Utshovঅধ্যায় 40
40.1
বিদুর উবাচ
যোঽভ্যর্থিতঃ সদ্ভিরসজ্জমানঃ; করোত্যর্থং শক্তিমহাপয়িত্বা
ক্ষিপ্রং যশস্তং সমুপৈতি সন্ত;মলং প্রসন্না হি সুখায় সন্তঃ
40.2
মহান্তমপ্যর্থমধর্ময়ুক্তং; যঃ সংত্যজত্যনুপাক্রুষ্ট এব
সুখং স দুঃখান্যবমুচ্য শেতে; জীর্ণাং ত্বচং সর্প ইবাবমুচ্য
40.3
অনৃতং চ সমুত্কর্ষে রাজগামি চ পৈশুনম্
গুরোশ্চালীকনির্বন্ধঃ সমানি ব্রহ্মহত্যয়া
40.4
অসূয়ৈকপদং মৃত্যুরতিবাদঃ শ্রিয়ো বধঃ
অশুশ্রূষা ত্বরা শ্লাঘা বিদ্যায়াঃ শত্রবস্ত্রয়ঃ
40.5
সুখার্থিনঃ কুতো বিদ্যা নাস্তি বিদ্যার্থিনঃ সুখম্
সুখার্থী বা ত্যজেদ্বিদ্যাং বিদ্যার্থী বা সুখং ত্যজেৎ
40.6
নাগ্নিস্তৃপ্যতি কাষ্ঠানাং নাপগানাং মহোদধিঃ
নান্তকঃ সর্বভূতানাং ন পুংসাং বামলোচনা
40.7
আশা ধৃতিং হন্তি সমৃদ্ধিমন্তকঃ; ক্রোধঃ শ্রিয়ং হন্তি যশঃ কদর্যতা
অপালনং হন্তি পশূংশ্চ রাজ;ন্নেকঃ ক্রুদ্ধো ব্রাহ্মণো হন্তি রাষ্ট্রম্
40.8
অজশ্চ কাংস্যং চ রথশ্চ নিত্যং; মধ্বাকর্ষঃ শকুনিঃ শ্রোত্রিয়শ্চ
বৃদ্ধো জ্ঞাতিরবসন্নো বয়স্য; এতানি তে সন্তু গৃহে সদৈব
40.9
অজোক্ষা চন্দনং বীণা আদর্শো মধুসর্পিষী
বিষমৌদুম্বরং শঙ্খঃ স্বর্ণং নাভিশ্চ রোচনা
40.10
গৃহে স্থাপয়িতব্যানি ধন্যানি মনুরব্রবীৎ
দেবব্রাহ্মণপূজার্থমতিথীনাং চ ভারত
40.11
ইদং চ ত্বাং সর্বপরং ব্রবীমি; পুণ্যং পদং তাত মহাবিশিষ্টম্
ন জাতু কামান্ন ভয়ান্ন লোভা;দ্ধর্মং ত্যজেজ্জীবিতস্যাপি হেতোঃ
40.12
নিত্যো ধর্মঃ সুখদুঃখে ত্বনিত্যে; নিত্যো জীবো ধাতুরস্য ত্বনিত্যঃ
ত্যক্ত্বানিত্যং প্রতিতিষ্ঠস্ব নিত্যে; সংতুষ্য ত্বং তোষপরো হি লাভঃ
40.13
মহাবলান্পশ্য মহানুভাবা;ন্প্রশাস্য ভূমিং ধনধান্যপূর্ণাম্
রাজ্যানি হিত্বা বিপুলাংশ্চ ভোগা;ন্গতান্নরেন্দ্রান্বশমন্তকস্য
40.14
মৃতং পুত্রং দুঃখপুষ্টং মনুষ্যা; উত্ক্ষিপ্য রাজন্স্বগৃহান্নির্হরন্তি
তং মুক্তকেশাঃ করুণং রুদন্ত;শ্চিতামধ্যে কাষ্ঠমিব ক্ষিপন্তি
40.15
অন্যো ধনং প্রেতগতস্য ভুঙ্ক্তে; বয়াংসি চাগ্নিশ্চ শরীরধাতূন্
দ্বাভ্যাময়ং সহ গচ্ছত্যমুত্র; পুণ্যেন পাপেন চ বেষ্ট্যমানঃ
40.16
উত্সৃজ্য বিনিবর্তন্তে জ্ঞাতয়ঃ সুহৃদঃ সুতাঃ
অগ্নৌ প্রাস্তং তু পুরুষং কর্মান্বেতি স্বয়ংকৃতম্
40.17
অস্মাল্লোকাদূর্ধ্বমমুষ্য চাধো; মহত্তমস্তিষ্ঠতি হ্যন্ধকারম্
তদ্বৈ মহামোহনমিন্দ্রিয়াণাং; বুধ্যস্ব মা ত্বাং প্রলভেত রাজন্
40.18
ইদং বচঃ শক্ষ্যসি চেদ্যথাব;ন্নিশম্য সর্বং প্রতিপত্তুমেবম্
যশঃ পরং প্রাপ্স্যসি জীবলোকে; ভয়ং ন চামুত্র ন চেহ তেঽস্তি
40.19
আত্মা নদী ভারত পুণ্যতীর্থা; সত্যোদকা ধৃতিকূলা দমোর্মিঃ
তস্যাং স্নাতঃ পূয়তে পুণ্যকর্মা; পুণ্যো হ্যাত্মা নিত্যমম্ভোঽম্ভ এব
40.20
কামক্রোধগ্রাহবতীং পঞ্চেন্দ্রিয়জলাং নদীম্
কৃত্বা ধৃতিময়ীং নাবং জন্মদুর্গাণি সংতর
40.21
প্রজ্ঞাবৃদ্ধং ধর্মবৃদ্ধং স্ববন্ধুং; বিদ্যাবৃদ্ধং বয়সা চাপি বৃদ্ধম্
কার্যাকার্যে পূজয়িত্বা প্রসাদ্য; যঃ সংপৃচ্ছেন্ন স মুহ্যেত্কদাচিৎ
40.22
ধৃত্যা শিশ্নোদরং রক্ষেত্পাণিপাদং চ চক্ষুষা
চক্ষুঃশ্রোত্রে চ মনসা মনো বাচং চ কর্মণা
40.23
নিত্যোদকী নিত্যয়জ্ঞোপবীতী; নিত্যস্বাধ্যায়ী পতিতান্নবর্জী
ঋতং ব্রুবন্গুরবে কর্ম কুর্ব;ন্ন ব্রাহ্মণশ্চ্যবতে ব্রহ্মলোকাৎ
40.24
অধীত্য বেদান্পরিসংস্তীর্য চাগ্নী;নিষ্ট্বা যজ্ঞৈঃ পালয়িত্বা প্রজাশ্চ
গোব্রাহ্মণার্থে শস্ত্রপূতান্তরাত্মা; হতঃ সংগ্রামে ক্ষত্রিয়ঃ স্বর্গমেতি
40.25
বৈশ্যোঽধীত্য ব্রাহ্মণান্ক্ষত্রিয়াংশ্চ; ধনৈঃ কালে সংবিভজ্যাশ্রিতাংশ্চ
ত্রেতাপূতং ধূমমাঘ্রায় পুণ্যং; প্রেত্য স্বর্গে দেবসুখানি ভুঙ্ক্তে
40.26
ব্রহ্মক্ষত্রং বৈশ্যবর্ণং চ শূদ্রঃ; ক্রমেণৈতান্ন্যায়তঃ পূজয়ানঃ
তুষ্টেষ্বেতেষ্বব্যথো দগ্ধপাপ;স্ত্যক্ত্বা দেহং স্বর্গসুখানি ভুঙ্ক্তে
40.27
চাতুর্বর্ণ্যস্যৈষ ধর্মস্তবোক্তো; হেতুং চাত্র ব্রুবতো মে নিবোধ
ক্ষাত্রাদ্ধর্মাদ্ধীয়তে পাণ্ডুপুত্র;স্তং ত্বং রাজন্রাজধর্মে নিয়ুঙ্ক্ষ্ব
40.28
ধৃতরাষ্ট্র উবাচ
এবমেতদ্যথা মাং ত্বমনুশাসসি নিত্যদা
মমাপি চ মতিঃ সৌম্য ভবত্যেবং যথাত্থ মাম্
40.29
সা তু বুদ্ধিঃ কৃতাপ্যেবং পাণ্ডবান্প্রতি মে সদা
দুর্যোধনং সমাসাদ্য পুনর্বিপরিবর্ততে
40.30
ন দিষ্টমভ্যতিক্রান্তুং শক্যং মর্ত্যেন কেনচিৎ
দিষ্টমেব কৃতং মন্যে পৌরুষং তু নিরর্থকম্