অধ্যায় 46

46.1

বৈশংপায়ন উবাচ
এবং সনত্সুজাতেন বিদুরেণ চ ধীমতা
সার্ধং কথয়তো রাজ্ঞঃ সা ব্যতীয়ায় শর্বরী

তস্যাং রজন্যাং ব্যুষ্টায়াং রাজানঃ সর্ব এব তে
সভামাবিবিশুর্হৃষ্টাঃ সূতস্যোপদিদৃক্ষয়া

শুশ্রূষমাণাঃ পার্থানাং বচো ধর্মার্থসংহিতম্
ধৃতরাষ্ট্রমুখাঃ সর্বে যয়ূ রাজসভাং শুভাম্

সুধাবদাতাং বিস্তীর্ণাং কনকাজিরভূষিতাম্
চন্দ্রপ্রভাং সুরুচিরাং সিক্তাং পরমবারিণা

রুচিরৈরাসনৈঃ স্তীর্ণাং কাঞ্চনৈর্দারবৈরপি
অশ্মসারময়ৈর্দান্তৈঃ স্বাস্তীর্ণৈঃ সোত্তরচ্ছদৈঃ

ভীষ্মো দ্রোণঃ কৃপঃ শল্যঃ কৃতবর্মা জয়দ্রথঃ
অশ্বত্থামা বিকর্ণশ্চ সোমদত্তশ্চ বাহ্লিকঃ

বিদুরশ্চ মহাপ্রাজ্ঞো যুয়ুত্সুশ্চ মহারথঃ
সর্বে চ সহিতাঃ শূরাঃ পার্থিবা ভরতর্ষভ
ধৃতরাষ্ট্রং পুরস্কৃত্য বিবিশুস্তাং সভাং শুভাম্

দুঃশাসনশ্চিত্রসেনঃ শকুনিশ্চাপি সৌবলঃ
দুর্মুখো দুঃসহঃ কর্ণ উলূকোঽথ বিবিংশতিঃ

কুরুরাজং পুরস্কৃত্য দুর্যোধনমমর্ষণম্
বিবিশুস্তাং সভাং রাজন্সুরাঃ শক্রসদো যথা

আবিশদ্ভিস্তদা রাজঞ্শূরৈঃ পরিঘবাহুভিঃ
শুশুভে সা সভা রাজন্সিংহৈরিব গিরের্গুহা

তে প্রবিশ্য মহেষ্বাসাঃ সভাং সমিতিশোভনাঃ
আসনানি মহার্হাণি ভেজিরে সূর্যবর্চসঃ

আসনস্থেষু সর্বেষু তেষু রাজসু ভারত
দ্বাঃস্থো নিবেদয়ামাস সূতপুত্রমুপস্থিতম্

অয়ং স রথ আয়াতি যোঽয়াসীত্পাণ্ডবান্প্রতি
দূতো নস্তূর্ণমায়াতঃ সৈন্ধবৈঃ সাধুবাহিভিঃ

উপয়ায় তু স ক্ষিপ্রং রথাত্প্রস্কন্দ্য কুণ্ডলী
প্রবিবেশ সভাং পূর্ণাং মহীপালৈর্মহাত্মভিঃ

সংজয় উবাচ
প্রাপ্তোঽস্মি পাণ্ডবান্গত্বা তদ্বিজানীত কৌরবাঃ
যথাবয়ঃ কুরূন্সর্বান্প্রতিনন্দন্তি পাণ্ডবাঃ

অভিবাদয়ন্তি বৃদ্ধাংশ্চ বয়স্যাংশ্চ বয়স্যবৎ
যূনশ্চাভ্যবদন্পার্থাঃ প্রতিপূজ্য যথাবয়ঃ

যথাহং ধৃতরাষ্ট্রেণ শিষ্টঃ পূর্বমিতো গতঃ
অব্রুবং পাণ্ডবান্গত্বা তন্নিবোধত পার্থিবাঃ