Utshovঅধ্যায় 36
36.1
বিদুর উবাচ
অত্রৈবোদাহরন্তীমমিতিহাসং পুরাতনম্
আত্রেয়স্য চ সংবাদং সাধ্যানাং চেতি নঃ শ্রুতম্
36.2
চরন্তং হংসরূপেণ মহর্ষিং সংশিতব্রতম্
সাধ্যা দেবা মহাপ্রাজ্ঞং পর্যপৃচ্ছন্ত বৈ পুরা
36.3
সাধ্যা দেবা বয়মস্মো মহর্ষে; দৃষ্ট্বা ভবন্তং ন শক্নুমোঽনুমাতুম্
শ্রুতেন ধীরো বুদ্ধিমাংস্ত্বং মতো নঃ; কাব্যাং বাচং বক্তুমর্হস্যুদারাম্
36.4
হংস উবাচ
এতত্কার্যমমরাঃ সংশ্রুতং মে; ধৃতিঃ শমঃ সত্যধর্মানুবৃত্তিঃ
গ্রন্থিং বিনীয় হৃদয়স্য সর্বং; প্রিয়াপ্রিয়ে চাত্মবশং নয়ীত
36.5
আক্রুশ্যমানো নাক্রোশেন্মন্যুরেব তিতিক্ষিতঃ
আক্রোষ্টারং নির্দহতি সুকৃতং চাস্য বিন্দতি
36.6
নাক্রোশী স্যান্নাবমানী পরস্য; মিত্রদ্রোহী নোত নীচোপসেবী
ন চাতিমানী ন চ হীনবৃত্তো; রূক্ষাং বাচং রুশতীং বর্জয়ীত
36.7
মর্মাণ্যস্থীনি হৃদয়ং তথাসূ;ন্ঘোরা বাচো নির্দহন্তীহ পুংসাম্
তস্মাদ্বাচং রুশতীং রূক্ষরূপাং; ধর্মারামো নিত্যশো বর্জয়ীত
36.8
অরুংতুদং পরুষং রূক্ষবাচং; বাক্কণ্টকৈর্বিতুদন্তং মনুষ্যান্
বিদ্যাদলক্ষ্মীকতমং জনানাং; মুখে নিবদ্ধাং নিরৃতিং বহন্তম্
36.9
পরশ্চেদেনমধিবিধ্যেত বাণৈ;র্ভৃশং সুতীক্ষ্ণৈরনলার্কদীপ্তৈঃ
বিরিচ্যমানোঽপ্যতিরিচ্যমানো; বিদ্যাত্কবিঃ সুকৃতং মে দধাতি
36.10
যদি সন্তং সেবতে যদ্যসন্তং; তপস্বিনং যদি বা স্তেনমেব
বাসো যথা রঙ্গবশং প্রয়াতি; তথা স তেষাং বশমভ্যুপৈতি
36.11
বাদং তু যো ন প্রবদেন্ন বাদয়ে;দ্যো নাহতঃ প্রতিহন্যান্ন ঘাতয়েৎ
যো হন্তুকামস্য ন পাপমিচ্ছে;ত্তস্মৈ দেবাঃ স্পৃহয়ন্ত্যাগতায়
36.12
অব্যাহৃতং ব্যাহৃতাচ্ছ্রেয় আহুঃ; সত্যং বদেদ্ব্যাহৃতং তদ্দ্বিতীয়ম্
প্রিয়ং বদেদ্ব্যাহৃতং তত্তৃতীয়ং; ধর্ম্যং বদেদ্ব্যাহৃতং তচ্চতুর্থম্
36.13
যাদৃশৈঃ সংবিবদতে যাদৃশাংশ্চোপসেবতে
যাদৃগিচ্ছেচ্চ ভবিতুং তাদৃগ্ভবতি পূরুষঃ
36.14
যতো যতো নিবর্ততে ততস্ততো বিমুচ্যতে
নিবর্তনাদ্ধি সর্বতো ন বেত্তি দুঃখমণ্বপি
36.15
ন জীয়তে নোত জিগীষতেঽন্যা;ন্ন বৈরকৃচ্চাপ্রতিঘাতকশ্চ
নিন্দাপ্রশংসাসু সমস্বভাবো; ন শোচতে হৃষ্যতি নৈব চায়ম্
36.16
ভাবমিচ্ছতি সর্বস্য নাভাবে কুরুতে মতিম্
সত্যবাদী মৃদুর্দান্তো যঃ স উত্তমপূরুষঃ
36.17
নানর্থকং সান্ত্বয়তি প্রতিজ্ঞায় দদাতি চ
রাদ্ধাপরাদ্ধে জানাতি যঃ স মধ্যমপূরুষঃ
36.18
দুঃশাসনস্তূপহন্তা ন শাস্তা; নাবর্ততে মন্যুবশাত্কৃতঘ্নঃ
ন কস্যচিন্মিত্রমথো দুরাত্মা; কলাশ্চৈতা অধমস্যেহ পুংসঃ
36.19
ন শ্রদ্দধাতি কল্যাণং পরেভ্যোঽপ্যাত্মশঙ্কিতঃ
নিরাকরোতি মিত্রাণি যো বৈ সোঽধমপূরুষঃ
36.20
উত্তমানেব সেবেত প্রাপ্তে কালে তু মধ্যমান্
অধমাংস্তু ন সেবেত য ইচ্ছেচ্ছ্রেয় আত্মনঃ
36.21
প্রাপ্নোতি বৈ বিত্তমসদ্বলেন; নিত্যোত্থানাত্প্রজ্ঞয়া পৌরুষেণ
ন ত্বেব সম্যগ্লভতে প্রশংসাং; ন বৃত্তমাপ্নোতি মহাকুলানাম্
36.22
ধৃতরাষ্ট্র উবাচ
মহাকুলানাং স্পৃহয়ন্তি দেবা; ধর্মার্থবৃদ্ধাশ্চ বহুশ্রুতাশ্চ
পৃচ্ছামি ত্বাং বিদুর প্রশ্নমেতং; ভবন্তি বৈ কানি মহাকুলানি
36.23
বিদুর উবাচ
তপো দমো ব্রহ্মবিত্ত্বং বিতানাঃ; পুণ্যা বিবাহাঃ সততান্নদানম্
যেষ্বেবৈতে সপ্ত গুণা ভবন্তি; সম্যগ্বৃত্তাস্তানি মহাকুলানি
36.24
যেষাং ন বৃত্তং ব্যথতে ন যোনি;র্বৃত্তপ্রসাদেন চরন্তি ধর্মম্
যে কীর্তিমিচ্ছন্তি কুলে বিশিষ্টাং; ত্যক্তানৃতাস্তানি মহাকুলানি
36.25
অনিজ্যয়াবিবাহৈশ্চ বেদস্যোত্সাদনেন চ
কুলান্যকুলতাং যান্তি ধর্মস্যাতিক্রমেণ চ
36.26
দেবদ্রব্যবিনাশেন ব্রহ্মস্বহরণেন চ
কুলান্যকুলতাং যান্তি ব্রাহ্মণাতিক্রমেণ চ
36.27
ব্রাহ্মণানাং পরিভবাত্পরিবাদাচ্চ ভারত
কুলান্যকুলতাং যান্তি ন্যাসাপহরণেন চ
36.28
কুলানি সমুপেতানি গোভিঃ পুরুষতোঽশ্বতঃ
কুলসংখ্যাং ন গচ্ছন্তি যানি হীনানি বৃত্ততঃ
36.29
বৃত্ততস্ত্ববিহীনানি কুলান্যল্পধনান্যপি
কুলসংখ্যাং তু গচ্ছন্তি কর্ষন্তি চ মহদ্যশঃ
36.30
মা নঃ কুলে বৈরকৃত্কশ্চিদস্তু; রাজামাত্যো মা পরস্বাপহারী
মিত্রদ্রোহী নৈকৃতিকোঽনৃতী বা; পূর্বাশী বা পিতৃদেবাতিথিভ্যঃ
36.31
যশ্চ নো ব্রাহ্মণং হন্যাদ্যশ্চ নো ব্রাহ্মণান্দ্বিষেৎ
ন নঃ স সমিতিং গচ্ছেদ্যশ্চ নো নির্বপেত্কৃষিম্
36.32
তৃণানি ভূমিরুদকং বাক্চতুর্থী চ সূনৃতা
সতামেতানি গেহেষু নোচ্ছিদ্যন্তে কদাচন
36.33
শ্রদ্ধয়া পরয়া রাজন্নুপনীতানি সত্কৃতিম্
প্রবৃত্তানি মহাপ্রাজ্ঞ ধর্মিণাং পুণ্যকর্মণাম্
36.34
সূক্ষ্মোঽপি ভারং নৃপতে স্যন্দনো বৈ; শক্তো বোঢুং ন তথান্যে মহীজাঃ
এবং যুক্তা ভারসহা ভবন্তি; মহাকুলীনা ন তথান্যে মনুষ্যাঃ
36.35
ন তন্মিত্রং যস্য কোপাদ্বিভেতি; যদ্বা মিত্রং শঙ্কিতেনোপচর্যম্
যস্মিন্মিত্রে পিতরীবাশ্বসীত; তদ্বৈ মিত্রং সংগতানীতরাণি
36.36
যদি চেদপ্যসংবন্ধো মিত্রভাবেন বর্ততে
স এব বন্ধুস্তন্মিত্রং সা গতিস্তত্পরায়ণম্
36.37
চলচিত্তস্য বৈ পুংসো বৃদ্ধাননুপসেবতঃ
পারিপ্লবমতের্নিত্যমধ্রুবো মিত্রসংগ্রহঃ
36.38
চলচিত্তমনাত্মানমিন্দ্রিয়াণাং বশানুগম্
অর্থাঃ সমতিবর্তন্তে হংসাঃ শুষ্কং সরো যথা
36.39
অকস্মাদেব কুপ্যন্তি প্রসীদন্ত্যনিমিত্ততঃ
শীলমেতদসাধূনামভ্রং পারিপ্লবং যথা
36.40
সত্কৃতাশ্চ কৃতার্থাশ্চ মিত্রাণাং ন ভবন্তি যে
তান্মৃতানপি ক্রব্যাদাঃ কৃতঘ্নান্নোপভুঞ্জতে
36.41
অর্থয়েদেব মিত্রাণি সতি বাসতি বা ধনে
নানর্থয়ন্বিজানাতি মিত্রাণাং সারফল্গুতাম্
36.42
সংতাপাদ্ভ্রশ্যতে রূপং সংতাপাদ্ভ্রশ্যতে বলম্
সংতাপাদ্ভ্রশ্যতে জ্ঞানং সংতাপাদ্ব্যাধিমৃচ্ছতি
36.43
অনবাপ্যং চ শোকেন শরীরং চোপতপ্যতে
অমিত্রাশ্চ প্রহৃষ্যন্তি মা স্ম শোকে মনঃ কৃথাঃ
36.44
পুনর্নরো ম্রিয়তে জায়তে চ; পুনর্নরো হীয়তে বর্ধতে পুনঃ
পুনর্নরো যাচতি যাচ্যতে চ; পুনর্নরঃ শোচতি শোচ্যতে পুনঃ
36.45
সুখং চ দুঃখং চ ভবাভবৌ চ; লাভালাভৌ মরণং জীবিতং চ
পর্যায়শঃ সর্বমিহ স্পৃশন্তি; তস্মাদ্ধীরো নৈব হৃষ্যেন্ন শোচেৎ
36.46
চলানি হীমানি ষডিন্দ্রিয়াণি; তেষাং যদ্যদ্বর্ততে যত্র যত্র
ততস্ততঃ স্রবতে বুদ্ধিরস্য; ছিদ্রোদকুম্ভাদিব নিত্যমম্ভঃ
36.47
ধৃতরাষ্ট্র উবাচ
তনুরুচ্চঃ শিখী রাজা মিথ্যোপচরিতো ময়া
মন্দানাং মম পুত্রাণাং যুদ্ধেনান্তং করিষ্যতি
36.48
নিত্যোদ্বিগ্নমিদং সর্বং নিত্যোদ্বিগ্নমিদং মনঃ
যত্তত্পদমনুদ্বিগ্নং তন্মে বদ মহামতে
36.49
বিদুর উবাচ
নান্যত্র বিদ্যাতপসোর্নান্যত্রেন্দ্রিয়নিগ্রহাৎ
নান্যত্র লোভসংত্যাগাচ্ছান্তিং পশ্যামি তেঽনঘ
36.50
বুদ্ধ্যা ভয়ং প্রণুদতি তপসা বিন্দতে মহৎ
গুরুশুশ্রূষয়া জ্ঞানং শান্তিং ত্যাগেন বিন্দতি
36.51
অনাশ্রিতা দানপুণ্যং বেদপুণ্যমনাশ্রিতাঃ
রাগদ্বেষবিনির্মুক্তা বিচরন্তীহ মোক্ষিণঃ
36.52
স্বধীতস্য সুয়ুদ্ধস্য সুকৃতস্য চ কর্মণঃ
তপসশ্চ সুতপ্তস্য তস্যান্তে সুখমেধতে
36.53
স্বাস্তীর্ণানি শয়নানি প্রপন্না; ন বৈ ভিন্না জাতু নিদ্রাং লভন্তে
ন স্ত্রীষু রাজন্রতিমাপ্নুবন্তি; ন মাগধৈঃ স্তূয়মানা ন সূতৈঃ
36.54
ন বৈ ভিন্না জাতু চরন্তি ধর্মং; ন বৈ সুখং প্রাপ্নুবন্তীহ ভিন্নাঃ
ন বৈ ভিন্না গৌরবং মানয়ন্তি; ন বৈ ভিন্নাঃ প্রশমং রোচয়ন্তি
36.55
ন বৈ তেষাং স্বদতে পথ্যমুক্তং; যোগক্ষেমং কল্পতে নোত তেষাম্
ভিন্নানাং বৈ মনুজেন্দ্র পরায়ণং; ন বিদ্যতে কিংচিদন্যদ্বিনাশাৎ
36.56
সংভাব্যং গোষু সংপন্নং সংভাব্যং ব্রাহ্মণে তপঃ
সংভাব্যং স্ত্রীষু চাপল্যং সংভাব্যং জ্ঞাতিতো ভয়ম্
36.57
তন্তবোঽপ্যায়তা নিত্যং তন্তবো বহুলাঃ সমাঃ
বহূন্বহুত্বাদায়াসান্সহন্তীত্যুপমা সতাম্
36.58
ধূমায়ন্তে ব্যপেতানি জ্বলন্তি সহিতানি চ
ধৃতরাষ্ট্রোল্মুকানীব জ্ঞাতয়ো ভরতর্ষভ
36.59
ব্রাহ্মণেষু চ যে শূরাঃ স্ত্রীষু জ্ঞাতিষু গোষু চ
বৃন্তাদিব ফলং পক্বং ধৃতরাষ্ট্র পতন্তি তে
36.60
মহানপ্যেকজো বৃক্ষো বলবান্সুপ্রতিষ্ঠিতঃ
প্রসহ্য এব বাতেন শাখাস্কন্ধং বিমর্দিতুম্
36.61
অথ যে সহিতা বৃক্ষাঃ সংঘশঃ সুপ্রতিষ্ঠিতাঃ
তে হি শীঘ্রতমান্বাতান্সহন্তেঽন্যোন্যসংশ্রয়াৎ
36.62
এবং মনুষ্যমপ্যেকং গুণৈরপি সমন্বিতম্
শক্যং দ্বিষন্তো মন্যন্তে বায়ুর্দ্রুমমিবৈকজম্
36.63
অন্যোন্যসমুপষ্টম্ভাদন্যোন্যাপাশ্রয়েণ চ
জ্ঞাতয়ঃ সংপ্রবর্ধন্তে সরসীবোত্পলান্যুত
36.64
অবধ্যা ব্রাহ্মণা গাবঃ স্ত্রিয়ো বালাশ্চ জ্ঞাতয়ঃ
যেষাং চান্নানি ভুঞ্জীত যে চ স্যুঃ শরণাগতাঃ
36.65
ন মনুষ্যে গুণঃ কশ্চিদন্যো ধনবতামপি
অনাতুরত্বাদ্ভদ্রং তে মৃতকল্পা হি রোগিণঃ
36.66
অব্যাধিজং কটুকং শীর্ষরোগং; পাপানুবন্ধং পরুষং তীক্ষ্ণমুগ্রম্
সতাং পেয়ং যন্ন পিবন্ত্যসন্তো; মন্যুং মহারাজ পিব প্রশাম্য
36.67
রোগার্দিতা ন ফলান্যাদ্রিয়ন্তে; ন বৈ লভন্তে বিষয়েষু তত্ত্বম্
দুঃখোপেতা রোগিণো নিত্যমেব; ন বুধ্যন্তে ধনভোগান্ন সৌখ্যম্
36.68
পুরা হ্যুক্তো নাকরোস্ত্বং বচো মে; দ্যূতে জিতাং দ্রৌপদীং প্রেক্ষ্য রাজন্
দুর্যোধনং বারয়েত্যক্ষবত্যাং; কিতবত্বং পণ্ডিতা বর্জয়ন্তি
36.69
ন তদ্বলং যন্মৃদুনা বিরুধ্যতে; মিশ্রো ধর্মস্তরসা সেবিতব্যঃ
প্রধ্বংসিনী ক্রূরসমাহিতা শ্রী;র্মৃদুপ্রৌঢা গচ্ছতি পুত্রপৌত্রান্
36.70
ধার্তরাষ্ট্রাঃ পাণ্ডবান্পালয়ন্তু; পাণ্ডোঃ সুতাস্তব পুত্রাংশ্চ পান্তু
একারিমিত্রাঃ কুরবো হ্যেকমন্ত্রা; জীবন্তু রাজন্সুখিনঃ সমৃদ্ধাঃ
36.71
মেঢীভূতঃ কৌরবাণাং ত্বমদ্য; ত্বয্যাধীনং কুরুকুলমাজমীঢ
পার্থান্বালান্বনবাসপ্রতপ্তা;ন্গোপায়স্ব স্বং যশস্তাত রক্ষন্
36.72
সংধত্স্ব ত্বং কৌরবান্পাণ্ডুপুত্রৈ;র্মা তেঽন্তরং রিপবঃ প্রার্থয়ন্তু
সত্যে স্থিতাস্তে নরদেব সর্বে; দুর্যোধনং স্থাপয় ত্বং নরেন্দ্র