UtshovChapter 52
52.1
धृतराष्ट्र उवाच
यथैव पाण्डवाः सर्वे पराक्रान्ता जिगीषवः
तथैवाभिसरास्तेषां त्यक्तात्मानो जये धृताः
Dhritarashtra uvacha
Yathaiva pandavah sarve parakranta jigishavah
Tathaivabhisarastesham tyaktatmano jaye dhritah
52.2
त्वमेव हि पराक्रान्तानाचक्षीथाः परान्मम
पाञ्चालान्केकयान्मत्स्यान्मागधान्वत्सभूमिपान्
Tvameva hi parakrantanachakshithah paranmama
Panchalankekayanmatsyanmagadhanvatsabhumipan
52.3
यश्च सेन्द्रानिमाँल्लोकानिच्छन्कुर्याद्वशे बली
स श्रेष्ठो जगतः कृष्णः पाण्डवानां जये धृतः
Yashcha sendranimanllokanichchhankuryadvashe bali
Sa shreshtho jagatah krishnah pandavanam jaye dhritah
52.4
समस्तामर्जुनाद्विद्यां सात्यकिः क्षिप्रमाप्तवान्
शैनेयः समरे स्थाता बीजवत्प्रवपञ्शरान्
Samastamarjunadvidyam satyakih kshipramaptavan
Shaineyah samare sthata bijavatpravapansharan
52.5
धृष्टद्युम्नश्च पाञ्चाल्यः क्रूरकर्मा महारथः
मामकेषु रणं कर्ता बलेषु परमास्त्रवित्
Dhrishtadyumnashcha panchalyah krurakarma maharathah
Mamakeshu ranam karta baleshu paramastravit
52.6
युधिष्ठिरस्य च क्रोधादर्जुनस्य च विक्रमात्
यमाभ्यां भीमसेनाच्च भयं मे तात जायते
Yudhishthirasya cha krodhadarjunasya cha vikramat
Yamabhyam bhimasenachcha bhayam me tata jayate
52.7
अमानुषं मनुष्येन्द्रैर्जालं विततमन्तरा
मम सेनां हनिष्यन्ति ततः क्रोशामि संजय
Amanusham manushyendrairjalam vitatamantara
Mama senam hanishyanti tatah kroshami sanjaya
52.8
दर्शनीयो मनस्वी च लक्ष्मीवान्ब्रह्मवर्चसी
मेधावी सुकृतप्रज्ञो धर्मात्मा पाण्डुनन्दनः
Darshaniyo manasvi cha lakshmivanbrahmavarchasi
Medhavi sukritapragyo dharmatma pandunandanah
52.9
मित्रामात्यैः सुसंपन्नः संपन्नो योज्ययोजकैः
भ्रातृभिः श्वशुरैः पुत्रैरुपपन्नो महारथैः
Mitramatyaih susampannah sampanno yojyayojakaih
Bhratribhih shvashuraih putrairupapanno maharathaih
52.10
धृत्या च पुरुषव्याघ्रो नैभृत्येन च पाण्डवः
अनृशंसो वदान्यश्च ह्रीमान्सत्यपराक्रमः
Dhritya cha purushavyaghro naibhrityena cha pandavah
Anrishanso vadanyashcha hrimansatyaparakramah
52.11
बहुश्रुतः कृतात्मा च वृद्धसेवी जितेन्द्रियः
तं सर्वगुणसंपन्नं समिद्धमिव पावकम्
Bahushrutah kritatma cha vriddhasevi jitendriyah
Tam sarvagunasampannam samiddhamiva pavakam
52.12
तपन्तमिव को मन्दः पतिष्यति पतंगवत्
पाण्डवाग्निमनावार्यं मुमूर्षुर्मूढचेतनः
Tapantamiva ko mandah patishyati patangavat
Pandavagnimanavaryam mumurshurmudhachetanah
52.13
तनुरुच्चः शिखी राजा शुद्धजाम्बूनदप्रभः
मन्दानां मम पुत्राणां युद्धेनान्तं करिष्यति
Tanuruchchah shikhi raja shuddhajambunadaprabhah
Mandanam mama putranam yuddhenantam karishyati
52.14
तैरयुद्धं साधु मन्ये कुरवस्तन्निबोधत
युद्धे विनाशः कृत्स्नस्य कुलस्य भविता ध्रुवम्
Tairayuddham sadhu manye kuravastannibodhata
Yuddhe vinashah kritsnasya kulasya bhavita dhruvam
52.15
एषा मे परमा शान्तिर्यया शाम्यति मे मनः
यदि त्वयुद्धमिष्टं वो वयं शान्त्यै यतामहे
Esha me parama shantiryaya shamyati me manah
Yadi tvayuddhamishtam vo vayam shantyai yatamahe
52.16
न तु नः शिक्षमाणानामुपेक्षेत युधिष्ठिरः
जुगुप्सति ह्यधर्मेण मामेवोद्दिश्य कारणम्
Na tu nah shikshamananamupeksheta yudhishthirah
Jugupsati hyadharmena mamevoddishya karanam