Utshovঅধ্যায় 47
47.1
ধৃতরাষ্ট্র উবাচ
পৃচ্ছামি ত্বাং সংজয় রাজমধ্যে; কিমব্রবীদ্বাক্যমদীনসত্ত্বঃ
ধনংজয়স্তাত যুধাং প্রণেতা; দুরাত্মনাং জীবিতচ্ছিন্মহাত্মা
47.2
সংজয় উবাচ
দুর্যোধনো বাচমিমাং শৃণোতু; যদব্রবীদর্জুনো যোত্স্যমানঃ
যুধিষ্ঠিরস্যানুমতে মহাত্মা; ধনংজয়ঃ শৃণ্বতঃ কেশবস্য
47.3
অন্বত্রস্তো বাহুবীর্যং বিদান; উপহ্বরে বাসুদেবস্য ধীরঃ
অবোচন্মাং যোত্স্যমানঃ কিরীটী; মধ্যে ব্রূয়া ধার্তরাষ্ট্রং কুরূণাম্
47.4
যে বৈ রাজানঃ পাণ্ডবায়োধনায়; সমানীতাঃ শৃণ্বতাং চাপি তেষাম্
যথা সমগ্রং বচনং ময়োক্তং; সহামাত্যং শ্রাবয়েথা নৃপং তম্
47.5
যথা নূনং দেবরাজস্য দেবাঃ; শুশ্রূষন্তে বজ্রহস্তস্য সর্বে
তথাশৃণ্বন্পাণ্ডবাঃ সৃঞ্জয়াশ্চ; কিরীটিনা বাচমুক্তাং সমর্থাম্
47.6
ইত্যব্রবীদর্জুনো যোত্স্যমানো; গাণ্ডীবধন্বা লোহিতপদ্মনেত্রঃ
ন চেদ্রাজ্যং মুঞ্চতি ধার্তরাষ্ট্রো; যুধিষ্ঠিরস্যাজমীঢস্য রাজ্ঞঃ
অস্তি নূনং কর্ম কৃতং পুরস্তা;দনির্বিষ্টং পাপকং ধার্তরাষ্ট্রৈঃ
47.7
যেষাং যুদ্ধং ভীমসেনার্জুনাভ্যাং; তথাশ্বিভ্যাং বাসুদেবেন চৈব
শৈনেয়েন ধ্রুবমাত্তায়ুধেন; ধৃষ্টদ্যুম্নেনাথ শিখণ্ডিনা চ
যুধিষ্ঠিরেণেন্দ্রকল্পেন চৈব; যোঽপধ্যানান্নির্দহেদ্গাং দিবং চ
47.8
তৈশ্চেদ্যুদ্ধং মন্যতে ধার্তরাষ্ট্রো; নির্বৃত্তোঽর্থঃ সকলঃ পাণ্ডবানাম্
মা তত্কার্ষীঃ পাণ্ডবার্থায় হেতো;রুপৈহি যুদ্ধং যদি মন্যসে ত্বম্
47.9
যাং তাং বনে দুঃখশয্যামুবাস; প্রব্রাজিতঃ পাণ্ডবো ধর্মচারী
আশিষ্যতে দুঃখতরামনর্থা;মন্ত্যাং শয্যাং ধার্তরাষ্ট্রঃ পরাসুঃ
47.10
হ্রিয়া জ্ঞানেন তপসা দমেন; ক্রোধেনাথো ধর্মগুপ্ত্যা ধনেন
অন্যায়বৃত্তঃ কুরুপাণ্ডবেয়া;নধ্যাতিষ্ঠদ্ধার্তরাষ্ট্রো দুরাত্মা
47.11
মায়োপধঃ প্রণিধানার্জবাভ্যাং; তপোদমাভ্যাং ধর্মগুপ্ত্যা বলেন
সত্যং ব্রুবন্প্রীতিয়ুক্ত্যানৃতেন; তিতিক্ষমাণঃ ক্লিশ্যমানোঽতিবেলম্
47.12
যদা জ্যেষ্ঠঃ পাণ্ডবঃ সংশিতাত্মা; ক্রোধং যত্তং বর্ষপূগান্সুঘোরম্
অবস্রষ্টা কুরুষূদ্বৃত্তচেতা;স্তদা যুদ্ধং ধার্তরাষ্ট্রোঽন্বতপ্স্যৎ
47.13
কৃষ্ণবর্ত্মেব জ্বলিতঃ সমিদ্ধো; যথা দহেত্কক্ষমগ্নির্নিদাঘে
এবং দগ্ধা ধার্তরাষ্ট্রস্য সেনাং; যুধিষ্ঠিরঃ ক্রোধদীপ্তোঽনুবীক্ষ্য
47.14
যদা দ্রষ্টা ভীমসেনং রণস্থং; গদাহস্তং ক্রোধবিষং বমন্তম্
দুর্মর্ষণং পাণ্ডবং ভীমবেগং; তদা যুদ্ধং ধার্তরাষ্ট্রোঽন্বতপ্স্যৎ
47.15
মহাসিংহো গাব ইব প্রবিশ্য; গদাপাণির্ধার্তরাষ্ট্রানুপেত্য
যদা ভীমো ভীমরূপো নিহন্তা; তদা যুদ্ধং ধার্তরাষ্ট্রোঽন্বতপ্স্যৎ
47.16
মহাভয়ে বীতভয়ঃ কৃতাস্ত্রঃ; সমাগমে শত্রুবলাবমর্দী
সকৃদ্রথেন প্রতিয়াদ্রথৌঘা;ন্পদাতিসংঘান্গদয়াভিনিঘ্নন্
47.17
সৈন্যাননেকাংস্তরসা বিমৃদ্ন;ন্যদা ক্ষেপ্তা ধার্তরাষ্ট্রস্য সৈন্যম্
ছিন্দন্বনং পরশুনেব শূর;স্তদা যুদ্ধং ধার্তরাষ্ট্রোঽন্বতপ্স্যৎ
47.18
তৃণপ্রায়ং জ্বলনেনেব দগ্ধং; গ্রামং যথা ধার্তরাষ্ট্রঃ সমীক্ষ্য
পক্বং সস্যং বৈদ্যুতেনেব দগ্ধং; পরাসিক্তং বিপুলং স্বং বলৌঘম্
47.19
হতপ্রবীরং বিমুখং ভয়ার্তং; পরাঙ্মুখং প্রায়শোঽধৃষ্টয়োধম্
শস্ত্রার্চিষা ভীমসেনেন দগ্ধং; তদা যুদ্ধং ধার্তরাষ্ট্রোঽন্বতপ্স্যৎ
47.20
উপাসঙ্গাদুদ্ধরন্দক্ষিণেন; পরঃশতান্নকুলশ্চিত্রয়োধী
যদা রথাগ্র্যো রথিনঃ প্রচেতা; তদা যুদ্ধং ধার্তরাষ্ট্রোঽন্বতপ্স্যৎ
47.21
সুখোচিতো দুঃখশয্যাং বনেষু; দীর্ঘং কালং নকুলো যামশেত
আশীবিষঃ ক্রুদ্ধ ইব শ্বসন্ভৃশং; তদা যুদ্ধং ধার্তরাষ্ট্রোঽন্বতপ্স্যৎ
47.22
ত্যক্তাত্মানঃ পার্থিবায়োধনায়; সমাদিষ্টা ধর্মরাজেন বীরাঃ
রথৈঃ শুভ্রৈঃ সৈন্যমভিদ্রবন্তো; দৃষ্ট্বা পশ্চাত্তপ্স্যতে ধার্তরাষ্ট্রঃ
47.23
শিশূন্কৃতাস্ত্রানশিশুপ্রকাশা;ন্যদা দ্রষ্টা কৌরবঃ পঞ্চ শূরান্
ত্যক্ত্বা প্রাণান্কেকয়ানাদ্রবন্ত;স্তদা যুদ্ধং ধার্তরাষ্ট্রোঽন্বতপ্স্যৎ
47.24
যদা গতোদ্বাহমকূজনাক্ষং; সুবর্ণতারং রথমাততায়ী
দান্তৈর্যুক্তং সহদেবোঽধিরূঢঃ; শিরাংসি রাজ্ঞাং ক্ষেপ্স্যতে মার্গণৌঘৈঃ
47.25
মহাভয়ে সংপ্রবৃত্তে রথস্থং; বিবর্তমানং সমরে কৃতাস্ত্রম্
সর্বাং দিশং সংপতন্তং সমীক্ষ্য; তদা যুদ্ধং ধার্তরাষ্ট্রোঽন্বতপ্স্যৎ
47.26
হ্রীনিষেধো নিপুণঃ সত্যবাদী; মহাবলঃ সর্বধর্মোপপন্নঃ
গান্ধারিমার্চ্ছংস্তুমুলে ক্ষিপ্রকারী; ক্ষেপ্তা জনান্সহদেবস্তরস্বী
47.27
যদা দ্রষ্টা দ্রৌপদেয়ান্মহেষূ;ঞ্শূরান্কৃতাস্ত্রান্রথয়ুদ্ধকোবিদান্
আশীবিষান্ঘোরবিষানিবায়ত;স্তদা যুদ্ধং ধার্তরাষ্ট্রোঽন্বতপ্স্যৎ
47.28
যদাভিমন্যুঃ পরবীরঘাতী; শরৈঃ পরান্মেঘ ইবাভিবর্ষন্
বিগাহিতা কৃষ্ণসমঃ কৃতাস্ত্র;স্তদা যুদ্ধং ধার্তরাষ্ট্রোঽন্বতপ্স্যৎ
47.29
যদা দ্রষ্টা বালমবালবীর্যং; দ্বিষচ্চমূং মৃত্যুমিবাপতন্তম্
সৌভদ্রমিন্দ্রপ্রতিমং কৃতাস্ত্রং; তদা যুদ্ধং ধার্তরাষ্ট্রোঽন্বতপ্স্যৎ
47.30
প্রভদ্রকাঃ শীঘ্রতরা যুবানো; বিশারদাঃ সিংহসমানবীর্যাঃ
যদা ক্ষেপ্তারো ধার্তরাষ্ট্রান্সসৈন্যাং;স্তদা যুদ্ধং ধার্তরাষ্ট্রোঽন্বতপ্স্যৎ
47.31
বৃদ্ধৌ বিরাটদ্রুপদৌ মহারথৌ; পৃথক্চমূভ্যামভিবর্তমানৌ
যদা দ্রষ্টারৌ ধার্তরাষ্ট্রান্সসৈন্যাং;স্তদা যুদ্ধং ধার্তরাষ্ট্রোঽন্বতপ্স্যৎ
47.32
যদা কৃতাস্ত্রো দ্রুপদঃ প্রচিন্ব;ঞ্শিরাংসি যূনাং সমরে রথস্থঃ
ক্রুদ্ধঃ শরৈশ্ছেত্স্যতি চাপমুক্তৈ;স্তদা যুদ্ধং ধার্তরাষ্ট্রোঽন্বতপ্স্যৎ
47.33
যদা বিরাটঃ পরবীরঘাতী; মর্মান্তরে শত্রুচমূং প্রবেষ্টা
মত্স্যৈঃ সার্ধমনৃশংসরূপৈ;স্তদা যুদ্ধং ধার্তরাষ্ট্রোঽন্বতপ্স্যৎ
47.34
জ্যেষ্ঠং মাত্স্যানামনৃশংসরূপং; বিরাটপুত্রং রথিনং পুরস্তাৎ
যদা দ্রষ্টা দংশিতং পাণ্ডবার্থে; তদা যুদ্ধং ধার্তরাষ্ট্রোঽন্বতপ্স্যৎ
47.35
রণে হতে কৌরবাণাং প্রবীরে; শিখণ্ডিনা সত্তমে শংতনূজে
ন জাতু নঃ শত্রবো ধারয়েয়ু;রসংশয়ং সত্যমেতদ্ব্রবীমি
47.36
যদা শিখণ্ডী রথিনঃ প্রচিন্ব;ন্ভীষ্মং রথেনাভিয়াতা বরূথী
দিব্যৈর্হয়ৈরবমৃদ্নন্রথৌঘাং;স্তদা যুদ্ধং ধার্তরাষ্ট্রোঽন্বতপ্স্যৎ
47.37
যদা দ্রষ্টা সৃঞ্জয়ানামনীকে; ধৃষ্টদ্যুম্নং প্রমুখে রোচমানম্
অস্ত্রং যস্মৈ গুহ্যমুবাচ ধীমা;ন্দ্রোণস্তদা তপ্স্যতি ধার্তরাষ্ট্রঃ
47.38
যদা স সেনাপতিরপ্রমেয়ঃ; পরাভবন্নিষুভির্ধার্তরাষ্ট্রান্
দ্রোণং রণে শত্রুসহোঽভিয়াতা; তদা যুদ্ধং ধার্তরাষ্ট্রোঽন্বতপ্স্যৎ
47.39
হ্রীমান্মনীষী বলবান্মনস্বী; স লক্ষ্মীবান্সোমকানাং প্রবর্হঃ
ন জাতু তং শত্রবোঽন্যে সহের;ন্যেষাং স স্যাদগ্রণীর্বৃষ্ণিসিংহঃ
47.40
ব্রূয়াচ্চ মা প্রবৃণীষ্বেতি লোকে; যুদ্ধেঽদ্বিতীয়ং সচিবং রথস্থম্
শিনের্নপ্তারং প্রবৃণীম সাত্যকিং; মহাবলং বীতভয়ং কৃতাস্ত্রম্
47.41
যদা শিনীনামধিপো ময়োক্তঃ; শরৈঃ পরান্মেঘ ইব প্রবর্ষন্
প্রচ্ছাদয়িষ্যঞ্শরজালেন যোধাং;স্তদা যুদ্ধং ধার্তরাষ্ট্রোঽন্বতপ্স্যৎ
47.42
যদা ধৃতিং কুরুতে যোত্স্যমানঃ; স দীর্ঘবাহুর্দৃঢধন্বা মহাত্মা
সিংহস্যেব গন্ধমাঘ্রায় গাবঃ; সংবেষ্টন্তে শত্রবোঽস্মাদ্যথাগ্নেঃ
47.43
স দীর্ঘবাহুর্দৃঢধন্বা মহাত্মা; ভিন্দ্যাদ্গিরীন্সংহরেত্সর্বলোকান্
অস্ত্রে কৃতী নিপুণঃ ক্ষিপ্রহস্তো; দিবি স্থিতঃ সূর্য ইবাভিভাতি
47.44
চিত্রঃ সূক্ষ্মঃ সুকৃতো যাদবস্য; অস্ত্রে যোগো বৃষ্ণিসিংহস্য ভূয়ান্
যথাবিধং যোগমাহুঃ প্রশস্তং; সর্বৈর্গুণৈঃ সাত্যকিস্তৈরুপেতঃ
47.45
হিরণ্ময়ং শ্বেতহয়ৈশ্চতুর্ভি;র্যদা যুক্তং স্যন্দনং মাধবস্য
দ্রষ্টা যুদ্ধে সাত্যকের্বৈ সুয়োধন;স্তদা তপ্স্যত্যকৃতাত্মা স মন্দঃ
47.46
যদা রথং হেমমণিপ্রকাশং; শ্বেতাশ্বয়ুক্তং বানরকেতুমুগ্রম্
দ্রষ্টা রণে সংয়তং কেশবেন; তদা তপ্স্যত্যকৃতাত্মা স মন্দঃ
47.47
যদা মৌর্ব্যাস্তলনিষ্পেষমুগ্রং; মহাশব্দং বজ্রনিষ্পেষতুল্যম্
বিধূয়মানস্য মহারণে ময়া; গাণ্ডীবস্য শ্রোষ্যতি মন্দবুদ্ধিঃ
47.48
তদা মূঢো ধৃতরাষ্ট্রস্য পুত্র;স্তপ্তা যুদ্ধে দুর্মতির্দুঃসহায়ঃ
দৃষ্ট্বা সৈন্যং বাণবর্ষান্ধকারং; প্রভজ্যন্তং গোকুলবদ্রণাগ্রে
47.49
বলাহকাদুচ্চরন্তীব বিদ্যু;ত্সহস্রঘ্নী দ্বিষতাং সংগমেষু
অস্থিচ্ছিদো মর্মভিদো বমেচ্ছরাং;স্তদা যুদ্ধং ধার্তরাষ্ট্রোঽন্বতপ্স্যৎ
47.50
যদা দ্রষ্টা জ্যামুখাদ্বাণসংঘা;ন্গাণ্ডীবমুক্তান্পততঃ শিতাগ্রান্
নাগান্হয়ান্বর্মিণশ্চাদদানাং;স্তদা যুদ্ধং ধার্তরাষ্ট্রোঽন্বতপ্স্যৎ
47.51
যদা মন্দঃ পরবাণান্বিমুক্তা;ন্মমেষুভির্হ্রিয়মাণান্প্রতীপম্
তির্যগ্বিদ্বাংশ্ছিদ্যমানান্ক্ষুরপ্রৈ;স্তদা যুদ্ধং ধার্তরাষ্ট্রোঽন্বতপ্স্যৎ
47.52
যদা বিপাঠা মদ্ভুজবিপ্রমুক্তা; দ্বিজাঃ ফলানীব মহীরুহাগ্রাৎ
প্রচ্ছেত্তার উত্তমাঙ্গানি যূনাং; তদা যুদ্ধং ধার্তরাষ্ট্রোঽন্বতপ্স্যৎ
47.53
যদা দ্রষ্টা পততঃ স্যন্দনেভ্যো; মহাগজেভ্যোঽশ্বগতাংশ্চ যোধান্
শরৈর্হতান্পাতিতাংশ্চৈব রঙ্গে; তদা যুদ্ধং ধার্তরাষ্ট্রোঽন্বতপ্স্যৎ
47.54
পদাতিসংঘান্রথসংঘান্সমন্তা;দ্ব্যাত্তাননঃ কাল ইবাততেষুঃ
প্রণোত্স্যামি জ্বলিতৈর্বাণবর্ষৈঃ; শত্রূংস্তদা তপ্স্যতি মন্দবুদ্ধিঃ
47.55
সর্বা দিশঃ সংপততা রথেন; রজোধ্বস্তং গাণ্ডিবেনাপকৃত্তম্
যদা দ্রষ্টা স্ববলং সংপ্রমূঢং; তদা পশ্চাত্তপ্স্যতি মন্দবুদ্ধিঃ
47.56
কাংদিগ্ভূতং ছিন্নগাত্রং বিসংজ্ঞং; দুর্যোধনো দ্রক্ষ্যতি সর্বসৈন্যম্
হতাশ্ববীরাগ্র্যনরেন্দ্রনাগং; পিপাসিতং শ্রান্তপত্রং ভয়ার্তম্
47.57
আর্তস্বরং হন্যমানং হতং চ; বিকীর্ণকেশাস্থিকপালসংঘম্
প্রজাপতেঃ কর্ম যথার্ধনিষ্ঠিতং; তদা দৃষ্ট্বা তপ্স্যতে মন্দবুদ্ধিঃ
47.58
যদা রথে গাণ্ডিবং বাসুদেবং; দিব্যং শঙ্খং পাঞ্চজন্যং হয়াংশ্চ
তূণাবক্ষয্যৌ দেবদত্তং চ মাং চ; দ্রষ্টা যুদ্ধে ধার্তরাষ্ট্রঃ সমেতান্
47.59
উদ্বর্তয়ন্দস্যুসংঘান্সমেতা;ন্প্রবর্তয়ন্যুগমন্যদ্যুগান্তে
যদা ধক্ষ্যাম্যগ্নিবত্কৌরবেয়াং;স্তদা তপ্তা ধৃতরাষ্ট্রঃ সপুত্রঃ
47.60
সহভ্রাতা সহপুত্রঃ সসৈন্যো; ভ্রষ্টৈশ্বর্যঃ ক্রোধবশোঽল্পচেতাঃ
দর্পস্যান্তে বিহিতে বেপমানঃ; পশ্চান্মন্দস্তপ্স্যতি ধার্তরাষ্ট্রঃ
47.61
পূর্বাহ্ণে মাং কৃতজপ্যং কদাচি;দ্বিপ্রঃ প্রোবাচোদকান্তে মনোজ্ঞম্
কর্তব্যং তে দুষ্করং কর্ম পার্থ; যোদ্ধব্যং তে শত্রুভিঃ সব্যসাচিন্
47.62
ইন্দ্রো বা তে হরিবান্বজ্রহস্তঃ; পুরস্তাদ্যাতু সমরেঽরীন্বিনিঘ্নন্
সুগ্রীবয়ুক্তেন রথেন বা তে; পশ্চাত্কৃষ্ণো রক্ষতু বাসুদেবঃ
47.63
বব্রে চাহং বজ্রহস্তান্মহেন্দ্রা;দস্মিন্যুদ্ধে বাসুদেবং সহায়ম্
স মে লব্ধো দস্যুবধায় কৃষ্ণো; মন্যে চৈতদ্বিহিতং দৈবতৈর্মে
47.64
অয়ুধ্যমানো মনসাপি যস্য; জয়ং কৃষ্ণঃ পুরুষস্যাভিনন্দেৎ
ধ্রুবং সর্বান্সোঽভ্যতীয়াদমিত্রা;ন্সেন্দ্রান্দেবান্মানুষে নাস্তি চিন্তা
47.65
স বাহুভ্যাং সাগরমুত্তিতীর্ষে;ন্মহোদধিং সলিলস্যাপ্রমেয়ম্
তেজস্বিনং কৃষ্ণমত্যন্তশূরং; যুদ্ধেন যো বাসুদেবং জিগীষেৎ
47.66
গিরিং য ইচ্ছেত তলেন ভেত্তুং; শিলোচ্চয়ং শ্বেতমতিপ্রমাণম্
তস্যৈব পাণিঃ সনখো বিশীর্যে;ন্ন চাপি কিংচিত্স গিরেস্তু কুর্যাৎ
47.67
অগ্নিং সমিদ্ধং শময়েদ্ভুজাভ্যাং; চন্দ্রং চ সূর্যং চ নিবারয়েত
হরেদ্দেবানামমৃতং প্রসহ্য; যুদ্ধেন যো বাসুদেবং জিগীষেৎ
47.68
যো রুক্মিণীমেকরথেন ভোজ্যা;মুত্সাদ্য রাজ্ঞাং বিষয়ং প্রসহ্য
উবাহ ভার্যাং যশসা জ্বলন্তীং; যস্যাং জজ্ঞে রৌক্মিণেয়ো মহাত্মা
47.69
অয়ং গান্ধারাংস্তরসা সংপ্রমথ্য; জিত্বা পুত্রান্নগ্নজিতঃ সমগ্রান্
বদ্ধং মুমোচ বিনদন্তং প্রসহ্য; সুদর্শনীয়ং দেবতানাং ললামম্
47.70
অয়ং কবাটে নিজঘান পাণ্ড্যং; তথা কলিঙ্গান্দন্তকূরে মমর্দ
অনেন দগ্ধা বর্ষপূগান্বিনাথা; বারাণসী নগরী সংবভূব
47.71
যং স্ম যুদ্ধে মন্যতেঽন্যৈরজেয়;মেকলব্যং নাম নিষাদরাজম্
বেগেনেব শৈলমভিহত্য জম্ভঃ; শেতে স কৃষ্ণেন হতঃ পরাসুঃ
47.72
তথোগ্রসেনস্য সুতং প্রদুষ্টং; বৃষ্ণ্যন্ধকানাং মধ্যগাং তপন্তম্
অপাতয়দ্বলদেবদ্বিতীয়ো; হত্বা দদৌ চোগ্রসেনায় রাজ্যম্
47.73
অয়ং সৌভং যোধয়ামাস খস্থং; বিভীষণং মায়য়া শাল্বরাজম্
সৌভদ্বারি প্রত্যগৃহ্ণাচ্ছতঘ্নীং; দোর্ভ্যাং ক এনং বিষহেত মর্ত্যঃ
47.74
প্রাগ্জ্যোতিষং নাম বভূব দুর্গং; পুরং ঘোরমসুরাণামসহ্যম্
মহাবলো নরকস্তত্র ভৌমো; জহারাদিত্যা মণিকুণ্ডলে শুভে
47.75
ন তং দেবাঃ সহ শক্রেণ সেহিরে; সমাগতা আহরণায় ভীতাঃ
দৃষ্ট্বা চ তে বিক্রমং কেশবস্য; বলং তথৈবাস্ত্রমবারণীয়ম্
47.76
জানন্তোঽস্য প্রকৃতিং কেশবস্য; ন্যয়োজয়ন্দস্যুবধায় কৃষ্ণম্
স তত্কর্ম প্রতিশুশ্রাব দুষ্কর;মৈশ্বর্যবান্সিদ্ধিষু বাসুদেবঃ
47.77
নির্মোচনে ষট্সহস্রাণি হত্বা; সংছিদ্য পাশান্সহসা ক্ষুরান্তান্
মুরং হত্বা বিনিহত্যৌঘরাক্ষসং; নির্মোচনং চাপি জগাম বীরঃ
47.78
তত্রৈব তেনাস্য বভূব যুদ্ধং; মহাবলেনাতিবলস্য বিষ্ণোঃ
শেতে স কৃষ্ণেন হতঃ পরাসু;র্বাতেনেব মথিতঃ কর্ণিকারঃ
47.79
আহৃত্য কৃষ্ণো মণিকুণ্ডলে তে; হত্বা চ ভৌমং নরকং মুরং চ
শ্রিয়া বৃতো যশসা চৈব ধীমা;ন্প্রত্যাজগামাপ্রতিমপ্রভাবঃ
47.80
তস্মৈ বরানদদংস্তত্র দেবা; দৃষ্ট্বা ভীমং কর্ম রণে কৃতং তৎ
শ্রমশ্চ তে যুধ্যমানস্য ন স্যা;দাকাশে বা অপ্সু চৈব ক্রমঃ স্যাৎ
47.81
শস্ত্রাণি গাত্রে চ ন তে ক্রমের;ন্নিত্যেব কৃষ্ণশ্চ ততঃ কৃতার্থঃ
এবংরূপে বাসুদেবেঽপ্রমেয়ে; মহাবলে গুণসংপত্সদৈব
47.82
তমসহ্যং বিষ্ণুমনন্তবীর্য;মাশংসতে ধার্তরাষ্ট্রো বলেন
যদা হ্যেনং তর্কয়তে দুরাত্মা; তচ্চাপ্যয়ং সহতেঽস্মান্সমীক্ষ্য
47.83
পর্যাগতং মম কৃষ্ণস্য চৈব; যো মন্যতে কলহং সংপ্রয়ুজ্য
শক্যং হর্তুং পাণ্ডবানাং মমত্বং; তদ্বেদিতা সংয়ুগং তত্র গত্বা
47.84
নমস্কৃত্বা শাংতনবায় রাজ্ঞে; দ্রোণায়াথো সহপুত্রায় চৈব
শারদ্বতায়াপ্রতিদ্বন্দ্বিনে চ; যোত্স্যাম্যহং রাজ্যমভীপ্সমানঃ
47.85
ধর্মেণাস্ত্রং নিয়তং তস্য মন্যে; যো যোত্স্যতে পাণ্ডবৈর্ধর্মচারী
মিথ্যাগ্লহে নির্জিতা বৈ নৃশংসৈঃ; সংবত্সরান্দ্বাদশ পাণ্ডুপুত্রাঃ
47.86
অবাপ্য কৃচ্ছ্রং বিহিতং হ্যরণ্যে; দীর্ঘং কালং চৈকমজ্ঞাতচর্যাম্
তে হ্যকস্মাজ্জীবিতং পাণ্ডবানাং; ন মৃষ্যন্তে ধার্তরাষ্ট্রাঃ পদস্থাঃ
47.87
তে চেদস্মান্যুধ্যমানাঞ্জয়েয়ু;র্দেবৈরপীন্দ্রপ্রমুখৈঃ সহায়ৈঃ
ধর্মাদধর্মশ্চরিতো গরীয়া;নিতি ধ্রুবং নাস্তি কৃতং ন সাধু
47.88
ন চেদিমং পুরুষং কর্মবদ্ধং; ন চেদস্মান্মন্যতেঽসৌ বিশিষ্টান্
আশংসেঽহং বাসুদেবদ্বিতীয়ো; দুর্যোধনং সানুবন্ধং নিহন্তুম্
47.89
ন চেদিদং কর্ম নরেষু বদ্ধং; ন বিদ্যতে পুরুষস্য স্বকর্ম
ইদং চ তচ্চাপি সমীক্ষ্য নূনং; পরাজয়ো ধার্তরাষ্ট্রস্য সাধুঃ
47.90
প্রত্যক্ষং বঃ কুরবো যদ্ব্রবীমি; যুধ্যমানা ধার্তরাষ্ট্রা ন সন্তি
অন্যত্র যুদ্ধাত্কুরবঃ পরীপ্স;ন্ন যুধ্যতাং শেষ ইহাস্তি কশ্চিৎ
47.91
হত্বা ত্বহং ধার্তরাষ্ট্রান্সকর্ণা;ন্রাজ্যং কুরূণামবজেতা সমগ্রম্
যদ্বঃ কার্যং তত্কুরুধ্বং যথাস্ব;মিষ্টান্দারানাত্মজাংশ্চোপভুঙ্ক্ত
47.92
অপ্যেবং নো ব্রাহ্মণাঃ সন্তি বৃদ্ধা; বহুশ্রুতাঃ শীলবন্তঃ কুলীনাঃ
সাংবত্সরা জ্যোতিষি চাপি যুক্তা; নক্ষত্রয়োগেষু চ নিশ্চয়জ্ঞাঃ
47.93
উচ্চাবচং দৈবয়ুক্তং রহস্যং; দিব্যাঃ প্রশ্না মৃগচক্রা মুহূর্তাঃ
ক্ষয়ং মহান্তং কুরুসৃঞ্জয়ানাং; নিবেদয়ন্তে পাণ্ডবানাং জয়ং চ
47.94
তথা হি নো মন্যতেঽজাতশত্রুঃ; সংসিদ্ধার্থো দ্বিষতাং নিগ্রহায়
জনার্দনশ্চাপ্যপরোক্ষবিদ্যো; ন সংশয়ং পশ্যতি বৃষ্ণিসিংহঃ
47.95
অহং চ জানামি ভবিষ্যরূপং; পশ্যামি বুদ্ধ্যা স্বয়মপ্রমত্তঃ
দৃষ্টিশ্চ মে ন ব্যথতে পুরাণী; যুধ্যমানা ধার্তরাষ্ট্রা ন সন্তি
47.96
অনালব্ধং জৃম্ভতি গাণ্ডিবং ধনু;রনালব্ধা কম্পতি মে ধনুর্জ্যা
বাণাশ্চ মে তূণমুখাদ্বিসৃজ্য; মুহুর্মুহুর্গন্তুমুশন্তি চৈব
47.97
সৈক্যঃ কোশান্নিঃসরতি প্রসন্নো; হিত্বেব জীর্ণামুরগস্ত্বচং স্বাম্
ধ্বজে বাচো রৌদ্ররূপা বদন্তি; কদা রথো যোক্ষ্যতে তে কিরীটিন্
47.98
গোমায়ুসংঘাশ্চ বদন্তি রাত্রৌ; রক্ষাংস্যথো নিষ্পতন্ত্যন্তরিক্ষাৎ
মৃগাঃ শৃগালাঃ শিতিকণ্ঠাশ্চ কাকা; গৃধ্রা বডাশ্চৈব তরক্ষবশ্চ
47.99
সুপর্ণপাতাশ্চ পতন্তি পশ্চা;দ্দৃষ্ট্বা রথং শ্বেতহয়প্রয়ুক্তম্
অহং হ্যেকঃ পার্থিবান্সর্বয়োধা;ঞ্শরান্বর্ষন্মৃত্যুলোকং নয়েয়ম্
47.100
সমাদদানঃ পৃথগস্ত্রমার্গা;ন্যথাগ্নিরিদ্ধো গহনং নিদাঘে
স্থূণাকর্ণং পাশুপতং চ ঘোরং; তথা ব্রহ্মাস্ত্রং যচ্চ শক্রো বিবেদ
47.101
বধে ধৃতো বেগবতঃ প্রমুঞ্চ;ন্নাহং প্রজাঃ কিংচিদিবাবশিষ্যে
শান্তিং লপ্স্যে পরমো হ্যেষ ভাবঃ; স্থিরো মম ব্রূহি গাবল্গণে তান্
47.102
নিত্যং পুনঃ সচিবৈর্যৈরবোচ;দ্দেবানপীন্দ্রপ্রমুখান্সহায়ান্
তৈর্মন্যতে কলহং সংপ্রয়ুজ্য; স ধার্তরাষ্ট্রঃ পশ্যত মোহমস্য
47.103
বৃদ্ধো ভীষ্মঃ শাংতনবঃ কৃপশ্চ; দ্রোণঃ সপুত্রো বিদুরশ্চ ধীমান্
এতে সর্বে যদ্বদন্তে তদস্তু; আয়ুষ্মন্তঃ কুরবঃ সন্তু সর্বে