UtshovChapter 43
43.1
धृतराष्ट्र उवाच
ऋचो यजूंष्यधीते यः सामवेदं च यो द्विजः
पापानि कुर्वन्पापेन लिप्यते न स लिप्यते
Dhritarashtra uvacha
Richo yajunshyadhite yah samavedam cha yo dvijah
Papani kurvanpapena lipyate na sa lipyate
43.2
सनत्सुजात उवाच
नैनं सामान्यृचो वापि न यजूंषि विचक्षण
त्रायन्ते कर्मणः पापान्न ते मिथ्या ब्रवीम्यहम्
Sanatsujata uvacha
Nainam samanyricho vapi na yajunshi vichakshana
Trayante karmanah papanna te mithya bravimyaham
43.3
न छन्दांसि वृजिनात्तारयन्ति; मायाविनं मायया वर्तमानम्
नीडं शकुन्ता इव जातपक्षा;श्छन्दांस्येनं प्रजहत्यन्तकाले
Na chhandansi vrijinattarayanti; mayavinam mayaya vartamanam
Nidam shakunta iva jatapaksha;shchhandansyenam prajahatyantakale
43.4
धृतराष्ट्र उवाच
न चेद्वेदा वेदविदं शक्तास्त्रातुं विचक्षण
अथ कस्मात्प्रलापोऽयं ब्राह्मणानां सनातनः
Dhritarashtra uvacha
Na chedveda vedavidam shaktastratum vichakshana
Atha kasmatpralapoyam brahmananam sanatanah
43.5
सनत्सुजात उवाच
अस्मिँल्लोके तपस्तप्तं फलमन्यत्र दृश्यते
ब्राह्मणानामिमे लोका ऋद्धे तपसि संयताः
Sanatsujata uvacha
Asminlloke tapastaptam phalamanyatra drishyate
Brahmananamime loka riddhe tapasi sanyatah
43.6
धृतराष्ट्र उवाच
कथं समृद्धमप्यृद्धं तपो भवति केवलम्
सनत्सुजात तद्ब्रूहि यथा विद्याम तद्वयम्
Dhritarashtra uvacha
Katham samriddhamapyriddham tapo bhavati kevalam
Sanatsujata tadbruhi yatha vidyama tadvayam
43.7
सनत्सुजात उवाच
क्रोधादयो द्वादश यस्य दोषा;स्तथा नृशंसादि षडत्र राजन्
धर्मादयो द्वादश चाततानाः; शास्त्रे गुणा ये विदिता द्विजानाम्
Sanatsujata uvacha
Krodhadayo dvadasha yasya dosha;statha nrishansadi shadatra rajan
Dharmadayo dvadasha chatatanah; shastre guna ye vidita dvijanam
43.8
क्रोधः कामो लोभमोहौ विवित्सा;कृपासूया मानशोकौ स्पृहा च
ईर्ष्या जुगुप्सा च मनुष्यदोषा; वर्ज्याः सदा द्वादशैते नरेण
Krodhah kamo lobhamohau vivitsa;kripasuya manashokau spriha cha
Irshya jugupsa cha manushyadosha; varjyah sada dvadashaite narena
43.9
एकैकमेते राजेन्द्र मनुष्यान्पर्युपासते
लिप्समानोऽन्तरं तेषां मृगाणामिव लुब्धकः
Ekaikamete rajendra manushyanparyupasate
Lipsamanontaram tesham mriganamiva lubdhakah
43.10
विकत्थनः स्पृहयालुर्मनस्वी; बिभ्रत्कोपं चपलोऽरक्षणश्च
एते प्राप्ताः षण्नरान्पापधर्मा;न्प्रकुर्वते नोत सन्तः सुदुर्गे
Vikatthanah sprihayalurmanasvi; bibhratkopam chapalorakshanashcha
Ete praptah shannaranpapadharma;nprakurvate nota santah sudurge
43.11
संभोगसंविद्द्विषमेधमानो; दत्तानुतापी कृपणोऽबलीयान्
वर्गप्रशंसी वनितासु द्वेष्टा; एतेऽपरे सप्त नृशंसधर्माः
Sambhogasanviddvishamedhamano; dattanutapi kripanobaliyan
Vargaprashansi vanitasu dveshta; etepare sapta nrishansadharmah
43.12
धर्मश्च सत्यं च दमस्तपश्च; अमात्सर्यं ह्रीस्तितिक्षानसूया
यज्ञश्च दानं च धृतिः श्रुतं च; महाव्रता द्वादश ब्राह्मणस्य
Dharmashcha satyam cha damastapashcha; amatsaryam hristitikshanasuya
Yagyashcha danam cha dhritih shrutam cha; mahavrata dvadasha brahmanasya
43.13
यस्त्वेतेभ्यः प्रवसेद्द्वादशेभ्यः; सर्वामपीमां पृथिवीं प्रशिष्यात्
त्रिभिर्द्वाभ्यामेकतो वा विशिष्टो; नास्य स्वमस्तीति स वेदितव्यः
Yastvetebhyah pravaseddvadashebhyah; sarvamapimam prithivim prashishyat
Tribhirdvabhyamekato va vishishto; nasya svamastiti sa veditavyah
43.14
दमस्त्यागोऽप्रमादश्च एतेष्वमृतमाहितम्
तानि सत्यमुखान्याहुर्ब्राह्मणा ये मनीषिणः
Damastyagopramadashcha eteshvamritamahitam
Tani satyamukhanyahurbrahmana ye manishinah
43.15
दमोऽष्टादशदोषः स्यात्प्रतिकूलं कृताकृते
अनृतं चाभ्यसूया च कामार्थौ च तथा स्पृहा
Damoshtadashadoshah syatpratikulam kritakrite
Anritam chabhyasuya cha kamarthau cha tatha spriha
43.16
क्रोधः शोकस्तथा तृष्णा लोभः पैशुन्यमेव च
मत्सरश्च विवित्सा च परितापस्तथा रतिः
Krodhah shokastatha trishna lobhah paishunyameva cha
Matsarashcha vivitsa cha paritapastatha ratih
43.17
अपस्मारः सातिवादस्तथा संभावनात्मनि
एतैर्विमुक्तो दोषैर्यः स दमः सद्भिरुच्यते
Apasmarah sativadastatha sambhavanatmani
Etairvimukto doshairyah sa damah sadbhiruchyate
43.18
श्रेयांस्तु षड्विधस्त्यागः प्रियं प्राप्य न हृष्यति
अप्रिये तु समुत्पन्ने व्यथां जातु न चार्च्छति
Shreyanstu shadvidhastyagah priyam prapya na hrishyati
Apriye tu samutpanne vyatham jatu na charchchhati
43.19
इष्टान्दारांश्च पुत्रांश्च न चान्यं यद्वचो भवेत्
अर्हते याचमानाय प्रदेयं तद्वचो भवेत्
अप्यवाच्यं वदत्येव स तृतीयो गुणः स्मृतः
Ishtandaranshcha putranshcha na chanyam yadvacho bhavet
Arhate yachamanaya pradeyam tadvacho bhavet
Apyavachyam vadatyeva sa tritiyo gunah smritah
43.20
त्यक्तैर्द्रव्यैर्यो भवति नोपयुङ्क्ते च कामतः
न च कर्मसु तद्धीनः शिष्यबुद्धिर्नरो यथा
सर्वैरेव गुणैर्युक्तो द्रव्यवानपि यो भवेत्
Tyaktairdravyairyo bhavati nopayunkte cha kamatah
Na cha karmasu taddhinah shishyabuddhirnaro yatha
Sarvaireva gunairyukto dravyavanapi yo bhavet
43.21
अप्रमादोऽष्टदोषः स्यात्तान्दोषान्परिवर्जयेत्
इन्द्रियेभ्यश्च पञ्चभ्यो मनसश्चैव भारत
अतीतानागतेभ्यश्च मुक्तो ह्येतैः सुखी भवेत्
Apramadoshtadoshah syattandoshanparivarjayet
Indriyebhyashcha panchabhyo manasashchaiva bharata
Atitanagatebhyashcha mukto hyetaih sukhi bhavet
43.22
दोषैरेतैर्विमुक्तं तु गुणैरेतैः समन्वितम्
एतत्समृद्धमप्यृद्धं तपो भवति केवलम्
यन्मां पृच्छसि राजेन्द्र किं भूयः श्रोतुमिच्छसि
Doshairetairvimuktam tu gunairetaih samanvitam
Etatsamriddhamapyriddham tapo bhavati kevalam
Yanmam prichchhasi rajendra kim bhuyah shrotumichchhasi
43.23
धृतराष्ट्र उवाच
आख्यानपञ्चमैर्वेदैर्भूयिष्ठं कथ्यते जनः
तथैवान्ये चतुर्वेदास्त्रिवेदाश्च तथापरे
Dhritarashtra uvacha
Akhyanapanchamairvedairbhuyishtham kathyate janah
Tathaivanye chaturvedastrivedashcha tathapare
43.24
द्विवेदाश्चैकवेदाश्च अनृचश्च तथापरे
तेषां तु कतमः स स्याद्यमहं वेद ब्राह्मणम्
Dvivedashchaikavedashcha anrichashcha tathapare
Tesham tu katamah sa syadyamaham veda brahmanam
43.25
सनत्सुजात उवाच
एकस्य वेदस्याज्ञानाद्वेदास्ते बहवोऽभवन्
सत्यस्यैकस्य राजेन्द्र सत्ये कश्चिदवस्थितः
एवं वेदमनुत्साद्य प्रज्ञां महति कुर्वते
Sanatsujata uvacha
Ekasya vedasyagyanadvedaste bahavobhavan
Satyasyaikasya rajendra satye kashchidavasthitah
Evam vedamanutsadya pragyam mahati kurvate
43.26
दानमध्ययनं यज्ञो लोभादेतत्प्रवर्तते
सत्यात्प्रच्यवमानानां संकल्पो वितथो भवेत्
Danamadhyayanam yagyo lobhadetatpravartate
Satyatprachyavamananam sankalpo vitatho bhavet
43.27
ततो यज्ञः प्रतायेत सत्यस्यैवावधारणात्
मनसान्यस्य भवति वाचान्यस्योत कर्मणा
संकल्पसिद्धः पुरुषः संकल्पानधितिष्ठति
Tato yagyah pratayeta satyasyaivavadharanat
Manasanyasya bhavati vachanyasyota karmana
Sankalpasiddhah purushah sankalpanadhitishthati
43.28
अनैभृत्येन वै तस्य दीक्षितव्रतमाचरेत्
नामैतद्धातुनिर्वृत्तं सत्यमेव सतां परम्
ज्ञानं वै नाम प्रत्यक्षं परोक्षं जायते तपः
Anaibhrityena vai tasya dikshitavratamacharet
Namaitaddhatunirvrittam satyameva satam param
Gyanam vai nama pratyaksham paroksham jayate tapah
43.29
विद्याद्बहु पठन्तं तु बहुपाठीति ब्राह्मणम्
तस्मात्क्षत्रिय मा मंस्था जल्पितेनैव ब्राह्मणम्
य एव सत्यान्नापैति स ज्ञेयो ब्राह्मणस्त्वया
Vidyadbahu pathantam tu bahupathiti brahmanam
Tasmatkshatriya ma manstha jalpitenaiva brahmanam
Ya eva satyannapaiti sa gyeyo brahmanastvaya
43.30
छन्दांसि नाम क्षत्रिय तान्यथर्वा; जगौ पुरस्तादृषिसर्ग एषः
छन्दोविदस्ते य उ तानधीत्य; न वेद्यवेदस्य विदुर्न वेद्यम्
Chhandansi nama kshatriya tanyatharva; jagau purastadrishisarga eshah
Chhandovidaste ya u tanadhitya; na vedyavedasya vidurna vedyam
43.31
न वेदानां वेदिता कश्चिदस्ति; कश्चिद्वेदान्बुध्यते वापि राजन्
यो वेद वेदान्न स वेद वेद्यं; सत्ये स्थितो यस्तु स वेद वेद्यम्
Na vedanam vedita kashchidasti; kashchidvedanbudhyate vapi rajan
Yo veda vedanna sa veda vedyam; satye sthito yastu sa veda vedyam
43.32
अभिजानामि ब्राह्मणमाख्यातारं विचक्षणम्
यश्छिन्नविचिकित्सः सन्नाचष्टे सर्वसंशयान्
Abhijanami brahmanamakhyataram vichakshanam
Yashchhinnavichikitsah sannachashte sarvasanshayan
43.33
तस्य पर्येषणं गच्छेत्प्राचीनं नोत दक्षिणम्
नार्वाचीनं कुतस्तिर्यङ्नादिशं तु कथंचन
Tasya paryeshanam gachchhetprachinam nota dakshinam
Narvachinam kutastiryannadisham tu kathanchana
43.34
तूष्णींभूत उपासीत न चेष्टेन्मनसा अपि
अभ्यावर्तेत ब्रह्मास्य अन्तरात्मनि वै श्रितम्
Tushnimbhuta upasita na cheshtenmanasa api
Abhyavarteta brahmasya antaratmani vai shritam
43.35
मौनाद्धि स मुनिर्भवति नारण्यवसनान्मुनिः
अक्षरं तत्तु यो वेद स मुनिः श्रेष्ठ उच्यते
Maunaddhi sa munirbhavati naranyavasananmunih
Aksharam tattu yo veda sa munih shreshtha uchyate
43.36
सर्वार्थानां व्याकरणाद्वैयाकरण उच्यते
प्रत्यक्षदर्शी लोकानां सर्वदर्शी भवेन्नरः
Sarvarthanam vyakaranadvaiyakarana uchyate
Pratyakshadarshi lokanam sarvadarshi bhavennarah
43.37
सत्ये वै ब्राह्मणस्तिष्ठन्ब्रह्म पश्यति क्षत्रिय
वेदानां चानुपूर्व्येण एतद्विद्वन्ब्रवीमि ते
Satye vai brahmanastishthanbrahma pashyati kshatriya
Vedanam chanupurvyena etadvidvanbravimi te