Utshovঅধ্যায় 35
35.1
ধৃতরাষ্ট্র উবাচ
ব্রূহি ভূয়ো মহাবুদ্ধে ধর্মার্থসহিতং বচঃ
শৃণ্বতো নাস্তি মে তৃপ্তির্বিচিত্রাণীহ ভাষসে
35.2
বিদুর উবাচ
সর্বতীর্থেষু বা স্নানং সর্বভূতেষু চার্জবম্
উভে এতে সমে স্যাতামার্জবং বা বিশিষ্যতে
35.3
আর্জবং প্রতিপদ্যস্ব পুত্রেষু সততং বিভো
ইহ কীর্তিং পরাং প্রাপ্য প্রেত্য স্বর্গমবাপ্স্যসি
35.4
যাবত্কীর্তির্মনুষ্যস্য পুণ্যা লোকেষু গীয়তে
তাবত্স পুরুষব্যাঘ্র স্বর্গলোকে মহীয়তে
35.5
অত্রাপ্যুদাহরন্তীমমিতিহাসং পুরাতনম্
বিরোচনস্য সংবাদং কেশিন্যর্থে সুধন্বনা
35.6
কেশিন্যুবাচ
কিং ব্রাহ্মণাঃ স্বিচ্ছ্রেয়াংসো দিতিজাঃ স্বিদ্বিরোচন
অথ কেন স্ম পর্যঙ্কং সুধন্বা নাধিরোহতি
35.7
বিরোচন উবাচ
প্রাজাপত্যা হি বৈ শ্রেষ্ঠা বয়ং কেশিনি সত্তমাঃ
অস্মাকং খল্বিমে লোকাঃ কে দেবাঃ কে দ্বিজাতয়ঃ
35.8
কেশিন্যুবাচ
ইহৈবাস্স্ব প্রতীক্ষাব উপস্থানে বিরোচন
সুধন্বা প্রাতরাগন্তা পশ্যেয়ং বাং সমাগতৌ
35.9
বিরোচন উবাচ
তথা ভদ্রে করিষ্যামি যথা ত্বং ভীরু ভাষসে
সুধন্বানং চ মাং চৈব প্রাতর্দ্রষ্টাসি সংগতৌ
35.10
সুধন্বোবাচ
অন্বালভে হিরণ্ময়ং প্রাহ্রাদেঽহং তবাসনম্
একত্বমুপসংপন্নো ন ত্বাসেয়ং ত্বয়া সহ
35.11
বিরোচন উবাচ
অন্বাহরন্তু ফলকং কূর্চং বাপ্যথ বা বৃসীম্
সুধন্বন্ন ত্বমর্হোঽসি ময়া সহ সমাসনম্
35.12
সুধন্বোবাচ
পিতাপি তে সমাসীনমুপাসীতৈব মামধঃ
বালঃ সুখৈধিতো গেহে ন ত্বং কিংচন বুধ্যসে
35.13
বিরোচন উবাচ
হিরণ্যং চ গবাশ্বং চ যদ্বিত্তমসুরেষু নঃ
সুধন্বন্বিপণে তেন প্রশ্নং পৃচ্ছাব যে বিদুঃ
35.14
সুধন্বোবাচ
হিরণ্যং চ গবাশ্বং চ তবৈবাস্তু বিরোচন
প্রাণয়োস্তু পণং কৃত্বা প্রশ্নং পৃচ্ছাব যে বিদুঃ
35.15
বিরোচন উবাচ
আবাং কুত্র গমিষ্যাবঃ প্রাণয়োর্বিপণে কৃতে
ন হি দেবেষ্বহং স্থাতা ন মনুষ্যেষু কর্হিচিৎ
35.16
সুধন্বোবাচ
পিতরং তে গমিষ্যাবঃ প্রাণয়োর্বিপণে কৃতে
পুত্রস্যাপি স হেতোর্হি প্রহ্রাদো নানৃতং বদেৎ
35.17
প্রহ্রাদ উবাচ
ইমৌ তৌ সংপ্রদৃশ্যেতে যাভ্যাং ন চরিতং সহ
আশীবিষাবিব ক্রুদ্ধাবেকমার্গমিহাগতৌ
35.18
কিং বৈ সহৈব চরতো ন পুরা চরতঃ সহ
বিরোচনৈতত্পৃচ্ছামি কিং তে সখ্যং সুধন্বনা
35.19
বিরোচন উবাচ
ন মে সুধন্বনা সখ্যং প্রাণয়োর্বিপণাবহে
প্রহ্রাদ তত্ত্বাং পৃচ্ছামি মা প্রশ্নমনৃতং বদীঃ
35.20
প্রহ্রাদ উবাচ
উদকং মধুপর্কং চাপ্যানয়ন্তু সুধন্বনে
ব্রহ্মন্নভ্যর্চনীয়োঽসি শ্বেতা গৌঃ পীবরীকৃতা
35.21
সুধন্বোবাচ
উদকং মধুপর্কং চ পথ এবার্পিতং মম
প্রহ্রাদ ত্বং তু নৌ প্রশ্নং তথ্যং প্রব্রূহি পৃচ্ছতোঃ
35.22
প্রহ্রাদ উবাচ
পুত্রো বান্যো ভবান্ব্রহ্মন্সাক্ষ্যে চৈব ভবেত্স্থিতঃ
তয়োর্বিবদতোঃ প্রশ্নং কথমস্মদ্বিধো বদেৎ
35.23
অথ যো নৈব প্রব্রূয়াত্সত্যং বা যদি বানৃতম্
এতত্সুধন্বন্পৃচ্ছামি দুর্বিবক্তা স্ম কিং বসেৎ
35.24
সুধন্বোবাচ
যাং রাত্রিমধিবিন্না স্ত্রী যাং চৈবাক্ষপরাজিতঃ
যাং চ ভারাভিতপ্তাঙ্গো দুর্বিবক্তা স্ম তাং বসেৎ
35.25
নগরে প্রতিরুদ্ধঃ সন্বহির্দ্বারে বুভুক্ষিতঃ
অমিত্রান্ভূয়সঃ পশ্যন্দুর্বিবক্তা স্ম তাং বসেৎ
35.26
পঞ্চ পশ্বনৃতে হন্তি দশ হন্তি গবানৃতে
শতমশ্বানৃতে হন্তি সহস্রং পুরুষানৃতে
35.27
হন্তি জাতানজাতাংশ্চ হিরণ্যার্থেঽনৃতং বদন্
সর্বং ভূম্যনৃতে হন্তি মা স্ম ভূম্যনৃতং বদীঃ
35.28
প্রহ্রাদ উবাচ
মত্তঃ শ্রেয়ানঙ্গিরা বৈ সুধন্বা ত্বদ্বিরোচন
মাতাস্য শ্রেয়সী মাতুস্তস্মাত্ত্বং তেন বৈ জিতঃ
35.29
বিরোচন সুধন্বায়ং প্রাণানামীশ্বরস্তব
সুধন্বন্পুনরিচ্ছামি ত্বয়া দত্তং বিরোচনম্
35.30
সুধন্বোবাচ
যদ্ধর্মমবৃণীথাস্ত্বং ন কামাদনৃতং বদীঃ
পুনর্দদামি তে তস্মাত্পুত্রং প্রহ্রাদ দুর্লভম্
35.31
এষ প্রহ্রাদ পুত্রস্তে ময়া দত্তো বিরোচনঃ
পাদপ্রক্ষালনং কুর্যাত্কুমার্যাঃ সংনিধৌ মম
35.32
বিদুর উবাচ
তস্মাদ্রাজেন্দ্র ভূম্যর্থে নানৃতং বক্তুমর্হসি
মা গমঃ সসুতামাত্যোঽত্যয়ং পুত্রাননুভ্রমন্
35.33
ন দেবা যষ্টিমাদায় রক্ষন্তি পশুপালবৎ
যং তু রক্ষিতুমিচ্ছন্তি বুদ্ধ্যা সংবিভজন্তি তম্
35.34
যথা যথা হি পুরুষঃ কল্যাণে কুরুতে মনঃ
তথা তথাস্য সর্বার্থাঃ সিধ্যন্তে নাত্র সংশয়ঃ
35.35
ন ছন্দাংসি বৃজিনাত্তারয়ন্তি; মায়াবিনং মায়য়া বর্তমানম্
নীডং শকুন্তা ইব জাতপক্ষা;শ্ছন্দাংস্যেনং প্রজহত্যন্তকালে
35.36
মত্তাপানং কলহং পূগবৈরং; ভার্যাপত্যোরন্তরং জ্ঞাতিভেদম্
রাজদ্বিষ্টং স্ত্রীপুমাংসোর্বিবাদং; বর্জ্যান্যাহুর্যশ্চ পন্থাঃ প্রদুষ্টঃ
35.37
সামুদ্রিকং বণিজং চোরপূর্বং; শলাকধূর্তং চ চিকিত্সকং চ
অরিং চ মিত্রং চ কুশীলবং চ; নৈতান্সাক্ষ্যেষ্বধিকুর্বীত সপ্ত
35.38
মানাগ্নিহোত্রমুত মানমৌনং; মানেনাধীতমুত মানয়জ্ঞঃ
এতানি চত্বার্যভয়ংকরাণি; ভয়ং প্রয়চ্ছন্ত্যয়থাকৃতানি
35.39
অগারদাহী গরদঃ কুণ্ডাশী সোমবিক্রয়ী
পর্বকারশ্চ সূচী চ মিত্রধ্রুক্পারদারিকঃ
35.40
ভ্রূণহা গুরুতল্পী চ যশ্চ স্যাত্পানপো দ্বিজঃ
অতিতীক্ষ্ণশ্চ কাকশ্চ নাস্তিকো বেদনিন্দকঃ
35.41
স্রুবপ্রগ্রহণো ব্রাত্যঃ কীনাশশ্চার্থবানপি
রক্ষেত্যুক্তশ্চ যো হিংস্যাত্সর্বে ব্রহ্মহণৈঃ সমাঃ
35.42
তৃণোল্কয়া জ্ঞায়তে জাতরূপং; যুগে ভদ্রো ব্যবহারেণ সাধুঃ
শূরো ভয়েষ্বর্থকৃচ্ছ্রেষু ধীরঃ; কৃচ্ছ্রাস্বাপত্সু সুহৃদশ্চারয়শ্চ
35.43
জরা রূপং হরতি হি ধৈর্যমাশা; মৃত্যুঃ প্রাণান্ধর্মচর্যামসূয়া
ক্রোধঃ শ্রিয়ং শীলমনার্যসেবা; হ্রিয়ং কামঃ সর্বমেবাভিমানঃ
35.44
শ্রীর্মঙ্গলাত্প্রভবতি প্রাগল্ভ্যাত্সংপ্রবর্ধতে
দাক্ষ্যাত্তু কুরুতে মূলং সংয়মাত্প্রতিতিষ্ঠতি
35.45
অষ্টৌ গুণাঃ পুরুষং দীপয়ন্তি; প্রজ্ঞা চ কৌল্যং চ দমঃ শ্রুতং চ
পরাক্রমশ্চাবহুভাষিতা চ; দানং যথাশক্তি কৃতজ্ঞতা চ
35.46
এতান্গুণাংস্তাত মহানুভাবা;নেকো গুণঃ সংশ্রয়তে প্রসহ্য
রাজা যদা সত্কুরুতে মনুষ্যং; সর্বান্গুণানেষ গুণোঽতিভাতি
35.47
অষ্টৌ নৃপেমানি মনুষ্যলোকে; স্বর্গস্য লোকস্য নিদর্শনানি
চত্বার্যেষামন্ববেতানি সদ্ভি;শ্চত্বার্যেষামন্ববয়ন্তি সন্তঃ
35.48
যজ্ঞো দানমধ্যয়নং তপশ্চ; চত্বার্যেতান্যন্ববেতানি সদ্ভিঃ
দমঃ সত্যমার্জবমানৃশংস্যং; চত্বার্যেতান্যন্ববয়ন্তি সন্তঃ
35.49
ন সা সভা যত্র ন সন্তি বৃদ্ধা; ন তে বৃদ্ধা যে ন বদন্তি ধর্মম্
নাসৌ ধর্মো যত্র ন সত্যমস্তি; ন তত্সত্যং যচ্ছলেনানুবিদ্ধম্
35.50
সত্যং রূপং শ্রুতং বিদ্যা কৌল্যং শীলং বলং ধনম্
শৌর্যং চ চিত্রভাষ্যং চ দশ সংসর্গয়োনয়ঃ
35.51
পাপং কুর্বন্পাপকীর্তিঃ পাপমেবাশ্নুতে ফলম্
পুণ্যং কুর্বন্পুণ্যকীর্তিঃ পুণ্যমেবাশ্নুতে ফলম্
35.52
পাপং প্রজ্ঞাং নাশয়তি ক্রিয়মাণং পুনঃ পুনঃ
নষ্টপ্রজ্ঞঃ পাপমেব নিত্যমারভতে নরঃ
35.53
পুণ্যং প্রজ্ঞাং বর্ধয়তি ক্রিয়মাণং পুনঃ পুনঃ
বৃদ্ধপ্রজ্ঞঃ পুণ্যমেব নিত্যমারভতে নরঃ
35.54
অসূয়কো দন্দশূকো নিষ্ঠুরো বৈরকৃন্নরঃ
স কৃচ্ছ্রং মহদাপ্নোতি নচিরাত্পাপমাচরন্
35.55
অনসূয়ঃ কৃতপ্রজ্ঞঃ শোভনান্যাচরন্সদা
অকৃচ্ছ্রাত্সুখমাপ্নোতি সর্বত্র চ বিরাজতে
35.56
প্রজ্ঞামেবাগময়তি যঃ প্রাজ্ঞেভ্যঃ স পণ্ডিতঃ
প্রাজ্ঞো হ্যবাপ্য ধর্মার্থৌ শক্নোতি সুখমেধিতুম্
35.57
দিবসেনৈব তত্কুর্যাদ্যেন রাত্রৌ সুখং বসেৎ
অষ্টমাসেন তত্কুর্যাদ্যেন বর্ষাঃ সুখং বসেৎ
35.58
পূর্বে বয়সি তত্কুর্যাদ্যেন বৃদ্ধঃ সুখং বসেৎ
যাবজ্জীবেন তত্কুর্যাদ্যেন প্রেত্য সুখং বসেৎ
35.59
জীর্ণমন্নং প্রশংসন্তি ভার্যাং চ গতয়ৌবনাম্
শূরং বিগতসংগ্রামং গতপারং তপস্বিনম্
35.60
ধনেনাধর্মলব্ধেন যচ্ছিদ্রমপিধীয়তে
অসংবৃতং তদ্ভবতি ততোঽন্যদবদীর্যতে
35.61
গুরুরাত্মবতাং শাস্তা শাস্তা রাজা দুরাত্মনাম্
অথ প্রচ্ছন্নপাপানাং শাস্তা বৈবস্বতো যমঃ
35.62
ঋষীণাং চ নদীনাং চ কুলানাং চ মহাত্মনাম্
প্রভবো নাধিগন্তব্যঃ স্ত্রীণাং দুশ্চরিতস্য চ
35.63
দ্বিজাতিপূজাভিরতো দাতা জ্ঞাতিষু চার্জবী
ক্ষত্রিয়ঃ স্বর্গভাগ্রাজংশ্চিরং পালয়তে মহীম্
35.64
সুবর্ণপুষ্পাং পৃথিবীং চিন্বন্তি পুরুষাস্ত্রয়ঃ
শূরশ্চ কৃতবিদ্যশ্চ যশ্চ জানাতি সেবিতুম্
35.65
বুদ্ধিশ্রেষ্ঠানি কর্মাণি বাহুমধ্যানি ভারত
তানি জঙ্ঘাজঘন্যানি ভারপ্রত্যবরাণি চ
35.66
দুর্যোধনে চ শকুনৌ মূঢে দুঃশাসনে তথা
কর্ণে চৈশ্বর্যমাধায় কথং ত্বং ভূতিমিচ্ছসি
35.67
সর্বৈর্গুণৈরুপেতাশ্চ পাণ্ডবা ভরতর্ষভ
পিতৃবত্ত্বয়ি বর্তন্তে তেষু বর্তস্ব পুত্রবৎ