Utshovঅধ্যায় 30
30.1
বৈশংপায়ন উবাচ
ততস্তেষাং মহারাজ তত্রৈবামিততেজসাম্
ছদ্মলিঙ্গপ্রবিষ্টানাং পাণ্ডবানাং মহাত্মনাম্
30.2
ব্যতীতঃ সময়ঃ সম্যগ্বসতাং বৈ পুরোত্তমে
কুর্বতাং তস্য কর্মাণি বিরাটস্য মহীপতেঃ
30.3
ততস্ত্রয়োদশস্যান্তে তস্য বর্ষস্য ভারত
সুশর্মণা গৃহীতং তু গোধনং তরসা বহু
30.4
ততো জবেন মহতা গোপাঃ পুরমথাব্রজৎ
অপশ্যন্মত্স্যরাজং চ রথাত্প্রস্কন্দ্য কুণ্ডলী
30.5
শূরৈঃ পরিবৃতং যোধৈঃ কুণ্ডলাঙ্গদধারিভিঃ
সদ্ভিশ্চ মন্ত্রিভিঃ সার্ধং পাণ্ডবৈশ্চ নরর্ষভৈঃ
30.6
তং সভায়াং মহারাজমাসীনং রাষ্ট্রবর্ধনম্
সোঽব্রবীদুপসংগম্য বিরাটং প্রণতস্তদা
30.7
অস্মান্যুধি বিনির্জিত্য পরিভূয় সবান্ধবান্
গবাং শতসহস্রাণি ত্রিগর্তাঃ কালয়ন্তি তে
তান্পরীপ্স মনুষ্যেন্দ্র মা নেশুঃ পশবস্তব
30.8
তচ্ছ্রুত্বা নৃপতিঃ সেনাং মত্স্যানাং সময়োজয়ৎ
রথনাগাশ্বকলিলাং পত্তিধ্বজসমাকুলাম্
30.9
রাজানো রাজপুত্রাশ্চ তনুত্রাণ্যত্র ভেজিরে
ভানুমন্তি বিচিত্রাণি সূপসেব্যানি ভাগশঃ
30.10
সবজ্রায়সগর্ভং তু কবচং তপ্তকাঞ্চনম্
বিরাটস্য প্রিয়ো ভ্রাতা শতানীকোঽভ্যহারয়ৎ
30.11
সর্বপারসবং বর্ম কল্যাণপটলং দৃঢম্
শতানীকাদবরজো মদিরাশ্বোঽভ্যহারয়ৎ
30.12
শতসূর্যং শতাবর্তং শতবিন্দু শতাক্ষিমৎ
অভেদ্যকল্পং মত্স্যানাং রাজা কবচমাহরৎ
30.13
উত্সেধে যস্য পদ্মানি শতং সৌগন্ধিকানি চ
সুবর্ণপৃষ্ঠং সূর্যাভং সূর্যদত্তোঽভ্যহারয়ৎ
30.14
দৃঢমায়সগর্ভং তু শ্বেতং বর্ম শতাক্ষিমৎ
বিরাটস্য সুতো জ্যেষ্ঠো বীরঃ শঙ্খোঽভ্যহারয়ৎ
30.15
শতশশ্চ তনুত্রাণি যথাস্বানি মহারথাঃ
যোত্স্যমানাভ্যনহ্যন্ত দেবরূপাঃ প্রহারিণঃ
30.16
সূপস্করেষু শুভ্রেষু মহত্সু চ মহারথাঃ
পৃথক্কাঞ্চনসংনাহান্রথেষ্বশ্বানয়োজয়ন্
30.17
সূর্যচন্দ্রপ্রতীকাশো রথে দিব্যে হিরণ্ময়ঃ
মহানুভাবো মত্স্যস্য ধ্বজ উচ্ছিশ্রিয়ে তদা
30.18
অথান্যান্বিবিধাকারান্ধ্বজান্হেমবিভূষিতান্
যথাস্বং ক্ষত্রিয়াঃ শূরা রথেষু সময়োজয়ন্
30.19
অথ মত্স্যোঽব্রবীদ্রাজা শতানীকং জঘন্যজম্
কঙ্কবল্লবগোপালা দামগ্রন্থিশ্চ বীর্যবান্
যুধ্যেয়ুরিতি মে বুদ্ধির্বর্ততে নাত্র সংশয়ঃ
30.20
এতেষামপি দীয়ন্তাং রথা ধ্বজপতাকিনঃ
কবচানি বিচিত্রাণি দৃঢানি চ মৃদূনি চ
প্রতিমুঞ্চন্তু গাত্রেষু দীয়ন্তামায়ুধানি চ
30.21
বীরাঙ্গরূপাঃ পুরুষা নাগরাজকরোপমাঃ
নেমে জাতু ন যুধ্যেরন্নিতি মে ধীয়তে মতিঃ
30.22
এতচ্ছ্রুত্বা তু নৃপতের্বাক্যং ত্বরিতমানসঃ
শতানীকস্তু পার্থেভ্যো রথান্রাজন্সমাদিশৎ
সহদেবায় রাজ্ঞে চ ভীমায় নকুলায় চ
30.23
তান্প্রহৃষ্টাস্ততঃ সূতা রাজভক্তিপুরস্কৃতাঃ
নির্দিষ্টান্নরদেবেন রথাঞ্শীঘ্রময়োজয়ন্
30.24
কবচানি বিচিত্রাণি দৃঢানি চ মৃদূনি চ
বিরাটঃ প্রাদিশদ্যানি তেষামক্লিষ্টকর্মণাম্
তান্যামুচ্য শরীরেষু দংশিতাস্তে পরংতপাঃ
30.25
তরস্বিনশ্ছন্নরূপাঃ সর্বে যুদ্ধবিশারদাঃ
বিরাটমন্বয়ুঃ পশ্চাত্সহিতাঃ কুরুপুংগবাঃ
চত্বারো ভ্রাতরঃ শূরাঃ পাণ্ডবাঃ সত্যবিক্রমাঃ
30.26
ভীমাশ্চ মত্তমাতঙ্গাঃ প্রভিন্নকরটামুখাঃ
ক্ষরন্ত ইব জীমূতাঃ সুদন্তাঃ ষষ্টিহায়নাঃ
30.27
স্বারূঢা যুদ্ধকুশলৈঃ শিক্ষিতৈর্হস্তিসাদিভিঃ
রাজানমন্বয়ুঃ পশ্চাচ্চলন্ত ইব পর্বতাঃ
30.28
বিশারদানাং বশ্যানাং হৃষ্টানাং চানুয়ায়িনাম্
অষ্টৌ রথসহস্রাণি দশ নাগশতানি চ
ষষ্টিশ্চাশ্বসহস্রাণি মত্স্যানামভিনির্যয়ুঃ
30.29
তদনীকং বিরাটস্য শুশুভে ভরতর্ষভ
সংপ্রয়াতং মহারাজ নিনীষন্তং গবাং পদম্
30.30
তদ্বলাগ্র্যং বিরাটস্য সংপ্রস্থিতমশোভত
দৃঢায়ুধজনাকীর্ণং গজাশ্বরথসংকুলম্