অধ্যায় 51

51.1

ধৃতরাষ্ট্র উবাচ
যস্য বৈ নানৃতা বাচঃ প্রবৃত্তা অনুশুশ্রুমঃ
ত্রৈলোক্যমপি তস্য স্যাদ্যোদ্ধা যস্য ধনংজয়ঃ

তস্যৈব চ ন পশ্যামি যুধি গাণ্ডীবধন্বনঃ
অনিশং চিন্তয়ানোঽপি যঃ প্রতীয়াদ্রথেন তম্

অস্যতঃ কর্ণিনালীকান্মার্গণান্হৃদয়চ্ছিদঃ
প্রত্যেতা ন সমঃ কশ্চিদ্যুধি গাণ্ডীবধন্বনঃ

দ্রোণকর্ণৌ প্রতীয়াতাং যদি বীরৌ নরর্ষভৌ
মাহাত্ম্যাত্সংশয়ো লোকে ন ত্বস্তি বিজয়ো মম

ঘৃণী কর্ণঃ প্রমাদী চ আচার্যঃ স্থবিরো গুরুঃ
সমর্থো বলবান্পার্থো দৃঢধন্বা জিতক্লমঃ
ভবেত্সুতুমুলং যুদ্ধং সর্বশোঽপ্যপরাজয়ঃ

সর্বে হ্যস্ত্রবিদঃ শূরাঃ সর্বে প্রাপ্তা মহদ্যশঃ
অপি সর্বামরৈশ্বর্যং ত্যজেয়ুর্ন পুনর্জয়ম্
বধে নূনং ভবেচ্ছান্তিস্তয়োর্বা ফল্গুনস্য বা

ন তু জেতার্জুনস্যাস্তি হন্তা চাস্য ন বিদ্যতে
মন্যুস্তস্য কথং শাম্যেন্মন্দান্প্রতি য উত্থিতঃ

অন্যেঽপ্যস্ত্রাণি জানন্তি জীয়ন্তে চ জয়ন্তি চ
একান্তবিজয়স্ত্বেব শ্রূয়তে ফল্গুনস্য হ

ত্রয়স্ত্রিংশত্সমাহূয় খাণ্ডবেঽগ্নিমতর্পয়ৎ
জিগায় চ সুরান্সর্বান্নাস্য বেদ্মি পরাজয়ম্

যস্য যন্তা হৃষীকেশঃ শীলবৃত্তসমো যুধি
ধ্রুবস্তস্য জয়স্তাত যথেন্দ্রস্য জয়স্তথা

কৃষ্ণাবেকরথে যত্তাবধিজ্যং গাণ্ডিবং ধনুঃ
যুগপত্ত্রীণি তেজাংসি সমেতান্যনুশুশ্রুমঃ

নৈব নোঽস্তি ধনুস্তাদৃঙ্ন যোদ্ধা ন চ সারথিঃ
তচ্চ মন্দা ন জানন্তি দুর্যোধনবশানুগাঃ

শেষয়েদশনির্দীপ্তো নিপতন্মূর্ধ্নি সংজয়
ন তু শেষং শরাঃ কুর্যুরস্তাস্তাত কিরীটিনা

অপি চাস্যন্নিবাভাতি নিঘ্নন্নিব চ ফল্গুনঃ
উদ্ধরন্নিব কায়েভ্যঃ শিরাংসি শরবৃষ্টিভিঃ

অপি বাণময়ং তেজঃ প্রদীপ্তমিব সর্বতঃ
গাণ্ডীবেদ্ধং দহেতাজৌ পুত্রাণাং মম বাহিনীম্

অপি সা রথঘোষেণ ভয়ার্তা সব্যসাচিনঃ
বিত্রস্তা বহুলা সেনা ভারতী প্রতিভাতি মে

যথা কক্ষং দহত্যগ্নিঃ প্রবৃদ্ধঃ সর্বতশ্চরন্
মহার্চিরনিলোদ্ধূতস্তদ্বদ্ধক্ষ্যতি মামকান্

যদোদ্বমন্নিশিতান্বাণসংঘা;ন্স্থাতাততায়ী সমরে কিরীটী
সৃষ্টোঽন্তকঃ সর্বহরো বিধাত্রা; যথা ভবেত্তদ্বদবারণীয়ঃ

যদা হ্যভীক্ষ্ণং সুবহূন্প্রকারা;ঞ্শ্রোতাস্মি তানাবসথে কুরূণাম্
তেষাং সমন্তাচ্চ তথা রণাগ্রে; ক্ষয়ঃ কিলায়ং ভরতানুপৈতি