অধ্যায় 55

55.1

দুর্যোধন উবাচ
অক্ষৌহিণীঃ সপ্ত লব্ধ্বা রাজভিঃ সহ সংজয়
কিং স্বিদিচ্ছতি কৌন্তেয়ো যুদ্ধপ্রেপ্সুর্যুধিষ্ঠিরঃ

সংজয় উবাচ
অতীব মুদিতো রাজন্যুদ্ধপ্রেপ্সুর্যুধিষ্ঠিরঃ
ভীমসেনার্জুনৌ চোভৌ যমাবপি ন বিভ্যতঃ

রথং তু দিব্যং কৌন্তেয়ঃ সর্বা বিভ্রাজয়ন্দিশঃ
মন্ত্রং জিজ্ঞাসমানঃ সন্বীভত্সুঃ সময়োজয়ৎ

তমপশ্যাম সংনদ্ধং মেঘং বিদ্যুত্প্রভং যথা
স মন্ত্রান্সমভিধ্যায় হৃষ্যমাণোঽভ্যভাষত

পূর্বরূপমিদং পশ্য বয়ং জেষ্যাম সংজয়
বীভত্সুর্মাং যথোবাচ তথাবৈম্যহমপ্যুত

দুর্যোধন উবাচ
প্রশংসস্যভিনন্দংস্তান্পার্থানক্ষপরাজিতান্
অর্জুনস্য রথে ব্রূহি কথমশ্বাঃ কথং ধ্বজঃ

সংজয় উবাচ
ভৌবনঃ সহ শক্রেণ বহুচিত্রং বিশাং পতে
রূপাণি কল্পয়ামাস ত্বষ্টা ধাত্রা সহাভিভো

ধ্বজে হি তস্মিন্রূপাণি চক্রুস্তে দেবমায়য়া
মহাধনানি দিব্যানি মহান্তি চ লঘূনি চ

সর্বা দিশো যোজনমাত্রমন্তরং; স তির্যগূর্ধ্বং চ রুরোধ বৈ ধ্বজঃ
ন সংসজ্জেত্তরুভিঃ সংবৃতোঽপি; তথা হি মায়া বিহিতা ভৌবনেন

যথাকাশে শক্রধনুঃ প্রকাশতে; ন চৈকবর্ণং ন চ বিদ্ম কিং নু তৎ
তথা ধ্বজো বিহিতো ভৌবনেন; বহ্বাকারং দৃশ্যতে রূপমস্য

যথাগ্নিধূমো দিবমেতি রুদ্ধ্বা; বর্ণান্বিভ্রত্তৈজসং তচ্ছরীরম্
তথা ধ্বজো বিহিতো ভৌবনেন; ন চেদ্ভারো ভবিতা নোত রোধঃ

শ্বেতাস্তস্মিন্বাতবেগাঃ সদশ্বা; দিব্যা যুক্তাশ্চিত্ররথেন দত্তাঃ
শতং যত্তত্পূর্যতে নিত্যকালং; হতং হতং দত্তবরং পুরস্তাৎ

তথা রাজ্ঞো দন্তবর্ণা বৃহন্তো; রথে যুক্তা ভান্তি তদ্বীর্যতুল্যাঃ
ঋশ্যপ্রখ্যা ভীমসেনস্য বাহা; রণে বায়োস্তুল্যবেগা বভূবুঃ

কল্মাষাঙ্গাস্তিত্তিরিচিত্রপৃষ্ঠা; ভ্রাত্রা দত্তাঃ প্রীয়তা ফল্গুনেন
ভ্রাতুর্বীরস্য স্বৈস্তুরংগৈর্বিশিষ্টা; মুদা যুক্তাঃ সহদেবং বহন্তি

মাদ্রীপুত্রং নকুলং ত্বাজমীঢং; মহেন্দ্রদত্তা হরয়ো বাজিমুখ্যাঃ
সমা বায়োর্বলবন্তস্তরস্বিনো; বহন্তি বীরং বৃত্রশত্রুং যথেন্দ্রম্

তুল্যাশ্চৈভির্বয়সা বিক্রমেণ; জবেন চৈবাপ্রতিরূপাঃ সদশ্বাঃ
সৌভদ্রাদীন্দ্রৌপদেয়ান্কুমারা;ন্বহন্ত্যশ্বা দেবদত্তা বৃহন্তঃ