অধ্যায় 52

52.1

ধৃতরাষ্ট্র উবাচ
যথৈব পাণ্ডবাঃ সর্বে পরাক্রান্তা জিগীষবঃ
তথৈবাভিসরাস্তেষাং ত্যক্তাত্মানো জয়ে ধৃতাঃ

ত্বমেব হি পরাক্রান্তানাচক্ষীথাঃ পরান্মম
পাঞ্চালান্কেকয়ান্মত্স্যান্মাগধান্বত্সভূমিপান্

যশ্চ সেন্দ্রানিমাঁল্লোকানিচ্ছন্কুর্যাদ্বশে বলী
স শ্রেষ্ঠো জগতঃ কৃষ্ণঃ পাণ্ডবানাং জয়ে ধৃতঃ

সমস্তামর্জুনাদ্বিদ্যাং সাত্যকিঃ ক্ষিপ্রমাপ্তবান্
শৈনেয়ঃ সমরে স্থাতা বীজবত্প্রবপঞ্শরান্

ধৃষ্টদ্যুম্নশ্চ পাঞ্চাল্যঃ ক্রূরকর্মা মহারথঃ
মামকেষু রণং কর্তা বলেষু পরমাস্ত্রবিৎ

যুধিষ্ঠিরস্য চ ক্রোধাদর্জুনস্য চ বিক্রমাৎ
যমাভ্যাং ভীমসেনাচ্চ ভয়ং মে তাত জায়তে

অমানুষং মনুষ্যেন্দ্রৈর্জালং বিততমন্তরা
মম সেনাং হনিষ্যন্তি ততঃ ক্রোশামি সংজয়

দর্শনীয়ো মনস্বী চ লক্ষ্মীবান্ব্রহ্মবর্চসী
মেধাবী সুকৃতপ্রজ্ঞো ধর্মাত্মা পাণ্ডুনন্দনঃ

মিত্রামাত্যৈঃ সুসংপন্নঃ সংপন্নো যোজ্যয়োজকৈঃ
ভ্রাতৃভিঃ শ্বশুরৈঃ পুত্রৈরুপপন্নো মহারথৈঃ

ধৃত্যা চ পুরুষব্যাঘ্রো নৈভৃত্যেন চ পাণ্ডবঃ
অনৃশংসো বদান্যশ্চ হ্রীমান্সত্যপরাক্রমঃ

বহুশ্রুতঃ কৃতাত্মা চ বৃদ্ধসেবী জিতেন্দ্রিয়ঃ
তং সর্বগুণসংপন্নং সমিদ্ধমিব পাবকম্

তপন্তমিব কো মন্দঃ পতিষ্যতি পতংগবৎ
পাণ্ডবাগ্নিমনাবার্যং মুমূর্ষুর্মূঢচেতনঃ

তনুরুচ্চঃ শিখী রাজা শুদ্ধজাম্বূনদপ্রভঃ
মন্দানাং মম পুত্রাণাং যুদ্ধেনান্তং করিষ্যতি

তৈরয়ুদ্ধং সাধু মন্যে কুরবস্তন্নিবোধত
যুদ্ধে বিনাশঃ কৃত্স্নস্য কুলস্য ভবিতা ধ্রুবম্

এষা মে পরমা শান্তির্যয়া শাম্যতি মে মনঃ
যদি ত্বয়ুদ্ধমিষ্টং বো বয়ং শান্ত্যৈ যতামহে

ন তু নঃ শিক্ষমাণানামুপেক্ষেত যুধিষ্ঠিরঃ
জুগুপ্সতি হ্যধর্মেণ মামেবোদ্দিশ্য কারণম্