অধ্যায় 41

41.1

ধৃতরাষ্ট্র উবাচ
অনুক্তং যদি তে কিংচিদ্বাচা বিদুর বিদ্যতে
তন্মে শুশ্রূষবে ব্রূহি বিচিত্রাণি হি ভাষসে

বিদুর উবাচ
ধৃতরাষ্ট্র কুমারো বৈ যঃ পুরাণঃ সনাতনঃ
সনত্সুজাতঃ প্রোবাচ মৃত্যুর্নাস্তীতি ভারত

স তে গুহ্যান্প্রকাশাংশ্চ সর্বান্হৃদয়সংশ্রয়ান্
প্রবক্ষ্যতি মহারাজ সর্ববুদ্ধিমতাং বরঃ

ধৃতরাষ্ট্র উবাচ
কিং ত্বং ন বেদ তদ্ভূয়ো যন্মে ব্রূয়াত্সনাতনঃ
ত্বমেব বিদুর ব্রূহি প্রজ্ঞাশেষোঽস্তি চেত্তব

বিদুর উবাচ
শূদ্রয়োনাবহং জাতো নাতোঽন্যদ্বক্তুমুত্সহে
কুমারস্য তু যা বুদ্ধির্বেদ তাং শাশ্বতীমহম্

ব্রাহ্মীং হি যোনিমাপন্নঃ সুগুহ্যমপি যো বদেৎ
ন তেন গর্হ্যো দেবানাং তস্মাদেতদ্ব্রবীমি তে

ধৃতরাষ্ট্র উবাচ
ব্রবীহি বিদুর ত্বং মে পুরাণং তং সনাতনম্
কথমেতেন দেহেন স্যাদিহৈব সমাগমঃ

বৈশংপায়ন উবাচ
চিন্তয়ামাস বিদুরস্তমৃষিং সংশিতব্রতম্
স চ তচ্চিন্তিতং জ্ঞাত্বা দর্শয়ামাস ভারত

স চৈনং প্রতিজগ্রাহ বিধিদৃষ্টেন কর্মণা
সুখোপবিষ্টং বিশ্রান্তমথৈনং বিদুরোঽব্রবীৎ

ভগবন্সংশয়ঃ কশ্চিদ্ধৃতরাষ্ট্রস্য মানসে
যো ন শক্যো ময়া বক্তুং তমস্মৈ বক্তুমর্হসি
যং শ্রুত্বায়ং মনুষ্যেন্দ্রঃ সুখদুঃখাতিগো ভবেৎ

লাভালাভৌ প্রিয়দ্বেষ্যৌ যথৈনং ন জরান্তকৌ
বিষহেরন্ভয়ামর্ষৌ ক্ষুত্পিপাসে মদোদ্ভবৌ
অরতিশ্চৈব তন্দ্রী চ কামক্রোধৌ ক্ষয়োদয়ৌ