Utshovঅধ্যায় 43
43.1
ধৃতরাষ্ট্র উবাচ
ঋচো যজূংষ্যধীতে যঃ সামবেদং চ যো দ্বিজঃ
পাপানি কুর্বন্পাপেন লিপ্যতে ন স লিপ্যতে
43.2
সনত্সুজাত উবাচ
নৈনং সামান্যৃচো বাপি ন যজূংষি বিচক্ষণ
ত্রায়ন্তে কর্মণঃ পাপান্ন তে মিথ্যা ব্রবীম্যহম্
43.3
ন ছন্দাংসি বৃজিনাত্তারয়ন্তি; মায়াবিনং মায়য়া বর্তমানম্
নীডং শকুন্তা ইব জাতপক্ষা;শ্ছন্দাংস্যেনং প্রজহত্যন্তকালে
43.4
ধৃতরাষ্ট্র উবাচ
ন চেদ্বেদা বেদবিদং শক্তাস্ত্রাতুং বিচক্ষণ
অথ কস্মাত্প্রলাপোঽয়ং ব্রাহ্মণানাং সনাতনঃ
43.5
সনত্সুজাত উবাচ
অস্মিঁল্লোকে তপস্তপ্তং ফলমন্যত্র দৃশ্যতে
ব্রাহ্মণানামিমে লোকা ঋদ্ধে তপসি সংয়তাঃ
43.6
ধৃতরাষ্ট্র উবাচ
কথং সমৃদ্ধমপ্যৃদ্ধং তপো ভবতি কেবলম্
সনত্সুজাত তদ্ব্রূহি যথা বিদ্যাম তদ্বয়ম্
43.7
সনত্সুজাত উবাচ
ক্রোধাদয়ো দ্বাদশ যস্য দোষা;স্তথা নৃশংসাদি ষডত্র রাজন্
ধর্মাদয়ো দ্বাদশ চাততানাঃ; শাস্ত্রে গুণা যে বিদিতা দ্বিজানাম্
43.8
ক্রোধঃ কামো লোভমোহৌ বিবিত্সা;কৃপাসূয়া মানশোকৌ স্পৃহা চ
ঈর্ষ্যা জুগুপ্সা চ মনুষ্যদোষা; বর্জ্যাঃ সদা দ্বাদশৈতে নরেণ
43.9
একৈকমেতে রাজেন্দ্র মনুষ্যান্পর্যুপাসতে
লিপ্সমানোঽন্তরং তেষাং মৃগাণামিব লুব্ধকঃ
43.10
বিকত্থনঃ স্পৃহয়ালুর্মনস্বী; বিভ্রত্কোপং চপলোঽরক্ষণশ্চ
এতে প্রাপ্তাঃ ষণ্নরান্পাপধর্মা;ন্প্রকুর্বতে নোত সন্তঃ সুদুর্গে
43.11
সংভোগসংবিদ্দ্বিষমেধমানো; দত্তানুতাপী কৃপণোঽবলীয়ান্
বর্গপ্রশংসী বনিতাসু দ্বেষ্টা; এতেঽপরে সপ্ত নৃশংসধর্মাঃ
43.12
ধর্মশ্চ সত্যং চ দমস্তপশ্চ; অমাত্সর্যং হ্রীস্তিতিক্ষানসূয়া
যজ্ঞশ্চ দানং চ ধৃতিঃ শ্রুতং চ; মহাব্রতা দ্বাদশ ব্রাহ্মণস্য
43.13
যস্ত্বেতেভ্যঃ প্রবসেদ্দ্বাদশেভ্যঃ; সর্বামপীমাং পৃথিবীং প্রশিষ্যাৎ
ত্রিভির্দ্বাভ্যামেকতো বা বিশিষ্টো; নাস্য স্বমস্তীতি স বেদিতব্যঃ
43.14
দমস্ত্যাগোঽপ্রমাদশ্চ এতেষ্বমৃতমাহিতম্
তানি সত্যমুখান্যাহুর্ব্রাহ্মণা যে মনীষিণঃ
43.15
দমোঽষ্টাদশদোষঃ স্যাত্প্রতিকূলং কৃতাকৃতে
অনৃতং চাভ্যসূয়া চ কামার্থৌ চ তথা স্পৃহা
43.16
ক্রোধঃ শোকস্তথা তৃষ্ণা লোভঃ পৈশুন্যমেব চ
মত্সরশ্চ বিবিত্সা চ পরিতাপস্তথা রতিঃ
43.17
অপস্মারঃ সাতিবাদস্তথা সংভাবনাত্মনি
এতৈর্বিমুক্তো দোষৈর্যঃ স দমঃ সদ্ভিরুচ্যতে
43.18
শ্রেয়াংস্তু ষড্বিধস্ত্যাগঃ প্রিয়ং প্রাপ্য ন হৃষ্যতি
অপ্রিয়ে তু সমুত্পন্নে ব্যথাং জাতু ন চার্চ্ছতি
43.19
ইষ্টান্দারাংশ্চ পুত্রাংশ্চ ন চান্যং যদ্বচো ভবেৎ
অর্হতে যাচমানায় প্রদেয়ং তদ্বচো ভবেৎ
অপ্যবাচ্যং বদত্যেব স তৃতীয়ো গুণঃ স্মৃতঃ
43.20
ত্যক্তৈর্দ্রব্যৈর্যো ভবতি নোপয়ুঙ্ক্তে চ কামতঃ
ন চ কর্মসু তদ্ধীনঃ শিষ্যবুদ্ধির্নরো যথা
সর্বৈরেব গুণৈর্যুক্তো দ্রব্যবানপি যো ভবেৎ
43.21
অপ্রমাদোঽষ্টদোষঃ স্যাত্তান্দোষান্পরিবর্জয়েৎ
ইন্দ্রিয়েভ্যশ্চ পঞ্চভ্যো মনসশ্চৈব ভারত
অতীতানাগতেভ্যশ্চ মুক্তো হ্যেতৈঃ সুখী ভবেৎ
43.22
দোষৈরেতৈর্বিমুক্তং তু গুণৈরেতৈঃ সমন্বিতম্
এতত্সমৃদ্ধমপ্যৃদ্ধং তপো ভবতি কেবলম্
যন্মাং পৃচ্ছসি রাজেন্দ্র কিং ভূয়ঃ শ্রোতুমিচ্ছসি
43.23
ধৃতরাষ্ট্র উবাচ
আখ্যানপঞ্চমৈর্বেদৈর্ভূয়িষ্ঠং কথ্যতে জনঃ
তথৈবান্যে চতুর্বেদাস্ত্রিবেদাশ্চ তথাপরে
43.24
দ্বিবেদাশ্চৈকবেদাশ্চ অনৃচশ্চ তথাপরে
তেষাং তু কতমঃ স স্যাদ্যমহং বেদ ব্রাহ্মণম্
43.25
সনত্সুজাত উবাচ
একস্য বেদস্যাজ্ঞানাদ্বেদাস্তে বহবোঽভবন্
সত্যস্যৈকস্য রাজেন্দ্র সত্যে কশ্চিদবস্থিতঃ
এবং বেদমনুত্সাদ্য প্রজ্ঞাং মহতি কুর্বতে
43.26
দানমধ্যয়নং যজ্ঞো লোভাদেতত্প্রবর্ততে
সত্যাত্প্রচ্যবমানানাং সংকল্পো বিতথো ভবেৎ
43.27
ততো যজ্ঞঃ প্রতায়েত সত্যস্যৈবাবধারণাৎ
মনসান্যস্য ভবতি বাচান্যস্যোত কর্মণা
সংকল্পসিদ্ধঃ পুরুষঃ সংকল্পানধিতিষ্ঠতি
43.28
অনৈভৃত্যেন বৈ তস্য দীক্ষিতব্রতমাচরেৎ
নামৈতদ্ধাতুনির্বৃত্তং সত্যমেব সতাং পরম্
জ্ঞানং বৈ নাম প্রত্যক্ষং পরোক্ষং জায়তে তপঃ
43.29
বিদ্যাদ্বহু পঠন্তং তু বহুপাঠীতি ব্রাহ্মণম্
তস্মাত্ক্ষত্রিয় মা মংস্থা জল্পিতেনৈব ব্রাহ্মণম্
য এব সত্যান্নাপৈতি স জ্ঞেয়ো ব্রাহ্মণস্ত্বয়া
43.30
ছন্দাংসি নাম ক্ষত্রিয় তান্যথর্বা; জগৌ পুরস্তাদৃষিসর্গ এষঃ
ছন্দোবিদস্তে য উ তানধীত্য; ন বেদ্যবেদস্য বিদুর্ন বেদ্যম্
43.31
ন বেদানাং বেদিতা কশ্চিদস্তি; কশ্চিদ্বেদান্বুধ্যতে বাপি রাজন্
যো বেদ বেদান্ন স বেদ বেদ্যং; সত্যে স্থিতো যস্তু স বেদ বেদ্যম্
43.32
অভিজানামি ব্রাহ্মণমাখ্যাতারং বিচক্ষণম্
যশ্ছিন্নবিচিকিত্সঃ সন্নাচষ্টে সর্বসংশয়ান্
43.33
তস্য পর্যেষণং গচ্ছেত্প্রাচীনং নোত দক্ষিণম্
নার্বাচীনং কুতস্তির্যঙ্নাদিশং তু কথংচন
43.34
তূষ্ণীংভূত উপাসীত ন চেষ্টেন্মনসা অপি
অভ্যাবর্তেত ব্রহ্মাস্য অন্তরাত্মনি বৈ শ্রিতম্
43.35
মৌনাদ্ধি স মুনির্ভবতি নারণ্যবসনান্মুনিঃ
অক্ষরং তত্তু যো বেদ স মুনিঃ শ্রেষ্ঠ উচ্যতে
43.36
সর্বার্থানাং ব্যাকরণাদ্বৈয়াকরণ উচ্যতে
প্রত্যক্ষদর্শী লোকানাং সর্বদর্শী ভবেন্নরঃ
43.37
সত্যে বৈ ব্রাহ্মণস্তিষ্ঠন্ব্রহ্ম পশ্যতি ক্ষত্রিয়
বেদানাং চানুপূর্ব্যেণ এতদ্বিদ্বন্ব্রবীমি তে