Utshovঅধ্যায় 48
48.1
বৈশংপায়ন উবাচ
সমবেতেষু সর্বেষু তেষু রাজসু ভারত
দুর্যোধনমিদং বাক্যং ভীষ্মঃ শাংতনবোঽব্রবীৎ
48.2
বৃহস্পতিশ্চোশনা চ ব্রহ্মাণং পর্যুপস্থিতৌ
মরুতশ্চ সহেন্দ্রেণ বসবশ্চ সহাশ্বিনৌ
48.3
আদিত্যাশ্চৈব সাধ্যাশ্চ যে চ সপ্তর্ষয়ো দিবি
বিশ্বাবসুশ্চ গন্ধর্বঃ শুভাশ্চাপ্সরসাং গণাঃ
48.4
নমস্কৃত্বোপজগ্মুস্তে লোকবৃদ্ধং পিতামহম্
পরিবার্য চ বিশ্বেশং পর্যাসত দিবৌকসঃ
48.5
তেষাং মনশ্চ তেজশ্চাপ্যাদদানৌ দিবৌকসাম্
পূর্বদেবৌ ব্যতিক্রান্তৌ নরনারায়ণাবৃষী
48.6
বৃহস্পতিশ্চ পপ্রচ্ছ ব্রাহ্মণং কাবিমাবিতি
ভবন্তং নোপতিষ্ঠেতে তৌ নঃ শংস পিতামহ
48.7
ব্রহ্মোবাচ
যাবেতৌ পৃথিবীং দ্যাং চ ভাসয়ন্তৌ তপস্বিনৌ
জ্বলন্তৌ রোচমানৌ চ ব্যাপ্যাতীতৌ মহাবলৌ
48.8
নরনারায়ণাবেতৌ লোকাল্লোকং সমাস্থিতৌ
ঊর্জিতৌ স্বেন তপসা মহাসত্ত্বপরাক্রমৌ
48.9
এতৌ হি কর্মণা লোকান্নন্দয়ামাসতুর্ধ্রুবৌ
অসুরাণামভাবায় দেবগন্ধর্বপূজিতৌ
48.10
বৈশংপায়ন উবাচ
জগাম শক্রস্তচ্ছ্রুত্বা যত্র তৌ তেপতুস্তপঃ
সার্ধং দেবগণৈঃ সর্বৈর্বৃহস্পতিপুরোগমৈঃ
48.11
তদা দেবাসুরে ঘোরে ভয়ে জাতে দিবৌকসাম্
অয়াচত মহাত্মানৌ নরনারায়ণৌ বরম্
48.12
তাবব্রূতাং বৃণীষ্বেতি তদা ভরতসত্তম
অথৈতাবব্রবীচ্ছক্রঃ সাহ্যং নঃ ক্রিয়তামিতি
48.13
ততস্তৌ শক্রমব্রূতাং করিষ্যাবো যদিচ্ছসি
তাভ্যাং চ সহিতঃ শক্রো বিজিগ্যে দৈত্যদানবান্
48.14
নর ইন্দ্রস্য সংগ্রামে হত্বা শত্রূন্পরংতপঃ
পৌলোমান্কালখঞ্জাংশ্চ সহস্রাণি শতানি চ
48.15
এষ ভ্রান্তে রথে তিষ্ঠন্ভল্লেনাপহরচ্ছিরঃ
জম্ভস্য গ্রসমানস্য যজ্ঞমর্জুন আহবে
48.16
এষ পারে সমুদ্রস্য হিরণ্যপুরমারুজৎ
হত্বা ষষ্টিসহস্রাণি নিবাতকবচান্রণে
48.17
এষ দেবান্সহেন্দ্রেণ জিত্বা পরপুরংজয়ঃ
অতর্পয়ন্মহাবাহুরর্জুনো জাতবেদসম্
নারায়ণস্তথৈবাত্র ভূয়সোঽন্যাঞ্জঘান হ
48.18
এবমেতৌ মহাবীর্যৌ তৌ পশ্যত সমাগতৌ
বাসুদেবার্জুনৌ বীরৌ সমবেতৌ মহারথৌ
48.19
নরনারায়ণৌ দেবৌ পূর্বদেবাবিতি শ্রুতিঃ
অজেয়ৌ মানুষে লোকে সেন্দ্রৈরপি সুরাসুরৈঃ
48.20
এষ নারায়ণঃ কৃষ্ণঃ ফল্গুনস্তু নরঃ স্মৃতঃ
নারায়ণো নরশ্চৈব সত্ত্বমেকং দ্বিধাকৃতম্
48.21
এতৌ হি কর্মণা লোকানশ্নুবাতেঽক্ষয়ান্ধ্রুবান্
তত্র তত্রৈব জায়েতে যুদ্ধকালে পুনঃ পুনঃ
48.22
তস্মাত্কর্মৈব কর্তব্যমিতি হোবাচ নারদঃ
এতদ্ধি সর্বমাচষ্ট বৃষ্ণিচক্রস্য বেদবিৎ
48.23
শঙ্খচক্রগদাহস্তং যদা দ্রক্ষ্যসি কেশবম্
পর্যাদদানং চাস্ত্রাণি ভীমধন্বানমর্জুনম্
48.24
সনাতনৌ মহাত্মানৌ কৃষ্ণাবেকরথে স্থিতৌ
দুর্যোধন তদা তাত স্মর্তাসি বচনং মম
48.25
নো চেদয়মভাবঃ স্যাত্কুরূণাং প্রত্যুপস্থিতঃ
অর্থাচ্চ তাত ধর্মাচ্চ তব বুদ্ধিরুপপ্লুতা
48.26
ন চেদ্গ্রহীষ্যসে বাক্যং শ্রোতাসি সুবহূন্হতান্
তবৈব হি মতং সর্বে কুরবঃ পর্যুপাসতে
48.27
ত্রয়াণামেব চ মতং তত্ত্বমেকোঽনুমন্যসে
রামেণ চৈব শপ্তস্য কর্ণস্য ভরতর্ষভ
48.28
দুর্জাতেঃ সূতপুত্রস্য শকুনেঃ সৌবলস্য চ
তথা ক্ষুদ্রস্য পাপস্য ভ্রাতুর্দুঃশাসনস্য চ
48.29
কর্ণ উবাচ
নৈবমায়ুষ্মতা বাচ্যং যন্মামাত্থ পিতামহ
ক্ষত্রধর্মে স্থিতো হ্যস্মি স্বধর্মাদনপেয়িবান্
48.30
কিং চান্যন্ময়ি দুর্বৃত্তং যেন মাং পরিগর্হসে
ন হি মে বৃজিনং কিংচিদ্ধার্তরাষ্ট্রা বিদুঃ ক্বচিৎ
48.31
রাজ্ঞো হি ধৃতরাষ্ট্রস্য সর্বং কার্যং প্রিয়ং ময়া
তথা দুর্যোধনস্যাপি স হি রাজ্যে সমাহিতঃ
48.32
বৈশংপায়ন উবাচ
কর্ণস্য তু বচঃ শ্রুত্বা ভীষ্মঃ শাংতনবঃ পুনঃ
ধৃতরাষ্ট্রং মহারাজমাভাষ্যেদং বচোঽব্রবীৎ
48.33
যদয়ং কত্থতে নিত্যং হন্তাহং পাণ্ডবানিতি
নায়ং কলাপি সংপূর্ণা পাণ্ডবানাং মহাত্মনাম্
48.34
অনয়ো যোঽয়মাগন্তা পুত্রাণাং তে দুরাত্মনাম্
তদস্য কর্ম জানীহি সূতপুত্রস্য দুর্মতেঃ
48.35
এনমাশ্রিত্য পুত্রস্তে মন্দবুদ্ধিঃ সুয়োধনঃ
অবমন্যত তান্বীরান্দেবপুত্রানরিংদমান্
48.36
কিং চাপ্যনেন তত্কর্ম কৃতং পূর্বং সুদুষ্করম্
তৈর্যথা পাণ্ডবৈঃ সর্বৈরেকৈকেন কৃতং পুরা
48.37
দৃষ্ট্বা বিরাটনগরে ভ্রাতরং নিহতং প্রিয়ম্
ধনংজয়েন বিক্রম্য কিমনেন তদা কৃতম্
48.38
সহিতান্হি কুরূন্সর্বানভিয়াতো ধনংজয়ঃ
প্রমথ্য চাচ্ছিনদ্গাবঃ কিময়ং প্রোষিতস্তদা
48.39
গন্ধর্বৈর্ঘোষয়াত্রায়াং হ্রিয়তে যত্সুতস্তব
ক্ব তদা সূতপুত্রোঽভূদ্য ইদানীং বৃষায়তে
48.40
ননু তত্রাপি পার্থেন ভীমেন চ মহাত্মনা
যমাভ্যামেব চাগম্য গন্ধর্বাস্তে পরাজিতাঃ
48.41
এতান্যস্য মৃষোক্তানি বহূনি ভরতর্ষভ
বিকত্থনস্য ভদ্রং তে সদা ধর্মার্থলোপিনঃ
48.42
ভীষ্মস্য তু বচঃ শ্রুত্বা ভারদ্বাজো মহামনাঃ
ধৃতরাষ্ট্রমুবাচেদং রাজমধ্যেঽভিপূজয়ন্
48.43
যদাহ ভরতশ্রেষ্ঠো ভীষ্মস্তত্ক্রিয়তাং নৃপ
ন কামমর্থলিপ্সূনাং বচনং কর্তুমর্হসি
48.44
পুরা যুদ্ধাত্সাধু মন্যে পাণ্ডবৈঃ সহ সংগমম্
যদ্বাক্যমর্জুনেনোক্তং সংজয়েন নিবেদিতম্
48.45
সর্বং তদভিজানামি করিষ্যতি চ পাণ্ডবঃ
ন হ্যস্য ত্রিষু লোকেষু সদৃশোঽস্তি ধনুর্ধরঃ
48.46
অনাদৃত্য তু তদ্বাক্যমর্থবদ্দ্রোণভীষ্ময়োঃ
ততঃ স সংজয়ং রাজা পর্যপৃচ্ছত পাণ্ডবম্
48.47
তদৈব কুরবঃ সর্বে নিরাশা জীবিতেঽভবন্
ভীষ্মদ্রোণৌ যদা রাজা ন সম্যগনুভাষতে