অধ্যায় 45

45.1

সনত্সুজাত উবাচ
যত্তচ্ছুক্রং মহজ্জ্যোতির্দীপ্যমানং মহদ্যশঃ
তদ্বৈ দেবা উপাসন্তে যস্মাদর্কো বিরাজতে
যোগিনস্তং প্রপশ্যন্তি ভগবন্তং সনাতনম্

45.2

শুক্রাদ্ব্রহ্ম প্রভবতি ব্রহ্ম শুক্রেণ বর্ধতে
তচ্ছুক্রং জ্যোতিষাং মধ্যেঽতপ্তং তপতি তাপনম্
যোগিনস্তং প্রপশ্যন্তি ভগবন্তং সনাতনম্

45.3

আপোঽথ অদ্ভ্যঃ সলিলস্য মধ্যে; উভৌ দেবৌ শিশ্রিয়াতেঽন্তরিক্ষে
স সধ্রীচীঃ স বিষূচীর্বসানা; উভে বিভর্তি পৃথিবীং দিবং চ
যোগিনস্তং প্রপশ্যন্তি ভগবন্তং সনাতনম্

45.4

উভৌ চ দেবৌ পৃথিবীং দিবং চ; দিশশ্চ শুক্রং ভুবনং বিভর্তি
তস্মাদ্দিশঃ সরিতশ্চ স্রবন্তি; তস্মাত্সমুদ্রা বিহিতা মহান্তঃ
যোগিনস্তং প্রপশ্যন্তি ভগবন্তং সনাতনম্

45.5

চক্রে রথস্য তিষ্ঠন্তং ধ্রুবস্যাব্যয়কর্মণঃ
কেতুমন্তং বহন্ত্যশ্বাস্তং দিব্যমজরং দিবি
যোগিনস্তং প্রপশ্যন্তি ভগবন্তং সনাতনম্

45.6

ন সাদৃশ্যে তিষ্ঠতি রূপমস্য; ন চক্ষুষা পশ্যতি কশ্চিদেনম্
মনীষয়াথো মনসা হৃদা চ; য এবং বিদুরমৃতাস্তে ভবন্তি
যোগিনস্তং প্রপশ্যন্তি ভগবন্তং সনাতনম্

45.7

দ্বাদশপূগাং সরিতং দেবরক্ষিতম্
মধু ঈশন্তস্তদা সংচরন্তি ঘোরম্
যোগিনস্তং প্রপশ্যন্তি ভগবন্তং সনাতনম্

45.8

তদর্ধমাসং পিবতি সংচিত্য ভ্রমরো মধু
ঈশানঃ সর্বভূতেষু হবির্ভূতমকল্পয়ৎ
যোগিনস্তং প্রপশ্যন্তি ভগবন্তং সনাতনম্

45.9

হিরণ্যপর্ণমশ্বত্থমভিপত্য অপক্ষকাঃ
তে তত্র পক্ষিণো ভূত্বা প্রপতন্তি যথাদিশম্
যোগিনস্তং প্রপশ্যন্তি ভগবন্তং সনাতনম্

45.10

পূর্ণাত্পূর্ণান্যুদ্ধরন্তি পূর্ণাত্পূর্ণানি চক্রিরে
হরন্তি পূর্ণাত্পূর্ণানি পূর্ণমেবাবশিষ্যতে
যোগিনস্তং প্রপশ্যন্তি ভগবন্তং সনাতনম্

45.11

তস্মাদ্বৈ বায়ুরায়াতস্তস্মিংশ্চ প্রয়তঃ সদা
তস্মাদগ্নিশ্চ সোমশ্চ তস্মিংশ্চ প্রাণ আততঃ

45.12

সর্বমেব ততো বিদ্যাত্তত্তদ্বক্তুং ন শক্নুমঃ
যোগিনস্তং প্রপশ্যন্তি ভগবন্তং সনাতনম্

45.13

অপানং গিরতি প্রাণঃ প্রাণং গিরতি চন্দ্রমাঃ
আদিত্যো গিরতে চন্দ্রমাদিত্যং গিরতে পরঃ
যোগিনস্তং প্রপশ্যন্তি ভগবন্তং সনাতনম্

45.14

একং পাদং নোত্ক্ষিপতি সলিলাদ্ধংস উচ্চরন্
তং চেত্সততমৃত্বিজং ন মৃত্যুর্নামৃতং ভবেৎ
যোগিনস্তং প্রপশ্যন্তি ভগবন্তং সনাতনম্

45.15

এবং দেবো মহাত্মা স পাবকং পুরুষো গিরন্
যো বৈ তং পুরুষং বেদ তস্যেহাত্মা ন রিষ্যতে
যোগিনস্তং প্রপশ্যন্তি ভগবন্তং সনাতনম্

45.16

যঃ সহস্রং সহস্রাণাং পক্ষান্সংতত্য সংপতেৎ
মধ্যমে মধ্য আগচ্ছেদপি চেত্স্যান্মনোজবঃ
যোগিনস্তং প্রপশ্যন্তি ভগবন্তং সনাতনম্

45.17

ন দর্শনে তিষ্ঠতি রূপমস্য; পশ্যন্তি চৈনং সুবিশুদ্ধসত্ত্বাঃ
হিতো মনীষী মনসাভিপশ্যে;দ্যে তং শ্রয়েয়ুরমৃতাস্তে ভবন্তি
যোগিনস্তং প্রপশ্যন্তি ভগবন্তং সনাতনম্

45.18

গূহন্তি সর্পা ইব গহ্বরাণি; স্বশিক্ষয়া স্বেন বৃত্তেন মর্ত্যাঃ
তেষু প্রমুহ্যন্তি জনা বিমূঢা; যথাধ্বানং মোহয়ন্তে ভয়ায়
যোগিনস্তং প্রপশ্যন্তি ভগবন্তং সনাতনম্

45.19

সদা সদাসত্কৃতঃ স্যান্ন মৃত্যুরমৃতং কুতঃ
সত্যানৃতে সত্যসমানবন্ধনে; সতশ্চ যোনিরসতশ্চৈক এব
যোগিনস্তং প্রপশ্যন্তি ভগবন্তং সনাতনম্

45.20

ন সাধুনা নোত অসাধুনা বা; সমানমেতদ্দৃশ্যতে মানুষেষু
সমানমেতদমৃতস্য বিদ্যা;দেবংয়ুক্তো মধু তদ্বৈ পরীপ্সেৎ
যোগিনস্তং প্রপশ্যন্তি ভগবন্তং সনাতনম্

45.21

নাস্যাতিবাদা হৃদয়ং তাপয়ন্তি; নানধীতং নাহুতমগ্নিহোত্রম্
মনো ব্রাহ্মীং লঘুতামাদধীত; প্রজ্ঞানমস্য নাম ধীরা লভন্তে
যোগিনস্তং প্রপশ্যন্তি ভগবন্তং সনাতনম্