Utshovঅধ্যায় 29
29.1
বৈশংপায়ন উবাচ
অথ রাজা ত্রিগর্তানাং সুশর্মা রথয়ূথপঃ
প্রাপ্তকালমিদং বাক্যমুবাচ ত্বরিতো ভৃশম্
29.2
অসকৃন্নিকৃতঃ পূর্বং মত্স্যৈঃ সাল্বেয়কৈঃ সহ
সূতেন চৈব মত্স্যস্য কীচকেন পুনঃ পুনঃ
29.3
বাধিতো বন্ধুভিঃ সার্ধং বলাদ্বলবতা বিভো
স কর্ণমভ্যুদীক্ষ্যাথ দুর্যোধনমভাষত
29.4
অসকৃন্মত্স্যরাজ্ঞা মে রাষ্ট্রং বাধিতমোজসা
প্রণেতা কীচকশ্চাস্য বলবানভবত্পুরা
29.5
ক্রূরোঽমর্ষী স দুষ্টাত্মা ভুবি প্রখ্যাতবিক্রমঃ
নিহতস্তত্র গন্ধর্বৈঃ পাপকর্মা নৃশংসবান্
29.6
তস্মিংশ্চ নিহতে রাজন্হীনদর্পো নিরাশ্রয়ঃ
ভবিষ্যতি নিরুত্সাহো বিরাট ইতি মে মতিঃ
29.7
তত্র যাত্রা মম মতা যদি তে রোচতেঽনঘ
কৌরবাণাং চ সর্বেষাং কর্ণস্য চ মহাত্মনঃ
29.8
এতত্প্রাপ্তমহং মন্যে কার্যমাত্যয়িকং হিতম্
রাষ্ট্রং তস্যাভিয়াত্বাশু বহুধান্যসমাকুলম্
29.9
আদদামোঽস্য রত্নানি বিবিধানি বসূনি চ
গ্রামান্রাষ্ট্রাণি বা তস্য হরিষ্যামো বিভাগশঃ
29.10
অথ বা গোসহস্রাণি বহূনি চ শুভানি চ
বিবিধানি হরিষ্যামঃ প্রতিপীড্য পুরং বলাৎ
29.11
কৌরবৈঃ সহ সংগম্য ত্রিগর্তৈশ্চ বিশাং পতে
গাস্তস্যাপহরামাশু সহ সর্বৈঃ সুসংহতাঃ
29.12
সংধিং বা তেন কৃত্বা তু নিবধ্নীমোঽস্য পৌরুষম্
হত্বা চাস্য চমূং কৃত্স্নাং বশমন্বানয়ামহে
29.13
তং বশে ন্যায়তঃ কৃত্বা সুখং বত্স্যামহে বয়ম্
ভবতো বলবৃদ্ধিশ্চ ভবিষ্যতি ন সংশয়ঃ
29.14
তচ্ছ্রুত্বা বচনং তস্য কর্ণো রাজানমব্রবীৎ
সূক্তং সুশর্মণা বাক্যং প্রাপ্তকালং হিতং চ নঃ
29.15
তস্মাত্ক্ষিপ্রং বিনির্যামো যোজয়িত্বা বরূথিনীম্
বিভজ্য চাপ্যনীকানি যথা বা মন্যসেঽনঘ
29.16
প্রজ্ঞাবান্কুরুবৃদ্ধোঽয়ং সর্বেষাং নঃ পিতামহঃ
আচার্যশ্চ তথা দ্রোণঃ কৃপঃ শারদ্বতস্তথা
29.17
মন্যন্তে তে যথা সর্বে তথা যাত্রা বিধীয়তাম্
সংমন্ত্র্য চাশু গচ্ছামঃ সাধনার্থং মহীপতেঃ
29.18
কিং চ নঃ পাণ্ডবৈঃ কার্যং হীনার্থবলপৌরুষৈঃ
অত্যর্থং বা প্রনষ্টাস্তে প্রাপ্তা বাপি যমক্ষয়ম্
29.19
যামো রাজন্ননুদ্বিগ্না বিরাটবিষয়ং বয়ম্
আদাস্যামো হি গাস্তস্য বিবিধানি বসূনি চ
29.20
ততো দুর্যোধনো রাজা বাক্যমাদায় তস্য তৎ
বৈকর্তনস্য কর্ণস্য ক্ষিপ্রমাজ্ঞাপয়ত্স্বয়ম্
29.21
শাসনে নিত্যসংয়ুক্তং দুঃশাসনমনন্তরম্
সহ বৃদ্ধৈস্তু সংমন্ত্র্য ক্ষিপ্রং যোজয় বাহিনীম্
29.22
যথোদ্দেশং চ গচ্ছামঃ সহিতাঃ সর্বকৌরবৈঃ
সুশর্মা তু যথোদ্দিষ্টং দেশং যাতু মহারথঃ
29.23
ত্রিগর্তৈঃ সহিতো রাজা সমগ্রবলবাহনঃ
প্রাগেব হি সুসংবীতো মত্স্যস্য বিষয়ং প্রতি
29.24
জঘন্যতো বয়ং তত্র যাস্যামো দিবসান্তরম্
বিষয়ং মত্স্যরাজস্য সুসমৃদ্ধং সুসংহতাঃ
29.25
তে যাত্বা সহসা তত্র বিরাটনগরং প্রতি
ক্ষিপ্রং গোপান্সমাসাদ্য গৃহ্ণন্তু বিপুলং ধনম্
29.26
গবাং শতসহস্রাণি শ্রীমন্তি গুণবন্তি চ
বয়মপি নিগৃহ্ণীমো দ্বিধা কৃত্বা বরূথিনীম্
29.27
স স্ম গত্বা যথোদ্দিষ্টাং দিশং বহ্নের্মহীপতিঃ
আদত্ত গাঃ সুশর্মাথ ঘর্মপক্ষস্য সপ্তমীম্
29.28
অপরং দিবসং সর্বে রাজন্সংভূয় কৌরবাঃ
অষ্টম্যাং তান্যগৃহ্ণন্ত গোকুলানি সহস্রশঃ