অধ্যায় 53

53.1

সংজয় উবাচ
এবমেতন্মহারাজ যথা বদসি ভারত
যুদ্ধে বিনাশঃ ক্ষত্রস্য গাণ্ডীবেন প্রদৃশ্যতে

ইদং তু নাভিজানামি তব ধীরস্য নিত্যশঃ
যত্পুত্রবশমাগচ্ছেঃ সত্ত্বজ্ঞঃ সব্যসাচিনঃ

নৈষ কালো মহারাজ তব শশ্বত্কৃতাগসঃ
ত্বয়া হ্যেবাদিতঃ পার্থা নিকৃতা ভরতর্ষভ

পিতা শ্রেষ্ঠঃ সুহৃদ্যশ্চ সম্যক্প্রণিহিতাত্মবান্
আস্থেয়ং হি হিতং তেন ন দ্রোগ্ধা গুরুরুচ্যতে

ইদং জিতমিদং লব্ধমিতি শ্রুত্বা পরাজিতান্
দ্যূতকালে মহারাজ স্ময়সে স্ম কুমারবৎ

পরুষাণ্যুচ্যমানান্স্ম পুরা পার্থানুপেক্ষসে
কৃত্স্নং রাজ্যং জয়ন্তীতি প্রপাতং নানুপশ্যসি

পিত্র্যং রাজ্যং মহারাজ কুরবস্তে সজাঙ্গলাঃ
অথ বীরৈর্জিতাং ভূমিমখিলাং প্রত্যপদ্যথাঃ

বাহুবীর্যার্জিতা ভূমিস্তব পার্থৈর্নিবেদিতা
ময়েদং কৃতমিত্যেব মন্যসে রাজসত্তম

গ্রস্তান্গন্ধর্বরাজেন মজ্জতো হ্যপ্লবেঽম্ভসি
আনিনায় পুনঃ পার্থঃ পুত্রাংস্তে রাজসত্তম

কুমারবচ্চ স্ময়সে দ্যূতে বিনিকৃতেষু যৎ
পাণ্ডবেষু বনং রাজন্প্রব্রজত্সু পুনঃ পুনঃ

প্রবর্ষতঃ শরব্রাতানর্জুনস্য শিতান্বহূন্
অপ্যর্ণবা বিশুষ্যেয়ুঃ কিং পুনর্মাংসয়োনয়ঃ

অস্যতাং ফল্গুনঃ শ্রেষ্ঠো গাণ্ডীবং ধনুষাং বরম্
কেশবঃ সর্বভূতানাং চক্রাণাং চ সুদর্শনম্

বানরো রোচমানশ্চ কেতুঃ কেতুমতাং বরঃ
এবমেতানি সরথো বহঞ্শ্বেতহয়ো রণে
ক্ষপয়িষ্যতি নো রাজন্কালচক্রমিবোদ্যতম্

তস্যাদ্য বসুধা রাজন্নিখিলা ভরতর্ষভ
যস্য ভীমার্জুনৌ যোধৌ স রাজা রাজসত্তম

তথা ভীমহতপ্রায়াং মজ্জন্তীং তব বাহিনীম্
দুর্যোধনমুখা দৃষ্ট্বা ক্ষয়ং যাস্যন্তি কৌরবাঃ

ন হি ভীমভয়াদ্ভীতা লপ্স্যন্তে বিজয়ং বিভো
তব পুত্রা মহারাজ রাজানশ্চানুসারিণঃ

মত্স্যাস্ত্বামদ্য নার্চন্তি পাঞ্চালাশ্চ সকেকয়াঃ
শাল্বেয়াঃ শূরসেনাশ্চ সর্বে ত্বামবজানতে
পার্থং হ্যেতে গতাঃ সর্বে বীর্যজ্ঞাস্তস্য ধীমতঃ

অনর্হানেব তু বধে ধর্ময়ুক্তান্বিকর্মণা
সর্বোপায়ৈর্নিয়ন্তব্যঃ সানুগঃ পাপপূরুষঃ
তব পুত্রো মহারাজ নাত্র শোচিতুমর্হসি

দ্যূতকালে ময়া চোক্তং বিদুরেণ চ ধীমতা
যদিদং তে বিলপিতং পাণ্ডবান্প্রতি ভারত
অনীশেনেব রাজেন্দ্র সর্বমেতন্নিরর্থকম্