Utshovঅধ্যায় 33
33.1
বৈশংপায়ন উবাচ
দ্বাঃস্থং প্রাহ মহাপ্রাজ্ঞো ধৃতরাষ্ট্রো মহীপতিঃ
বিদুরং দ্রষ্টুমিচ্ছামি তমিহানয় মাচিরম্
33.2
প্রহিতো ধৃতরাষ্ট্রেণ দূতঃ ক্ষত্তারমব্রবীৎ
ঈশ্বরস্ত্বাং মহারাজো মহাপ্রাজ্ঞ দিদৃক্ষতি
33.3
এবমুক্তস্তু বিদুরঃ প্রাপ্য রাজনিবেশনম্
অব্রবীদ্ধৃতরাষ্ট্রায় দ্বাঃস্থ মাং প্রতিবেদয়
33.4
দ্বাঃস্থ উবাচ
বিদুরোঽয়মনুপ্রাপ্তো রাজেন্দ্র তব শাসনাৎ
দ্রষ্টুমিচ্ছতি তে পাদৌ কিং করোতু প্রশাধি মাম্
33.5
ধৃতরাষ্ট্র উবাচ
প্রবেশয় মহাপ্রাজ্ঞং বিদুরং দীর্ঘদর্শিনম্
অহং হি বিদুরস্যাস্য নাকাল্যো জাতু দর্শনে
33.6
দ্বাঃস্থ উবাচ
প্রবিশান্তঃপুরং ক্ষত্তর্মহারাজস্য ধীমতঃ
ন হি তে দর্শনেঽকাল্যো জাতু রাজা ব্রবীতি মাম্
33.7
বৈশংপায়ন উবাচ
ততঃ প্রবিশ্য বিদুরো ধৃতরাষ্ট্রনিবেশনম্
অব্রবীত্প্রাঞ্জলির্বাক্যং চিন্তয়ানং নরাধিপম্
33.8
বিদুরোঽহং মহাপ্রাজ্ঞ সংপ্রাপ্তস্তব শাসনাৎ
যদি কিংচন কর্তব্যময়মস্মি প্রশাধি মাম্
33.9
ধৃতরাষ্ট্র উবাচ
সংজয়ো বিদুর প্রাপ্তো গর্হয়িত্বা চ মাং গতঃ
অজাতশত্রোঃ শ্বো বাক্যং সভামধ্যে স বক্ষ্যতি
33.10
তস্যাদ্য কুরুবীরস্য ন বিজ্ঞাতং বচো ময়া
তন্মে দহতি গাত্রাণি তদকার্ষীত্প্রজাগরম্
33.11
জাগ্রতো দহ্যমানস্য শ্রেয়ো যদিহ পশ্যসি
তদ্ব্রূহি ত্বং হি নস্তাত ধর্মার্থকুশলো হ্যসি
33.12
যতঃ প্রাপ্তঃ সংজয়ঃ পাণ্ডবেভ্যো; ন মে যথাবন্মনসঃ প্রশান্তিঃ
সর্বেন্দ্রিয়াণ্যপ্রকৃতিং গতানি; কিং বক্ষ্যতীত্যেব হি মেঽদ্য চিন্তা
33.13
বিদুর উবাচ
অভিয়ুক্তং বলবতা দুর্বলং হীনসাধনম্
হৃতস্বং কামিনং চোরমাবিশন্তি প্রজাগরাঃ
33.14
কচ্চিদেতৈর্মহাদোষৈর্ন স্পৃষ্টোঽসি নরাধিপ
কচ্চিন্ন পরবিত্তেষু গৃধ্যন্বিপরিতপ্যসে
33.15
ধৃতরাষ্ট্র উবাচ
শ্রোতুমিচ্ছামি তে ধর্ম্যং পরং নৈঃশ্রেয়সং বচঃ
অস্মিন্রাজর্ষিবংশে হি ত্বমেকঃ প্রাজ্ঞসংমতঃ
33.16
বিদুর উবাচ
নিষেবতে প্রশস্তানি নিন্দিতানি ন সেবতে
অনাস্তিকঃ শ্রদ্দধান এতত্পণ্ডিতলক্ষণম্
33.17
ক্রোধো হর্ষশ্চ দর্পশ্চ হ্রীস্তম্ভো মান্যমানিতা
যমর্থান্নাপকর্ষন্তি স বৈ পণ্ডিত উচ্যতে
33.18
যস্য কৃত্যং ন জানন্তি মন্ত্রং বা মন্ত্রিতং পরে
কৃতমেবাস্য জানন্তি স বৈ পণ্ডিত উচ্যতে
33.19
যস্য কৃত্যং ন বিঘ্নন্তি শীতমুষ্ণং ভয়ং রতিঃ
সমৃদ্ধিরসমৃদ্ধির্বা স বৈ পণ্ডিত উচ্যতে
33.20
যস্য সংসারিণী প্রজ্ঞা ধর্মার্থাবনুবর্ততে
কামাদর্থং বৃণীতে যঃ স বৈ পণ্ডিত উচ্যতে
33.21
যথাশক্তি চিকীর্ষন্তি যথাশক্তি চ কুর্বতে
ন কিংচিদবমন্যন্তে পণ্ডিতা ভরতর্ষভ
33.22
ক্ষিপ্রং বিজানাতি চিরং শৃণোতি; বিজ্ঞায় চার্থং ভজতে ন কামাৎ
নাসংপৃষ্টো ব্যুপয়ুঙ্ক্তে পরার্থে; তত্প্রজ্ঞানং প্রথমং পণ্ডিতস্য
33.23
নাপ্রাপ্যমভিবাঞ্ছন্তি নষ্টং নেচ্ছন্তি শোচিতুম্
আপত্সু চ ন মুহ্যন্তি নরাঃ পণ্ডিতবুদ্ধয়ঃ
33.24
নিশ্চিত্য যঃ প্রক্রমতে নান্তর্বসতি কর্মণঃ
অবন্ধ্যকালো বশ্যাত্মা স বৈ পণ্ডিত উচ্যতে
33.25
আর্যকর্মণি রজ্যন্তে ভূতিকর্মাণি কুর্বতে
হিতং চ নাভ্যসূয়ন্তি পণ্ডিতা ভরতর্ষভ
33.26
ন হৃষ্যত্যাত্মসংমানে নাবমানেন তপ্যতে
গাঙ্গো হ্রদ ইবাক্ষোভ্যো যঃ স পণ্ডিত উচ্যতে
33.27
তত্ত্বজ্ঞঃ সর্বভূতানাং যোগজ্ঞঃ সর্বকর্মণাম্
উপায়জ্ঞো মনুষ্যাণাং নরঃ পণ্ডিত উচ্যতে
33.28
প্রবৃত্তবাক্চিত্রকথ ঊহবান্প্রতিভানবান্
আশু গ্রন্থস্য বক্তা চ স বৈ পণ্ডিত উচ্যতে
33.29
শ্রুতং প্রজ্ঞানুগং যস্য প্রজ্ঞা চৈব শ্রুতানুগা
অসংভিন্নার্যমর্যাদঃ পণ্ডিতাখ্যাং লভেত সঃ
33.30
অশ্রুতশ্চ সমুন্নদ্ধো দরিদ্রশ্চ মহামনাঃ
অর্থাংশ্চাকর্মণা প্রেপ্সুর্মূঢ ইত্যুচ্যতে বুধৈঃ
33.31
স্বমর্থং যঃ পরিত্যজ্য পরার্থমনুতিষ্ঠতি
মিথ্যা চরতি মিত্রার্থে যশ্চ মূঢঃ স উচ্যতে
33.32
অকামান্কাময়তি যঃ কাময়ানান্পরিদ্বিষন্
বলবন্তং চ যো দ্বেষ্টি তমাহুর্মূঢচেতসম্
33.33
অমিত্রং কুরুতে মিত্রং মিত্রং দ্বেষ্টি হিনস্তি চ
কর্ম চারভতে দুষ্টং তমাহুর্মূঢচেতসম্
33.34
সংসারয়তি কৃত্যানি সর্বত্র বিচিকিত্সতে
চিরং করোতি ক্ষিপ্রার্থে স মূঢো ভরতর্ষভ
33.35
অনাহূতঃ প্রবিশতি অপৃষ্টো বহু ভাষতে
বিশ্বসত্যপ্রমত্তেষু মূঢচেতা নরাধমঃ
33.36
পরং ক্ষিপতি দোষেণ বর্তমানঃ স্বয়ং তথা
যশ্চ ক্রুধ্যত্যনীশঃ সন্স চ মূঢতমো নরঃ
33.37
আত্মনো বলমজ্ঞায় ধর্মার্থপরিবর্জিতম্
অলভ্যমিচ্ছন্নৈষ্কর্ম্যান্মূঢবুদ্ধিরিহোচ্যতে
33.38
অশিষ্যং শাস্তি যো রাজন্যশ্চ শূন্যমুপাসতে
কদর্যং ভজতে যশ্চ তমাহুর্মূঢচেতসম্
33.39
অর্থং মহান্তমাসাদ্য বিদ্যামৈশ্বর্যমেব বা
বিচরত্যসমুন্নদ্ধো যঃ স পণ্ডিত উচ্যতে
33.40
একঃ সংপন্নমশ্নাতি বস্তে বাসশ্চ শোভনম্
যোঽসংবিভজ্য ভৃত্যেভ্যঃ কো নৃশংসতরস্ততঃ
33.41
একঃ পাপানি কুরুতে ফলং ভুঙ্ক্তে মহাজনঃ
ভোক্তারো বিপ্রমুচ্যন্তে কর্তা দোষেণ লিপ্যতে
33.42
একং হন্যান্ন বা হন্যাদিষুর্মুক্তো ধনুষ্মতা
বুদ্ধির্বুদ্ধিমতোত্সৃষ্টা হন্যাদ্রাষ্ট্রং সরাজকম্
33.43
একয়া দ্বে বিনিশ্চিত্য ত্রীংশ্চতুর্ভির্বশে কুরু
পঞ্চ জিত্বা বিদিত্বা ষট্সপ্ত হিত্বা সুখী ভব
33.44
একং বিষরসো হন্তি শস্ত্রেণৈকশ্চ বধ্যতে
সরাষ্ট্রং সপ্রজং হন্তি রাজানং মন্ত্রবিস্রবঃ
33.45
একঃ স্বাদু ন ভুঞ্জীত একশ্চার্থান্ন চিন্তয়েৎ
একো ন গচ্ছেদধ্বানং নৈকঃ সুপ্তেষু জাগৃয়াৎ
33.46
একমেবাদ্বিতীয়ং তদ্যদ্রাজন্নাববুধ্যসে
সত্যং স্বর্গস্য সোপানং পারাবারস্য নৌরিব
33.47
একঃ ক্ষমাবতাং দোষো দ্বিতীয়ো নোপলভ্যতে
যদেনং ক্ষময়া যুক্তমশক্তং মন্যতে জনঃ
33.48
একো ধর্মঃ পরং শ্রেয়ঃ ক্ষমৈকা শান্তিরুত্তমা
বিদ্যৈকা পরমা দৃষ্টিরহিংসৈকা সুখাবহা
33.49
দ্বাবিমৌ গ্রসতে ভূমিঃ সর্পো বিলশয়ানিব
রাজানং চাবিরোদ্ধারং ব্রাহ্মণং চাপ্রবাসিনম্
33.50
দ্বে কর্মণী নরঃ কুর্বন্নস্মিঁল্লোকে বিরোচতে
অব্রুবন্পরুষং কিংচিদসতো নার্থয়ংস্তথা
33.51
দ্বাবিমৌ পুরুষব্যাঘ্র পরপ্রত্যয়কারিণৌ
স্ত্রিয়ঃ কামিতকামিন্যো লোকঃ পূজিতপূজকঃ
33.52
দ্বাবিমৌ কণ্টকৌ তীক্ষ্ণৌ শরীরপরিশোষণৌ
যশ্চাধনঃ কাময়তে যশ্চ কুপ্যত্যনীশ্বরঃ
33.53
দ্বাবিমৌ পুরুষৌ রাজন্স্বর্গস্যোপরি তিষ্ঠতঃ
প্রভুশ্চ ক্ষময়া যুক্তো দরিদ্রশ্চ প্রদানবান্
33.54
ন্যায়াগতস্য দ্রব্যস্য বোদ্ধব্যৌ দ্বাবতিক্রমৌ
অপাত্রে প্রতিপত্তিশ্চ পাত্রে চাপ্রতিপাদনম্
33.55
ত্রয়ো ন্যায়া মনুষ্যাণাং শ্রূয়ন্তে ভরতর্ষভ
কনীয়ান্মধ্যমঃ শ্রেষ্ঠ ইতি বেদবিদো বিদুঃ
33.56
ত্রিবিধাঃ পুরুষা রাজন্নুত্তমাধমমধ্যমাঃ
নিয়োজয়েদ্যথাবত্তাংস্ত্রিবিধেষ্বেব কর্মসু
33.57
ত্রয় এবাধনা রাজন্ভার্যা দাসস্তথা সুতঃ
যত্তে সমধিগচ্ছন্তি যস্য তে তস্য তদ্ধনম্
33.58
চত্বারি রাজ্ঞা তু মহাবলেন; বর্জ্যান্যাহুঃ পণ্ডিতস্তানি বিদ্যাৎ
অল্পপ্রজ্ঞৈঃ সহ মন্ত্রং ন কুর্যা;ন্ন দীর্ঘসূত্রৈরলসৈশ্চারণৈশ্চ
33.59
চত্বারি তে তাত গৃহে বসন্তু; শ্রিয়াভিজুষ্টস্য গৃহস্থধর্মে
বৃদ্ধো জ্ঞাতিরবসন্নঃ কুলীনঃ; সখা দরিদ্রো ভগিনী চানপত্যা
33.60
চত্বার্যাহ মহারাজ সদ্যস্কানি বৃহস্পতিঃ
পৃচ্ছতে ত্রিদশেন্দ্রায় তানীমানি নিবোধ মে
33.61
দেবতানাং চ সংকল্পমনুভাবং চ ধীমতাম্
বিনয়ং কৃতবিদ্যানাং বিনাশং পাপকর্মণাম্
33.62
পঞ্চাগ্নয়ো মনুষ্যেণ পরিচর্যাঃ প্রয়ত্নতঃ
পিতা মাতাগ্নিরাত্মা চ গুরুশ্চ ভরতর্ষভ
33.63
পঞ্চৈব পূজয়ঁল্লোকে যশঃ প্রাপ্নোতি কেবলম্
দেবান্পিতৄন্মনুষ্যাংশ্চ ভিক্ষূনতিথিপঞ্চমান্
33.64
পঞ্চ ত্বানুগমিষ্যন্তি যত্র যত্র গমিষ্যসি
মিত্রাণ্যমিত্রা মধ্যস্থা উপজীব্যোপজীবিনঃ
33.65
পঞ্চেন্দ্রিয়স্য মর্ত্যস্য ছিদ্রং চেদেকমিন্দ্রিয়ম্
ততোঽস্য স্রবতি প্রজ্ঞা দৃতেঃ পাদাদিবোদকম্
33.66
ষড্দোষাঃ পুরুষেণেহ হাতব্যা ভূতিমিচ্ছতা
নিদ্রা তন্দ্রী ভয়ং ক্রোধ আলস্যং দীর্ঘসূত্রতা
33.67
ষডিমান্পুরুষো জহ্যাদ্ভিন্নাং নাবমিবার্ণবে
অপ্রবক্তারমাচার্যমনধীয়ানমৃত্বিজম্
33.68
অরক্ষিতারং রাজানং ভার্যাং চাপ্রিয়বাদিনীম্
গ্রামকামং চ গোপালং বনকামং চ নাপিতম্
33.69
ষডেব তু গুণাঃ পুংসা ন হাতব্যাঃ কদাচন
সত্যং দানমনালস্যমনসূয়া ক্ষমা ধৃতিঃ
33.70
ষণ্ণামাত্মনি নিত্যানামৈশ্বর্যং যোঽধিগচ্ছতি
ন স পাপৈঃ কুতোঽনর্থৈর্যুজ্যতে বিজিতেন্দ্রিয়ঃ
33.71
ষডিমে ষট্সু জীবন্তি সপ্তমো নোপলভ্যতে
চোরাঃ প্রমত্তে জীবন্তি ব্যাধিতেষু চিকিত্সকাঃ
33.72
প্রমদাঃ কাময়ানেষু যজমানেষু যাজকাঃ
রাজা বিবদমানেষু নিত্যং মূর্খেষু পণ্ডিতাঃ
33.73
সপ্ত দোষাঃ সদা রাজ্ঞা হাতব্যা ব্যসনোদয়াঃ
প্রায়শো যৈর্বিনশ্যন্তি কৃতমূলাশ্চ পার্থিবাঃ
33.74
স্ত্রিয়োঽক্ষা মৃগয়া পানং বাক্পারুষ্যং চ পঞ্চমম্
মহচ্চ দণ্ডপারুষ্যমর্থদূষণমেব চ
33.75
অষ্টৌ পূর্বনিমিত্তানি নরস্য বিনশিষ্যতঃ
ব্রাহ্মণান্প্রথমং দ্বেষ্টি ব্রাহ্মণৈশ্চ বিরুধ্যতে
33.76
ব্রাহ্মণস্বানি চাদত্তে ব্রাহ্মণাংশ্চ জিঘাংসতি
রমতে নিন্দয়া চৈষাং প্রশংসাং নাভিনন্দতি
33.77
নৈতান্স্মরতি কৃত্যেষু যাচিতশ্চাভ্যসূয়তি
এতান্দোষান্নরঃ প্রাজ্ঞো বুদ্ধ্যা বুদ্ধ্বা বিবর্জয়েৎ
33.78
অষ্টাবিমানি হর্ষস্য নবনীতানি ভারত
বর্তমানানি দৃশ্যন্তে তান্যেব সুসুখান্যপি
33.79
সমাগমশ্চ সখিভির্মহাংশ্চৈব ধনাগমঃ
পুত্রেণ চ পরিষ্বঙ্গঃ সংনিপাতশ্চ মৈথুনে
33.80
সময়ে চ প্রিয়ালাপঃ স্বয়ূথেষু চ সংনতিঃ
অভিপ্রেতস্য লাভশ্চ পূজা চ জনসংসদি
33.81
নবদ্বারমিদং বেশ্ম ত্রিস্থূণং পঞ্চসাক্ষিকম্
ক্ষেত্রজ্ঞাধিষ্ঠিতং বিদ্বান্যো বেদ স পরঃ কবিঃ
33.82
দশ ধর্মং ন জানন্তি ধৃতরাষ্ট্র নিবোধ তান্
মত্তঃ প্রমত্ত উন্মত্তঃ শ্রান্তঃ ক্রুদ্ধো বুভুক্ষিতঃ
33.83
ত্বরমাণশ্চ ভীরুশ্চ লুব্ধঃ কামী চ তে দশ
তস্মাদেতেষু ভাবেষু ন প্রসজ্জেত পণ্ডিতঃ
33.84
অত্রৈবোদাহরন্তীমমিতিহাসং পুরাতনম্
পুত্রার্থমসুরেন্দ্রেণ গীতং চৈব সুধন্বনা
33.85
যঃ কামমন্যূ প্রজহাতি রাজা; পাত্রে প্রতিষ্ঠাপয়তে ধনং চ
বিশেষবিচ্ছ্রুতবান্ক্ষিপ্রকারী; তং সর্বলোকঃ কুরুতে প্রমাণম্
33.86
জানাতি বিশ্বাসয়িতুং মনুষ্যা;ন্বিজ্ঞাতদোষেষু দধাতি দণ্ডম্
জানাতি মাত্রাং চ তথা ক্ষমাং চ; তং তাদৃশং শ্রীর্জুষতে সমগ্রা
33.87
সুদুর্বলং নাবজানাতি কংচি;দ্যুক্তো রিপুং সেবতে বুদ্ধিপূর্বম্
ন বিগ্রহং রোচয়তে বলস্থৈঃ; কালে চ যো বিক্রমতে স ধীরঃ
33.88
প্রাপ্যাপদং ন ব্যথতে কদাচি;দুদ্যোগমন্বিচ্ছতি চাপ্রমত্তঃ
দুঃখং চ কালে সহতে জিতাত্মা; ধুরংধরস্তস্য জিতাঃ সপত্নাঃ
33.89
অনর্থকং বিপ্রবাসং গৃহেভ্যঃ; পাপৈঃ সংধিং পরদারাভিমর্শম্
দম্ভং স্তৈন্যং পৈশুনং মদ্যপানং; ন সেবতে যঃ স সুখী সদৈব
33.90
ন সংরম্ভেণারভতেঽর্থবর্গ;মাকারিতঃ শংসতি তথ্যমেব
ন মাত্রার্থে রোচয়তে বিবাদং; নাপূজিতঃ কুপ্যতি চাপ্যমূঢঃ
33.91
ন যোঽভ্যসূয়ত্যনুকম্পতে চ; ন দুর্বলঃ প্রাতিভাব্যং করোতি
নাত্যাহ কিংচিত্ক্ষমতে বিবাদং; সর্বত্র তাদৃগ্লভতে প্রশংসাম্
33.92
যো নোদ্ধতং কুরুতে জাতু বেষং; ন পৌরুষেণাপি বিকত্থতেঽন্যান্
ন মূর্চ্ছিতঃ কটুকান্যাহ কিংচি;ত্প্রিয়ং সদা তং কুরুতে জনোঽপি
33.93
ন বৈরমুদ্দীপয়তি প্রশান্তং; ন দর্পমারোহতি নাস্তমেতি
ন দুর্গতোঽস্মীতি করোতি মন্যুং; তমার্যশীলং পরমাহুরগ্র্যম্
33.94
ন স্বে সুখে বৈ কুরুতে প্রহর্ষং; নান্যস্য দুঃখে ভবতি প্রতীতঃ
দত্ত্বা ন পশ্চাত্কুরুতেঽনুতাপং; ন কত্থতে সত্পুরুষার্যশীলঃ
33.95
দেশাচারান্সময়াঞ্জাতিধর্মা;ন্বুভূষতে যস্তু পরাবরজ্ঞঃ
স তত্র তত্রাধিগতঃ সদৈব; মহাজনস্যাধিপত্যং করোতি
33.96
দম্ভং মোহং মত্সরং পাপকৃত্যং; রাজদ্বিষ্টং পৈশুনং পূগবৈরম্
মত্তোন্মত্তৈর্দুর্জনৈশ্চাপি বাদং; যঃ প্রজ্ঞাবান্বর্জয়েত্স প্রধানঃ
33.97
দমং শৌচং দৈবতং মঙ্গলানি; প্রায়শ্চিত্তং বিবিধাঁল্লোকবাদান্
এতানি যঃ কুরুতে নৈত্যকানি; তস্যোত্থানং দেবতা রাধয়ন্তি
33.98
সমৈর্বিবাহং কুরুতে ন হীনৈঃ; সমৈঃ সখ্যং ব্যবহারং কথাশ্চ
গুণৈর্বিশিষ্টাংশ্চ পুরোদধাতি; বিপশ্চিতস্তস্য নয়াঃ সুনীতাঃ
33.99
মিতং ভুঙ্ক্তে সংবিভজ্যাশ্রিতেভ্যো; মিতং স্বপিত্যমিতং কর্ম কৃত্বা
দদাত্যমিত্রেষ্বপি যাচিতঃ সং;স্তমাত্মবন্তং প্রজহত্যনর্থাঃ
33.100
চিকীর্ষিতং বিপ্রকৃতং চ যস্য; নান্যে জনাঃ কর্ম জানন্তি কিংচিৎ
মন্ত্রে গুপ্তে সম্যগনুষ্ঠিতে চ; স্বল্পো নাস্য ব্যথতে কশ্চিদর্থঃ
33.101
যঃ সর্বভূতপ্রশমে নিবিষ্টঃ; সত্যো মৃদুর্দানকৃচ্ছুদ্ধভাবঃ
অতীব সংজ্ঞায়তে জ্ঞাতিমধ্যে; মহামণির্জাত্য ইব প্রসন্নঃ
33.102
য আত্মনাপত্রপতে ভৃশং নরঃ; স সর্বলোকস্য গুরুর্ভবত্যুত
অনন্ততেজাঃ সুমনাঃ সমাহিতঃ; স্বতেজসা সূর্য ইবাবভাসতে
33.103
বনে জাতাঃ শাপদগ্ধস্য রাজ্ঞঃ; পাণ্ডোঃ পুত্রাঃ পঞ্চ পঞ্চেন্দ্রকল্পাঃ
ত্বয়ৈব বালা বর্ধিতাঃ শিক্ষিতাশ্চ; তবাদেশং পালয়ন্ত্যাম্বিকেয়
33.104
প্রদায়ৈষামুচিতং তাত রাজ্যং; সুখী পুত্রৈঃ সহিতো মোদমানঃ
ন দেবানাং নাপি চ মানুষাণাং; ভবিষ্যসি ত্বং তর্কণীয়ো নরেন্দ্র