অধ্যায় 31

31.1

যুধিষ্ঠির উবাচ
উত সন্তমসন্তং চ বালং বৃদ্ধং চ সংজয়
উতাবলং বলীয়াংসং ধাতা প্রকুরুতে বশে

উত বালায় পাণ্ডিত্যং পণ্ডিতায়োত বালতাম্
দদাতি সর্বমীশানঃ পুরস্তাচ্ছুক্রমুচ্চরন্

অলং বিজ্ঞাপনায় স্যাদাচক্ষীথা যথাতথম্
অথো মন্ত্রং মন্ত্রয়িত্বা অন্যোন্যেনাতিহৃষ্টবৎ

গাবল্গণে কুরূন্গত্বা ধৃতরাষ্ট্রং মহাবলম্
অভিবাদ্যোপসংগৃহ্য ততঃ পৃচ্ছেরনাময়ম্

ব্রূয়াশ্চৈনং ত্বমাসীনং কুরুভিঃ পরিবারিতম্
তবৈব রাজন্বীর্যেণ সুখং জীবন্তি পাণ্ডবাঃ

তব প্রসাদাদ্বালাস্তে প্রাপ্তা রাজ্যমরিংদম
রাজ্যে তান্স্থাপয়িত্বাগ্রে নোপেক্ষীর্বিনশিষ্যতঃ

সর্বমপ্যেতদেকস্য নালং সংজয় কস্যচিৎ
তাত সংহত্য জীবামো মা দ্বিষদ্ভ্যো বশং গমঃ

তথা ভীষ্মং শাংতনবং ভারতানাং পিতামহম্
শিরসাভিবদেথাস্ত্বং মম নাম প্রকীর্তয়ন্

অভিবাদ্য চ বক্তব্যস্ততোঽস্মাকং পিতামহঃ
ভবতা শংতনোর্বংশো নিমগ্নঃ পুনরুদ্ধৃতঃ

স ত্বং কুরু তথা তাত স্বমতেন পিতামহ
যথা জীবন্তি তে পৌত্রাঃ প্রীতিমন্তঃ পরস্পরম্

তথৈব বিদুরং ব্রূয়াঃ কুরূণাং মন্ত্রধারিণম্
অয়ুদ্ধং সৌম্য ভাষস্ব হিতকামো যুধিষ্ঠিরঃ

অথো সুয়োধনং ব্রূয়া রাজপুত্রমমর্ষণম্
মধ্যে কুরূণামাসীনমনুনীয় পুনঃ পুনঃ

অপশ্যন্মামুপেক্ষন্তং কৃষ্ণামেকাং সভাগতাম্
তদ্দুঃখমতিতিক্ষাম মা বধীষ্ম কুরূনিতি

এবং পূর্বাপরান্ক্লেশানতিতিক্ষন্ত পাণ্ডবাঃ
যথা বলীয়সঃ সন্তস্তত্সর্বং কুরবো বিদুঃ

যন্নঃ প্রাব্রাজয়ঃ সৌম্য অজিনৈঃ প্রতিবাসিতান্
তদ্দুঃখমতিতিক্ষাম মা বধীষ্ম কুরূনিতি

যত্তত্সভায়ামাক্রম্য কৃষ্ণাং কেশেষ্বধর্ষয়ৎ
দুঃশাসনস্তেঽনুমতে তচ্চাস্মাভিরুপেক্ষিতম্

যথোচিতং স্বকং ভাগং লভেমহি পরংতপ
নিবর্তয় পরদ্রব্যে বুদ্ধিং গৃদ্ধাং নরর্ষভ

শান্তিরেবং ভবেদ্রাজন্প্রীতিশ্চৈব পরস্পরম্
রাজ্যৈকদেশমপি নঃ প্রয়চ্ছ শমমিচ্ছতাম্

কুশস্থলং বৃকস্থলমাসন্দী বারণাবতম্
অবসানং ভবেদত্র কিংচিদেব তু পঞ্চমম্

ভ্রাতৄণাং দেহি পঞ্চানাং গ্রামান্পঞ্চ সুয়োধন
শান্তির্নোঽস্তু মহাপ্রাজ্ঞ জ্ঞাতিভিঃ সহ সংজয়

ভ্রাতা ভ্রাতরমন্বেতু পিতা পুত্রেণ যুজ্যতাম্
স্ময়মানাঃ সমায়ান্তু পাঞ্চালাঃ কুরুভিঃ সহ

অক্ষতান্কুরুপাঞ্চালান্পশ্যেম ইতি কাময়ে
সর্বে সুমনসস্তাত শাম্যাম ভরতর্ষভ

অলমেব শমায়াস্মি তথা যুদ্ধায় সংজয়
ধর্মার্থয়োরলং চাহং মৃদবে দারুণায় চ