Utshovঅধ্যায় 34
34.1
ধৃতরাষ্ট্র উবাচ
জাগ্রতো দহ্যমানস্য যত্কার্যমনুপশ্যসি
তদ্ব্রূহি ত্বং হি নস্তাত ধর্মার্থকুশলঃ শুচিঃ
34.2
ত্বং মাং যথাবদ্বিদুর প্রশাধি; প্রজ্ঞাপূর্বং সর্বমজাতশত্রোঃ
যন্মন্যসে পথ্যমদীনসত্ত্ব; শ্রেয়স্করং ব্রূহি তদ্বৈ কুরূণাম্
34.3
পাপাশঙ্কী পাপমেবানুপশ্য;ন্পৃচ্ছামি ত্বাং ব্যাকুলেনাত্মনাহম্
কবে তন্মে ব্রূহি সর্বং যথাব;ন্মনীষিতং সর্বমজাতশত্রোঃ
34.4
বিদুর উবাচ
শুভং বা যদি বা পাপং দ্বেষ্যং বা যদি বা প্রিয়ম্
অপৃষ্টস্তস্য তদ্ব্রূয়াদ্যস্য নেচ্ছেত্পরাভবম্
34.5
তস্মাদ্বক্ষ্যামি তে রাজন্ভবমিচ্ছন্কুরূন্প্রতি
বচঃ শ্রেয়স্করং ধর্ম্যং ব্রুবতস্তন্নিবোধ মে
34.6
মিথ্যোপেতানি কর্মাণি সিধ্যেয়ুর্যানি ভারত
অনুপায়প্রয়ুক্তানি মা স্ম তেষু মনঃ কৃথাঃ
34.7
তথৈব যোগবিহিতং ন সিধ্যেত্কর্ম যন্নৃপ
উপায়য়ুক্তং মেধাবী ন তত্র গ্লপয়েন্মনঃ
34.8
অনুবন্ধানবেক্ষেত সানুবন্ধেষু কর্মসু
সংপ্রধার্য চ কুর্বীত ন বেগেন সমাচরেৎ
34.9
অনুবন্ধং চ সংপ্রেক্ষ্য বিপাকাংশ্চৈব কর্মণাম্
উত্থানমাত্মনশ্চৈব ধীরঃ কুর্বীত বা ন বা
34.10
যঃ প্রমাণং ন জানাতি স্থানে বৃদ্ধৌ তথা ক্ষয়ে
কোশে জনপদে দণ্ডে ন স রাজ্যেঽবতিষ্ঠতে
34.11
যস্ত্বেতানি প্রমাণানি যথোক্তান্যনুপশ্যতি
যুক্তো ধর্মার্থয়োর্জ্ঞানে স রাজ্যমধিগচ্ছতি
34.12
ন রাজ্যং প্রাপ্তমিত্যেব বর্তিতব্যমসাংপ্রতম্
শ্রিয়ং হ্যবিনয়ো হন্তি জরা রূপমিবোত্তমম্
34.13
ভক্ষ্যোত্তমপ্রতিচ্ছন্নং মত্স্যো বডিশমায়সম্
রূপাভিপাতী গ্রসতে নানুবন্ধমবেক্ষতে
34.14
যচ্ছক্যং গ্রসিতুং গ্রস্যং গ্রস্তং পরিণমেচ্চ যৎ
হিতং চ পরিণামে যত্তদদ্যং ভূতিমিচ্ছতা
34.15
বনস্পতেরপক্বানি ফলানি প্রচিনোতি যঃ
স নাপ্নোতি রসং তেভ্যো বীজং চাস্য বিনশ্যতি
34.16
যস্তু পক্বমুপাদত্তে কালে পরিণতং ফলম্
ফলাদ্রসং স লভতে বীজাচ্চৈব ফলং পুনঃ
34.17
যথা মধু সমাদত্তে রক্ষন্পুষ্পাণি ষট্পদঃ
তদ্বদর্থান্মনুষ্যেভ্য আদদ্যাদবিহিংসয়া
34.18
পুষ্পং পুষ্পং বিচিন্বীত মূলচ্ছেদং ন কারয়েৎ
মালাকার ইবারামে ন যথাঙ্গারকারকঃ
34.19
কিং নু মে স্যাদিদং কৃত্বা কিং নু মে স্যাদকুর্বতঃ
ইতি কর্মাণি সংচিন্ত্য কুর্যাদ্বা পুরুষো ন বা
34.20
অনারভ্যা ভবন্ত্যর্থাঃ কেচিন্নিত্যং তথাগতাঃ
কৃতঃ পুরুষকারোঽপি ভবেদ্যেষু নিরর্থকঃ
34.21
কাংশ্চিদর্থান্নরঃ প্রাজ্ঞো লঘুমূলান্মহাফলান্
ক্ষিপ্রমারভতে কর্তুং ন বিঘ্নয়তি তাদৃশান্
34.22
ঋজু পশ্যতি যঃ সর্বং চক্ষুষানুপিবন্নিব
আসীনমপি তূষ্ণীকমনুরজ্যন্তি তং প্রজাঃ
34.23
চক্ষুষা মনসা বাচা কর্মণা চ চতুর্বিধম্
প্রসাদয়তি লোকং যঃ তং লোকোঽনুপ্রসীদতি
34.24
যস্মাত্ত্রস্যন্তি ভূতানি মৃগব্যাধান্মৃগা ইব
সাগরান্তামপি মহীং লব্ধ্বা স পরিহীয়তে
34.25
পিতৃপৈতামহং রাজ্যং প্রাপ্তবান্স্বেন তেজসা
বায়ুরভ্রমিবাসাদ্য ভ্রংশয়ত্যনয়ে স্থিতঃ
34.26
ধর্মমাচরতো রাজ্ঞঃ সদ্ভিশ্চরিতমাদিতঃ
বসুধা বসুসংপূর্ণা বর্ধতে ভূতিবর্ধনী
34.27
অথ সংত্যজতো ধর্মমধর্মং চানুতিষ্ঠতঃ
প্রতিসংবেষ্টতে ভূমিরগ্নৌ চর্মাহিতং যথা
34.28
য এব যত্নঃ ক্রিয়তে পররাষ্ট্রাবমর্দনে
স এব যত্নঃ কর্তব্যঃ স্বরাষ্ট্রপরিপালনে
34.29
ধর্মেণ রাজ্যং বিন্দেত ধর্মেণ পরিপালয়েৎ
ধর্মমূলাং শ্রিয়ং প্রাপ্য ন জহাতি ন হীয়তে
34.30
অপ্যুন্মত্তাত্প্রলপতো বালাচ্চ পরিসর্পতঃ
সর্বতঃ সারমাদদ্যাদশ্মভ্য ইব কাঞ্চনম্
34.31
সুব্যাহৃতানি সুধিয়াং সুকৃতানি ততস্ততঃ
সংচিন্বন্ধীর আসীত শিলাহারী শিলং যথা
34.32
গন্ধেন গাবঃ পশ্যন্তি বেদৈঃ পশ্যন্তি ব্রাহ্মণাঃ
চারৈঃ পশ্যন্তি রাজানশ্চক্ষুর্ভ্যামিতরে জনাঃ
34.33
ভূয়াংসং লভতে ক্লেশং যা গৌর্ভবতি দুর্দুহা
অথ যা সুদুহা রাজন্নৈব তাং বিনয়ন্ত্যপি
34.34
যদতপ্তং প্রণমতি ন তত্সংতাপয়ন্ত্যপি
যচ্চ স্বয়ং নতং দারু ন তত্সংনাময়ন্ত্যপি
34.35
এতয়োপময়া ধীরঃ সংনমেত বলীয়সে
ইন্দ্রায় স প্রণমতে নমতে যো বলীয়সে
34.36
পর্জন্যনাথাঃ পশবো রাজানো মিত্রবান্ধবাঃ
পতয়ো বান্ধবাঃ স্ত্রীণাং ব্রাহ্মণা বেদবান্ধবাঃ
34.37
সত্যেন রক্ষ্যতে ধর্মো বিদ্যা যোগেন রক্ষ্যতে
মৃজয়া রক্ষ্যতে রূপং কুলং বৃত্তেন রক্ষ্যতে
34.38
মানেন রক্ষ্যতে ধান্যমশ্বান্রক্ষত্যনুক্রমঃ
অভীক্ষ্ণদর্শনাদ্গাবঃ স্ত্রিয়ো রক্ষ্যাঃ কুচেলতঃ
34.39
ন কুলং বৃত্তহীনস্য প্রমাণমিতি মে মতিঃ
অন্ত্যেষ্বপি হি জাতানাং বৃত্তমেব বিশিষ্যতে
34.40
য ঈর্ষ্যুঃ পরবিত্তেষু রূপে বীর্যে কুলান্বয়ে
সুখে সৌভাগ্যসত্কারে তস্য ব্যাধিরনন্তকঃ
34.41
অকার্যকরণাদ্ভীতঃ কার্যাণাং চ বিবর্জনাৎ
অকালে মন্ত্রভেদাচ্চ যেন মাদ্যেন্ন তত্পিবেৎ
34.42
বিদ্যামদো ধনমদস্তৃতীয়োঽভিজনো মদঃ
এতে মদাবলিপ্তানামেত এব সতাং দমাঃ
34.43
অসন্তোঽভ্যর্থিতাঃ সদ্ভিঃ কিংচিত্কার্যং কদাচন
মন্যন্তে সন্তমাত্মানমসন্তমপি বিশ্রুতম্
34.44
গতিরাত্মবতাং সন্তঃ সন্ত এব সতাং গতিঃ
অসতাং চ গতিঃ সন্তো ন ত্বসন্তঃ সতাং গতিঃ
34.45
জিতা সভা বস্ত্রবতা সমাশা গোমতা জিতা
অধ্বা জিতো যানবতা সর্বং শীলবতা জিতম্
34.46
শীলং প্রধানং পুরুষে তদ্যস্যেহ প্রণশ্যতি
ন তস্য জীবিতেনার্থো ন ধনেন ন বন্ধুভিঃ
34.47
আঢ্যানাং মাংসপরমং মধ্যানাং গোরসোত্তরম্
লবণোত্তরং দরিদ্রাণাং ভোজনং ভরতর্ষভ
34.48
সংপন্নতরমেবান্নং দরিদ্রা ভুঞ্জতে সদা
ক্ষুত্স্বাদুতাং জনয়তি সা চাঢ্যেষু সুদুর্লভা
34.49
প্রায়েণ শ্রীমতাং লোকে ভোক্তুং শক্তির্ন বিদ্যতে
দরিদ্রাণাং তু রাজেন্দ্র অপি কাষ্ঠং হি জীর্যতে
34.50
অবৃত্তির্ভয়মন্ত্যানাং মধ্যানাং মরণাদ্ভয়ম্
উত্তমানাং তু মর্ত্যানামবমানাত্পরং ভয়ম্
34.51
ঐশ্বর্যমদপাপিষ্ঠা মদাঃ পানমদাদয়ঃ
ঐশ্বর্যমদমত্তো হি নাপতিত্বা বিবুধ্যতে
34.52
ইন্দ্রিয়ৈরিন্দ্রিয়ার্থেষু বর্তমানৈরনিগ্রহৈঃ
তৈরয়ং তাপ্যতে লোকো নক্ষত্রাণি গ্রহৈরিব
34.53
যো জিতঃ পঞ্চবর্গেণ সহজেনাত্মকর্শিনা
আপদস্তস্য বর্ধন্তে শুক্লপক্ষ ইবোডুরাট্
34.54
অবিজিত্য য আত্মানমমাত্যান্বিজিগীষতে
অমিত্রান্বাজিতামাত্যঃ সোঽবশঃ পরিহীয়তে
34.55
আত্মানমেব প্রথমং দেশরূপেণ যো জয়েৎ
ততোঽমাত্যানমিত্রাংশ্চ ন মোঘং বিজিগীষতে
34.56
বশ্যেন্দ্রিয়ং জিতামাত্যং ধৃতদণ্ডং বিকারিষু
পরীক্ষ্যকারিণং ধীরমত্যন্তং শ্রীর্নিষেবতে
34.57
রথঃ শরীরং পুরুষস্য রাজ;ন্নাত্মা নিয়ন্তেন্দ্রিয়াণ্যস্য চাশ্বাঃ
তৈরপ্রমত্তঃ কুশলঃ সদশ্বৈ;র্দান্তৈঃ সুখং যাতি রথীব ধীরঃ
34.58
এতান্যনিগৃহীতানি ব্যাপাদয়িতুমপ্যলম্
অবিধেয়া ইবাদান্তা হয়াঃ পথি কুসারথিম্
34.59
অনর্থমর্থতঃ পশ্যন্নর্থং চৈবাপ্যনর্থতঃ
ইন্দ্রিয়ৈঃ প্রসৃতো বালঃ সুদুঃখং মন্যতে সুখম্
34.60
ধর্মার্থৌ যঃ পরিত্যজ্য স্যাদিন্দ্রিয়বশানুগঃ
শ্রীপ্রাণধনদারেভ্য ক্ষিপ্রং স পরিহীয়তে
34.61
অর্থানামীশ্বরো যঃ স্যাদিন্দ্রিয়াণামনীশ্বরঃ
ইন্দ্রিয়াণামনৈশ্বর্যাদৈশ্বর্যাদ্ভ্রশ্যতে হি সঃ
34.62
আত্মনাত্মানমন্বিচ্ছেন্মনোবুদ্ধীন্দ্রিয়ৈর্যতৈঃ
আত্মৈব হ্যাত্মনো বন্ধুরাত্মৈব রিপুরাত্মনঃ
34.63
ক্ষুদ্রাক্ষেণেব জালেন ঝষাবপিহিতাবুভৌ
কামশ্চ রাজন্ক্রোধশ্চ তৌ প্রজ্ঞানং বিলুম্পতঃ
34.64
সমবেক্ষ্যেহ ধর্মার্থৌ সংভারান্যোঽধিগচ্ছতি
স বৈ সংভৃতসংভারঃ সততং সুখমেধতে
34.65
যঃ পঞ্চাভ্যন্তরাঞ্শত্রূনবিজিত্য মতিক্ষয়ান্
জিগীষতি রিপূনন্যান্রিপবোঽভিভবন্তি তম্
34.66
দৃশ্যন্তে হি দুরাত্মানো বধ্যমানাঃ স্বকর্মভিঃ
ইন্দ্রিয়াণামনীশত্বাদ্রাজানো রাজ্যবিভ্রমৈঃ
34.67
অসংত্যাগাত্পাপকৃতামপাপাং;স্তুল্যো দণ্ডঃ স্পৃশতে মিশ্রভাবাৎ
শুষ্কেণার্দ্রং দহ্যতে মিশ্রভাবা;ত্তস্মাত্পাপৈঃ সহ সংধিং ন কুর্যাৎ
34.68
নিজানুত্পততঃ শত্রূন্পঞ্চ পঞ্চপ্রয়োজনান্
যো মোহান্ন নিগৃহ্ণাতি তমাপদ্গ্রসতে নরম্
34.69
অনসূয়ার্জবং শৌচং সংতোষঃ প্রিয়বাদিতা
দমঃ সত্যমনায়াসো ন ভবন্তি দুরাত্মনাম্
34.70
আত্মজ্ঞানমনায়াসস্তিতিক্ষা ধর্মনিত্যতা
বাক্চৈব গুপ্তা দানং চ নৈতান্যন্ত্যেষু ভারত
34.71
আক্রোশপরিবাদাভ্যাং বিহিংসন্ত্যবুধা বুধান্
বক্তা পাপমুপাদত্তে ক্ষমমাণো বিমুচ্যতে
34.72
হিংসা বলমসাধূনাং রাজ্ঞাং দণ্ডবিধির্বলম্
শুশ্রূষা তু বলং স্ত্রীণাং ক্ষমা গুণবতাং বলম্
34.73
বাক্সংয়মো হি নৃপতে সুদুষ্করতমো মতঃ
অর্থবচ্চ বিচিত্রং চ ন শক্যং বহু ভাষিতুম্
34.74
অভ্যাবহতি কল্যাণং বিবিধা বাক্সুভাষিতা
সৈব দুর্ভাষিতা রাজন্ননর্থায়োপপদ্যতে
34.75
সংরোহতি শরৈর্বিদ্ধং বনং পরশুনা হতম্
বাচা দুরুক্তং বীভত্সং ন সংরোহতি বাক্ক্ষতম্
34.76
কর্ণিনালীকনারাচা নির্হরন্তি শরীরতঃ
বাক্শল্যস্তু ন নির্হর্তুং শক্যো হৃদিশয়ো হি সঃ
34.77
বাক্সায়কা বদনান্নিষ্পতন্তি; যৈরাহতঃ শোচতি রাত্র্যহানি
পরস্য নামর্মসু তে পতন্তি; তান্পণ্ডিতো নাবসৃজেত্পরেষু
34.78
যস্মৈ দেবাঃ প্রয়চ্ছন্তি পুরুষায় পরাভবম্
বুদ্ধিং তস্যাপকর্ষন্তি সোঽপাচীনানি পশ্যতি
34.79
বুদ্ধৌ কলুষভূতায়াং বিনাশে প্রত্যুপস্থিতে
অনয়ো নয়সংকাশো হৃদয়ান্নাপসর্পতি
34.80
সেয়ং বুদ্ধিঃ পরীতা তে পুত্রাণাং তব ভারত
পাণ্ডবানাং বিরোধেন ন চৈনামববুধ্যসে
34.81
রাজা লক্ষণসংপন্নস্ত্রৈলোক্যস্যাপি যো ভবেৎ
শিষ্যস্তে শাসিতা সোঽস্তু ধৃতরাষ্ট্র যুধিষ্ঠিরঃ
34.82
অতীব সর্বান্পুত্রাংস্তে ভাগধেয়পুরস্কৃতঃ
তেজসা প্রজ্ঞয়া চৈব যুক্তো ধর্মার্থতত্ত্ববিৎ
34.83
আনৃশংস্যাদনুক্রোশাদ্যোঽসৌ ধর্মভৃতাং বরঃ
গৌরবাত্তব রাজেন্দ্র বহূন্ক্লেশাংস্তিতিক্ষতি