Utshovঅধ্যায় 38
38.1
বিদুর উবাচ
ঊর্ধ্বং প্রাণা হ্যুত্ক্রামন্তি যূনঃ স্থবির আয়তি
প্রত্যুত্থানাভিবাদাভ্যাং পুনস্তান্প্রতিপদ্যতে
38.2
পীঠং দত্ত্বা সাধবেঽভ্যাগতায়; আনীয়াপঃ পরিনির্ণিজ্য পাদৌ
সুখং পৃষ্ট্বা প্রতিবেদ্যাত্মসংস্থং; ততো দদ্যাদন্নমবেক্ষ্য ধীরঃ
38.3
যস্যোদকং মধুপর্কং চ গাং চ; নমন্ত্রবিত্প্রতিগৃহ্ণাতি গেহে
লোভাদ্ভয়াদর্থকার্পণ্যতো বা; তস্যানর্থং জীবিতমাহুরার্যাঃ
38.4
চিকিত্সকঃ শল্যকর্তাবকীর্ণী; স্তেনঃ ক্রূরো মদ্যপো ভ্রূণহা চ
সেনাজীবী শ্রুতিবিক্রায়কশ্চ; ভৃশং প্রিয়োঽপ্যতিথির্নোদকার্হঃ
38.5
অবিক্রেয়ং লবণং পক্বমন্নং; দধি ক্ষীরং মধু তৈলং ঘৃতং চ
তিলা মাংসং মূলফলানি শাকং; রক্তং বাসঃ সর্বগন্ধা গুডশ্চ
38.6
অরোষণো যঃ সমলোষ্টকাঞ্চনঃ; প্রহীণশোকো গতসংধিবিগ্রহঃ
নিন্দাপ্রশংসোপরতঃ প্রিয়াপ্রিয়ে; চরন্নুদাসীনবদেষ ভিক্ষুকঃ
38.7
নীবারমূলেঙ্গুদশাকবৃত্তিঃ; সুসংয়তাত্মাগ্নিকার্যেষ্বচোদ্যঃ
বনে বসন্নতিথিষ্বপ্রমত্তো; ধুরংধরঃ পুণ্যকৃদেষ তাপসঃ
38.8
অপকৃত্বা বুদ্ধিমতো দূরস্থোঽস্মীতি নাশ্বসেৎ
দীর্ঘৌ বুদ্ধিমতো বাহূ যাভ্যাং হিংসতি হিংসিতঃ
38.9
ন বিশ্বসেদবিশ্বস্তে বিশ্বস্তে নাতিবিশ্বসেৎ
বিশ্বাসাদ্ভয়মুত্পন্নং মূলান্যপি নিকৃন্ততি
38.10
অনীর্ষ্যুর্গুপ্তদারঃ স্যাত্সংবিভাগী প্রিয়ংবদঃ
শ্লক্ষ্ণো মধুরবাক্স্ত্রীণাং ন চাসাং বশগো ভবেৎ
38.11
পূজনীয়া মহাভাগাঃ পুণ্যাশ্চ গৃহদীপ্তয়ঃ
স্ত্রিয়ঃ শ্রিয়ো গৃহস্যোক্তাস্তস্মাদ্রক্ষ্যা বিশেষতঃ
38.12
পিতুরন্তঃপুরং দদ্যান্মাতুর্দদ্যান্মহানসম্
গোষু চাত্মসমং দদ্যাত্স্বয়মেব কৃষিং ব্রজেৎ
ভৃত্যৈর্বণিজ্যাচারং চ পুত্রৈঃ সেবেত ব্রাহ্মণান্
38.13
অদ্ভ্যোঽগ্নির্ব্রহ্মতঃ ক্ষত্রমশ্মনো লোহমুত্থিতম্
তেষাং সর্বত্রগং তেজঃ স্বাসু যোনিষু শাম্যতি
38.14
নিত্যং সন্তঃ কুলে জাতাঃ পাবকোপমতেজসঃ
ক্ষমাবন্তো নিরাকারাঃ কাষ্ঠেঽগ্নিরিব শেরতে
38.15
যস্য মন্ত্রং ন জানন্তি বাহ্যাশ্চাভ্যন্তরাশ্চ যে
স রাজা সর্বতশ্চক্ষুশ্চিরমৈশ্বর্যমশ্নুতে
38.16
করিষ্যন্ন প্রভাষেত কৃতান্যেব চ দর্শয়েৎ
ধর্মকামার্থকার্যাণি তথা মন্ত্রো ন ভিদ্যতে
38.17
গিরিপৃষ্ঠমুপারুহ্য প্রাসাদং বা রহোগতঃ
অরণ্যে নিঃশলাকে বা তত্র মন্ত্রো বিধীয়তে
38.18
নাসুহৃত্পরমং মন্ত্রং ভারতার্হতি বেদিতুম্
অপণ্ডিতো বাপি সুহৃত্পণ্ডিতো বাপ্যনাত্মবান্
অমাত্যে হ্যর্থলিপ্সা চ মন্ত্ররক্ষণমেব চ
38.19
কৃতানি সর্বকার্যাণি যস্য বা পার্ষদা বিদুঃ
গূঢমন্ত্রস্য নৃপতেস্তস্য সিদ্ধিরসংশয়ম্
38.20
অপ্রশস্তানি কর্মাণি যো মোহাদনুতিষ্ঠতি
স তেষাং বিপরিভ্রংশে ভ্রশ্যতে জীবিতাদপি
38.21
কর্মণাং তু প্রশস্তানামনুষ্ঠানং সুখাবহম্
তেষামেবাননুষ্ঠানং পশ্চাত্তাপকরং মহৎ
38.22
স্থানবৃদ্ধিক্ষয়জ্ঞস্য ষাড্গুণ্যবিদিতাত্মনঃ
অনবজ্ঞাতশীলস্য স্বাধীনা পৃথিবী নৃপ
38.23
অমোঘক্রোধহর্ষস্য স্বয়ং কৃত্যান্ববেক্ষিণঃ
আত্মপ্রত্যয়কোশস্য বসুধেয়ং বসুংধরা
38.24
নামমাত্রেণ তুষ্যেত ছত্রেণ চ মহীপতিঃ
ভৃত্যেভ্যো বিসৃজেদর্থান্নৈকঃ সর্বহরো ভবেৎ
38.25
ব্রাহ্মণো ব্রাহ্মণং বেদ ভর্তা বেদ স্ত্রিয়ং তথা
অমাত্যং নৃপতির্বেদ রাজা রাজানমেব চ
38.26
ন শত্রুরঙ্কমাপন্নো মোক্তব্যো বধ্যতাং গতঃ
অহতাদ্ধি ভয়ং তস্মাজ্জায়তে নচিরাদিব
38.27
দৈবতেষু চ যত্নেন রাজসু ব্রাহ্মণেষু চ
নিয়ন্তব্যঃ সদা ক্রোধো বৃদ্ধবালাতুরেষু চ
38.28
নিরর্থং কলহং প্রাজ্ঞো বর্জয়েন্মূঢসেবিতম্
কীর্তিং চ লভতে লোকে ন চানর্থেন যুজ্যতে
38.29
প্রসাদো নিষ্ফলো যস্য ক্রোধশ্চাপি নিরর্থকঃ
ন তং ভর্তারমিচ্ছন্তি ষণ্ঢং পতিমিব স্ত্রিয়ঃ
38.30
ন বুদ্ধির্ধনলাভায় ন জাড্যমসমৃদ্ধয়ে
লোকপর্যায়বৃত্তান্তং প্রাজ্ঞো জানাতি নেতরঃ
38.31
বিদ্যাশীলবয়োবৃদ্ধান্বুদ্ধিবৃদ্ধাংশ্চ ভারত
ধনাভিজনবৃদ্ধাংশ্চ নিত্যং মূঢোঽবমন্যতে
38.32
অনার্যবৃত্তমপ্রাজ্ঞমসূয়কমধার্মিকম্
অনর্থাঃ ক্ষিপ্রমায়ান্তি বাগ্দুষ্টং ক্রোধনং তথা
38.33
অবিসংবাদনং দানং সময়স্যাব্যতিক্রমঃ
আবর্তয়ন্তি ভূতানি সম্যক্প্রণিহিতা চ বাক্
38.34
অবিসংবাদকো দক্ষঃ কৃতজ্ঞো মতিমানৃজুঃ
অপি সংক্ষীণকোশোঽপি লভতে পরিবারণম্
38.35
ধৃতিঃ শমো দমঃ শৌচং কারুণ্যং বাগনিষ্ঠুরা
মিত্রাণাং চানভিদ্রোহঃ সপ্তৈতাঃ সমিধঃ শ্রিয়ঃ
38.36
অসংবিভাগী দুষ্টাত্মা কৃতঘ্নো নিরপত্রপঃ
তাদৃঙ্নরাধমো লোকে বর্জনীয়ো নরাধিপ
38.37
ন স রাত্রৌ সুখং শেতে সসর্প ইব বেশ্মনি
যঃ কোপয়তি নির্দোষং সদোষোঽভ্যন্তরং জনম্
38.38
যেষু দুষ্টেষু দোষঃ স্যাদ্যোগক্ষেমস্য ভারত
সদা প্রসাদনং তেষাং দেবতানামিবাচরেৎ
38.39
যেঽর্থাঃ স্ত্রীষু সমাসক্তাঃ প্রথমোত্পতিতেষু চ
যে চানার্যসমাসক্তাঃ সর্বে তে সংশয়ং গতাঃ
38.40
যত্র স্ত্রী যত্র কিতবো যত্র বালোঽনুশাস্তি চ
মজ্জন্তি তেঽবশা দেশা নদ্যামশ্মপ্লবা ইব
38.41
প্রয়োজনেষু যে সক্তা ন বিশেষেষু ভারত
তানহং পণ্ডিতান্মন্যে বিশেষা হি প্রসঙ্গিনঃ
38.42
যং প্রশংসন্তি কিতবা যং প্রশংসন্তি চারণাঃ
যং প্রশংসন্তি বন্ধক্যো ন স জীবতি মানবঃ
38.43
হিত্বা তান্পরমেষ্বাসান্পাণ্ডবানমিতৌজসঃ
আহিতং ভারতৈশ্বর্যং ত্বয়া দুর্যোধনে মহৎ
38.44
তং দ্রক্ষ্যসি পরিভ্রষ্টং তস্মাত্ত্বং নচিরাদিব
ঐশ্বর্যমদসংমূঢং বলিং লোকত্রয়াদিব