Utshovঅধ্যায় 44
44.1
ধৃতরাষ্ট্র উবাচ
সনত্সুজাত যদিমাং পরার্থাং; ব্রাহ্মীং বাচং প্রবদসি বিশ্বরূপাম্
পরাং হি কামেষু সুদুর্লভাং কথাং; তদ্ব্রূহি মে বাক্যমেতত্কুমার
44.2
সনত্সুজাত উবাচ
নৈতদ্ব্রহ্ম ত্বরমাণেন লভ্যং; যন্মাং পৃচ্ছস্যভিহৃষ্যস্যতীব
অব্যক্তবিদ্যামভিধাস্যে পুরাণীং; বুদ্ধ্যা চ তেষাং ব্রহ্মচর্যেণ সিদ্ধাম্
44.3
ধৃতরাষ্ট্র উবাচ
অব্যক্তবিদ্যামিতি যত্সনাতনীং; ব্রবীষি ত্বং ব্রহ্মচর্যেণ সিদ্ধাম্
অনারভ্যা বসতীহার্য কালে; কথং ব্রাহ্মণ্যমমৃতত্বং লভেত
44.4
সনত্সুজাত উবাচ
যেঽস্মিঁল্লোকে বিজয়ন্তীহ কামা;ন্ব্রাহ্মীং স্থিতিমনুতিতিক্ষমাণাঃ
ত আত্মানং নির্হরন্তীহ দেহা;ন্মুঞ্জাদিষীকামিব সত্ত্বসংস্থাঃ
44.5
শরীরমেতৌ কুরুতঃ পিতা মাতা চ ভারত
আচার্যশাস্তা যা জাতিঃ সা সত্যা সাজরামরা
44.6
আচার্যয়োনিমিহ যে প্রবিশ্য; ভূত্বা গর্ভং ব্রহ্মচর্যং চরন্তি
ইহৈব তে শাস্ত্রকারা ভবন্তি; প্রহায় দেহং পরমং যান্তি যোগম্
44.7
য আবৃণোত্যবিতথেন কর্ণা;বৃতং কুর্বন্নমৃতং সংপ্রয়চ্ছন্
তং মন্যেত পিতরং মাতরং চ; তস্মৈ ন দ্রুহ্যেত্কৃতমস্য জানন্
44.8
গুরুং শিষ্যো নিত্যমভিমন্যমানঃ; স্বাধ্যায়মিচ্ছেচ্ছুচিরপ্রমত্তঃ
মানং ন কুর্যান্ন দধীত রোষ;মেষ প্রথমো ব্রহ্মচর্যস্য পাদঃ
44.9
আচার্যস্য প্রিয়ং কুর্যাত্প্রাণৈরপি ধনৈরপি
কর্মণা মনসা বাচা দ্বিতীয়ঃ পাদ উচ্যতে
44.10
সমা গুরৌ যথা বৃত্তির্গুরুপত্ন্যাং তথা ভবেৎ
যথোক্তকারী প্রিয়কৃত্তৃতীয়ঃ পাদ উচ্যতে
44.11
নাচার্যায়েহোপকৃত্বা প্রবাদং; প্রাজ্ঞঃ কুর্বীত নৈতদহং করোমি
ইতীব মন্যেত ন ভাষয়েত; স বৈ চতুর্থো ব্রহ্মচর্যস্য পাদঃ
44.12
এবং বসন্তং যদুপপ্লবেদ্ধন;মাচার্যায় তদনুপ্রয়চ্ছেৎ
সতাং বৃত্তিং বহুগুণামেবমেতি; গুরোঃ পুত্রে ভবতি চ বৃত্তিরেষা
44.13
এবং বসন্সর্বতো বর্ধতীহ; বহূন্পুত্রাঁল্লভতে চ প্রতিষ্ঠাম্
বর্ষন্তি চাস্মৈ প্রদিশো দিশশ্চ; বসন্ত্যস্মিন্ব্রহ্মচর্যে জনাশ্চ
44.14
এতেন ব্রহ্মচর্যেণ দেবা দেবত্বমাপ্নুবন্
ঋষয়শ্চ মহাভাগা ব্রহ্মলোকং মনীষিণঃ
44.15
গন্ধর্বাণামনেনৈব রূপমপ্সরসামভূৎ
এতেন ব্রহ্মচর্যেণ সূর্যো অহ্নায় জায়তে
44.16
য আশয়েত্পাটয়েচ্চাপি রাজ;ন্সর্বং শরীরং তপসা তপ্যমানঃ
এতেনাসৌ বাল্যমত্যেতি বিদ্বা;ন্মৃত্যুং তথা রোধয়ত্যন্তকালে
44.17
অন্তবন্তঃ ক্ষত্রিয় তে জয়ন্তি; লোকাঞ্জনাঃ কর্মণা নির্মিতেন
ব্রহ্মৈব বিদ্বাংস্তেন অভ্যেতি সর্বং; নান্যঃ পন্থা অয়নায় বিদ্যতে
44.18
ধৃতরাষ্ট্র উবাচ
আভাতি শুক্লমিব লোহিতমিব; অথো কৃষ্ণমথাঞ্জনং কাদ্রবং বা
তদ্ব্রাহ্মণঃ পশ্যতি যোঽত্র বিদ্বা;ন্কথংরূপং তদমৃতমক্ষরং পদম্
44.19
সনত্সুজাত উবাচ
নাভাতি শুক্লমিব লোহিতমিব; অথো কৃষ্ণমায়সমর্কবর্ণম্
ন পৃথিব্যাং তিষ্ঠতি নান্তরিক্ষে; নৈতত্সমুদ্রে সলিলং বিভর্তি
44.20
ন তারকাসু ন চ বিদ্যুদাশ্রিতং; ন চাভ্রেষু দৃশ্যতে রূপমস্য
ন চাপি বায়ৌ ন চ দেবতাসু; ন তচ্চন্দ্রে দৃশ্যতে নোত সূর্যে
44.21
নৈবর্ক্ষু তন্ন যজুঃষু নাপ্যথর্বসু; ন চৈব দৃশ্যত্যমলেষু সামসু
রথংতরে বার্হতে চাপি রাজ;ন্মহাব্রতে নৈব দৃশ্যেদ্ধ্রুবং তৎ
44.22
অপারণীয়ং তমসঃ পরস্তা;ত্তদন্তকোঽপ্যেতি বিনাশকালে
অণীয়রূপং ক্ষুরধারয়া ত;ন্মহচ্চ রূপং ত্বপি পর্বতেভ্যঃ
44.23
সা প্রতিষ্ঠা তদমৃতং লোকাস্তদ্ব্রহ্ম তদ্যশঃ
ভূতানি জজ্ঞিরে তস্মাত্প্রলয়ং যান্তি তত্র চ
44.24
অনাময়ং তন্মহদুদ্যতং যশো; বাচো বিকারান্কবয়ো বদন্তি
তস্মিঞ্জগত্সর্বমিদং প্রতিষ্ঠিতং; যে তদ্বিদুরমৃতাস্তে ভবন্তি