Utshovঅধ্যায় 39
39.1
ধৃতরাষ্ট্র উবাচ
অনীশ্বরোঽয়ং পুরুষো ভবাভবে; সূত্রপ্রোতা দারুময়ীব যোষা
ধাত্রা তু দিষ্টস্য বশে কিলায়ং; তস্মাদ্বদ ত্বং শ্রবণে ধৃতোঽহম্
39.2
বিদুর উবাচ
অপ্রাপ্তকালং বচনং বৃহস্পতিরপি ব্রুবন্
লভতে বুদ্ধ্যবজ্ঞানমবমানং চ ভারত
39.3
প্রিয়ো ভবতি দানেন প্রিয়বাদেন চাপরঃ
মন্ত্রং মূলবলেনান্যো যঃ প্রিয়ঃ প্রিয় এব সঃ
39.4
দ্বেষ্যো ন সাধুর্ভবতি ন মেধাবী ন পণ্ডিতঃ
প্রিয়ে শুভানি কর্মাণি দ্বেষ্যে পাপানি ভারত
39.5
ন স ক্ষয়ো মহারাজ যঃ ক্ষয়ো বৃদ্ধিমাবহেৎ
ক্ষয়ঃ স ত্বিহ মন্তব্যো যং লব্ধ্বা বহু নাশয়েৎ
39.6
সমৃদ্ধা গুণতঃ কেচিদ্ভবন্তি ধনতোঽপরে
ধনবৃদ্ধান্গুণৈর্হীনান্ধৃতরাষ্ট্র বিবর্জয়েৎ
39.7
ধৃতরাষ্ট্র উবাচ
সর্বং ত্বমায়তীয়ুক্তং ভাষসে প্রাজ্ঞসংমতম্
ন চোত্সহে সুতং ত্যক্তুং যতো ধর্মস্ততো জয়ঃ
39.8
বিদুর উবাচ
স্বভাবগুণসংপন্নো ন জাতু বিনয়ান্বিতঃ
সুসূক্ষ্মমপি ভূতানামুপমর্দং প্রয়োক্ষ্যতে
39.9
পরাপবাদনিরতাঃ পরদুঃখোদয়েষু চ
পরস্পরবিরোধে চ যতন্তে সততোত্থিতাঃ
39.10
সদোষং দর্শনং যেষাং সংবাসে সুমহদ্ভয়ম্
অর্থাদানে মহান্দোষঃ প্রদানে চ মহদ্ভয়ম্
39.11
যে পাপা ইতি বিখ্যাতাঃ সংবাসে পরিগর্হিতাঃ
যুক্তাশ্চান্যৈর্মহাদোষৈর্যে নরাস্তান্বিবর্জয়েৎ
39.12
নিবর্তমানে সৌহার্দে প্রীতির্নীচে প্রণশ্যতি
যা চৈব ফলনির্বৃত্তিঃ সৌহৃদে চৈব যত্সুখম্
39.13
যততে চাপবাদায় যত্নমারভতে ক্ষয়ে
অল্পেঽপ্যপকৃতে মোহান্ন শান্তিমুপগচ্ছতি
39.14
তাদৃশৈঃ সংগতং নীচৈর্নৃশংসৈরকৃতাত্মভিঃ
নিশাম্য নিপুণং বুদ্ধ্যা বিদ্বান্দূরাদ্বিবর্জয়েৎ
39.15
যো জ্ঞাতিমনুগৃহ্ণাতি দরিদ্রং দীনমাতুরম্
স পুত্রপশুভির্বৃদ্ধিং যশশ্চাব্যয়মশ্নুতে
39.16
জ্ঞাতয়ো বর্ধনীয়াস্তৈর্য ইচ্ছন্ত্যাত্মনঃ শুভম্
কুলবৃদ্ধিং চ রাজেন্দ্র তস্মাত্সাধু সমাচর
39.17
শ্রেয়সা যোক্ষ্যসে রাজন্কুর্বাণো জ্ঞাতিসত্ক্রিয়াম্
বিগুণা হ্যপি সংরক্ষ্যা জ্ঞাতয়ো ভরতর্ষভ
39.18
কিং পুনর্গুণবন্তস্তে ত্বত্প্রসাদাভিকাঙ্ক্ষিণঃ
প্রসাদং কুরু দীনানাং পাণ্ডবানাং বিশাং পতে
39.19
দীয়ন্তাং গ্রামকাঃ কেচিত্তেষাং বৃত্ত্যর্থমীশ্বর
এবং লোকে যশঃপ্রাপ্তো ভবিষ্যসি নরাধিপ
39.20
বৃদ্ধেন হি ত্বয়া কার্যং পুত্রাণাং তাত রক্ষণম্
ময়া চাপি হিতং বাচ্যং বিদ্ধি মাং ত্বদ্ধিতৈষিণম্
39.21
জ্ঞাতিভির্বিগ্রহস্তাত ন কর্তব্যো ভবার্থিনা
সুখানি সহ ভোজ্যানি জ্ঞাতিভির্ভরতর্ষভ
39.22
সংভোজনং সংকথনং সংপ্রীতিশ্চ পরস্পরম্
জ্ঞাতিভিঃ সহ কার্যাণি ন বিরোধঃ কথংচন
39.23
জ্ঞাতয়স্তারয়ন্তীহ জ্ঞাতয়ো মজ্জয়ন্তি চ
সুবৃত্তাস্তারয়ন্তীহ দুর্বৃত্তা মজ্জয়ন্তি চ
39.24
সুবৃত্তো ভব রাজেন্দ্র পাণ্ডবান্প্রতি মানদ
অধর্ষণীয়ঃ শত্রূণাং তৈর্বৃতস্ত্বং ভবিষ্যসি
39.25
শ্রীমন্তং জ্ঞাতিমাসাদ্য যো জ্ঞাতিরবসীদতি
দিগ্ধহস্তং মৃগ ইব স এনস্তস্য বিন্দতি
39.26
পশ্চাদপি নরশ্রেষ্ঠ তব তাপো ভবিষ্যতি
তান্বা হতান্সুতান্বাপি শ্রুত্বা তদনুচিন্তয়
39.27
যেন খট্বাং সমারূঢঃ পরিতপ্যেত কর্মণা
আদাবেব ন তত্কুর্যাদধ্রুবে জীবিতে সতি
39.28
ন কশ্চিন্নাপনয়তে পুমানন্যত্র ভার্গবাৎ
শেষসংপ্রতিপত্তিস্তু বুদ্ধিমত্স্বেব তিষ্ঠতি
39.29
দুর্যোধনেন যদ্যেতত্পাপং তেষু পুরা কৃতম্
ত্বয়া তত্কুলবৃদ্ধেন প্রত্যানেয়ং নরেশ্বর
39.30
তাংস্ত্বং পদে প্রতিষ্ঠাপ্য লোকে বিগতকল্মষঃ
ভবিষ্যসি নরশ্রেষ্ঠ পূজনীয়ো মনীষিণাম্
39.31
সুব্যাহৃতানি ধীরাণাং ফলতঃ প্রবিচিন্ত্য যঃ
অধ্যবস্যতি কার্যেষু চিরং যশসি তিষ্ঠতি
39.32
অবৃত্তিং বিনয়ো হন্তি হন্ত্যনর্থং পরাক্রমঃ
হন্তি নিত্যং ক্ষমা ক্রোধমাচারো হন্ত্যলক্ষণম্
39.33
পরিচ্ছদেন ক্ষেত্রেণ বেশ্মনা পরিচর্যয়া
পরীক্ষেত কুলং রাজন্ভোজনাচ্ছাদনেন চ
39.34
যয়োশ্চিত্তেন বা চিত্তং নৈভৃতং নৈভৃতেন বা
সমেতি প্রজ্ঞয়া প্রজ্ঞা তয়োর্মৈত্রী ন জীর্যতে
39.35
দুর্বুদ্ধিমকৃতপ্রজ্ঞং ছন্নং কূপং তৃণৈরিব
বিবর্জয়ীত মেধাবী তস্মিন্মৈত্রী প্রণশ্যতি
39.36
অবলিপ্তেষু মূর্খেষু রৌদ্রসাহসিকেষু চ
তথৈবাপেতধর্মেষু ন মৈত্রীমাচরেদ্বুধঃ
39.37
কৃতজ্ঞং ধার্মিকং সত্যমক্ষুদ্রং দৃঢভক্তিকম্
জিতেন্দ্রিয়ং স্থিতং স্থিত্যাং মিত্রমত্যাগি চেষ্যতে
39.38
ইন্দ্রিয়াণামনুত্সর্গো মৃত্যুনা ন বিশিষ্যতে
অত্যর্থং পুনরুত্সর্গঃ সাদয়েদ্দৈবতান্যপি
39.39
মার্দবং সর্বভূতানামনসূয়া ক্ষমা ধৃতিঃ
আয়ুষ্যাণি বুধাঃ প্রাহুর্মিত্রাণাং চাবিমাননা
39.40
অপনীতং সুনীতেন যোঽর্থং প্রত্যানিনীষতে
মতিমাস্থায় সুদৃঢাং তদকাপুরুষব্রতম্
39.41
আয়ত্যাং প্রতিকারজ্ঞস্তদাত্বে দৃঢনিশ্চয়ঃ
অতীতে কার্যশেষজ্ঞো নরোঽর্থৈর্ন প্রহীয়তে
39.42
কর্মণা মনসা বাচা যদভীক্ষ্ণং নিষেবতে
তদেবাপহরত্যেনং তস্মাত্কল্যাণমাচরেৎ
39.43
মঙ্গলালম্ভনং যোগঃ শ্রুতমুত্থানমার্জবম্
ভূতিমেতানি কুর্বন্তি সতাং চাভীক্ষ্ণদর্শনম্
39.44
অনির্বেদঃ শ্রিয়ো মূলং দুঃখনাশে সুখস্য চ
মহান্ভবত্যনির্বিণ্ণঃ সুখং চাত্যন্তমশ্নুতে
39.45
নাতঃ শ্রীমত্তরং কিংচিদন্যত্পথ্যতমং তথা
প্রভবিষ্ণোর্যথা তাত ক্ষমা সর্বত্র সর্বদা
39.46
ক্ষমেদশক্তঃ সর্বস্য শক্তিমান্ধর্মকারণাৎ
অর্থানর্থৌ সমৌ যস্য তস্য নিত্যং ক্ষমা হিতা
39.47
যত্সুখং সেবমানোঽপি ধর্মার্থাভ্যাং ন হীয়তে
কামং তদুপসেবেত ন মূঢব্রতমাচরেৎ
39.48
দুঃখার্তেষু প্রমত্তেষু নাস্তিকেষ্বলসেষু চ
ন শ্রীর্বসত্যদান্তেষু যে চোত্সাহবিবর্জিতাঃ
39.49
আর্জবেন নরং যুক্তমার্জবাত্সব্যপত্রপম্
অশক্তিমন্তং মন্যন্তো ধর্ষয়ন্তি কুবুদ্ধয়ঃ
39.50
অত্যার্যমতিদাতারমতিশূরমতিব্রতম্
প্রজ্ঞাভিমানিনং চৈব শ্রীর্ভয়ান্নোপসর্পতি
39.51
অগ্নিহোত্রফলা বেদাঃ শীলবৃত্তফলং শ্রুতম্
রতিপুত্রফলা দারা দত্তভুক্তফলং ধনম্
39.52
অধর্মোপার্জিতৈরর্থৈর্যঃ করোত্যৌর্ধ্বদেহিকম্
ন স তস্য ফলং প্রেত্য ভুঙ্ক্তেঽর্থস্য দুরাগমাৎ
39.53
কান্তারবনদুর্গেষু কৃচ্ছ্রাস্বাপত্সু সংভ্রমে
উদ্যতেষু চ শস্ত্রেষু নাস্তি শেষবতাং ভয়ম্
39.54
উত্থানং সংয়মো দাক্ষ্যমপ্রমাদো ধৃতিঃ স্মৃতিঃ
সমীক্ষ্য চ সমারম্ভো বিদ্ধি মূলং ভবস্য তৎ
39.55
তপো বলং তাপসানাং ব্রহ্ম ব্রহ্মবিদাং বলম্
হিংসা বলমসাধূনাং ক্ষমা গুণবতাং বলম্
39.56
অষ্টৌ তান্যব্রতঘ্নানি আপো মূলং ফলং পয়ঃ
হবির্ব্রাহ্মণকাম্যা চ গুরোর্বচনমৌষধম্
39.57
ন তত্পরস্য সংদধ্যাত্প্রতিকূলং যদাত্মনঃ
সংগ্রহেণৈষ ধর্মঃ স্যাত্কামাদন্যঃ প্রবর্ততে
39.58
অক্রোধেন জয়েত্ক্রোধমসাধুং সাধুনা জয়েৎ
জয়েত্কদর্যং দানেন জয়েত্সত্যেন চানৃতম্
39.59
স্ত্রীধূর্তকেঽলসে ভীরৌ চণ্ডে পুরুষমানিনি
চৌরে কৃতঘ্নে বিশ্বাসো ন কার্যো ন চ নাস্তিকে
39.60
অভিবাদনশীলস্য নিত্যং বৃদ্ধোপসেবিনঃ
চত্বারি সংপ্রবর্ধন্তে কীর্তিরায়ুর্যশোবলম্
39.61
অতিক্লেশেন যেঽর্থাঃ স্যুর্ধর্মস্যাতিক্রমেণ চ
অরের্বা প্রণিপাতেন মা স্ম তেষু মনঃ কৃথাঃ
39.62
অবিদ্যঃ পুরুষঃ শোচ্যঃ শোচ্যং মিথুনমপ্রজম্
নিরাহারাঃ প্রজাঃ শোচ্যাঃ শোচ্যং রাষ্ট্রমরাজকম্
39.63
অধ্বা জরা দেহবতাং পর্বতানাং জলং জরা
অসংভোগো জরা স্ত্রীণাং বাক্শল্যং মনসো জরা
39.64
অনাম্নায়মলা বেদা ব্রাহ্মণস্যাব্রতং মলম্
কৌতূহলমলা সাধ্বী বিপ্রবাসমলাঃ স্ত্রিয়ঃ
39.65
সুবর্ণস্য মলং রূপ্যং রূপ্যস্যাপি মলং ত্রপু
জ্ঞেয়ং ত্রপুমলং সীসং সীসস্যাপি মলং মলম্
39.66
ন স্বপ্নেন জয়েন্নিদ্রাং ন কামেন স্ত্রিয়ং জয়েৎ
নেন্ধনেন জয়েদগ্নিং ন পানেন সুরাং জয়েৎ
39.67
যস্য দানজিতং মিত্রমমিত্রা যুধি নির্জিতাঃ
অন্নপানজিতা দারাঃ সফলং তস্য জীবিতম্
39.68
সহস্রিণোঽপি জীবন্তি জীবন্তি শতিনস্তথা
ধৃতরাষ্ট্রং বিমুঞ্চেচ্ছাং ন কথংচিন্ন জীব্যতে
39.69
যত্পৃথিব্যাং ব্রীহিয়বং হিরণ্যং পশবঃ স্ত্রিয়ঃ
নালমেকস্য তত্সর্বমিতি পশ্যন্ন মুহ্যতি
39.70
রাজন্ভূয়ো ব্রবীমি ত্বাং পুত্রেষু সমমাচর
সমতা যদি তে রাজন্স্বেষু পাণ্ডুসুতেষু চ