অধ্যায় 28

28.1

বৈশংপায়ন উবাচ
ততঃ শারদ্বতো বাক্যমিত্যুবাচ কৃপস্তদা
যুক্তং প্রাপ্তং চ বৃদ্ধেন পাণ্ডবান্প্রতি ভাষিতম্

ধর্মার্থসহিতং শ্লক্ষ্ণং তত্ত্বতশ্চ সহেতুমৎ
তত্রানুরূপং ভীষ্মেণ মমাপ্যত্র গিরং শৃণু

তেষাং চৈব গতিস্তীর্থৈর্বাসশ্চৈষাং প্রচিন্ত্যতাম্
নীতির্বিধীয়তাং চাপি সাংপ্রতং যা হিতা ভবেৎ

নাবজ্ঞেয়ো রিপুস্তাত প্রাকৃতোঽপি বুভূষতা
কিং পুনঃ পাণ্ডবাস্তাত সর্বাস্ত্রকুশলা রণে

তস্মাত্সত্রং প্রবিষ্টেষু পাণ্ডবেষু মহাত্মসু
গূঢভাবেষু ছন্নেষু কালে চোদয়মাগতে

স্বরাষ্ট্রপররাষ্ট্রেষু জ্ঞাতব্যং বলমাত্মনঃ
উদয়ে পাণ্ডবানাং চ প্রাপ্তে কালে ন সংশয়ঃ

নিবৃত্তসময়াঃ পার্থা মহাত্মানো মহাবলাঃ
মহোত্সাহা ভবিষ্যন্তি পাণ্ডবা হ্যতিতেজসঃ

তস্মাদ্বলং চ কোশং চ নীতিশ্চাপি বিধীয়তাম্
যথা কালোদয়ে প্রাপ্তে সম্যক্তৈঃ সংদধামহে

তাত মন্যামি তত্সর্বং বুধ্যস্ব বলমাত্মনঃ
নিয়তং সর্বমিত্রেষু বলবত্স্ববলেষু চ

উচ্চাবচং বলং জ্ঞাত্বা মধ্যস্থং চাপি ভারত
প্রহৃষ্টমপ্রহৃষ্টং চ সংদধাম তথা পরৈঃ

সাম্না ভেদেন দানেন দণ্ডেন বলিকর্মণা
ন্যায়েনানম্য চ পরান্বলাচ্চানম্য দুর্বলান্

সান্ত্বয়িত্বা চ মিত্রাণি বলং চাভাষ্যতাং সুখম্
সকোশবলসংবৃদ্ধঃ সম্যক্সিদ্ধিমবাপ্স্যসি

যোত্স্যসে চাপি বলিভিররিভিঃ প্রত্যুপস্থিতৈঃ
অন্যৈস্ত্বং পাণ্ডবৈর্বাপি হীনস্ববলবাহনৈঃ

এবং সর্বং বিনিশ্চিত্য ব্যবসায়ং স্বধর্মতঃ
যথাকালং মনুষ্যেন্দ্র চিরং সুখমবাপ্স্যসি