Utshovঅধ্যায় 37
37.1
বিদুর উবাচ
সপ্তদশেমান্রাজেন্দ্র মনুঃ স্বায়ংভুবোঽব্রবীৎ
বৈচিত্রবীর্য পুরুষানাকাশং মুষ্টিভির্ঘ্নতঃ
37.2
তানেবেন্দ্রস্য হি ধনুরনাম্যং নমতোঽব্রবীৎ
অথো মরীচিনঃ পাদাননাম্যান্নমতস্তথা
37.3
যশ্চাশিষ্যং শাসতি যশ্চ কুপ্যতে; যশ্চাতিবেলং ভজতে দ্বিষন্তম্
স্ত্রিয়শ্চ যোঽরক্ষতি ভদ্রমস্তু তে; যশ্চায়াচ্যং যাচতি যশ্চ কত্থতে
37.4
যশ্চাভিজাতঃ প্রকরোত্যকার্যং; যশ্চাবলো বলিনা নিত্যবৈরী
অশ্রদ্দধানায় চ যো ব্রবীতি; যশ্চাকাম্যং কাময়তে নরেন্দ্র
37.5
বধ্বা হাসং শ্বশুরো যশ্চ মন্যতে; বধ্বা বসন্নুত যো মানকামঃ
পরক্ষেত্রে নির্বপতি যশ্চ বীজং; স্ত্রিয়ং চ যঃ পরিবদতেঽতিবেলম্
37.6
যশ্চৈব লব্ধ্বা ন স্মরামীত্যুবাচ; দত্ত্বা চ যঃ কত্থতি যাচ্যমানঃ
যশ্চাসতঃ সান্ত্বমুপাসতীহ; এতেঽনুয়ান্ত্যনিলং পাশহস্তাঃ
37.7
যস্মিন্যথা বর্ততে যো মনুষ্য;স্তস্মিংস্তথা বর্তিতব্যং স ধর্মঃ
মায়াচারো মায়য়া বর্তিতব্যঃ; সাধ্বাচারঃ সাধুনা প্রত্যুদেয়ঃ
37.8
ধৃতরাষ্ট্র উবাচ
শতায়ুরুক্তঃ পুরুষঃ সর্ববেদেষু বৈ যদা
নাপ্নোত্যথ চ তত্সর্বমায়ুঃ কেনেহ হেতুনা
37.9
বিদুর উবাচ
অতিবাদোঽতিমানশ্চ তথাত্যাগো নরাধিপ
ক্রোধশ্চাতিবিবিত্সা চ মিত্রদ্রোহশ্চ তানি ষট্
37.10
এত এবাসয়স্তীক্ষ্ণাঃ কৃন্তন্ত্যায়ূংষি দেহিনাম্
এতানি মানবান্ঘ্নন্তি ন মৃত্যুর্ভদ্রমস্তু তে
37.11
বিশ্বস্তস্যৈতি যো দারান্যশ্চাপি গুরুতল্পগঃ
বৃষলীপতির্দ্বিজো যশ্চ পানপশ্চৈব ভারত
37.12
শরণাগতহা চৈব সর্বে ব্রহ্মহণৈঃ সমাঃ
এতৈঃ সমেত্য কর্তব্যং প্রায়শ্চিত্তমিতি শ্রুতিঃ
37.13
গৃহী বদান্যোঽনপবিদ্ধবাক্যঃ; শেষান্নভোক্তাপ্যবিহিংসকশ্চ
নানর্থকৃত্ত্যক্তকলিঃ কৃতজ্ঞঃ; সত্যো মৃদুঃ স্বর্গমুপৈতি বিদ্বান্
37.14
সুলভাঃ পুরুষা রাজন্সততং প্রিয়বাদিনঃ
অপ্রিয়স্য তু পথ্যস্য বক্তা শ্রোতা চ দুর্লভঃ
37.15
যো হি ধর্মং ব্যপাশ্রিত্য হিত্বা ভর্তুঃ প্রিয়াপ্রিয়ে
অপ্রিয়াণ্যাহ পথ্যানি তেন রাজা সহায়বান্
37.16
ত্যজেত্কুলার্থে পুরুষং গ্রামস্যার্থে কুলং ত্যজেৎ
গ্রামং জনপদস্যার্থে আত্মার্থে পৃথিবীং ত্যজেৎ
37.17
আপদর্থং ধনং রক্ষেদ্দারান্রক্ষেদ্ধনৈরপি
আত্মানং সততং রক্ষেদ্দারৈরপি ধনৈরপি
37.18
উক্তং ময়া দ্যূতকালেঽপি রাজ;ন্নৈবং যুক্তং বচনং প্রাতিপীয়
তদৌষধং পথ্যমিবাতুরস্য; ন রোচতে তব বৈচিত্রবীর্য
37.19
কাকৈরিমাংশ্চিত্রবর্হান্ময়ূরা;ন্পরাজৈষ্ঠাঃ পাণ্ডবান্ধার্তরাষ্ট্রৈঃ
হিত্বা সিংহান্ক্রোষ্টুকান্গূহমানঃ; প্রাপ্তে কালে শোচিতা ত্বং নরেন্দ্র
37.20
যস্তাত ন ক্রুধ্যতি সর্বকালং; ভৃত্যস্য ভক্তস্য হিতে রতস্য
তস্মিন্ভৃত্যা ভর্তরি বিশ্বসন্তি; ন চৈনমাপত্সু পরিত্যজন্তি
37.21
ন ভৃত্যানাং বৃত্তিসংরোধনেন; বাহ্যং জনং সংজিঘৃক্ষেদপূর্বম্
ত্যজন্তি হ্যেনমুচিতাবরুদ্ধাঃ; স্নিগ্ধা হ্যমাত্যাঃ পরিহীনভোগাঃ
37.22
কৃত্যানি পূর্বং পরিসংখ্যায় সর্বা;ণ্যায়ব্যয়াবনুরূপাং চ বৃত্তিম্
সংগৃহ্ণীয়াদনুরূপান্সহায়া;ন্সহায়সাধ্যানি হি দুষ্করাণি
37.23
অভিপ্রায়ং যো বিদিত্বা তু ভর্তুঃ; সর্বাণি কার্যাণি করোত্যতন্দ্রীঃ
বক্তা হিতানামনুরক্ত আর্যঃ; শক্তিজ্ঞ আত্মেব হি সোঽনুকম্প্যঃ
37.24
বাক্যং তু যো নাদ্রিয়তেঽনুশিষ্টঃ; প্রত্যাহ যশ্চাপি নিয়ুজ্যমানঃ
প্রজ্ঞাভিমানী প্রতিকূলবাদী; ত্যাজ্যঃ স তাদৃক্ত্বরয়ৈব ভৃত্যঃ
37.25
অস্তব্ধমক্লীবমদীর্ঘসূত্রং; সানুক্রোশং শ্লক্ষ্ণমহার্যমন্যৈঃ
অরোগজাতীয়মুদারবাক্যং; দূতং বদন্ত্যষ্টগুণোপপন্নম্
37.26
ন বিশ্বাসাজ্জাতু পরস্য গেহং; গচ্ছেন্নরশ্চেতয়ানো বিকালে
ন চত্বরে নিশি তিষ্ঠেন্নিগূঢো; ন রাজন্যাং যোষিতং প্রার্থয়ীত
37.27
ন নিহ্নবং সত্রগতস্য গচ্ছে;ত্সংসৃষ্টমন্ত্রস্য কুসংগতস্য
ন চ ব্রূয়ান্নাশ্বসামি ত্বয়ীতি; সকারণং ব্যপদেশং তু কুর্যাৎ
37.28
ঘৃণী রাজা পুংশ্চলী রাজভৃত্যঃ; পুত্রো ভ্রাতা বিধবা বালপুত্রা
সেনাজীবী চোদ্ধৃতভক্ত এব; ব্যবহারে বৈ বর্জনীয়াঃ স্যুরেতে
37.29
গুণা দশ স্নানশীলং ভজন্তে; বলং রূপং স্বরবর্ণপ্রশুদ্ধিঃ
স্পর্শশ্চ গন্ধশ্চ বিশুদ্ধতা চ; শ্রীঃ সৌকুমার্যং প্রবরাশ্চ নার্যঃ
37.30
গুণাশ্চ ষণ্মিতভুক্তং ভজন্তে; আরোগ্যমায়ুশ্চ সুখং বলং চ
অনাবিলং চাস্য ভবেদপত্যং; ন চৈনমাদ্যূন ইতি ক্ষিপন্তি
37.31
অকর্মশীলং চ মহাশনং চ; লোকদ্বিষ্টং বহুমায়ং নৃশংসম্
অদেশকালজ্ঞমনিষ্টবেষ;মেতান্গৃহে ন প্রতিবাসয়ীত
37.32
কদর্যমাক্রোশকমশ্রুতং চ; বরাকসংভূতমমান্যমানিনম্
নিষ্ঠূরিণং কৃতবৈরং কৃতঘ্ন;মেতান্ভৃশার্তোঽপি ন জাতু যাচেৎ
37.33
সংক্লিষ্টকর্মাণমতিপ্রবাদং; নিত্যানৃতং চাদৃঢভক্তিকং চ
বিকৃষ্টরাগং বহুমানিনং চা;প্যেতান্ন সেবেত নরাধমান্ষট্
37.34
সহায়বন্ধনা হ্যর্থাঃ সহায়াশ্চার্থবন্ধনাঃ
অন্যোন্যবন্ধনাবেতৌ বিনান্যোন্যং ন সিধ্যতঃ
37.35
উত্পাদ্য পুত্রাননৃণাংশ্চ কৃত্বা; বৃত্তিং চ তেভ্যোঽনুবিধায় কাংচিৎ
স্থানে কুমারীঃ প্রতিপাদ্য সর্বা; অরণ্যসংস্থো মুনিবদ্বুভূষেৎ
37.36
হিতং যত্সর্বভূতানামাত্মনশ্চ সুখাবহম্
তত্কুর্যাদীশ্বরো হ্যেতন্মূলং ধর্মার্থসিদ্ধয়ে
37.37
বুদ্ধিঃ প্রভাবস্তেজশ্চ সত্ত্বমুত্থানমেব চ
ব্যবসায়শ্চ যস্য স্যাত্তস্যাবৃত্তিভয়ং কুতঃ
37.38
পশ্য দোষান্পাণ্ডবৈর্বিগ্রহে ত্বং; যত্র ব্যথেরন্নপি দেবাঃ সশক্রাঃ
পুত্রৈর্বৈরং নিত্যমুদ্বিগ্নবাসো; যশঃপ্রণাশো দ্বিষতাং চ হর্ষঃ
37.39
ভীষ্মস্য কোপস্তব চেন্দ্রকল্প; দ্রোণস্য রাজ্ঞশ্চ যুধিষ্ঠিরস্য
উত্সাদয়েল্লোকমিমং প্রবৃদ্ধঃ; শ্বেতো গ্রহস্তির্যগিবাপতন্খে
37.40
তব পুত্রশতং চৈব কর্ণঃ পঞ্চ চ পাণ্ডবাঃ
পৃথিবীমনুশাসেয়ুরখিলাং সাগরাম্বরাম্
37.41
ধার্তরাষ্ট্রা বনং রাজন্ব্যাঘ্রাঃ পাণ্ডুসুতা মতাঃ
মা বনং ছিন্ধি সব্যাঘ্রং মা ব্যাঘ্রান্নীনশো বনাৎ
37.42
ন স্যাদ্বনমৃতে ব্যাঘ্রান্ব্যাঘ্রা ন স্যুরৃতে বনম্
বনং হি রক্ষ্যতে ব্যাঘ্রৈর্ব্যাঘ্রান্রক্ষতি কাননম্
37.43
ন তথেচ্ছন্ত্যকল্যাণাঃ পরেষাং বেদিতুং গুণান্
যথৈষাং জ্ঞাতুমিচ্ছন্তি নৈর্গুণ্যং পাপচেতসঃ
37.44
অর্থসিদ্ধিং পরামিচ্ছন্ধর্মমেবাদিতশ্চরেৎ
ন হি ধর্মাদপৈত্যর্থঃ স্বর্গলোকাদিবামৃতম্
37.45
যস্যাত্মা বিরতঃ পাপাত্কল্যাণে চ নিবেশিতঃ
তেন সর্বমিদং বুদ্ধং প্রকৃতির্বিকৃতিশ্চ যা
37.46
যো ধর্মমর্থং কামং চ যথাকালং নিষেবতে
ধর্মার্থকামসংয়োগং সোঽমুত্রেহ চ বিন্দতি
37.47
সংনিয়চ্ছতি যো বেগমুত্থিতং ক্রোধহর্ষয়োঃ
স শ্রিয়ো ভাজনং রাজন্যশ্চাপত্সু ন মুহ্যতি
37.48
বলং পঞ্চবিধং নিত্যং পুরুষাণাং নিবোধ মে
যত্তু বাহুবলং নাম কনিষ্ঠং বলমুচ্যতে
37.49
অমাত্যলাভো ভদ্রং তে দ্বিতীয়ং বলমুচ্যতে
ধনলাভস্তৃতীয়ং তু বলমাহুর্জিগীষবঃ
37.50
যত্ত্বস্য সহজং রাজন্পিতৃপৈতামহং বলম্
অভিজাতবলং নাম তচ্চতুর্থং বলং স্মৃতম্
37.51
যেন ত্বেতানি সর্বাণি সংগৃহীতানি ভারত
যদ্বলানাং বলং শ্রেষ্ঠং তত্প্রজ্ঞাবলমুচ্যতে
37.52
মহতে যোঽপকারায় নরস্য প্রভবেন্নরঃ
তেন বৈরং সমাসজ্য দূরস্থোঽস্মীতি নাশ্বসেৎ
37.53
স্ত্রীষু রাজসু সর্পেষু স্বাধ্যায়ে শত্রুসেবিষু
ভোগে চায়ুষি বিশ্বাসং কঃ প্রাজ্ঞঃ কর্তুমর্হতি
37.54
প্রজ্ঞাশরেণাভিহতস্য জন্তো;শ্চিকিত্সকাঃ সন্তি ন চৌষধানি
ন হোমমন্ত্রা ন চ মঙ্গলানি; নাথর্বণা নাপ্যগদাঃ সুসিদ্ধাঃ
37.55
সর্পশ্চাগ্নিশ্চ সিংহশ্চ কুলপুত্রশ্চ ভারত
নাবজ্ঞেয়া মনুষ্যেণ সর্বে তে হ্যতিতেজসঃ
37.56
অগ্নিস্তেজো মহল্লোকে গূঢস্তিষ্ঠতি দারুষু
ন চোপয়ুঙ্ক্তে তদ্দারু যাবন্নো দীপ্যতে পরৈঃ
37.57
স এব খলু দারুভ্যো যদা নির্মথ্য দীপ্যতে
তদা তচ্চ বনং চান্যন্নির্দহত্যাশু তেজসা
37.58
এবমেব কুলে জাতাঃ পাবকোপমতেজসঃ
ক্ষমাবন্তো নিরাকারাঃ কাষ্ঠেঽগ্নিরিব শেরতে
37.59
লতাধর্মা ত্বং সপুত্রঃ শালাঃ পাণ্ডুসুতা মতাঃ
ন লতা বর্ধতে জাতু মহাদ্রুমমনাশ্রিতা
37.60
বনং রাজংস্ত্বং সপুত্রোঽম্বিকেয়; সিংহান্বনে পাণ্ডবাংস্তাত বিদ্ধি
সিংহৈর্বিহীনং হি বনং বিনশ্যে;ত্সিংহা বিনশ্যেয়ুরৃতে বনেন