2
সংজয় উবাচ
মুখ্যমন্ধকবৃষ্ণীনামপশ্যং কৃষ্ণমাগতম্
চেকিতানং চ তত্রৈব যুয়ুধানং চ সাত্যকিম্
56.3
পৃথগক্ষৌহিণীভ্যাং তৌ পাণ্ডবানভিসংশ্রিতৌ
মহারথৌ সমাখ্যাতাবুভৌ পুরুষমানিনৌ
56.4
অক্ষৌহিণ্যাথ পাঞ্চাল্যো দশভিস্তনয়ৈর্বৃতঃ
সত্যজিত্প্রমুখৈর্বীরৈর্ধৃষ্টদ্যুম্নপুরোগমৈঃ
56.5
দ্রুপদো বর্ধয়ন্মানং শিখণ্ডিপরিপালিতঃ
উপায়াত্সর্বসৈন্যানাং প্রতিচ্ছাদ্য তদা বপুঃ
56.6
বিরাটঃ সহ পুত্রাভ্যাং শঙ্খেনৈবোত্তরেণ চ
সূর্যদত্তাদিভির্বীরৈর্মদিরাশ্বপুরোগমৈঃ
56.7
সহিতঃ পৃথিবীপালো ভ্রাতৃভিস্তনয়ৈস্তথা
অক্ষৌহিণ্যৈব সৈন্যস্য বৃতঃ পার্থং সমাশ্রিতঃ
56.8
জারাসংধির্মাগধশ্চ ধৃষ্টকেতুশ্চ চেদিরাট্
পৃথক্পৃথগনুপ্রাপ্তৌ পৃথগক্ষৌহিণীবৃতৌ
56.9
কেকয়া ভ্রাতরঃ পঞ্চ সর্বে লোহিতকধ্বজাঃ
অক্ষৌহিণীপরিবৃতাঃ পাণ্ডবানভিসংশ্রিতাঃ
56.10
এতানেতাবতস্তত্র যানপশ্যং সমাগতান্
যে পাণ্ডবার্থে যোত্স্যন্তি ধার্তরাষ্ট্রস্য বাহিনীম্
56.11
যো বেদ মানুষং ব্যূহং দৈবং গান্ধর্বমাসুরম্
স তস্য সেনাপ্রমুখে ধৃষ্টদ্যুম্নো মহামনাঃ
56.12
ভীষ্মঃ শাংতনবো রাজন্ভাগঃ কৢপ্তঃ শিখণ্ডিনঃ
তং বিরাটোঽনু সংয়াতা সহ মত্স্যৈঃ প্রহারিভিঃ
56.13
জ্যেষ্ঠস্য পাণ্ডুপুত্রস্য ভাগো মদ্রাধিপো বলী
তৌ তু তত্রাব্রুবন্কেচিদ্বিষমৌ নো মতাবিতি
56.14
দুর্যোধনঃ সহসুতঃ সার্ধং ভ্রাতৃশতেন চ
প্রাচ্যাশ্চ দাক্ষিণাত্যাশ্চ ভীমসেনস্য ভাগতঃ
56.15
অর্জুনস্য তু ভাগেন কর্ণো বৈকর্তনো মতঃ
অশ্বত্থামা বিকর্ণশ্চ সৈন্ধবশ্চ জয়দ্রথঃ
56.16
অশক্যাশ্চৈব যে কেচিত্পৃথিব্যাং শূরমানিনঃ
সর্বাংস্তানর্জুনঃ পার্থঃ কল্পয়ামাস ভাগতঃ
56.17
মহেষ্বাসা রাজপুত্রা ভ্রাতরঃ পঞ্চ কেকয়াঃ
কেকয়ানেব ভাগেন কৃত্বা যোত্স্যন্তি সংয়ুগে
56.18
তেষামেব কৃতো ভাগো মালবাঃ শাল্বকেকয়াঃ
ত্রিগর্তানাং চ দ্বৌ মুখ্যৌ যৌ তৌ সংশপ্তকাবিতি
56.19
দুর্যোধনসুতাঃ সর্বে তথা দুঃশাসনস্য চ
সৌভদ্রেণ কৃতো ভাগো রাজা চৈব বৃহদ্বলঃ
56.20
দ্রৌপদেয়া মহেষ্বাসাঃ সুবর্ণবিকৃতধ্বজাঃ
ধৃষ্টদ্যুম্নমুখা দ্রোণমভিয়াস্যন্তি ভারত
56.21
চেকিতানঃ সোমদত্তং দ্বৈরথে যোদ্ধুমিচ্ছতি
ভোজং তু কৃতবর্মাণং যুয়ুধানো যুয়ুত্সতি
56.22
সহদেবস্তু মাদ্রেয়ঃ শূরঃ সংক্রন্দনো যুধি
স্বমংশং কল্পয়ামাস শ্যালং তে সুবলাত্মজম্
56.23
উলূকং চাপি কৈতব্যং যে চ সারস্বতা গণাঃ
নকুলঃ কল্পয়ামাস ভাগং মাদ্রবতীসুতঃ
56.24
যে চান্যে পার্থিবা রাজন্প্রত্যুদ্যাস্যন্তি সংয়ুগে
সমাহ্বানেন তাংশ্চাপি পাণ্ডুপুত্রা অকল্পয়ন্
56.25
এবমেষামনীকানি প্রবিভক্তানি ভাগশঃ
যত্তে কার্যং সপুত্রস্য ক্রিয়তাং তদকালিকম্
56.26
ধৃতরাষ্ট্র উবাচ
ন সন্তি সর্বে পুত্রা মে মূঢা দুর্দ্যূতদেবিনঃ
যেষাং যুদ্ধং বলবতা ভীমেন রণমূর্ধনি
56.27
রাজানঃ পার্থিবাঃ সর্বে প্রোক্ষিতাঃ কালধর্মণা
গাণ্ডীবাগ্নিং প্রবেক্ষ্যন্তি পতঙ্গা ইব পাবকম্
56.28
বিদ্রুতাং বাহিনীং মন্যে কৃতবৈরৈর্মহাত্মভিঃ
তাং রণে কেঽনুয়াস্যন্তি প্রভগ্নাং পাণ্ডবৈর্যুধি
56.29
সর্বে হ্যতিরথাঃ শূরাঃ কীর্তিমন্তঃ প্রতাপিনঃ
সূর্যপাবকয়োস্তুল্যাস্তেজসা সমিতিংজয়াঃ
56.30
যেষাং যুধিষ্ঠিরো নেতা গোপ্তা চ মধুসূদনঃ
যোধৌ চ পাণ্ডবৌ বীরৌ সব্যসাচিবৃকোদরৌ
56.31
নকুলঃ সহদেবশ্চ ধৃষ্টদ্যুম্নশ্চ পার্ষতঃ
সাত্যকির্দ্রুপদশ্চৈব ধৃষ্টদ্যুম্নস্য চাত্মজঃ
56.32
উত্তমৌজাশ্চ পাঞ্চাল্যো যুধামন্যুশ্চ দুর্জয়ঃ
শিখণ্ডী ক্ষত্রদেবশ্চ তথা বৈরাটিরুত্তরঃ
56.33
কাশয়শ্চেদয়শ্চৈব মত্স্যাঃ সর্বে চ সৃঞ্জয়াঃ
বিরাটপুত্রো বভ্রুশ্চ পাঞ্চালাশ্চ প্রভদ্রকাঃ
56.34
যেষামিন্দ্রোঽপ্যকামানাং ন হরেত্পৃথিবীমিমাম্
বীরাণাং রণধীরাণাং যে ভিন্দ্যুঃ পর্বতানপি
56.35
তান্সর্বান্গুণসংপন্নানমনুষ্যপ্রতাপিনঃ
ক্রোশতো মম দুষ্পুত্রো যোদ্ধুমিচ্ছতি সংজয়
56.36
দুর্যোধন উবাচ
উভৌ স্ব একজাতীয়ৌ তথোভৌ ভূমিগোচরৌ
অথ কস্মাত্পাণ্ডবানামেকতো মন্যসে জয়ম্
56.37
পিতামহং চ দ্রোণং চ কৃপং কর্ণং চ দুর্জয়ম্
জয়দ্রথং সোমদত্তমশ্বত্থামানমেব চ
56.38
সুচেতসো মহেষ্বাসানিন্দ্রোঽপি সহিতোঽমরৈঃ
অশক্তঃ সমরে জেতুং কিং পুনস্তাত পাণ্ডবাঃ
56.39
সর্বা চ পৃথিবী সৃষ্টা মদর্থে তাত পাণ্ডবান্
আর্যান্ধৃতিমতঃ শূরানগ্নিকল্পান্প্রবাধিতুম্
56.40
ন মামকান্পাণ্ডবাস্তে সমর্থাঃ প্রতিবীক্ষিতুম্
পরাক্রান্তো হ্যহং পাণ্ডূন্সপুত্রান্যোদ্ধুমাহবে
56.41
মত্প্রিয়ং পার্থিবাঃ সর্বে যে চিকীর্ষন্তি ভারত
তে তানাবারয়িষ্যন্তি ঐণেয়ানিব তন্তুনা
56.42
মহতা রথবংশেন শরজালৈশ্চ মামকৈঃ
অভিদ্রুতা ভবিষ্যন্তি পাঞ্চালাঃ পাণ্ডবৈঃ সহ
56.43
ধৃতরাষ্ট্র উবাচ
উন্মত্ত ইব মে পুত্রো বিলপত্যেষ সংজয়
ন হি শক্তো যুধা জেতুং ধর্মরাজং যুধিষ্ঠিরম্
56.44
জানাতি হি সদা ভীষ্মঃ পাণ্ডবানাং যশস্বিনাম্
বলবত্তাং সপুত্রাণাং ধর্মজ্ঞানাং মহাত্মনাম্
56.45
যতো নারোচয়মহং বিগ্রহং তৈর্মহাত্মভিঃ
কিং তু সংজয় মে ব্রূহি পুনস্তেষাং বিচেষ্টিতম্
56.46
কস্তাংস্তরস্বিনো ভূয়ঃ সংদীপয়তি পাণ্ডবান্
অর্চিষ্মতো মহেষ্বাসান্হবিষা পাবকানিব
56.47
সংজয় উবাচ
ধৃষ্টদ্যুম্নঃ সদৈবৈতান্সংদীপয়তি ভারত
যুধ্যধ্বমিতি মা ভৈষ্ট যুদ্ধাদ্ভরতসত্তমাঃ
56.48
যে কেচিত্পার্থিবাস্তত্র ধার্তরাষ্ট্রেণ সংবৃতাঃ
যুদ্ধে সমাগমিষ্যন্তি তুমুলে কবচহ্রদে
56.49
তান্সর্বানাহবে ক্রুদ্ধান্সানুবন্ধান্সমাগতান্
অহমেকঃ সমাদাস্যে তিমির্মত্স্যানিবৌদকান্
56.50
ভীষ্মং দ্রোণং কৃপং কর্ণং দ্রৌণিং শল্যং সুয়োধনম্
এতাংশ্চাপি নিরোত্স্যামি বেলেব মকরালয়ম্
56.51
তথা ব্রুবাণং ধর্মাত্মা প্রাহ রাজা যুধিষ্ঠিরঃ
তব ধৈর্যং চ বীর্যং চ পাঞ্চালাঃ পাণ্ডবৈঃ সহ
সর্বে সমধিরূঢাঃ স্ম সংগ্রামান্নঃ সমুদ্ধর
56.52
জানামি ত্বাং মহাবাহো ক্ষত্রধর্মে ব্যবস্থিতম্
সমর্থমেকং পর্যাপ্তং কৌরবাণাং যুয়ুত্সতাম্
ভবতা যদ্বিধাতব্যং তন্নঃ শ্রেয়ঃ পরংতপ
56.53
সংগ্রামাদপয়াতানাং ভগ্নানাং শরণৈষিণাম্
পৌরুষং দর্শয়ঞ্শূরো যস্তিষ্ঠেদগ্রতঃ পুমান্
ক্রীণীয়াত্তং সহস্রেণ নীতিমন্নাম তত্পদম্
56.54
স ত্বং শূরশ্চ বীরশ্চ বিক্রান্তশ্চ নরর্ষভ
ভয়ার্তানাং পরিত্রাতা সংয়ুগেষু ন সংশয়ঃ
56.55
এবং ব্রুবতি কৌন্তেয়ে ধর্মাত্মনি যুধিষ্ঠিরে
ধৃষ্টদ্যুম্ন উবাচেদং মাং বচো গতসাধ্বসঃ
56.56
সর্বাঞ্জনপদান্সূত যোধা দুর্যোধনস্য যে
সবাহ্লীকান্কুরূন্ব্রূয়াঃ প্রাতিপেয়াঞ্শরদ্বতঃ
56.57
সূতপুত্রং তথা দ্রোণং সহপুত্রং জয়দ্রথম্
দুঃশাসনং বিকর্ণং চ তথা দুর্যোধনং নৃপম্
56.58
ভীষ্মং চৈব ব্রূহি গত্বা ত্বমাশু; যুধিষ্ঠিরং সাধুনৈবাভ্যুপেত
মা বো বধীদর্জুনো দেবগুপ্তঃ; ক্ষিপ্রং যাচধ্বং পাণ্ডবং লোকবীরম্
56.59
নৈতাদৃশো হি যোধোঽস্তি পৃথিব্যামিহ কশ্চন
যথাবিধঃ সব্যসাচী পাণ্ডবঃ শস্ত্রবিত্তমঃ
56.60
দেবৈর্হি সংভৃতো দিব্যো রথো গাণ্ডীবধন্বনঃ
ন স জেয়ো মনুষ্যেণ মা স্ম কৃধ্বং মনো যুধি