Utshovঅধ্যায় 49
49.1
ধৃতরাষ্ট্র উবাচ
কিমসৌ পাণ্ডবো রাজা ধর্মপুত্রোঽভ্যভাষত
শ্রুত্বেমা বহুলাঃ সেনাঃ প্রত্যর্থেন সমাগতাঃ
49.2
কিমিচ্ছত্যভিসংরম্ভাদ্যোত্স্যমানো যুধিষ্ঠিরঃ
কস্য স্বিদ্ভ্রাতৃপুত্রাণাং চিন্তাসু মুখমীক্ষতে
49.3
কে স্বিদেনং বারয়ন্তি শাম্য যুধ্যেতি বা পুনঃ
নিকৃত্যা কোপিতং মন্দৈর্ধর্মজ্ঞং ধর্মচারিণম্
49.4
সংজয় উবাচ
রাজ্ঞো মুখমুদীক্ষন্তে পাঞ্চালাঃ পাণ্ডবৈঃ সহ
যুধিষ্ঠিরস্য ভদ্রং তে স সর্বাননুশাস্তি চ
49.5
পৃথগ্ভূতাঃ পাণ্ডবানাং পাঞ্চালানাং রথব্রজাঃ
আয়ান্তমভিনন্দন্তি কুন্তীপুত্রং যুধিষ্ঠিরম্
49.6
তমঃ সূর্যমিবোদ্যন্তং কৌন্তেয়ং দীপ্ততেজসম্
পাঞ্চালাঃ প্রতিনন্দন্তি তেজোরাশিমিবোদ্যতম্
49.7
আ গোপালাবিপালেভ্যো নন্দমানং যুধিষ্ঠিরম্
পাঞ্চালাঃ কেকয়া মত্স্যাঃ প্রতিনন্দন্তি পাণ্ডবম্
49.8
ব্রাহ্মণ্যো রাজপুত্র্যশ্চ বিশাং দুহিতরশ্চ যাঃ
ক্রীডন্ত্যোঽভিসমায়ান্তি পার্থং সংনদ্ধমীক্ষিতুম্
49.9
ধৃতরাষ্ট্র উবাচ
সংজয়াচক্ষ্ব কেনাস্মান্পাণ্ডবা অভ্যয়ুঞ্জত
ধৃষ্টদ্যুম্নেন সেনান্যা সোমকাঃ কিংবলা ইব
49.10
বৈশংপায়ন উবাচ
গাবল্গণিস্তু তত্পৃষ্টঃ সভায়াং কুরুসংসদি
নিঃশ্বস্য সুভৃশং দীর্ঘং মুহুঃ সংচিন্তয়ন্নিব
তত্রানিমিত্ততো দৈবাত্সূতং কশ্মলমাবিশৎ
49.11
তদাচচক্ষে পুরুষঃ সভায়াং রাজসংসদি
সংজয়োঽয়ং মহারাজ মূর্চ্ছিতঃ পতিতো ভুবি
বাচং ন সৃজতে কাংচিদ্ধীনপ্রজ্ঞোঽল্পচেতনঃ
49.12
ধৃতরাষ্ট্র উবাচ
অপশ্যত্সংজয়ো নূনং কুন্তীপুত্রান্মহারথান্
তৈরস্য পুরুষব্যাঘ্রৈর্ভৃশমুদ্বেজিতং মনঃ
49.13
বৈশংপায়ন উবাচ
সংজয়শ্চেতনাং লব্ধ্বা প্রত্যাশ্বস্যেদমব্রবীৎ
ধৃতরাষ্ট্রং মহারাজ সভায়াং কুরুসংসদি
49.14
দৃষ্টবানস্মি রাজেন্দ্র কুন্তীপুত্রান্মহারথান্
মত্স্যরাজগৃহাবাসাদবরোধেন কর্শিতান্
শৃণু যৈর্হি মহারাজ পাণ্ডবা অভ্যয়ুঞ্জত
49.15
যো নৈব রোষান্ন ভয়ান্ন কামান্নার্থকারণাৎ
ন হেতুবাদাদ্ধর্মাত্মা সত্যং জহ্যাত্কথংচন
49.16
যঃ প্রমাণং মহারাজ ধর্মে ধর্মভৃতাং বরঃ
অজাতশত্রুণা তেন পাণ্ডবা অভ্যয়ুঞ্জত
49.17
যস্য বাহুবলে তুল্যঃ পৃথিব্যাং নাস্তি কশ্চন
যো বৈ সর্বান্মহীপালান্বশে চক্রে ধনুর্ধরঃ
তেন বো ভীমসেনেন পাণ্ডবা অভ্যয়ুঞ্জত
49.18
নিঃসৃতানাং জতুগৃহাদ্ধিডিম্বাত্পুরুষাদকাৎ
য এষামভবদ্দ্বীপঃ কুন্তীপুত্রো বৃকোদরঃ
49.19
যাজ্ঞসেনীমথো যত্র সিন্ধুরাজোঽপকৃষ্টবান্
তত্রৈষামভবদ্দ্বীপঃ কুন্তীপুত্রো বৃকোদরঃ
49.20
যশ্চ তান্সংগতান্সর্বান্পাণ্ডবান্বারণাবতে
দহ্যতো মোচয়ামাস তেন বস্তেঽভ্যয়ুঞ্জত
49.21
কৃষ্ণায়াশ্চরতা প্রীতিং যেন ক্রোধবশা হতাঃ
প্রবিশ্য বিষমং ঘোরং পর্বতং গন্ধমাদনম্
49.22
যস্য নাগায়ুতং বীর্যং ভুজয়োঃ সারমর্পিতম্
তেন বো ভীমসেনেন পাণ্ডবা অভ্যয়ুঞ্জত
49.23
কৃষ্ণদ্বিতীয়ো বিক্রম্য তুষ্ট্যর্থং জাতবেদসঃ
অজয়দ্যঃ পুরা বীরো যুধ্যমানং পুরংদরম্
49.24
যঃ স সাক্ষান্মহাদেবং গিরিশং শূলপাণিনম্
তোষয়ামাস যুদ্ধেন দেবদেবমুমাপতিম্
49.25
যশ্চ সর্বান্বশে চক্রে লোকপালান্ধনুর্ধরঃ
তেন বো বিজয়েনাজৌ পাণ্ডবা অভ্যয়ুঞ্জত
49.26
যঃ প্রতীচীং দিশং চক্রে বশে ম্লেচ্ছগণায়ুতাম্
স তত্র নকুলো যোদ্ধা চিত্রয়োধী ব্যবস্থিতঃ
49.27
তেন বো দর্শনীয়েন বীরেণাতিধনুর্ভৃতা
মাদ্রীপুত্রেণ কৌরব্য পাণ্ডবা অভ্যয়ুঞ্জত
49.28
যঃ কাশীনঙ্গমগধান্কলিঙ্গাংশ্চ যুধাজয়ৎ
তেন বঃ সহদেবেন পাণ্ডবা অভ্যয়ুঞ্জত
49.29
যস্য বীর্যেণ সদৃশাশ্চত্বারো ভুবি মানবাঃ
অশ্বত্থামা ধৃষ্টকেতুঃ প্রদ্যুম্নো রুক্মিরেব চ
49.30
তেন বঃ সহদেবেন পাণ্ডবা অভ্যয়ুঞ্জত
যবীয়সা নৃবীরেণ মাদ্রীনন্দিকরেণ চ
49.31
তপশ্চচার যা ঘোরং কাশিকন্যা পুরা সতী
ভীষ্মস্য বধমিচ্ছন্তী প্রেত্যাপি ভরতর্ষভ
49.32
পাঞ্চালস্য সুতা জজ্ঞে দৈবাচ্চ স পুনঃ পুমান্
স্ত্রীপুংসোঃ পুরুষব্যাঘ্র যঃ স বেদ গুণাগুণান্
49.33
যঃ কলিঙ্গান্সমাপেদে পাঞ্চালো যুদ্ধদুর্মদঃ
শিখণ্ডিনা বঃ কুরবঃ কৃতাস্ত্রেণাভ্যয়ুঞ্জত
49.34
যাং যক্ষঃ পুরুষং চক্রে ভীষ্মস্য নিধনে কিল
মহেষ্বাসেন রৌদ্রেণ পাণ্ডবা অভ্যয়ুঞ্জত
49.35
মহেষ্বাসা রাজপুত্রা ভ্রাতরঃ পঞ্চ কেকয়াঃ
সুমৃষ্টকবচাঃ শূরাস্তৈশ্চ বস্তেঽভ্যয়ুঞ্জত
49.36
যো দীর্ঘবাহুঃ ক্ষিপ্রাস্ত্রো ধৃতিমান্সত্যবিক্রমঃ
তেন বো বৃষ্ণিবীরেণ যুয়ুধানেন সংগরঃ
49.37
য আসীচ্ছরণং কালে পাণ্ডবানাং মহাত্মনাম্
রণে তেন বিরাটেন পাণ্ডবা অভ্যয়ুঞ্জত
49.38
যঃ স কাশিপতী রাজা বারাণস্যাং মহারথঃ
স তেষামভবদ্যোদ্ধা তেন বস্তেঽভ্যয়ুঞ্জত
49.39
শিশুভির্দুর্জয়ৈঃ সংখ্যে দ্রৌপদেয়ৈর্মহাত্মভিঃ
আশীবিষসমস্পর্শৈঃ পাণ্ডবা অভ্যয়ুঞ্জত
49.40
যঃ কৃষ্ণসদৃশো বীর্যে যুধিষ্ঠিরসমো দমে
তেনাভিমন্যুনা সংখ্যে পাণ্ডবা অভ্যয়ুঞ্জত
49.41
যশ্চৈবাপ্রতিমো বীর্যে ধৃষ্টকেতুর্মহায়শাঃ
দুঃসহঃ সমরে ক্রুদ্ধঃ শৈশুপালির্মহারথঃ
তেন বশ্চেদিরাজেন পাণ্ডবা অভ্যয়ুঞ্জত
49.42
যঃ সংশ্রয়ঃ পাণ্ডবানাং দেবানামিব বাসবঃ
তেন বো বাসুদেবেন পাণ্ডবা অভ্যয়ুঞ্জত
49.43
তথা চেদিপতের্ভ্রাতা শরভো ভরতর্ষভ
করকর্ষেণ সহিতস্তাভ্যাং বস্তেঽভ্যয়ুঞ্জত
49.44
জারাসংধিঃ সহদেবো জয়ত্সেনশ্চ তাবুভৌ
দ্রুপদশ্চ মহাতেজা বলেন মহতা বৃতঃ
ত্যক্তাত্মা পাণ্ডবার্থায় যোত্স্যমানো ব্যবস্থিতঃ
49.45
এতে চান্যে চ বহবঃ প্রাচ্যোদীচ্যা মহীক্ষিতঃ
শতশো যানপাশ্রিত্য ধর্মরাজো ব্যবস্থিতঃ