Utshovঅধ্যায় 50
50.1
ধৃতরাষ্ট্র উবাচ
সর্ব এতে মহোত্সাহা যে ত্বয়া পরিকীর্তিতাঃ
একতস্ত্বেব তে সর্বে সমেতা ভীম একতঃ
50.2
ভীমসেনাদ্ধি মে ভূয়ো ভয়ং সংজায়তে মহৎ
ক্রুদ্ধাদমর্ষণাত্তাত ব্যাঘ্রাদিব মহারুরোঃ
50.3
জাগর্মি রাত্রয়ঃ সর্বা দীর্ঘমুষ্ণং চ নিঃশ্বসন্
ভীতো বৃকোদরাত্তাত সিংহাত্পশুরিবাবলঃ
50.4
ন হি তস্য মহাবাহোঃ শক্রপ্রতিমতেজসঃ
সৈন্যেঽস্মিন্প্রতিপশ্যামি য এনং বিষহেদ্যুধি
50.5
অমর্ষণশ্চ কৌন্তেয়ো দৃঢবৈরশ্চ পাণ্ডবঃ
অনর্মহাসী সোন্মাদস্তির্যক্প্রেক্ষী মহাস্বনঃ
50.6
মহাবেগো মহোত্সাহো মহাবাহুর্মহাবলঃ
মন্দানাং মম পুত্রাণাং যুদ্ধেনান্তং করিষ্যতি
50.7
ঊরুগ্রাহগৃহীতানাং গদাং বিভ্রদ্বৃকোদরঃ
কুরূণামৃষভো যুদ্ধে দণ্ডপাণিরিবান্তকঃ
50.8
শৈক্যায়সময়ীং ঘোরাং গদাং কাঞ্চনভূষিতাম্
মনসাহং প্রপশ্যামি ব্রহ্মদণ্ডমিবোদ্যতম্
50.9
যথা রুরূণাং যূথেষু সিংহো জাতবলশ্চরেৎ
মামকেষু তথা ভীমো বলেষু বিচরিষ্যতি
50.10
সর্বেষাং মম পুত্রাণাং স একঃ ক্রূরবিক্রমঃ
বহ্বাশী বিপ্রতীপশ্চ বাল্যেঽপি রভসঃ সদা
50.11
উদ্বেপতে মে হৃদয়ং যদা দুর্যোধনাদয়ঃ
বাল্যেঽপি তেন যুধ্যন্তো বারণেনেব মর্দিতাঃ
50.12
তস্য বীর্যেণ সংক্লিষ্টা নিত্যমেব সুতা মম
স এব হেতুর্ভেদস্য ভীমো ভীমপরাক্রমঃ
50.13
গ্রসমানমনীকানি নরবারণবাজিনাম্
পশ্যামীবাগ্রতো ভীমং ক্রোধমূর্ছিতমাহবে
50.14
অস্ত্রে দ্রোণার্জুনসমং বায়ুবেগসমং জবে
সংজয়াচক্ষ্ব মে শূরং ভীমসেনমমর্ষণম্
50.15
অতিলাভং তু মন্যেঽহং যত্তেন রিপুঘাতিনা
তদৈব ন হতাঃ সর্বে মম পুত্রা মনস্বিনা
50.16
যেন ভীমবলা যক্ষা রাক্ষসাশ্চ সমাহতাঃ
কথং তস্য রণে বেগং মানুষঃ প্রসহিষ্যতি
50.17
ন স জাতু বশে তস্থৌ মম বালোঽপি সংজয়
কিং পুনর্মম দুষ্পুত্রৈঃ ক্লিষ্টঃ সংপ্রতি পাণ্ডবঃ
50.18
নিষ্ঠুরঃ স চ নৈষ্ঠুর্যাদ্ভজ্যেদপি ন সংনমেৎ
তির্যক্প্রেক্ষী সংহতভ্রূঃ কথং শাম্যেদ্বৃকোদরঃ
50.19
বৃহদংসোঽপ্রতিবলো গৌরস্তাল ইবোদ্গতঃ
প্রমাণতো ভীমসেনঃ প্রাদেশেনাধিকোঽর্জুনাৎ
50.20
জবেন বাজিনোঽত্যেতি বলেনাত্যেতি কুঞ্জরান্
অব্যক্তজল্পী মধ্বক্ষো মধ্যমঃ পাণ্ডবো বলী
50.21
ইতি বাল্যে শ্রুতঃ পূর্বং ময়া ব্যাসমুখাত্পুরা
রূপতো বীর্যতশ্চৈব যাথাতথ্যেন পাণ্ডবঃ
50.22
আয়সেন স দণ্ডেন রথান্নাগান্হয়ান্নরান্
হনিষ্যতি রণে ক্রুদ্ধো ভীমঃ প্রহরতাং বরঃ
50.23
অমর্ষী নিত্যসংরব্ধো রৌদ্রঃ ক্রূরপরাক্রমঃ
মম তাত প্রতীপানি কুর্বন্পূর্বং বিমানিতঃ
50.24
নিষ্কীর্ণামায়সীং স্থূলাং সুপর্বাং কাঞ্চনীং গদাম্
শতঘ্নীং শতনির্হ্রাদাং কথং শক্ষ্যন্তি মে সুতাঃ
50.25
অপারমপ্লবাগাধং সমুদ্রং শরবেগিনম্
ভীমসেনময়ং দুর্গং তাত মন্দাস্তিতীর্ষবঃ
50.26
ক্রোশতো মে ন শৃণ্বন্তি বালাঃ পণ্ডিতমানিনঃ
বিষমং নাববুধ্যন্তে প্রপাতং মধুদর্শিনঃ
50.27
সংয়ুগং যে করিষ্যন্তি নররূপেণ বায়ুনা
নিয়তং চোদিতা ধাত্রা সিংহেনেব মহামৃগাঃ
50.28
শৈক্যাং তাত চতুষ্কিষ্কুং ষডস্রিমমিতৌজসম্
প্রহিতাং দুঃখসংস্পর্শাং কথং শক্ষ্যন্তি মে সুতাঃ
50.29
গদাং ভ্রাময়তস্তস্য ভিন্দতো হস্তিমস্তকান্
সৃক্কিণী লেলিহানস্য বাষ্পমুত্সৃজতো মুহুঃ
50.30
উদ্দিশ্য পাতান্পততঃ কুর্বতো ভৈরবান্রবান্
প্রতীপান্পততো মত্তান্কুঞ্জরান্প্রতিগর্জতঃ
50.31
বিগাহ্য রথমার্গেষু বরানুদ্দিশ্য নিঘ্নতঃ
অগ্নেঃ প্রজ্বলিতস্যেব অপি মুচ্যেত মে প্রজা
50.32
বীথীং কুর্বন্মহাবাহুর্দ্রাবয়ন্মম বাহিনীম্
নৃত্যন্নিব গদাপাণির্যুগান্তং দর্শয়িষ্যতি
50.33
প্রভিন্ন ইব মাতঙ্গঃ প্রভঞ্জন্পুষ্পিতান্দ্রুমান্
প্রবেক্ষ্যতি রণে সেনাং পুত্রাণাং মে বৃকোদরঃ
50.34
কুর্বন্রথান্বিপুরুষান্বিধ্বজান্ভগ্নপুষ্করান্
আরুজন্পুরুষব্যাঘ্রো রথিনঃ সাদিনস্তথা
50.35
গঙ্গাবেগ ইবানূপাংস্তীরজান্বিবিধান্দ্রুমান্
প্রবেক্ষ্যতি মহাসেনাং পুত্রাণাং মম সংজয়
50.36
বশং নূনং গমিষ্যন্তি ভীমসেনবলার্দিতাঃ
মম পুত্রাশ্চ ভৃত্যাশ্চ রাজানশ্চৈব সংজয়
50.37
যেন রাজা মহাবীর্যঃ প্রবিশ্যান্তঃপুরং পুরা
বাসুদেবসহায়েন জরাসংধো নিপাতিতঃ
50.38
কৃত্স্নেয়ং পৃথিবী দেবী জরাসংধেন ধীমতা
মাগধেন্দ্রেণ বলিনা বশে কৃত্বা প্রতাপিতা
50.39
ভীষ্মপ্রতাপাত্কুরবো নয়েনান্ধকবৃষ্ণয়ঃ
তে ন তস্য বশং জগ্মুঃ কেবলং দৈবমেব বা
50.40
স গত্বা পাণ্ডুপুত্রেণ তরসা বাহুশালিনা
অনায়ুধেন বীরেণ নিহতঃ কিং ততোঽধিকম্
50.41
দীর্ঘকালেন সংসিক্তং বিষমাশীবিষো যথা
স মোক্ষ্যতি রণে তেজঃ পুত্রেষু মম সংজয়
50.42
মহেন্দ্র ইব বজ্রেণ দানবান্দেবসত্তমঃ
ভীমসেনো গদাপাণিঃ সূদয়িষ্যতি মে সুতান্
50.43
অবিষহ্যমনাবার্যং তীব্রবেগপরাক্রমম্
পশ্যামীবাতিতাম্রাক্ষমাপতন্তং বৃকোদরম্
50.44
অগদস্যাপ্যধনুষো বিরথস্য বিবর্মণঃ
বাহুভ্যাং যুধ্যমানস্য কস্তিষ্ঠেদগ্রতঃ পুমান্
50.45
ভীষ্মো দ্রোণশ্চ বিপ্রোঽয়ং কৃপঃ শারদ্বতস্তথা
জানন্ত্যেতে যথৈবাহং বীর্যজ্ঞস্তস্য ধীমতঃ
50.46
আর্যব্রতং তু জানন্তঃ সংগরান্ন বিভিত্সবঃ
সেনামুখেষু স্থাস্যন্তি মামকানাং নরর্ষভাঃ
50.47
বলীয়ঃ সর্বতো দিষ্টং পুরুষস্য বিশেষতঃ
পশ্যন্নপি জয়ং তেষাং ন নিয়চ্ছামি যত্সুতান্
50.48
তে পুরাণং মহেষ্বাসা মার্গমৈন্দ্রং সমাস্থিতাঃ
ত্যক্ষ্যন্তি তুমুলে প্রাণান্রক্ষন্তঃ পার্থিবং যশঃ
50.49
যথৈষাং মামকাস্তাত তথৈষাং পাণ্ডবা অপি
পৌত্রা ভীষ্মস্য শিষ্যাশ্চ দ্রোণস্য চ কৃপস্য চ
50.50
যত্ত্বস্মদাশ্রয়ং কিংচিদ্দত্তমিষ্টং চ সংজয়
তস্যাপচিতিমার্যত্বাত্কর্তারঃ স্থবিরাস্ত্রয়ঃ
50.51
আদদানস্য শস্ত্রং হি ক্ষত্রধর্মং পরীপ্সতঃ
নিধনং ব্রাহ্মণস্যাজৌ বরমেবাহুরুত্তমম্
50.52
স বৈ শোচামি সর্বান্বৈ যে যুয়ুত্সন্তি পাণ্ডবান্
বিক্রুষ্টং বিদুরেণাদৌ তদেতদ্ভয়মাগতম্
50.53
ন তু মন্যে বিঘাতায় জ্ঞানং দুঃখস্য সংজয়
ভবত্যতিবলে হ্যেতজ্জ্ঞানমপ্যুপঘাতকম্
50.54
ঋষয়ো হ্যপি নির্মুক্তাঃ পশ্যন্তো লোকসংগ্রহান্
সুখে ভবন্তি সুখিনস্তথা দুঃখেন দুঃখিতাঃ
50.55
কিং পুনর্যোঽহমাসক্তস্তত্র তত্র সহস্রধা
পুত্রেষু রাজ্যদারেষু পৌত্রেষ্বপি চ বন্ধুষু
50.56
সংশয়ে তু মহত্যস্মিন্কিং নু মে ক্ষমমুত্তমম্
বিনাশং হ্যেব পশ্যামি কুরূণামনুচিন্তয়ন্
50.57
দ্যূতপ্রমুখমাভাতি কুরূণাং ব্যসনং মহৎ
মন্দেনৈশ্বর্যকামেন লোভাত্পাপমিদং কৃতম্
50.58
মন্যে পর্যায়ধর্মোঽয়ং কালস্যাত্যন্তগামিনঃ
চক্রে প্রধিরিবাসক্তো নাস্য শক্যং পলায়িতুম্
50.59
কিং নু কার্যং কথং কুর্যাং ক্ব নু গচ্ছামি সংজয়
এতে নশ্যন্তি কুরবো মন্দাঃ কালবশং গতাঃ
50.60
অবশোঽহং পুরা তাত পুত্রাণাং নিহতে শতে
শ্রোষ্যামি নিনদং স্ত্রীণাং কথং মাং মরণং স্পৃশেৎ
50.61
যথা নিদাঘে জ্বলনঃ সমিদ্ধো; দহেত্কক্ষং বায়ুনা চোদ্যমানঃ
গদাহস্তঃ পাণ্ডবস্তদ্বদেব; হন্তা মদীয়ান্সহিতোঽর্জুনেন