Utshovঅধ্যায় 42
42.1
বৈশংপায়ন উবাচ
ততো রাজা ধৃতরাষ্ট্রো মনীষী; সংপূজ্য বাক্যং বিদুরেরিতং তৎ
সনত্সুজাতং রহিতে মহাত্মা; পপ্রচ্ছ বুদ্ধিং পরমাং বুভূষন্
42.2
ধৃতরাষ্ট্র উবাচ
সনত্সুজাত যদীদং শৃণোমি; মৃত্যুর্হি নাস্তীতি তবোপদেশম্
দেবাসুরা হ্যাচরন্ব্রহ্মচর্য;মমৃত্যবে তত্কতরন্নু সত্যম্
42.3
সনত্সুজাত উবাচ
অমৃত্যুঃ কর্মণা কেচিন্মৃত্যুর্নাস্তীতি চাপরে
শৃণু মে ব্রুবতো রাজন্যথৈতন্মা বিশঙ্কিথাঃ
42.4
উভে সত্যে ক্ষত্রিয়াদ্যপ্রবৃত্তে; মোহো মৃত্যুঃ সংমতো যঃ কবীনাম্
প্রমাদং বৈ মৃত্যুমহং ব্রবীমি; সদাপ্রমাদমমৃতত্বং ব্রবীমি
42.5
প্রমাদাদ্বৈ অসুরাঃ পরাভব;ন্নপ্রমাদাদ্ব্রহ্মভূতা ভবন্তি
ন বৈ মৃত্যুর্ব্যাঘ্র ইবাত্তি জন্তূ;ন্ন হ্যস্য রূপমুপলভ্যতে হ
42.6
যমং ত্বেকে মৃত্যুমতোঽন্যমাহু;রাত্মাবসন্নমমৃতং ব্রহ্মচর্যম্
পিতৃলোকে রাজ্যমনুশাস্তি দেবঃ; শিবঃ শিবানামশিবোঽশিবানাম্
42.7
আস্যাদেষ নিঃসরতে নরাণাং; ক্রোধঃ প্রমাদো মোহরূপশ্চ মৃত্যুঃ
তে মোহিতাস্তদ্বশে বর্তমানা; ইতঃ প্রেতাস্তত্র পুনঃ পতন্তি
42.8
ততস্তং দেবা অনু বিপ্লবন্তে; অতো মৃত্যুর্মরণাখ্যামুপৈতি
কর্মোদয়ে কর্মফলানুরাগা;স্তত্রানু যান্তি ন তরন্তি মৃত্যুম্
42.9
যোঽভিধ্যায়ন্নুত্পতিষ্ণূন্নিহন্যা;দনাদরেণাপ্রতিবুধ্যমানঃ
স বৈ মৃত্যুর্মৃত্যুরিবাত্তি ভূত্বা; এবং বিদ্বান্যো বিনিহন্তি কামান্
42.10
কামানুসারী পুরুষঃ কামাননু বিনশ্যতি
কামান্ব্যুদস্য ধুনুতে যত্কিংচিত্পুরুষো রজঃ
42.11
তমোঽপ্রকাশো ভূতানাং নরকোঽয়ং প্রদৃশ্যতে
গৃহ্যন্ত ইব ধাবন্তি গচ্ছন্তঃ শ্বভ্রমুন্মুখাঃ
42.12
অভিধ্যা বৈ প্রথমং হন্তি চৈনং; কামক্রোধৌ গৃহ্য চৈনং তু পশ্চাৎ
এতে বালান্মৃত্যবে প্রাপয়ন্তি; ধীরাস্তু ধৈর্যেণ তরন্তি মৃত্যুম্
42.13
অমন্যমানঃ ক্ষত্রিয় কিংচিদন্য;ন্নাধীয়তে তার্ণ ইবাস্য ব্যাঘ্রঃ
ক্রোধাল্লোভান্মোহময়ান্তরাত্মা; স বৈ মৃত্যুস্ত্বচ্ছরীরে য এষঃ
42.14
এবং মৃত্যুং জায়মানং বিদিত্বা; জ্ঞানে তিষ্ঠন্ন বিভেতীহ মৃত্যোঃ
বিনশ্যতে বিষয়ে তস্য মৃত্যু;র্মৃত্যোর্যথা বিষয়ং প্রাপ্য মর্ত্যঃ
42.15
ধৃতরাষ্ট্র উবাচ
যেঽস্মিন্ধর্মান্নাচরন্তীহ কেচি;ত্তথা ধর্মান্কেচিদিহাচরন্তি
ধর্মঃ পাপেন প্রতিহন্যতে স্ম; উতাহো ধর্মঃ প্রতিহন্তি পাপম্
42.16
সনত্সুজাত উবাচ
উভয়মেব তত্রোপভুজ্যতে ফলং; ধর্মস্যৈবেতরস্য চ
ধর্মেণাধর্মং প্রণুদতীহ বিদ্বা;ন্ধর্মো বলীয়ানিতি তস্য বিদ্ধি
42.17
ধৃতরাষ্ট্র উবাচ
যানিমানাহুঃ স্বস্য ধর্মস্য লোকা;ন্দ্বিজাতীনাং পুণ্যকৃতাং সনাতনান্
তেষাং পরিক্রমান্কথয়ন্তস্ততোঽন্যা;ন্নৈতদ্বিদ্বন্নৈব কৃতং চ কর্ম
42.18
সনত্সুজাত উবাচ
যেষাং বলে ন বিস্পর্ধা বলে বলবতামিব
তে ব্রাহ্মণা ইতঃ প্রেত্য স্বর্গলোকে প্রকাশতে
42.19
যত্র মন্যেত ভূয়িষ্ঠং প্রাবৃষীব তৃণোলপম্
অন্নং পানং চ ব্রাহ্মণস্তজ্জীবন্নানুসংজ্বরেৎ
42.20
যত্রাকথয়মানস্য প্রয়চ্ছত্যশিবং ভয়ম্
অতিরিক্তমিবাকুর্বন্স শ্রেয়ান্নেতরো জনঃ
42.21
যো বাকথয়মানস্য আত্মানং নানুসংজ্বরেৎ
ব্রহ্মস্বং নোপভুঞ্জেদ্বা তদন্নং সংমতং সতাম্
42.22
যথা স্বং বান্তমশ্নাতি শ্বা বৈ নিত্যমভূতয়ে
এবং তে বান্তমশ্নন্তি স্ববীর্যস্যোপজীবনাৎ
42.23
নিত্যমজ্ঞাতচর্যা মে ইতি মন্যেত ব্রাহ্মণঃ
জ্ঞাতীনাং তু বসন্মধ্যে নৈব বিদ্যেত কিংচন
42.24
কো হ্যেবমন্তরাত্মানং ব্রাহ্মণো হন্তুমর্হতি
তস্মাদ্ধি কিংচিত্ক্ষত্রিয় ব্রহ্মাবসতি পশ্যতি
42.25
অশ্রান্তঃ স্যাদনাদানাত্সংমতো নিরুপদ্রবঃ
শিষ্টো ন শিষ্টবত্স স্যাদ্ব্রাহ্মণো ব্রহ্মবিত্কবিঃ
42.26
অনাঢ্যা মানুষে বিত্তে আঢ্যা বেদেষু যে দ্বিজাঃ
তে দুর্ধর্ষা দুষ্প্রকম্প্যা বিদ্যাত্তান্ব্রহ্মণস্তনুম্
42.27
সর্বান্স্বিষ্টকৃতো দেবান্বিদ্যাদ্য ইহ কশ্চন
ন সমানো ব্রাহ্মণস্য যস্মিন্প্রয়ততে স্বয়ম্
42.28
যমপ্রয়তমানং তু মানয়ন্তি স মানিতঃ
ন মান্যমানো মন্যেত নামানাদভিসংজ্বরেৎ
42.29
বিদ্বাংসো মানয়ন্তীহ ইতি মন্যেত মানিতঃ
অধর্মবিদুষো মূঢা লোকশাস্ত্রবিশারদাঃ
ন মান্যং মানয়িষ্যন্তি ইতি মন্যেদমানিতঃ
42.30
ন বৈ মানং চ মৌনং চ সহিতৌ চরতঃ সদা
অয়ং হি লোকো মানস্য অসৌ মানস্য তদ্বিদুঃ
42.31
শ্রীঃ সুখস্যেহ সংবাসঃ সা চাপি পরিপন্থিনী
ব্রাহ্মী সুদুর্লভা শ্রীর্হি প্রজ্ঞাহীনেন ক্ষত্রিয়
42.32
দ্বারাণি তস্যা হি বদন্তি সন্তো; বহুপ্রকারাণি দুরাবরাণি
সত্যার্জবে হ্রীর্দমশৌচবিদ্যাঃ; ষণ্মানমোহপ্রতিবাধনানি