Utshovঅধ্যায় 32
32.1
বৈশংপায়ন উবাচ
অনুজ্ঞাতঃ পাণ্ডবেন প্রয়য়ৌ সংজয়স্তদা
শাসনং ধৃতরাষ্ট্রস্য সর্বং কৃত্বা মহাত্মনঃ
32.2
সংপ্রাপ্য হাস্তিনপুরং শীঘ্রং চ প্রবিবেশ হ
অন্তঃপুরমুপস্থায় দ্বাঃস্থং বচনমব্রবীৎ
32.3
আচক্ষ্ব মাং ধৃতরাষ্ট্রায় দ্বাঃস্থ; উপাগতং পাণ্ডবানাং সকাশাৎ
জাগর্তি চেদভিবদেস্ত্বং হি ক্ষত্তঃ; প্রবিশেয়ং বিদিতো ভূমিপস্য
32.4
দ্বাঃস্থ উবাচ
সংজয়োঽয়ং ভূমিপতে নমস্তে; দিদৃক্ষয়া দ্বারমুপাগতস্তে
প্রাপ্তো দূতঃ পাণ্ডবানাং সকাশা;ত্প্রশাধি রাজন্কিময়ং করোতু
32.5
ধৃতরাষ্ট্র উবাচ
আচক্ষ্ব মাং সুখিনং কাল্যমস্মৈ; প্রবেশ্যতাং স্বাগতং সংজয়ায়
ন চাহমেতস্য ভবাম্যকাল্যঃ; স মে কস্মাদ্দ্বারি তিষ্ঠেত ক্ষত্তঃ
32.6
বৈশংপায়ন উবাচ
ততঃ প্রবিশ্যানুমতে নৃপস্য; মহদ্বেশ্ম প্রাজ্ঞশূরার্যগুপ্তম্
সিংহাসনস্থং পার্থিবমাসসাদ; বৈচিত্রবীর্যং প্রাঞ্জলিঃ সূতপুত্রঃ
32.7
সংজয় উবাচ
সংজয়োঽহং ভূমিপতে নমস্তে; প্রাপ্তোঽস্মি গত্বা নরদেব পাণ্ডবান্
অভিবাদ্য ত্বাং পাণ্ডুপুত্রো মনস্বী; যুধিষ্ঠিরঃ কুশলং চান্বপৃচ্ছৎ
32.8
স তে পুত্রান্পৃচ্ছতি প্রীয়মাণঃ; কচ্চিত্পুত্রৈঃ প্রীয়সে নপ্তৃভিশ্চ
তথা সুহৃদ্ভিঃ সচিবৈশ্চ রাজ;ন্যে চাপি ত্বামুপজীবন্তি তৈশ্চ
32.9
ধৃতরাষ্ট্র উবাচ
অভ্যেত্য ত্বাং তাত বদামি সংজয়; অজাতশত্রুং চ সুখেন পার্থম্
কচ্চিত্স রাজা কুশলী সপুত্রঃ; সহামাত্যঃ সানুজঃ কৌরবাণাম্
32.10
সংজয় উবাচ
সহামাত্যঃ কুশলী পাণ্ডুপুত্রো; ভূয়শ্চাতো যচ্চ তেঽগ্রে মনোঽভূৎ
নির্ণিক্তধর্মার্থকরো মনস্বী; বহুশ্রুতো দৃষ্টিমাঞ্শীলবাংশ্চ
32.11
পরং ধর্মাত্পাণ্ডবস্যানৃশংস্যং; ধর্মঃ পরো বিত্তচয়ান্মতোঽস্য
সুখপ্রিয়ে ধর্মহীনে ন পার্থো;ঽনুরুধ্যতে ভারত তস্য বিদ্ধি
32.12
পরপ্রয়ুক্তঃ পুরুষো বিচেষ্টতে; সূত্রপ্রোতা দারুময়ীব যোষা
ইমং দৃষ্ট্বা নিয়মং পাণ্ডবস্য; মন্যে পরং কর্ম দৈবং মনুষ্যাৎ
32.13
ইমং চ দৃষ্ট্বা তব কর্মদোষং; পাদোদর্কং ঘোরমবর্ণরূপম্
যাবন্নরঃ কাময়তেঽতিকাল্যং; তাবন্নরোঽয়ং লভতে প্রশংসাম্
32.14
অজাতশত্রুস্তু বিহায় পাপং; জীর্ণাং ত্বচং সর্প ইবাসমর্থাম্
বিরোচতেঽহার্যবৃত্তেন ধীরো; যুধিষ্ঠিরস্ত্বয়ি পাপং বিসৃজ্য
32.15
অঙ্গাত্মনঃ কর্ম নিবোধ রাজ;ন্ধর্মার্থয়ুক্তাদার্যবৃত্তাদপেতম্
উপক্রোশং চেহ গতোঽসি রাজ;ন্নোহেশ্চ পাপং প্রসজেদমুত্র
32.16
স ত্বমর্থং সংশয়িতং বিনা তৈ;রাশংসসে পুত্রবশানুগোঽদ্য
অধর্মশব্দশ্চ মহান্পৃথিব্যাং; নেদং কর্ম ত্বত্সমং ভারতাগ্র্য
32.17
হীনপ্রজ্ঞো দৌষ্কুলেয়ো নৃশংসো; দীর্ঘবৈরী ক্ষত্রবিদ্যাস্বধীরঃ
এবংধর্মা নাপদঃ সংতিতীর্ষে;দ্ধীনবীর্যো যশ্চ ভবেদশিষ্টঃ
32.18
কুলে জাতো ধর্মবান্যো যশস্বী; বহুশ্রুতঃ সুখজীবী যতাত্মা
ধর্মার্থয়োর্গ্রথিতয়োর্বিভর্তি; নান্যত্র দিষ্টস্য বশাদুপৈতি
32.19
কথং হি মন্ত্রাগ্র্যধরো মনীষী; ধর্মার্থয়োরাপদি সংপ্রণেতা
এবংয়ুক্তঃ সর্বমন্ত্রৈরহীনো; অনানৃশংস্যং কর্ম কুর্যাদমূঢঃ
32.20
তবাপীমে মন্ত্রবিদঃ সমেত্য; সমাসতে কর্মসু নিত্যয়ুক্তাঃ
তেষাময়ং বলবান্নিশ্চয়শ্চ; কুরুক্ষয়ার্থে নিরয়ো ব্যপাদি
32.21
অকালিকং কুরবো নাভবিষ্য;ন্পাপেন চেত্পাপমজাতশত্রুঃ
ইচ্ছেজ্জাতু ত্বয়ি পাপং বিসৃজ্য; নিন্দা চেয়ং তব লোকেঽভবিষ্যৎ
32.22
কিমন্যত্র বিষয়াদীশ্বরাণাং; যত্র পার্থঃ পরলোকং দদর্শ
অত্যক্রামত্স তথা সংমতঃ স্যা;ন্ন সংশয়ো নাস্তি মনুষ্যকারঃ
32.23
এতান্গুণান্কর্মকৃতানবেক্ষ্য; ভাবাভাবৌ বর্তমানাবনিত্যৌ
বলির্হি রাজা পারমবিন্দমানো; নান্যত্কালাত্কারণং তত্র মেনে
32.24
চক্ষুঃ শ্রোত্রে নাসিকা ত্বক্চ জিহ্বা; জ্ঞানস্যৈতান্যায়তনানি জন্তোঃ
তানি প্রীতান্যেব তৃষ্ণাক্ষয়ান্তে; তান্যব্যথো দুঃখহীনঃ প্রণুদ্যাৎ
32.25
ন ত্বেব মন্যে পুরুষস্য কর্ম; সংবর্ততে সুপ্রয়ুক্তং যথাবৎ
মাতুঃ পিতুঃ কর্মণাভিপ্রসূতঃ; সংবর্ধতে বিধিবদ্ভোজনেন
32.26
প্রিয়াপ্রিয়ে সুখদুঃখে চ রাজ;ন্নিন্দাপ্রশংসে চ ভজেত এনম্
পরস্ত্বেনং গর্হয়তেঽপরাধে; প্রশংসতে সাধুবৃত্তং তমেব
32.27
স ত্বা গর্হে ভারতানাং বিরোধা;দন্তো নূনং ভবিতায়ং প্রজানাম্
নো চেদিদং তব কর্মাপরাধা;ত্কুরূন্দহেত্কৃষ্ণবর্ত্মেব কক্ষম্
32.28
ত্বমেবৈকো জাতপুত্রেষু রাজ;ন্বশং গন্তা সর্বলোকে নরেন্দ্র
কামাত্মনাং শ্লাঘসে দ্যূতকালে; নান্যচ্ছমাত্পশ্য বিপাকমস্য
32.29
অনাপ্তানাং প্রগ্রহাত্ত্বং নরেন্দ্র; তথাপ্তানাং নিগ্রহাচ্চৈব রাজন্
ভূমিং স্ফীতাং দুর্বলত্বাদনন্তাং; ন শক্তস্ত্বং রক্ষিতুং কৌরবেয়
32.30
অনুজ্ঞাতো রথবেগাবধূতঃ; শ্রান্তো নিপদ্যে শয়নং নৃসিংহ
প্রাতঃ শ্রোতারঃ কুরবঃ সভায়া;মজাতশত্রোর্বচনং সমেতাঃ