Utshovঅধ্যায় 54
54.1
দুর্যোধন উবাচ
ন ভেতব্যং মহারাজ ন শোচ্যা ভবতা বয়ম্
সমর্থাঃ স্ম পরান্রাজন্বিজেতুং সমরে বিভো
54.2
বনং প্রব্রাজিতান্পার্থান্যদায়ান্মধুসূদনঃ
মহতা বলচক্রেণ পররাষ্ট্রাবমর্দিনা
54.3
কেকয়া ধৃষ্টকেতুশ্চ ধৃষ্টদ্যুম্নশ্চ পার্ষতঃ
রাজানশ্চান্বয়ুঃ পার্থান্বহবোঽন্যেঽনুয়ায়িনঃ
54.4
ইন্দ্রপ্রস্থস্য চাদূরাত্সমাজগ্মুর্মহারথাঃ
ব্যগর্হয়ংশ্চ সংগম্য ভবন্তং কুরুভিঃ সহ
54.5
তে যুধিষ্ঠিরমাসীনমজিনৈঃ প্রতিবাসিতম্
কৃষ্ণপ্রধানাঃ সংহত্য পর্যুপাসন্ত ভারত
54.6
প্রত্যাদানং চ রাজ্যস্য কার্যমূচুর্নরাধিপাঃ
ভবতঃ সানুবন্ধস্য সমুচ্ছেদং চিকীর্ষবঃ
54.7
শ্রুত্বা চৈতন্ময়োক্তাস্তু ভীষ্মদ্রোণকৃপাস্তদা
জ্ঞাতিক্ষয়ভয়াদ্রাজন্ভীতেন ভরতর্ষভ
54.8
ন তে স্থাস্যন্তি সময়ে পাণ্ডবা ইতি মে মতিঃ
সমুচ্ছেদং হি নঃ কৃত্স্নং বাসুদেবশ্চিকীর্ষতি
54.9
ঋতে চ বিদুরং সর্বে যূয়ং বধ্যা মহাত্মনঃ
ধৃতরাষ্ট্রশ্চ ধর্মজ্ঞো ন বধ্যঃ কুরুসত্তমঃ
54.10
সমুচ্ছেদং চ কৃত্স্নং নঃ কৃত্বা তাত জনার্দনঃ
একরাজ্যং কুরূণাং স্ম চিকীর্ষতি যুধিষ্ঠিরে
54.11
তত্র কিং প্রাপ্তকালং নঃ প্রণিপাতঃ পলায়নম্
প্রাণান্বা সংপরিত্যজ্য প্রতিয়ুধ্যামহে পরান্
54.12
প্রতিয়ুদ্ধে তু নিয়তঃ স্যাদস্মাকং পরাজয়ঃ
যুধিষ্ঠিরস্য সর্বে হি পার্থিবা বশবর্তিনঃ
54.13
বিরক্তরাষ্ট্রাশ্চ বয়ং মিত্রাণি কুপিতানি নঃ
ধিক্কৃতাঃ পার্থিবৈঃ সর্বৈঃ স্বজনেন চ সর্বশঃ
54.14
প্রণিপাতে তু দোষোঽস্তি বন্ধূনাং শাশ্বতীঃ সমাঃ
পিতরং ত্বেব শোচামি প্রজ্ঞানেত্রং জনেশ্বরম্
মত্কৃতে দুঃখমাপন্নং ক্লেশং প্রাপ্তমনন্তকম্
54.15
কৃতং হি তব পুত্রৈশ্চ পরেষামবরোধনম্
মত্প্রিয়ার্থং পুরৈবৈতদ্বিদিতং তে নরোত্তম
54.16
তে রাজ্ঞো ধৃতরাষ্ট্রস্য সামাত্যস্য মহারথাঃ
বৈরং প্রতিকরিষ্যন্তি কুলোচ্ছেদেন পাণ্ডবাঃ
54.17
ততো দ্রোণোঽব্রবীদ্ভীষ্মঃ কৃপো দ্রৌণিশ্চ ভারত
মত্বা মাং মহতীং চিন্তামাস্থিতং ব্যথিতেন্দ্রিয়ম্
54.18
অভিদ্রুগ্ধাঃ পরে চেন্নো ন ভেতব্যং পরংতপ
অসমর্থাঃ পরে জেতুমস্মান্যুধি জনেশ্বর
54.19
একৈকশঃ সমর্থাঃ স্মো বিজেতুং সর্বপার্থিবান্
আগচ্ছন্তু বিনেষ্যামো দর্পমেষাং শিতৈঃ শরৈঃ
54.20
পুরৈকেন হি ভীষ্মেণ বিজিতাঃ সর্বপার্থিবাঃ
মৃতে পিতর্যভিক্রুদ্ধো রথেনৈকেন ভারত
54.21
জঘান সুবহূংস্তেষাং সংরব্ধঃ কুরুসত্তমঃ
ততস্তে শরণং জগ্মুর্দেবব্রতমিমং ভয়াৎ
54.22
স ভীষ্মঃ সুসমর্থোঽয়মস্মাভিঃ সহিতো রণে
পরান্বিজেতুং তস্মাত্তে ব্যেতু ভীর্ভরতর্ষভ
ইত্যেষাং নিশ্চয়ো হ্যাসীত্তত্কালমমিতৌজসাম্
54.23
পুরা পরেষাং পৃথিবী কৃত্স্নাসীদ্বশবর্তিনী
অস্মান্পুনরমী নাদ্য সমর্থা জেতুমাহবে
ছিন্নপক্ষাঃ পরে হ্যদ্য বীর্যহীনাশ্চ পাণ্ডবাঃ
54.24
অস্মত্সংস্থা চ পৃথিবী বর্ততে ভরতর্ষভ
একার্থাঃ সুখদুঃখেষু ময়ানীতাশ্চ পার্থিবাঃ
54.25
অপ্যগ্নিং প্রবিশেয়ুস্তে সমুদ্রং বা পরংতপ
মদর্থে পার্থিবাঃ সর্বে তদ্বিদ্ধি কুরুসত্তম
54.26
উন্মত্তমিব চাপি ত্বাং প্রহসন্তীহ দুঃখিতম্
বিলপন্তং বহুবিধং ভীতং পরবিকত্থনে
54.27
এষাং হ্যেকৈকশো রাজ্ঞাং সমর্থঃ পাণ্ডবান্প্রতি
আত্মানং মন্যতে সর্বো ব্যেতু তে ভয়মাগতম্
54.28
সর্বাং সমগ্রাং সেনাং মে বাসবোঽপি ন শক্নুয়াৎ
হন্তুমক্ষয্যরূপেয়ং ব্রহ্মণাপি স্বয়ম্ভুবা
54.29
যুধিষ্ঠিরঃ পুরং হিত্বা পঞ্চ গ্রামান্স যাচতি
ভীতো হি মামকাত্সৈন্যাত্প্রভাবাচ্চৈব মে প্রভো
54.30
সমর্থং মন্যসে যচ্চ কুন্তীপুত্রং বৃকোদরম্
তন্মিথ্যা ন হি মে কৃত্স্নং প্রভাবং বেত্থ ভারত
54.31
মত্সমো হি গদায়ুদ্ধে পৃথিব্যাং নাস্তি কশ্চন
নাসীত্কশ্চিদতিক্রান্তো ভবিতা ন চ কশ্চন
54.32
যুক্তো দুঃখোচিতশ্চাহং বিদ্যাপারগতস্তথা
তস্মান্ন ভীমান্নান্যেভ্যো ভয়ং মে বিদ্যতে ক্বচিৎ
54.33
দুর্যোধনসমো নাস্তি গদায়ামিতি নিশ্চয়ঃ
সংকর্ষণস্য ভদ্রং তে যত্তদৈনমুপাবসম্
54.34
যুদ্ধে সংকর্ষণসমো বলেনাভ্যধিকো ভুবি
গদাপ্রহারং ভীমো মে ন জাতু বিষহেদ্যুধি
54.35
একং প্রহারং যং দদ্যাং ভীমায় রুষিতো নৃপ
স এবৈনং নয়েদ্ঘোরং ক্ষিপ্রং বৈবস্বতক্ষয়ম্
54.36
ইচ্ছেয়ং চ গদাহস্তং রাজন্দ্রষ্টুং বৃকোদরম্
সুচিরং প্রার্থিতো হ্যেষ মম নিত্যং মনোরথঃ
54.37
গদয়া নিহতো হ্যাজৌ মম পার্থো বৃকোদরঃ
বিশীর্ণগাত্রঃ পৃথিবীং পরাসুঃ প্রপতিষ্যতি
54.38
গদাপ্রহারাভিহতো হিমবানপি পর্বতঃ
সকৃন্ময়া বিশীর্যেত গিরিঃ শতসহস্রধা
54.39
স চাপ্যেতদ্বিজানাতি বাসুদেবার্জুনৌ তথা
দুর্যোধনসমো নাস্তি গদায়ামিতি নিশ্চয়ঃ
54.40
তত্তে বৃকোদরময়ং ভয়ং ব্যেতু মহাহবে
ব্যপনেষ্যাম্যহং হ্যেনং মা রাজন্বিমনা ভব
54.41
তস্মিন্ময়া হতে ক্ষিপ্রমর্জুনং বহবো রথাঃ
তুল্যরূপা বিশিষ্টাশ্চ ক্ষেপ্স্যন্তি ভরতর্ষভ
54.42
ভীষ্মো দ্রোণঃ কৃপো দ্রৌণিঃ কর্ণো ভূরিশ্রবাস্তথা
প্রাগ্জ্যোতিষাধিপঃ শল্যঃ সিন্ধুরাজো জয়দ্রথঃ
54.43
একৈক এষাং শক্তস্তু হন্তুং ভারত পাণ্ডবান্
সমস্তাস্তু ক্ষণেনৈতান্নেষ্যন্তি যমসাদনম্
54.44
সমগ্রা পার্থিবী সেনা পার্থমেকং ধনংজয়ম্
কস্মাদশক্তা নির্জেতুমিতি হেতুর্ন বিদ্যতে
54.45
শরব্রাতৈস্তু ভীষ্মেণ শতশোঽথ সহস্রশঃ
দ্রোণদ্রৌণিকৃপৈশ্চৈব গন্তা পার্থো যমক্ষয়ম্
54.46
পিতামহো হি গাঙ্গেয়ঃ শংতনোরধি ভারত
ব্রহ্মর্ষিসদৃশো জজ্ঞে দেবৈরপি দুরুত্সহঃ
পিত্রা হ্যুক্তঃ প্রসন্নেন নাকামস্ত্বং মরিষ্যসি
54.47
ব্রহ্মর্ষেশ্চ ভরদ্বাজাদ্দ্রোণ্যাং দ্রোণো ব্যজায়ত
দ্রোণাজ্জজ্ঞে মহারাজ দ্রৌণিশ্চ পরমাস্ত্রবিৎ
54.48
কৃপশ্চাচার্যমুখ্যোঽয়ং মহর্ষের্গৌতমাদপি
শরস্তম্বোদ্ভবঃ শ্রীমানবধ্য ইতি মে মতিঃ
54.49
অয়োনিজং ত্রয়ং হ্যেতত্পিতা মাতা চ মাতুলঃ
অশ্বত্থাম্নো মহারাজ স চ শূরঃ স্থিতো মম
54.50
সর্ব এতে মহারাজ দেবকল্পা মহারথাঃ
শক্রস্যাপি ব্যথাং কুর্যুঃ সংয়ুগে ভরতর্ষভ
54.51
ভীষ্মদ্রোণকৃপাণাং চ তুল্যঃ কর্ণো মতো মম
অনুজ্ঞাতশ্চ রামেণ মত্সমোঽসীতি ভারত
54.52
কুণ্ডলে রুচিরে চাস্তাং কর্ণস্য সহজে শুভে
তে শচ্যর্থে মহেন্দ্রেণ যাচিতঃ স পরংতপঃ
অমোঘয়া মহারাজ শক্ত্যা পরমভীময়া
54.53
তস্য শক্ত্যোপগূঢস্য কস্মাজ্জীবেদ্ধনংজয়ঃ
বিজয়ো মে ধ্রুবং রাজন্ফলং পাণাবিবাহিতম্
অভিব্যক্তঃ পরেষাং চ কৃত্স্নো ভুবি পরাজয়ঃ
54.54
অহ্না হ্যেকেন ভীষ্মোঽয়ময়ুতং হন্তি ভারত
তত্সমাশ্চ মহেষ্বাসা দ্রোণদ্রৌণিকৃপা অপি
54.55
সংশপ্তানি চ বৃন্দানি ক্ষত্রিয়াণাং পরংতপ
অর্জুনং বয়মস্মান্বা ধনংজয় ইতি স্ম হ
54.56
তাংশ্চালমিতি মন্যন্তে সব্যসাচিবধে বিভো
পার্থিবাঃ স ভবান্রাজন্নকস্মাদ্ব্যথতে কথম্
54.57
ভীমসেনে চ নিহতে কোঽন্যো যুধ্যেত ভারত
পরেষাং তন্মমাচক্ষ্ব যদি বেত্থ পরংতপ
54.58
পঞ্চ তে ভ্রাতরঃ সর্বে ধৃষ্টদ্যুম্নোঽথ সাত্যকিঃ
পরেষাং সপ্ত যে রাজন্যোধাঃ পরমকং বলম্
54.59
অস্মাকং তু বিশিষ্টা যে ভীষ্মদ্রোণকৃপাদয়ঃ
দ্রৌণির্বৈকর্তনঃ কর্ণঃ সোমদত্তোঽথ বাহ্লিকঃ
54.60
প্রাগ্জ্যোতিষাধিপঃ শল্য আবন্ত্যোঽথ জয়দ্রথঃ
দুঃশাসনো দুর্মুখশ্চ দুঃসহশ্চ বিশাং পতে
54.61
শ্রুতায়ুশ্চিত্রসেনশ্চ পুরুমিত্রো বিবিংশতিঃ
শলো ভূরিশ্রবাশ্চোভৌ বিকর্ণশ্চ তবাত্মজঃ
54.62
অক্ষৌহিণ্যো হি মে রাজন্দশৈকা চ সমাহৃতাঃ
ন্যূনাঃ পরেষাং সপ্তৈব কস্মান্মে স্যাত্পরাজয়ঃ
54.63
বলং ত্রিগুণতো হীনং যোধ্যং প্রাহ বৃহস্পতিঃ
পরেভ্যস্ত্রিগুণা চেয়ং মম রাজন্ননীকিনী
54.64
গুণহীনং পরেষাং চ বহু পশ্যামি ভারত
গুণোদয়ং বহুগুণমাত্মনশ্চ বিশাং পতে
54.65
এতত্সর্বং সমাজ্ঞায় বলাগ্র্যং মম ভারত
ন্যূনতাং পাণ্ডবানাং চ ন মোহং গন্তুমর্হসি
54.66
বৈশংপায়ন উবাচ
ইত্যুক্ত্বা সংজয়ং ভূয়ঃ পর্যপৃচ্ছত ভারত
বিধিত্সুঃ প্রাপ্তকালানি জ্ঞাত্বা পরপুরংজয়ঃ